ຂ່າວຫຼ້າສຸດ

ສົ່ງເສີມ​ຜູ້​ຜະລິດ ແລະ ຜູ້​ບໍລິໂພກ​ສິນຄ້າ​ພາຍ​ໃນ​ໃຫ້​ຫຼາຍ​ຂຶ້ນ

1.287 06 ທ.ວ. 2019 ຂ່າວໜ້າ​ໜຶ່ງ
ສົ່ງເສີມ​ຜູ້​ຜະລິດ ແລະ ຜູ້​ບໍລິໂພກ​ສິນຄ້າ​ພາຍ​ໃນ​ໃຫ້​ຫຼາຍ​ຂຶ້ນ

   ກະຊວງ​ອຸດສາຫະກຳ ແລະ ການ​ຄ້າ ຮ່ວມ​ກັບ ກະຊວງ​ກະສິກຳ ແລະ ປ່າໄມ້ ໄດ້​ເປີດ​ຕະຫຼາດນັດ​ຜົນ​ຜະລິດ​ກະສິກຳ ສິນຄ້າ ODOP (ໂອ​ດ໋ອບ) ຄອບຄົວ​ຕົວ​ແບບ 9 ຕົວ​ເມືອງ​ຂອງ​ຊາວ​ກະສິກອນ ແລະ ຜົນ​ຜະລິດ​ກະສິກຳ​ອິນ​ຊີ ຈາກ​ກຸ່ມ​ຊາວ​ກະສິກອນ ນະຄອນຫຼວງ​ວຽງ​ຈັນ ເພື່ອ​ຄຳນັບ​ຮັບ​ຕ້ອນ​ກອງ​ປະຊຸມ​ສະໄໝ​ສາມັນ​ເທື່ອ​ທີ 8 ຂອງ​ສະພາ​ແຫ່ງ​ຊາດ ຊຸດ​ທີ VIII ແລະ ວັນຊາດ​ທີ 2 ທັນວາ ຄົບຮອບ 44 ປີ ຂຶ້ນ​ໃນ​ອາທິດ​ຜ່ານ​ມາ ທີ່​ເດີ່ນ​ສູນ​ການ​ຄ້າ​ລາວ-ໄອ​ເຕັກ ນະຄອນຫຼວງ​ວຽງ​ຈັນ ມີ​ທ່ານ ອາດ​ສະພັງ​ທອງ   ສີ​ພັນ​ດອນ ຮອງ​ເຈົ້າ​ຄອງ​ນະຄອນຫຼວງ​ວຽງ​ຈັນ ທ່ານ ສົມ​ຈິດ ອິນ​ທະ​ມິດ ຮອງ​ລັດຖະມົນຕີ ກະຊວງ​ອຸດສາຫະກຳ   ແລະ ການ​ຄ້າ ທ່ານ ພວງ​ປາ​ຣິ​ສັກ ປຣະ​ວົງ​ວຽງ​ຄຳ ຮອງ​ລັດຖະມົນຕີ ກະຊວງ​ກະສິກຳ ແລະ ປ່າໄມ້ ບັນດາ​ຄະນະ​ສະເພາະ​ກິດ​ສົ່ງເສີມ​ການ​ຜະລິດ ແລະ ຊົມໃຊ້​ຜະລິດ​ຕະ​ພັນ​ທີ່​ຜະລິດ​ໄດ້​ຢູ່​ພາຍ​ໃນ ແລະ ການ​ຄຸ້ມ​ຄອງ​ການ​ນຳ​ເຂົ້າ​ສິນຄ້າ​ອຸປະໂພກ-ບໍລິໂພກ ແລະ ຊາວ​ຄ້າຂາຍ​ເຂົ້າ​ຮ່ວມ.

    ທ່ານ ອາດ​ສະພັງ​ທອງ ສີ​ພັນ​ດອນ ກ່າວ​ວ່າ: ການ​ຈັດ​ງານ​ຕະຫຼາດນັດ​ຄັ້ງ​ນີ້​ເພື່ອ​ເປັນ​ການຈັດຕັ້ງ​ຜັນ​ຂະຫຍາຍ​ຂໍ້ ຕົກລົງ​ຂອງ​ທ່ານ​ນາຍົກລັດຖະມົນຕີ ເປັນ​ການ​ສ້າງ​ຂະ​ບວນ​ການ​ປູກ​ຈິດ​ສຳນຶກ​ໃຫ້​ປະຊາຊົນ ອົງ​ການຈັດຕັ້ງ​ພາກ​ລັດ ແລະ ເອກະ​ຊົນ ໃຫ້​ຫັນ​ມາ​ຊົມໃຊ້​ສິນຄ້າ​ທີ່​ຄົນ​ລາວ​ຜະລິດ​ຢູ່​ພາຍ​ໃນ​ປະເທດ​ເຮົາ​ຫຼາຍ​ຂຶ້ນ ໂດຍ​ສະເພາະ ເພື່ອ​ສົ່ງເສີມ​ການ​ຜະລິດ​ພາຍ​ໃນ​ໃຫ້​ມີ​ບ່ອນ​ຈຳໜ່າຍ ສ້າງ​ເງື່ອນໄຂ​ອຳນວຍ​ຄວາມ​ສະດວກ​ແກ່​ຜູ້​ຜະລິດ ແລະ ຜູ້​ຊົມໃຊ້ ໄດ້​ມີ​ການ​ພົບ​ປະ​ແລກປ່ຽນ​ບົດຮຽນ​ເຊິ່ງ​ກັນ ແລະ ກັນ ເພື່ອ​ໄດ້​ຮັບ​ຮູ້​ວິທີ​ການ​ຜະລິດ​ທີ່​ສາມາດ​ຜະລິດ​ສະໜອງ​ຢູ່​ພາຍ​ໃນ​ໄດ້ ຈະ​ເປັນ​ການ​ຫຼຸດຜ່ອນ​ການ​ນຳ​ເຂົ້າ​ຈາກ​ຕ່າງປະເທດ ທັງ​ນີ້ ເພື່ອ​ຊຸກຍູ້​ເສດຖະກິດ​ພາຍ​ໃນ​ປະເທດ​ໃຫ້​ມີ​ບັນຍາກາດ​ຟົດຟື້ນ.

    ພາຍ​ໃນ​ງານ​ມີ​ຜະລິດ​ຕະ​ພັນ​ຫຼາຍ​ຢ່າງ​ໃຫ້​ໄດ້​ເລືອກ​ຊື້ ເຊັ່ນ: ພືດ​ຜັກ ເປັນຕົ້ນ ຜັກ​ອີນ​ຊີ ສິນຄ້າ​ໂອ​ດ໋ອບ ສິນຄ້າ​ອຸດສາຫະກຳ​ປຸງ​ແຕ່ງ ແລະ ສິນຄ້າ​ຄອບຄົວ​ຕົວ​ແບບ​ທີ່​ມາ​ຈາກ 9 ເມືອງ​ທົ່ວ​ນະຄອນຫຼວງ​ວຽງ​ຈັນ ເຂົ້າ​ຮ່ວມ​ທັງ​ໝົດ​ຫຼາຍ​ກວ່າ 300 ຫົວໜ່ວຍ ງານ​ຄັ້ງ​ນີ້​ຄາດ​ວ່າ​ຈະ​ເປັນ​ບາດກ້າວ​ໃໝ່​ທີ່​ສຳຄັນ​ຫຼາຍ​ຕໍ່​ຊາວ​ກະສິກອນ​ຜູ້​ຜະລິດ ແລະ ຜູ້​ບໍລິໂພກ​ໄດ້​ຫັນ​ມາ​ຊົມໃຊ້​ສິນຄ້າ​ຂອງ​ຄົນ​ລາວ​ນັບ​ມື້​ນັບ​ຫຼາຍ​ຂຶ້ນ ບໍ່​ວ່າ​ຈະ​ເປັນ​ສິນຄ້າ​ພືດ​ຜັກ​ອີນ​ຊີ ຫຼື ພືດ​ຜັກ​ທີ່​ຜະລິດ​ຕາມ​ທຳ​ມະ​ຊາດ ໂດຍ​ອີງ​ຕາມ​ສະພາບ​ຄວາມ​ຈຳເປັນ​ຂອງ​ແຕ່ລະຄົນ​ໃນ​ການ​ຊົມໃຊ້​ໃນ​ຊີວິດ​ປະຈຳ​ວັນ.

ຂ່າວທີ່ກ່ຽວຂ້ອງ