ຂ່າວຫຼ້າສຸດ

ທົດ​ແທນ​ຄ່າ​ເສຍ​ຫາຍ ຄັ້ງ​ທີ 2 ໂຄງການ​ທາງ​ດ່ວນ ໝາຍ​ເລກ 1

1.473 06 ທ.ວ. 2019 ຂ່າວໜ້າ​ໜຶ່ງ
ທົດ​ແທນ​ຄ່າ​ເສຍ​ຫາຍ ຄັ້ງ​ທີ 2 ໂຄງການ​ທາງ​ດ່ວນ ໝາຍ​ເລກ 1

    ພິທີ​ມອບ-ຮັບ​ຄ່າ​ຊົດ​ເຊີຍ ແລະ ທົດ​ແທນ​ຄ່າ​ເສຍ​ຫາຍ​ຄັ້ງ​ທີ 2 ໃຫ້​ແກ່​ຜູ້​ທີ​ມີ​ສ່ວນ​ຮ່ວມ​ໂຄງການ​ທາງ​ດ່ວນ​ໝາຍ​ເລກ 1 ຂຶ້ນ​ວັນ​ທີ 5 ທັນວາ 2019 ທີ່​ສະໂມສອນ​ເມືອງ​ໄຊ​ທານີ ນະຄອນຫຼວງ​ວຽງ​ຈັນ ເປັນ​ປະທານ​ຂອງ ທ່ານ ພູ​ຂົງ ບັນ​ນາ​ວົງ ຮອງ​ເຈົ້າ​ຄອງ​ນະຄອນຫຼວງ​ວຽງ​ຈັນ ຫົວໜ້າ​ພະ​ແນກ​ແຜນການ ແລະ ການ​ລົງທຶນ​ນະຄອນຫຼວງ​ວຽງ​ຈັນ ມີ ທ່ານ ບຸນ​ທາມ ພຸດ​ທະ​ວົງສາ ຫົວໜ້າ​ພະ​ແນກ​ຊັບພະຍາກອນ​ທຳ​ມະ​ຊາດ ແລະ ສິ່ງແວດລ້ອມ ນວ ທັງ​ເປັນ​ຫົວໜ້າ​ຄະນະ​ຮັບຜິດຊອບ​ຄ່າ​ຊົດ​ເຊີຍ ທ່ານ ບຸນ​ປີງ ປັນຍາ​ຈິດ ຮອງ​ເຈົ້າເມືອງ​ໄຊ​ເສດ​ຖາ ທ່ານ ບຸນ​ວັນ ຈະ​ສົວ​ເກົ້າ ຮອງ​ເຈົ້າເມືອງ​ໄຊ​ທານີ ພ້ອມ​ດ້ວຍ ປະຊາຊົນ​ຜູ້​ທີ່​ໄດ້​ຮັບ​ຄ່າ​ຊົດ​ເຊີຍ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

    ທ່ານ ບຸນ​ທາມ ພຸດ​ທະ​ວົງສາ ກ່າວ​ວ່າ: ໂຄງການ​ກໍ່ສ້າງ​ທາງ​ດ່ວນ​ວຽງ​ຈັນ​ໝາຍ​ເລກ 1 ລວມ​ມີ 2 ເມືອງ​ຄື: ເມືອງ​ໄຊ​ເສດ​ຖາ ຈຳນວນ 14 ບ້ານ ເມືອງ​ໄຊ​ທານີ​ຈຳນວນ 7 ບ້ານ ລວມ​ຂອບ​ເຂດ​ພື້ນ​ທີ່​ພັດທະນາ​ເມືອງ​ໄຊ​ທານີ ເພື່ອ​ຂະຫຍາຍ​ເສັ້ນທາງ​ເຊື່ອມ​ຕໍ່ ລະຫວ່າງ​ທາງ​ດ່ວນ​ວຽງ​ຈັນ​ໝາຍ​ເລກ 1 ຫາ ສະຖານີ​ລົດໄຟ​ລາວ-ຈີນ ເຂດ​ສາ​ທາ ລະນະ​ນຸ​ປະ​ໂພກ​ທີ່​ອຳນວຍ​ຄວາມ​ສະດວກ ເຂດ​ພັດທະນາ​ທີ່​ຈຳເປັນ ແລະ ພື້ນ​ທີ່​ຮັບຮອງ​ກິດຈະກຳ​ຂອງ​ໂຄງການ ແລະ ມີ​ໄລຍະ​ແລວ​ທາງ​ທັງ​ໝົດ 15.933 ກິໂລແມັດ ແຕ່​ບໍລິເວນ​ເຂດ​ສະເພາະ​ບຶງ​ທາດຫຼວງ ຫາ ດົງ​ໝາກຄາຍ ເຊິ່ງ​ມີ 868 ຕອນ​ດິນ ສິ່ງ​ປຸກ​ສ້າງ 160 ຫຼັງ(ເມືອງ​ໄຊ​ເສດ​ຖາ 134 ຫຼັງ ໄຊ​ທານີ 26 ຫຼັງ)  ແລະ ເນື້ອທີ່​ໂຄງການ​ທັງ​ໝົດ 293,16 ເຮັກຕາ ມູນ​ຄ່າ​ຊົດ​ເຊີຍ​ເບື້ອງ​ຕົ້ນ 353 ຕື້​ກວ່າ​ກີບ.

    ໃນ​ໄລຍະ​ຜ່ານ​ມາ​ໄດ້​ສຳເລັດ​ການ​ມອບ​ຄ່າ​ຊົດ​ເຊີຍ(ຄັ້ງ​ທີ 1) ຈຳນວນ 19 ຕອນ ມູນ​ຄ່າ​ຊົດ​ເຊີຍ 4 ຕື້​ກວ່າ​ກີບ ສ່ວນ​ຄັ້ງ​ທີ 2 ທີ່​ໄດ້​ມອບ-ຮັບ​ຄ່າ​ຊົດ​ເຊີຍ​ໃນ​ຄັ້ງ​ນີ້​ປະກອບ​ມີ 92 ຕອນ ລວມ​ເປັນ 344.671 ຕາ​ແມັດ ມູນ​ຄ່າ​ຊົດ​ເຊີຍ ລວມ​ທັງ​ໝົດ 40 ຕື້​ກວ່າ​ກີບ    ເມືອງ​ໄຊ​ເສດ​ຖາ ລວມ​ມີ ບ້ານ ວັງ​ຊາຍ 29 ຕອນ ຮ່ອງ​ສຸພາບ 12 ຕອນ ໂນນ​ຄໍ້​ເໜືອ 5 ຕອນ ໂນນ​ສະຫວ່າງ 2 ຕອນ ສ່ວນ ເມືອງ​ໄຊ​ທານີ ມີ: ບ້ານ​ນາ​ແຄ 17 ຕອນ ແລະ ບ້ານ​ໄຊ 27 ຕອນ.

    ທ່ານ ພູ​ຂົງ ບັນ​ນາ​ວົງ ໄດ້​ເປັນ​ກຽດ​ໂອ້​ລົມ​ໃນ​ພິທີ​ດັ່ງກ່າວ​ວ່າ: ພັກ-ລັດ​ໄດ້​ຕີ​ລາຄາ​ສູງ​ຕໍ່​ຜູ້​ທີ່​ມີ​ສ່ວນ​ຮ່ວມ​ເສຍສະ​ຫຼະ​ຕອນ​ດິນ​ຂອງ​ຕົນ​ປະກອບສ່ວນ​ໃນ​ໂຄງການ​ດັ່ງກ່າວ​ເຊິ່ງ​ເປັນ​ໂຄງການ​ຂະຫຍາຍ​ພື້ນຖານ​ໂຄງ​ລ່າງ​ເພື່ອ​ຮອງ​ຮັບ​ການ​ຂະຫຍາຍຕົວ ແລະ ການ​ພັດທະນາ ດັ່ງນັ້ນ ການ​ຊົດ​ເຊີຍ​ແມ່ນ​ໄດ້​ອີງໃສ່​ຄວາມ​ຍຸຕິ​ທຳ ເຊິ່ງ​ການ​ຊົດ​ເຊີຍ​ແມ່ນ​ຈະ​ໃຫ້ ສຳເລັດ​ໃນ​ທ້າຍ​ເດືອນ​ທັນວາ.

 

ຂ່າວທີ່ກ່ຽວຂ້ອງ