ຂ່າວຫຼ້າສຸດ

ປະ​ເມີນ​ຜົນ​ໄດ້​ຮັບ​ໂຄງການ​ສ້າງ​ຄວາມ​ອາດ​ສາມາດ​ດ້ານ​ສະຖິຕິ

1.356 06 ທ.ວ. 2019 ຂ່າວໜ້າ​ໜຶ່ງ
ປະ​ເມີນ​ຜົນ​ໄດ້​ຮັບ​ໂຄງການ​ສ້າງ​ຄວາມ​ອາດ​ສາມາດ​ດ້ານ​ສະຖິຕິ

    ສູນ​ສະຖິຕິ ກະຊວງ​ແຜນການ ແລະ ການ​ລົງທຶນ ຈັດ​ກອງ​ປະຊຸມ​ສະຫຼຸບ​ຜົນ​ການຈັດຕັ້ງ​ປະຕິບັດ​ໂຄງການ​ສ້າງ​ຄວາມ​ອາດ​ສາມາດ​ດ້ານ​ສະຖິຕິ 2019 ໂດຍ​ການ​ສະໜັບສະໜູນ​ຂອງ​ອົງການ​ສະຖິຕິ​ແຫ່ງ​ຊາດ ສ ເກົາຫຼີ ຂຶ້ນ​ວັນ​ທີ 4 ທັນວາ 2019 ທີ່​ໂຮງແຮມ​ຄຣາວ​ພລາ​ຊາ ເປັນ​ປະທານ​ຂອງ​ທ່ານ ເລື່ອມ ສົນ​ສີວິໄລ ຮອງ​ຫົວໜ້າ​ສູນ​ສະຖິຕິ​ແຫ່ງ​ຊາດ ທ່ານ ຊອງ​ຊຸນ ຊິນ ເອກ​ອັກ​ຄະ​ລັດ​ຖະ​ທູດ ສ ເກົາຫຼີ ປະຈຳ​ລາວ ແລະ ທ່ານ ວົນ ໂບ ຊິມ ຮອງ​ຫົວໜ້າ​ກົມ​ແຜນການ ບໍລິການ​ຂໍ້​ມູນ​ສະຖິຕິ ອົງການ​ສະຖິຕິ​ແຫ່ງ​ຊາດ ສ ເກົາຫຼີ ມີ​ບັນດາ​ຜູ້​ບໍລິຫານ​ໂຄງການ ຊ່ຽວຊານ​ໂຄງການ ຫົວໜ້າ ຮອງ​ຫົວໜ້າ​ກົມ ຫ້ອງການ ພະ​ແນກ ວິຊາ​ການ ຕາງໜ້າ​ອົງ​ການຈັດຕັ້ງ​ສາກົນ​ຈາກ​ບັນດາ​ກະຊວງ ຂະແໜງ ການ ແລະ ພາກສ່ວນ​ກ່ຽວຂ້ອງ ເຂົ້າ​ຮ່ວມ.

     ໂຄງການ​ສ້າງ​ຄວາມ​ອາດ​ສາມາດ​ດ້ານ​ສະຖິຕິ​ປີ 2017-2020  ເປັນ​ໂຄງການ​ຮ່ວມ​ມື ແລະ ຊ່ວຍເຫຼືອ​ທາງ​ດ້ານ​ເຕັກນິກ​ວິຊາ​ການ​ຂອງ​ອົງການ​ສະຖິຕິ​ແຫ່ງ​ຊາດ ສ ເກົາຫຼີ (KOSTAT) ເຊິ່ງ​ຜູ້​ໃຫ້ການ​ສະໜັບສະໜູນ​ງົບປະມານ ແລະ ວິຊາ​ການ​ເຂົ້າ​ໃນ​ການຈັດຕັ້ງ​ກິດຈະກຳ​ເປັນ​ແຕ່​ລະ​ປີ ຄື: ປີ 2017 ມູນ​ຄ່າ 312.000 ໂດ​ລາ​ສະຫະລັດ ຫຼື ປະມານ 2,76 ຕື້​ກີບ ປີ 2018 ມູນ​ຄ່າ 1.350.000 ໂດ​ລາ ຫຼື ປະມານ 11,9 ຕື້​ກີບ ແລະ ປີ 2019 ມູນ​ຄ່າ 640.000 ໂດ​ລາ ຫຼື ປະມານ 5,6 ຕື້​ກີບ ປະກອບ​ມີ​ກິດຈະກຳ​ສະໜອງ​ເຄື່ອງ​ອຸປະກອນ​ເຊີ​ເວີ ແລະ ຊອບ​ແວ​ທີ່​ກ່ຽວຂ້ອງ ພ້ອມ​ທັງ​ຕິດ​ຕັ້ງ​ລະບົບ​ຖານ​ຂໍ້​ມູນ​ສະຖິຕິ ແລະ ການ​ບໍລິການ​ຂໍ້​ມູນ LaoStatisticalInformationService “LAOSIS” ສ້າງ ແລະ ພັດທະນາ​ລະບົບ​ຖານ​ຂໍ້​ມູນ​ສະຖິຕິ ແລະ ການ​ບໍລິການ​ຂໍ້​ມູນ LAOSIS ເຝິກອົບຮົມ​ກ່ຽວ​ກັບ​ການ​ນຳ​ໃຊ້​ຄຸ້ມ​ຄອງ​ບໍລິຫານ​ລະບົບ LAOSIS ໃຫ້​ພະນັກງານ​ວິຊາ​ການ​ສູນ​ສະຖິຕິ​ແຫ່ງ​ຊາດ ກໍ​ຄື ພະນັກງານ​ຮັບຜິດຊອບ​ດ້ານ​ໄອ​ທີ ແລະ ເຜີຍແຜ່​ຂໍ້​ມູນ​ສະຖິຕິ 5 ຄັ້ງ ມີ​ຜູ້​ເຂົ້າ​ຮ່ວມ​ທັງ​ໝົດ 35 ເທື່ອ​ຄົນ ໃນ​ນັ້ນ ຈັດ​ຢູ່​ລາວ 4 ຄັ້ງ ມີ​ຜູ້​ເຂົ້າ​ຮ່ວມ 30 ເທື່ອ​ຄົນ  ແລະ ຈັດ​ຢູ່ ສ ເກົາຫຼີ 1 ຄັ້ງ ມີ​ຜູ້​ເຂົ້າ​ຮ່ວມ 5 ຄົນ ນອກ​ນີ້ ຍັງ​ໄດ້​ຈັດ​ກອງ​ປະຊຸມ​ຄະນະ​ຮັບຜິດຊອບ​ຈັດ​ຕັ້ງ​ປະຕິບັດ ແລະ ຕິດຕາມ​ຄວາມ​ຄືບ​ໜ້າ​ຂອງ​ໂຄງການ​ທັງ 2 ຝ່າຍ​ປະຈຳ​ງວດ ແລະ ປີ 2019 ທັງ​ໝົດ 3 ຄັ້ງ.

    ສຳລັບ​ການຈັດຕັ້ງ​ປະຕິບັດ​ໂຄງການ​ປີ 2019 ໄດ້​ເລີ່ມ​ແຕ່​ເດືອນ​ກໍລະກົດ​ຫາ​ເດືອນ​ທັນວາ ໂດຍ​ອົງການ​ສະຖິຕິ​ແຫ່ງ​ຊາດ ສ ເກົາຫຼີ ໄດ້​ຈັດ​ຈ້າງ​ບໍລິສັດ ນູ​ລິມ​ຊອບ (NURIMSOFT) ເປັນ​ຜູ້​ສົມທົບ​ຮ່ວມ​ມື​ເຮັດ​ວຽກ​ກັບ​ສູນ​ສະຖິຕິ​ແຫ່ງ​ຊາດ ກະຊວງ​ແຜນການ ແລະ ການ​ລົງທຶນ ​ສປປ ລາວ ກັບ​ອົງການ​ສະຖິຕິ​ແຫ່ງ​ຊາດ ສ ເກົາຫຼີ.

    ໃນ​ກອງ​ປະຊຸມ​ສະຫຼຸບ​ຜົນ​ການຈັດຕັ້ງ​ປະຕິບັດ​ໂຄງການ​ປະຈຳ​ປີ 2019 ໄດ້​ມີ​ພິທີ​ເປີດ​ການ​ນຳ​ໃຊ້​ເວັບ​ໄຊ (https://laosis.lsb.gov.la/) ການ​ບໍລິການ​ຂໍ້​ມູນ​ສະຖິຕິ​ທາງ​ການ (LAOSIS) ຢ່າງ​ເປັນ​ທາງ​ການ ເຊິ່ງ​ເປັນ​ເວັບ​ໄຊ​ໜຶ່ງ​ທີ່​ນອນ​ຢູ່​ໃນ​ເວັບ​ໄຊ​ຂອງ​ສູນ​ສະຖິຕິ​ແຫ່ງ​ຊາດ​ທີ່​ໃຫ້​ຄວາມ​ສະດວກ​ໃນ​ການ​ບໍລິການ​ຂໍ້​ມູນ​ສະຖິຕິ​ທາງ​ການ​ຜ່ານ​ປະຕູ​ດຽວ ປະກອບ​ດ້ວຍ​ຂໍ້​ມູນ​ສະຖິຕິ​ບັນດາ​ຂະແໜງການ​ທີ່​ສຳຄັນ​ເຮັດ​ໃຫ້​ຜູ້ນຳ​ໃຊ້​ສາມາດ​ເຂົ້າ​ເຖິງ​ຂໍ້​ມູນ​ໄດ້​ງ່າຍ ແລະ ຄົ້ນ​ຫາ​ຂໍ້​ມູນ​ໄດ້​ຕາມ​ຄວາມ​ຕ້ອງການ ມີ​ບ່ອນ​ອີງ​ແຫຼ່ງ​ທີ່​ມາ​ຂອງ​ຂໍ້​ມູນ ນອກ​ນັ້ນ ຍັງ​ຊ່ວຍ​ໃຫ້​ສູນ​ສະຖິຕິ​ແຫ່ງ​ຊາດ​ສາມາດ​ສັງ​ລວມ ເກັບ​ກຳ​ສະພາບ​ການ​ນຳ​ໃຊ້ ຕົວ​ຊີ້​ບອກ ແລະ ຄວາມ​ຕ້ອງການ​ຂອງ​ຜູ້ນຳ​ໃຊ້​ໂດຍ​ຜ່ານ​ເວັບ​ໄຊ​ນີ້.

ຂ່າວທີ່ກ່ຽວຂ້ອງ