ຂ່າວຫຼ້າສຸດ

ລ່ອງ​ເຮືອ​ໃນ​ຍາມ​ລາຕີ ທີ່​ມາລາ​ກາ

1.732 06 ທ.ວ. 2019 ຫົວຂໍ້ຂ່າວອື່ນໆ
ລ່ອງ​ເຮືອ​ໃນ​ຍາມ​ລາຕີ ທີ່​ມາລາ​ກາ

   ມາລາ​ກາ ທີ່​ຂຽນ​ເປັນ​ພາສາ​ບ້ານ​ເພິ່ນ​ວ່າ Melaka ຫຼື Malacca ເປັນ​ເມືອງເກົ່າ​ແກ່​ທາງ​ດ້ານ​ປະຫວັດສາດ ແລະ ເປັນ​ເມືອງ​ທີ່​ອຸດສາຫະກຳ​ທ່ອງ​ທ່ຽວ​ໄດ້​ຮັບ​ການ​ຂະຫຍາຍຕົວ​ຢ່າງ​ຕໍ່​ເນື່ອງ ເຊິ່ງ​ນັກ​ທ່ອງ​ທ່ຽວ​ທີ່​ເຂົ້າ​ມາ ມາລາ​ກາ ແມ່ນ​ນັກ​ທ່ອງ​ທ່ຽວ​ສິງ​ກາ​ໂປ ທີ່​ມັກ​ເຂົ້າ​ມາ​ໃນວ​​ັນ​ເສົາ ແລະ ອາທິດ ຖ້າ​ເບິ່ງ​ຕາມ​ຕົວ​ເລກ​ສະຖິຕິ​ໃນ​ເວັບ​ໄຊ wikipedia.org ເຫັນ​ໄດ້​ວ່າ: ໂຕ​ເລກ​ນັກ​ທ່ອງ​ທ່ຽວ​ທີ່​ທາງ​ລັດ​ມາລາ​ກາ ບັນທຶກ​ໄວ້​ໃນ​ປີ 2017 ແມ່ນ​ມີ​ເຖິງ 16,7 ລ້ານ​ກວ່າ​ຄົນ.

    ມາລາ​ກາ ເຖິງ​ແມ່ນ​ວ່າ​ເປັນ​ລັດ​ທີ່​ມີ​ເນື້ອທີ່​ພຽງ 1.644 ກີ​ໂລ​ຕາ​ແມັດ ແຕ່​ມາລາ​ກາ ກໍ​ໄດ້​ກາຍເປັນ​ປາຍທາງ​ໃຫ້​ກັບ​ນັກ​ທ່ອງ​ທ່ຽວ​ຈາກ ຈີນ ສິງ​ກາ​ໂປ ຮົງ​ກົງ ອິນ​ໂດ​ເນ​ເຊຍ ແລະ ໃຕ້​ຫວັນ ເຊິ່ງ​ໃນ 6 ເດືອນ​ຕົ້ນ​ປີ 2018 ມີ​ນັກ​ທ່ອງ​ທ່ຽວ​ເຂົ້າ​ມາ​​​ເຖິງ 8,73 ລ້ານ​ຄົນ ທຽບໃສ່​ໄລຍະ​ດຽວ​ກັນ​ຂອງ​ປີ 2017 ມີ​ພຽງ 8,14 ລ້ານ​ຄົນ ລື ພີ່ມ​ຂຶ້ນ​ປະມານ 599.000 ກວ່າ​ຄົນ ໃນ​ນັ້ນ​ແມ່ນ​ນັກ​ທ່ອງ​ທ່ຽວ​ພາຍ​ໃນ​ມາລາ​ກາ​ເອງ 72.000 ຄົນ ເທົ່າ​ກັນ 1,36% ຂະນະ​ທີ່​ນັກ​ທ່ອງ​ທ່ຽວ​ຈາກ​ລັດ​ຕ່າງໆ​ເຊັ່ນ: ເຊ​ລັງ​ກໍ ກົວ​ລາ​ລຳ​ເປີ ຈໍ​ຫໍ ຕີ​ລັງກາ​ນູ ແລະ ເນ​ຈິ​ຣີ ຊຳ​ບີ​ລັງ ສ່ວນ​ນັກ​ທ່ອງ​ທ່ຽວ​ຕ່າງປະເທດ​ທີ່​ເຂົ້າ​ມາ​ມີ​ຢູ່​ປະທານ 520.000 ຄົນ ເທົ່າ​ກັບ 19,03%.

    ນັ້ນ​ເປັນ​ຂໍ້​ມູນ​ບາງ​ສ່ວນ​ເທົ່າ​ນັ້ນ​ທີ່​ຜູ້​ຂຽນ​ໄດ້​ນຳ​ມາ​ສະເໜີ ແຕ່​ຖ້າ​ຫາກ​ໄດ້​ໄປ​ສຳ​ພັດ​ຕົວ​ຈິງ​ແມ່ນ​ມີ​ຫຼາຍ​ທາງ​ເລືອກ​ຈົນ​ຕັດສິນ​ໃຈ​ຍາກ​ເລີຍ​ກໍ​ວ່າ​ໄດ້ ເພາະ​ໃນ​ເມືອງ​ມາລາ​ກາ ມີ​ຫຼາຍໆ​ສະຖານທີ່ ຫຼາຍໆ​ກິດຈະກຳ ທີ່​ໜ້າ​ທ່ຽວ​ຊົມ ແລະ ເຂົ້າ​ຮ່ວມ ໃນ​ນັ້ນ​ແມ່ນ​ການ​ຂີ່​ເຮືອ​ຊົມ​ຕົວ​ເມືອງ ເຊິ່ງ​ຜູ້​ຂຽນ​ໄດ້​ມີ​ໂອກາດ​ໄປ​ສຳ​ພັດ​ກັບ​ບັນດາ​ກາດ​ຕົວ​ຈິງ ເຊິ່ງ​ມີ​ຫຼາຍ​ຄົຍ​ເຄີຍ​ເວົ້າ​ວ່າ ຖ້າ​ບໍ່​ໄດ້​ໄປ​ສຳ​ພັດ​ກັບ​ລາຍ​ການທ່ອງທ່ຽວ​ລາຍການ​ນີ້​ກໍ​ຄົງ​ເວົ້າ​ໄປ​ວ່າ​ບໍ່​ໄດ້​ໄປ​ມາລາ​ກາ.

    ການ​ລ່ອງ​ເຮືອ​ຂອງ​ກຸ່ມ​ນັກ​ທ່ອງ​ທ່ຽວ​ທີ່​ຜູ້​ຂຽນ​ໄດ້​ເຂົ້າ​ຮ່ວມ​ແມ່ນ​ລ່ອງ​ໃນ​ຍາມ​ລາຕີ ຕະຫຼອດ​ໄລຍະ​ທາງ​ຂອງ​ການ​ລ່ອງ​ເຮືອ​ປະມານ 40 ນາທີ ຖື​ໄດ້​ວ່າ​ເປັນ​ພາບ​ທີ່​ໜ້າ​ປະ​ທັບ​ໃຈ​ຫຼາຍ ສອງ​ຝັ່ງ​ຂອງ​ນ້ຳ​ມາລາ​ກາ ທີ່​ເປັນ​ນ້ຳ​ທີ່​ມີ​ປະຫວັດ​ຄວາມ​ເປັນ​ມາ​ອັນ​ດົນ​ນານ ຖືກ​ປະດັບ​ປະດາ​ດ້ວຍ​ໄຟ​ສີ​ຕ່າງໆ​ບວກ​ກັບ​ບັນ​ຍາ ກາດ​ນັກ​ທ່ອງ​ທ່ຽວ ການ​ດຳລົງ​ຊີວິດ​ຂອງ​ປະຊາຊົນ ທີ່ຢູ່​ສອງ​ຝັ່ງ​ນ້ຳ​ເບິ່ງ​ແລ້ວ​ເປັນຕາ​ສະອອນ​ໃຈ ແລະ ສຳ​ພັດ​ໄດ້​ບັນຍາກາດ​ຄວາມ​ເປັນ​ເອກະລັກ​ຂອງ​ອາຄານ​ເຮືອນ​ຊານ ຮ້ານ​ອາຫານ ທີ່​ໄດ້​ຖືກ​ບູລະນະ ແລະ ຮັກສາ​ໄວ້​ຮູບ​ເດີມ​ຂອງ​ສະຖາປັດຕະຍະກຳ​ອັນ​ເກົ່າ​ແກ່ ຈົນ​ກາຍເປັນ​ຈຸດ​ດຶງ​ດູ​ໃຈ​ຂອງ​ນັກ​ທ່ອງ​ທ່ຽວ ທີ​​່​ເຂົ້າ​ມາ ໃນ​ມາລາ​ກາ.

    ສຳລັບ​ລາຍ​ກາຍ​ທ່ອງ​ທ່ຽວ​ລ່ອງ​ເຮືອ​ໃນ​ໃນ​ນ້ຳ​ມາລາ​ລາ​ກາ ແມ່ນ​ເປີດ​ໃຫ້​ບໍລິການ​ທຸ​ວັນ ນັບ​ແຕ່​ເວລາ 9:00-23:00 ໂມງ  ສ່ວນ​ລາຄາ​ຕໍ່​ຫົວ​ຄົນ​ກໍ​ຈະ​ແຕກ​ຕ່າງ​ກັນ​ໄປ ມື້​ປົກກະຕິ ຈັນ-ສຸກ ນັກ​ທ່ອງ​ທ່ຽວ​ພາຍ​ໃນ ຜູ້​ໃຫຍ່​ແມ່ນ 13 ຣິງ​ກິດ (ສະກຸນ​ເງິນ​ມາ​ເລ​ເຊຍ) ເດັກນ້ອຍ​ອາຍຸ​ຕ້ຳ​ກວ່າ 12 ປີ ແມ່ນ 6,50 ຣິງ​ກິດ ສ່ວນ​ນັກ​ທ່ອງ​ທ່ຽວ​ຕ່າງປະເທດ ຜູ້​ໃຫຍ່​ແມ່ນ 18 ຣິງ​ກິດ ເດັກນ້ອຍ​ອາຍຸ​ຕ່ຳ​ກວ່າ 12 ປີ 10 ຣິງ​ກິດ ສຳລັບ​ວັນ​ເສົາ-ອາທິດ ນັກ​ທ່ອງ​ທ່ຽວ​ພາຍ​ໃນ ຜູ້​ໃຫຍ່​ແມ່ນ 18 ຣິງ​ກິດ ເດັກນ້ອຍ​ອາຍຸ​ຕ່ຳ​ກວ່າ 12 ປີ 6,50 ຣິງ​ກິດ ນັກ​​​ທ່ອງ​ທ່ຽວ​ຕ່າງປະເທດ ຜູ້​ໃຫຍ່​ແມ່ນ 23 ຣິງ​ກິດ ແລະ ເດັກນ້ອຍ​ແມ່ນ 10 ຣິງ​ກິດ.

    ການທ່ອງທ່ຽວ​ລາຍການ​ນີ້ ຖື​ວ່າ​ສາມາດ​ດຶງ​ດູດ​ນັກ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງປະເທດ​ໄດ້​ຢ່າງ​ຫຼວງຫຼາຍ ດ້ວບ​ໄລຍະ​ທາງ 9 ກີ​ໂລ​ແມັດ ໃຊ້​ເວລາ 40-45 ນາທີ ກໍ​ສາມາດ​ອີ່ມ​ເຕັບ​ກັບ​ບັນຍາກາດ​ຂອງ​ສອງ​ຝັ່ງ​ນ້ຳ​ມາລາ​ກາ ທີ່​ນັກ​ທ່ອງ​ທ່ຽວ​ຫຼາຍໆ​ທ່ານ​ຕ້ອງ​ສຳ​ພັດ​ດ້ວຍ​ຕົນ​ເອງ. 

ຂ່າວທີ່ກ່ຽວຂ້ອງ