ຂ່າວຫຼ້າສຸດ

ສ້າງ​ຄວາມ​ເຂັ້ມແຂງ​ໃຫ້​ຄູ​ສອນ​ຊັ້ນ​ປະຖົມ

1.075 10 ທ.ວ. 2019 ຂ່າວໜ້າ​ໜຶ່ງ
ສ້າງ​ຄວາມ​ເຂັ້ມແຂງ​ໃຫ້​ຄູ​ສອນ​ຊັ້ນ​ປະຖົມ

     ກອງ​ປະຊຸມ​ພັດທະນາ​ຫຼັກສູດ​ສ້າງ​ຄູ​ປະຖົມ​ສຶກ​ສາ-ການ​ປະ​ເມີນ​ຜົນ ຈັດ​ຂຶ້ນ​ວັນ​ທີ 9-13 ທັນວາ 2019 ຢູ່​ນະຄອນຫຼວງ​ວຽງ​ຈັນ ໂດຍ​ມີ​ທ່ານ ຄຳໃບ ຄຳ​ສີ ຮອງ​ຫົວໜ້າ​ກົມ​ສ້າງ​ຄູ ກະຊວງ​ສຶກ​ສາ​ທິ​ການ ແລະ ກີລາ (​ສສກ) ທ່ານ ບຸນ​ໄຊ ຈັນ​ສີ​ນາ ຮອງ​ຜູ້ອຳນວຍການ​ສະ​ຖາ​ບັນ​ຜູ້​ບໍລິຫານ​ການ​ສຶກ​ສາ ແລະ ຜູ້ອຳນວຍການ​ສູນ​ພັດທະນາ​ຄູ ທ່ານ​ນາງ ຄໍ​ຣີນ ວິ ຜູ້​ບໍລິຫານ​ວຽກ​ງານ​ສຶກ​ສາຄູ ແຜນ​ງານ​ບີ​ຄວາ ພ້ອມ​ດ້ວຍ​ຕາງໜ້າ​ຈາກ​ກົມ​ສ້າງ​ຄູ ສູນ​ພັດທະນາ​ຄູ ແລະ 8 ວິທະຍາໄລ​ຄູ ເຂົ້າ​ຮ່ວມ.

    ທ່ານ ຄຳໃບ ຄຳ​ສີ ກ່າວ​ວ່າ: ຖ້າ​ຄູ​ບໍ່​ມີ​ຄວາມ​ຮູ້​ພື້ນຖານ​ກ່ຽວ​ກັບ​ລາຍ​ວິຊາ​ທີ່​ຕົນ​ສອນ​ຢ່າງ​ເລິກເຊິ່ງ ມີ​ທັກ​ສະການ​ສອນ​ທີ່​ດີ ແລະ ເຕັກນິກ​ການ​ສອນ​ທີ່​ເໝາະ​ສົມ ກໍ​ຈະ​ບໍ່​ສາມາດ​ບັນລຸ​ຜົນ​ການ​ຮຽນ​ຂອງ​ນັກຮຽນ​ຕາມ​ເປົ້າ​ໝາຍ​ໄດ້ ຈາກ​ການ​ວິໄຈ​ທົ່ວ​ໂລກ​ຢຶນ​ຢັນ ແລະ ຊີ້​ໃຫ້​ເຫັນ​ແລ້ວ​ວ່າ ຄຸນ​ນະ​ພາບ​ຂອງ​ຄູ​ສອນ ແມ່ນ​ມີ​ຜົນ​ກະທົບ​ໂດຍ​ກົງ​ຕໍ່​ຜົນສຳເລັດ​ດ້ານ​ການ​ຮຽນ​ຮູ້​ຂອງ​ນັກຮຽນ.

    ການ​ຮຽນ-ການ​ສອນ​ຫຼັກສູດ​ຊັ້ນ​ປະຖົມ​ສຶກ​ສາ​ສະບັບ​ປັບປຸງ​ໃໝ່ ໃນ​ຊັ້ນ​ປະຖົມ​ສຶກ​ສາ​ປີ​ທີ  1 ຢູ່​ທົ່ວ​ປະເທດ ໄດ້​ຈັດ​ຕັ້ງ​ໃນ​ເດືອນ​ກັນຍາ 2019 ເພື່ອ​ປັບປຸງ​ຜົນສຳເລັດ​ດ້ານ​ການ​ຮຽນ​ຂອງ​ເດັກນ້ອຍ​ລາວ ກະຊວງ ​ສສກ ໄດ້​ດຳເນີນ​ການ​ປັບປຸງ​ຄຸນ​ນະ​ພາບ ແລະ ຄວາມ​ສອດຄ່ອງ​ຂອງ​ຫຼັກສູດ​ສ້າງ​ຄູ ໂດຍ​ຜ່ານ​ການ​ເຝິກອົບຮົມ​ຄູ​ຮຸ່ນ​ຕໍ່​ໄປ ນັບ​ແຕ່​ປີ 2017 ກົມ​ສ້າງ​ຄູ ແລະ ສູນ​ພັດທະນາ​ຄູ (​ສພຄ) ໂດຍ​ການ​ສະໜັບສະໜູນ​ຂອງ​ລັດຖະບານ​ອົດ​ສະ​ຕຣາ​ລີ ແລະ ສະຫະພາບ​ເອີ​ຣົບ ໂດຍ​ຜ່ານ​ແຜນ​ງານ​ບີ​ຄວາ ໄດ້​ປັບປຸງ​ຫຼັກສູດ​ສ້າງ​ຄູ ເພື່ອ​ໃຫ້​ສອດຄ່ອງ​ກັບ​ຫຼັກສູດ​ສະບັບ​ປັບປຸງ​ໃໝ່ ໃນ​ເດືອນ​ກັນຍາ 2019 ນັກ​ສຶກ​ສາຄູ ລະບົບ 12+2 ຢູ່​ວິທະຍາໄລ​ຄູ​ທຸກ​ແຫ່ງ ໄດ້​ເລີ່ມ​ຈັດການ​ຮຽນ-ການ​ສອນ​ຫຼັກສູດ​ສ້າງ​ຄູ​ປະຖົມ​ສຶກ​ສາ​ປີ​ທີ 1 ສະບັບ​ປັບປຸງ​ໃໝ່​ເປັນ​ປີ​ທຳ​ອິດ ທີ່​ເນັ້ນ​ຫຼັກການ ການ​ຮຽນ-ການ​ສອນ ທີ່​ເນັ້ນ​ການ​ປະຕິບັດ​ຕົວ​ຈິງ.

    ຫຼັກສູດ​ສ້າງ​ຄູ​ປະຖົມ​ສຶກ​ສາ​ປະກອບ​ມີ 9 ລາຍ​ວິຊາ​ຂອງ​ຫຼັກສູດ​ຊັ້ນ​ປະຖົມ​ສຶກ​ສາ ແລະ 8 ວິຊາ​ທີ່​ກ່ຽວຂ້ອງ​ກັບ​ວິຊາ​ຊີບ​ຄູ ລວມ​ທັງ​ປະສົບ​ການ​ໃນ​ໂຮງຮຽນ ແລະ ການ​ເຝິກ​ຫັດ​ວິຊາ​ຊີບ ລາຍ​ວິຊາ​ທີ່​ໄດ້​ມີ​ການ​ຈັດ​ກຸ່ມ​ຄືນ ເພື່ອ​ໃຫ້​ສອດຄ່ອງ​ກັບ​ຫຼັກສູດ​ຊັ້ນ​ປະຖົມ​ສຶກ​ສາ​ສະບັບ​ປັບປຸງ​ໃໝ່ ເຊັ່ນ: ເຄ​ມີ​ສາດ ຊີວະ​ສາດ ແລະ ຟີ​ຊິກ​ສາດ ໄດ້​ຮວບ​ຮວມ​ເຂົ້າ​ເປັນ​ວິຊາ​ວິທະຍາສາດ ແລະ ສິ່ງແວດລ້ອມ ນອກ​ນີ້ ຍັງ​ມີ​ວິຊາ​ອື່ນ​ທີ່​ໄດ້​ເພີ່ມ​ເຂົ້າ​ໃນ​ຫຼັກສູດ ເຊັ່ນ: ພາບ​ລວມ​ຂອງ​ຫຼັກສູດ​ຊັ້ນ​ປະຖົມ​ສຶກ​ສາ ແລະ ພາສາ​ລາວ ສຳລັບ​ເດັກນ້ອຍ​ຊົນເຜົ່າ ແລະ ວິຊາ​ທີ່​ເນັ້ນ​ໜັກ​ພິເສດ​ແມ່ນ​ການ​ສຶກ​ສາ​ຮຽນ​ຮ່ວມ ປັດຈຸບັນ​ການ​ປ່ຽນແປງ​ຫຼັກ​ແມ່ນ​ລາຍ​ວິຊາ​ໃນ​ໂຮງຮຽນ​ຊັ້ນ​ປະຖົມ ທີ່​ໄດ້​ສອນ​ໃນ​ຮູບ​ແບບ​ບູ​ລະ​ນາ​ການ​ແຕ່​ລະວິ​ຊາ​ປະກອບ​ມີ​ຂໍ້​ມູນ​ກ່ຽວ​ກັບ​ວິຊາ​ນັ້ນໆ ຂໍ້​ມູນ​ກ່ຽວ​ກັບ​ຫຼັກສູດ​ຊັ້ນ​ປະຖົມ​ສຶກ​ສາ​ສະບັບ​ປັບປຸງ​ໃໝ່ ແລະ ເປົ້າ  ໝາຍ​ຫຼັກສູດ​ສຳລັບ​ວິຊາ​ນີ້ ແລະ ຂໍ້​ມູນ​ກ່ຽວ​ກັບ​ວິທີ​ທີ່​ເດັກນ້ອຍ​ຈະ​ຮຽນ​ຮູ້ ຈຸດ​ສຸມ​ທີ່​ເນັ້ນ​ໃສ່​ແມ່ນ​ກ່ຽວ​ກັບ​ເນື້ອ​ໃນ​ຄວາມ​ຮູ້​ກ່ຽວ​ກັບ​ວິຊາ​ຄູ ແລະ ວິທີ​ການ​ສອນ ບໍ່​ພຽງ​ແຕ່​ກ່ຽວ​ກັບ​ສິ່ງ​ທີ່​ຈະ​ສອນ​ເທົ່າ​ນັ້ນ ແຕ່​ຍັງ​ແມ່ນ​ວິທີ​ການ​ສອນ​ນຳ​ອີກ ການ​ປັບປຸງ​ຫຼັກສູດ​ທີ່​ກວມ​ເອົາ​ທັງ​ເນື້ອ​ໃນ​ລາຍ​ວິຊາ​ຮຽນ ແລະ ວິຊາ​ຄູ ແລະ ວິທີ​ການ​ສອນ ວິທີ​ການ​ປະ​ເມີນ​ຜົນ​ການ​ຮຽນ​ຂອງ​ນັກ​ສຶກ​ສາຄູ ຕ້ອງ​ໄດ້​ປັບປຸງ​ເຊັ່ນ​ດຽວ​ກັນ ເປົ້າ​ໝາຍ​ຂອງ​ຫຼັກສູດ​ສະບັບ​ປັບປຸງ​ໃໝ່ ເພື່ອ​ເພີ່ມ​ຜົນສຳເລັດ​ດ້ານ​ການ​ຮຽນ​ຮູ້ ແລະ ເພື່ອ​ກຽມ​ຄວາມ​ພ້ອມ​ໃຫ້​ນັກ​ສຶກ​ສາຄູ ກາຍ​ມາ​ເປັນ​ຄູ​ສອນ​ຊັ້ນ​ປະຖົມ​ສຶກ​ສາ​ທີ່​ເຂັ້ມແຂງ​ໃນ​ອະນາຄົດ. 

ຂ່າວທີ່ກ່ຽວຂ້ອງ