ຂ່າວຫຼ້າສຸດ

ເຊີນ​ຮ່ວມ​ງານ​ວາງສະແດງ​ຜະລິດ​ຕະ​ພັນ​ເຟີ​ນີ​ເຈີ​ໄມ້​ລາວ ຄັ້ງ​ທີ 6

1.171 10 ທ.ວ. 2019 ຂ່າວໜ້າ​ໜຶ່ງ
ເຊີນ​ຮ່ວມ​ງານ​ວາງສະແດງ​ຜະລິດ​ຕະ​ພັນ​ເຟີ​ນີ​ເຈີ​ໄມ້​ລາວ ຄັ້ງ​ທີ 6

    ງານ​ວາງສະແດງ​ຜະລິດ​ຕະ​ພັນ​ສິນຄ້າ​ເຟີ​ນີ​ເຈີ​ໄມ້​ລາວ ຄັ້ງ​ທີ 6 ທີ່​ຈະ​ຈັດ​ຂຶ້ນ​ໃນ​ລະຫວ່າງ​ວັນ​ທີ 11-19 ມັງກອນ 2020 ທີ່​ສູນ​ການ​ຄ້າ​ລາວ-ໄອ​ເຕັກ ນະຄອນຫຼວງ​ວຽງ​ຈັນ ພາຍຫຼັງ​ທີ່​ໄດ້​ມີ​ການ​ຫ້າງ​ຫາ​ກະກຽມ​ມາ​ໄດ້​ຫຼາຍ​ເດືອນ ຮອດ​ເວລາ​ນີ້​ພ້ອມ​ແລ້ວ 90% ໃນ​ດ້ານ​ຕ່າງໆ ທັງ​ນີ້ ຄະນະ​ຈັດ​ງານ​ໄດ້​ເຊີນຊວນ​ບັນດາ​ຫົວໜ່ວຍ​ທຸລະ​ກິດ​ດ້ານ​ເຟີ​ນິ​ເຈີ ທັງ​ພາຍ​ໃນ ແລະ ຕ່າງປະເທດ​ເຂົ້າ​ຈັບຈອງ​ຫ້ອງ​ວາງສະແດງ ຄາດ​ວ່າ​ງານ​ຄັ້ງ​ນີ້​ຈະ​ບໍ່​ໃຫ້​ຫຼຸດ 80 ຫົວໜ່ວຍ​ເຂົ້າ​ຮ່ວມ​ວາງສະແດງ.

    ທ່ານ ບຸນ​ກອງ ຫຼວງ​ໂຄດ ຄະນະ​ສະມາຄົມ​ເຟີ​ນິ​ເຈີ​ລາວ ເຈົ້າ​ຂອງ​ຮ້ານ​ຮຸ່ງ​ຈະເລີນ ຫັດຖະກຳ ເປີດເຜີຍ​ໃຫ້​ຮູ້​ບໍ່​ດົນ​ມາ​ນີ້​ວ່າ: ການ​ຈັດ​ງານ​ວາງສະແດງ​ຜະລິດ​ຕະ​ພັນ​ສິນຄ້າ​ເຟີ​ນີ​ເຈີ​ໄມ້​ລາວ ຄັ້ງ​ທີ 6 ນີ້ ກໍ​ເພື່ອ​ປະຕິບັດ​ຕາມ​ນະໂຍບາຍ​ໃນ​ການ​ສົ່ງເສີມ​ການ​ຜະລິດ​ເຄື່ອງ​ເຟີ​ນີ​ເຈີ​ໄມ້​ລາວ ທັງ​ເປັນ​ການ​ໂຄສະນາ​ເຜີຍແຜ່​ໃຫ້​ສັງຄົມ​ຮັບ​ຮູ້​ຜະລິດ​ຕະ​ພັນ​ເຟີ​ນີ​ເຈີ​ໄມ້​ລາວ​ຫຼາຍ​ຂຶ້ນ ໃຫ້​ຜູ້​ຜະລິດ​ສາມາດ​ເຂົ້າ​ຫາ​ຕະຫຼາດ ແລະ ຈຳໜ່າຍ​ສິນຄ້າ​ໄດ້​ທັງ​ພາຍ​ໃນ ແລະ ຕ່າງປະເທດ ກ້າວ​ເຂົ້າ​ສູ່​ການ​ສ້າງ​ຕາ​ໜ່າງ​ການວາງສະແດງ​ຂາຍ​ສິນຄ້າ​ເຟິ​​ິ​ນິ​ເຈີ  ກັບ​ພາກ​ພື້ນ ແລະ ສາກົນ​ໃນ​ອະນາຄົດ.

     ພ້ອມ​ດຽວ​ກັນ​ນັ້ນ ກໍ​ເພື່ອ​ຜັນ​ຂະຫຍາຍ​ຕາມ​ເນື້ອ​ໃນ​ຂອງ​ແຈ້ງ​ການ​ຄຳ​ສັ່ງ ເລກ​ທີ 15/​ນຍ ໃຫ້​ປາກົດ​ຜົນ​ເປັນ​ຈິງ ເປັນ​ການ​ອະນຸ​ຮັກ-ຮັກສາ​ປ່າໄມ້ ການ​ນຳ​ໃຊ້​ໄມ້​ໃຫ້​ເກີດ​ປະໂຫຍດ​ສູງ​ສຸດ ແລະ ມີ​ໄມ້​ໄວ້​ໃຊ້​ຢ່າງ​ຍືນ​ຍົງ ໂດຍ​ການ​ປຸງ​ແຕ່ງ​ໃຫ້​ເປັນ​ຜະລິດ​ຕະ​ພັນ​ສຳເລັດ​ຮູບ​ຈາກ​ໄມ້ ໃຫ້​ມີ​ຫຼາກ​ຫຼາຍ​ຜະລິດ​ຕະ​ພັນ​ຕາມ​ທີ່​ສັງຄົມ​ປັດຈຸບັນ​ຕ້ອງການ ໂດຍ​ງານ​ຄັ້ງ​ນີ້​ຄາດ​ຄະເນ​ວ່າ​ຈະ​ມີ​ຫົວໜ່ວຍ​ທຸລະ​ກິດ​ດ້ານ​ເຟີ​ນິ​ເຈີ​ທັງ​ພາຍ​ໃນ ແລະ ຕ່າງປະເທດ​ນຳ​ສິນຄ້າ​ເຂົ້າ​ຮ່ວມ​ວາງສະແດງ​ບໍ່​ຫຼຸດ 80 ຫົວໜ່ວຍ​ມີ​ມູນ​ຄ່າ​ສິນຄ້າ​ປະມານ 12 ຕື້​ກວ່າ​ກີບ ແລະ ຄາດ​ວ່າ​ຈະ​ສາມາດ​ດຶງ​ດູດ​ຜູ້​ຄົນ​ໃຫ້​ເຂົ້າ​ມາ​ທ່ຽວ​ຊົມ​ເລືອກ​ຊື້​ສິນຄ້າ​ໄດ້​ປະມານ 1,5 ແສນ​ຄົນ ໂດຍ​ມາ​ຮອດ​ປັດຈຸບັນ​ການ​ກະກຽມ​ຈັດ​ງານ​ໃນ​ດ້ານ​ຕ່າງໆ​ແມ່ນ 90% ແລ້ວ.

    ເພາະ​ນອກຈາກ​ພາຍ​ໃນ​ງານ​ຈະ​ໄດ້​ພົບ​ກັບ​ຄວາມ​ສວຍ​ງາມ​ຂອງ​ສິນຄ້າ​ເຟີ​ນິ​ເຈີ​ຫຼາກ​ຫຼາຍ​ແລ້ວ ຍັງ​ຈະ​ມີ​ກິດຈະກຳ​ອື່ນໆປີ່ນ​ອ້ອມ ທີ່​ຈະ​ສາມາດ​ສ້າງ​ຄວາມ​ມ່ວນຊື່ນ​ໄດ້​ຕະຫຼອດ​ງານ ເປັນຕົ້ນ​ແມ່ນ ການ​ສາທິດ​ການ​ຜະລິດ​ເຄື່ອງ​ເຟີ​ນີ​ເຈີ​ໄມ້ ແລະ ແກະສະຫຼັກ​ໄມ້ ສຳ​ມະ​ນາ​ເຝິກອົບຮົມ ຈົກ​ສະຫຼາກ​ຊີງ​ລາງວັນ (ເຄື່ອງ​ເຟີ​ນິ​ເຈີ) ການ​ແຂ່ງຂັນ​ສິລະ​ປະ​ດົນຕີ ແລະ ອີກ​ຫຼາຍ​ກິດຈະກຳ.

    ສຳລັບ​ຮຸ່ງ​ຈະເລີນ​ຫັດຖະກຳ ແມ່ນ​ໄດ້​ກະກຽມ​ຜະລິດ​ຕະ​ພັນ​ໃໝ່ໆ​ອອກ​ສູ່​ສາຍຕາ​ຂອງ​ສັງຄົມ ກໍ​ຄື​ລູກ​ຄ້າ​ທີ່​ຈະ​ມາ​ຊົມ ແລະ ມາ​ຊື້​ພາຍ​ໃນ​ງານ ເປັນຕົ້ນ​ແມ່ນ ເຟີ​ນິ​ເຈີ​ພາຍ​ໃນ​ເຮືອນ​ເຊັ່ນ: ໂຕະ ຕັ່ງ ຕຽງ​ນອນ ໄມ້​ປັກ​ເກ​ປູ​ພື້ນ ແລະ ໄມ້​ເພດານ ຫຼາຍ​ຮູບ​ແບບ​ແຕກ​ຕ່າງ​ກັນ​ໄປ ທັງ​ນີ້​ຄາດ​ວ່າ ງານ​ຄັ້ງ​ນີ້​ຈະ​ເປັນ​ງານ​ທີ່​ມີ​ສິນຄ້າ ຜະລິດ​ຕະ​ພັນ​ໄມ້​ເຂົ້າ​ຮ່ວມ​ຢ່າງ​ຫຼວງຫຼາຍ​ເປັນ​ພິເສດ​ກວ່າ​ຫຼາຍ​ຄັ້ງ​ທີ່​ຜ່ານ​ມາ ພ້ອມ​ເຊີນຊວນ​ສະມາຊິກ ກໍ​ຄື ທຸກ​ໂຮງງານ​ຜະລິດ​ຕະ​ພັນ​ໄມ້​ເຂົ້າ​ຮ່ວມ​ວາງ ສະແດງ​ນຳ​ກັນ ເພື່ອ​ໃຫ້​ລູກ​ຄ້າ​ທັງ​ພາຍ​ໃນ ແລະ ຕ່າງປະເທດ ເຂົ້າ​ມາ​ທ່ຽວ​ຊົມ​ຢ່າງ​ຄຶກຄື້ນ ແລະ ຫຼວງຫຼາຍ.

ຂ່າວທີ່ກ່ຽວຂ້ອງ