ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 10-12-2019

1.696 11 ທ.ວ. 2019 ຫົວຂໍ້ຂ່າວອື່ນໆ

   ຄໍ​ລຳ​ປະ­ຈຳ​ວັນ​ນີ້ ເລີ່ມ​ຕົ້ນ​ດ້ວຍ​ຂ່າວ​ກ່ຽວ​ກັບ​ນະ­ໂຍ­ບາຍ​ຂອງ​ປະ­ເທດ​ໂປ​ໂລຍ ເພື່ອ​ປ້ອງ​ກັນ​ບໍ່​ໃຫ້​ຊາວ​ໜຸ່ມ​ອອກ​ໄປ​ເຮັດ​ວຽກ​ຢູ່​ຕ່າງ­ປະ­ເທດ ບັນ­ຫາ​ສານຊັບ​ສິນ​ທາງ​ປັນ­ຍາ​ຈີນ ແລະ ມາດ​ຕະ­ການ​ຂອງ​ເນ​ປານ ເພື່ອ​ແກ້​ໄຂ​ບັນ­ຫາ​ຂີ້​ເຫຍື້ອ​ຢູ່​ພູ+ອີ​ເວ​ເຣດ.

   ທີ່ ໂປ​ໂລຍ: (ໂປ​ແລນ) ໃນ​ຊຸມ​ປີ​ຫຼັງໆ​ມາ​ນີ້ ໂປ​ໂລຍ​ປະ​ເຊີນ​ກັບ​ບັນ­ຫາ​ຊາວ​ໜຸ່ມ​ຫຼັ່ງ­ໄຫຼ​ໄປ​ເຮັດ​ວຽກ​ຢູ່​ປະ­ເທດ​ຕ່າງໆ​ໃນ​ສະ­ຫະ­ພາບ​ເອີ​ຣົບ ທີ່​ລາຍ​ໄດ້​ດີກ​ວ່າ­ການ​ອອກ­ແຮງ​ງານ​ຢູ່​ພາຍ​ໃນ​ປະ­ເທດ ເຮັດ​ໃຫ້​ເກີດ​ມີ​ສະ­ພາບ​ສະ­ໝອງ​ໄຫຼ ຄື: ຊາວ​ໜຸ່ມ​ໂປ​ໂລຍ​ທີ່​ມີ​ຄວາມ​ສາ­ມາດ ແລະ ມີ​ທັງ​ສະ ເລືອກ​ອອກ​ໄປ​ເຮັດ​ວຽກ​ຢູ່​ຕ່າງ­ປະ­ເທດ ເພື່ອ​ແກ້​ໄຂ​ບັນ­ຫາ​ດັ່ງ­ກ່າວ ລັດ​ຖະ​ສະ­ພາ​ໂປ​ໂລຍ ຈຶ່ງ​ໄດ້​ອອກ​ກົດ­ໝາຍ​ຍົກ­ເວັ້ນ​ພາ­ສີ​ສະ­ເພາະ​ໃຫ້​ພົນ­ລະ­ເມືອງ​ທີ່​ມີ​ອາ­ຍຸ​ຕ່ຳ​ກວ່າ 26 ປີ ທີ່​ມີ​ລາຍ​ຮັບ​ໜ້ອຍ​ກວ່າ 85 ພັນ​ຊວດ​ຕີ​ຕໍ່​ປີ  (ສະ­ກຸນ​ເງິນ​ຂອງ​ໂປ​ໂລຍ ເຊິ່ງ​ມີ​ມູນ​ຄ່າ​ປະ­ມານ 192 ລ້ານ​ກີບ) ຖ້າ​ເອົາ​ມູນ​ຄ່າ 192 ລ້ານ​ກີບ​ມາ​ຫານ​ໃຫ້ 12 ເດືອນ ກໍ​ຈະ​ໄດ້​ປະ­ມານ 16 ລ້ານ​ກີບ​ຕໍ່​ເດືອນ/ຄົນ ການ​ຍົກ­ເວັ້ນ​ພາ­ສີ​ໃຫ້​ແຮງ​ງານ​ອາ­ຍຸ​ຕ່ຳ​ກວ່າ 26 ປີ​ທີ່​ມີ​ລາຍ​ໄດ້​ໜ້ອຍ​ກວ່າ 85 ພັນ​ຊວດ​ຕີ ນີ້​ຖື​ວ່າ​ເປັນ​ນະ­ໂຍ­ບາຍ​ພິ­ເສດ ເພາະ​ລາຍ​ໄດ້​ສະ­ເລ່ຍ​ຂອງ​ຄົນ​ໂປ​ໂລຍ​ຕໍ່​ປີ ແມ່ນ​ຢູ່​ໃນ​ຕົວ​ເລກ 60 ພັນ​ຊວດ​ຕີ​ຕໍ່​ຄົນ ຫຼື ປະ­ມານ 135 ລ້ານ​ກວ່າ​ກີບ ກົດ­ໝາຍ​ສະ­ບັບ​ນີ້​ເລີ່ມ​ມີ​ຜົນ​ສັກ­ສິດ​ນັບ​ແຕ່​ວັນ​ທີ 1 ກັນ­ຍາ ປີ 2019 ເປັນ­ຕົ້ນ​ມາ ຂ່າວ​ບອກ​ວ່າ​ຊາວ​ໜຸ່ມ​ໂປ​ໂລຍ ປະ­ມານ 2 ລ້ານ​ຄົນ​ໃນ​ກຸ່ມ​ທີ່​ມີ​ອາ­ຍຸ​ຕ່ຳ​ກວ່າ 26 ປີ ຈະ​ໄດ້​ຮັບ​ຜົນ​ປະ­ໂຫຍດ​ຈາກ​ກົດ­ໝາຍ​ນີ້ ໂດຍ​ບໍ່​ຈຳ­ເປັນ​ອອກ​ໄປ​ຊອກ​ວຽກ​ເຮັດ​ງານ​ທຳ​ຢູ່​ຕ່າງ­ປະ­ເທດ.

   ທີ່ ສປ ຈີນ: ຂ່າວ​ຈາກ​ສານ​ປະ­ຊາ­ຊົນ​ສູງ​ສຸດ​ຈີນ ໄດ້​ໃຫ້​ຮູ້​ໃນ​ກາງ​ປີ 2018 ວ່າ: ທາງ​ສານ​ໄດ້​ພິ­ຈາ­ລະ­ນາ​ເພີ່ມ​ຈຳ­ນວນ​ຄະ­ນະ​ສານ ເພື່ອ​ແກ້​ໄຂ​ບັນ­ຫາ​ຂັດ​ແຍ່ງ​ກ່ຽວ​ກັບ​ຊັບ​ສິນ​ທາງ​ປັນ­ຍາ ແນ­ໃສ່​ປ້ອງ​ກັນ​ບັນ­ດາ​ເຄື່ອງ­ໝາຍ​ການ​ຄ້າ​ທີ່​ມີ​ຊື່​ສຽງ ທ່ານ ຕາວ​ກ້າຍ​ຢວນ (Tao Kaiyuan) ຮອງ​ປະ­ທານ​ສານ​ປະ­ຊາ­ຊົນ​ສູງ​ສຸດ​ຈີນ ໃຫ້​ຮູ້​ວ່າ: ຫ້ອງ­ການ​ຄະ­ນະ​ສານ​ຈະ​ໄດ້​ຮັບ​ການ​ສ້າງ­ຕັ້ງ​ຂຶ້ນ​ຢູ່​ຕາມ​ບັນ­ດາ​ເຂດ​ແຄວ້ນ​ທີ່​ມີ​ຄວາມ​ຈຳ­ເປັນ​ຕ້ອງ​ມີ​ວິ­ທີ​ການ​ໃໝ່ໆ​ໃນ​ການ​ປົກ​ປ້ອງ​ຊັບ​ສິນ​ທາງ​ປັນ­ຍາ ກໍ​ຄື ບ່ອນ​ທີ່​ມີ​ຄະ­ດີ​ກ່ຽວ​ກັບ​ຊັບ​ສິນ​ທາງ​ປັນ­ຍາ​ຫຼາຍ ນັບ​ແຕ່​ປີ 2017 ເປັນ­ຕົ້ນ​ມາ ທາງ​ການ ສປ ຈີນ ໄດ້​ຕົກ­ລົງ​ເປີດ​ບໍ­ລິ­ການ​ສຳ­ນັກ­ງານ​ຄະ­ນະ​ສານ​ຊັບ​ສິນ​ທາງ​ປັນ­ຍາ​ໃນ 16 ຕົວ​ເມືອງ​ໃຫຍ່ໆ​ພາຍ​ໃນ​ປະ­ເທດ ຊຶ່ງ​ລວມ​ມີ​ນະ­ຄອນ​ນານ​ຈິງ ຮາງ​ຈູ ວູ​ຫານ ແລະ ຊູ​ຈູ.

   ທີ່ ເນ​ປານ: ມີ​ຂ່າວ​ຈາກ​ເນ​ປານ​ໃນ​ທ້າຍ​ເດືອນ​ສິງ­ຫາ ປີ 2019 ວ່າ: ທາງ​ການ​ຂອງ​ເມືອງ​ຄຸມ​ບູ ປາ​ຊັງ ລາ​ມູ (Khumbu Pasang Lhamu) ໄດ້​ມີ​ແຜນ​ກຳ­ນົດ​ຫ້າມ​ການ​ໃຊ້​ຖົງ​ປລາ​ສ​ຕິກ ກໍ​ຄື ຕຸກ ແລະ ວັດ­ຖຸ​ທີ່​ເຮັດ​ດ້ວຍ​ຢາງ​ໃນ​ເຂດ​ພູ­ເຂົາ​ອີ​ເວ​ເຣັດ (Everest) ໃນ​ຫຼາຍ​ປີ­ຜ່ານ­ມາ​ຢູ່​ຕາມ​ບໍ­ລິ­ເວນ​ພູ­ເຂົາ ອີ​ເວ​ເຣັດ​ນັ້ນ ເຕັມ​ໄປ​ດ້ວຍ​ຂີ້​ເຫຍື້ອ​ປລາ​ສ​ຕິກ ທີ່​ມາ​ພ້ອມໆ​ກັບ​ຈຳ­ນວນ​ນັກ​ທ່ອງ​ທ່ຽວ​ທີ່​ນັບ​ມື້​ຫຼາຍ​ທີ່​ຕ້ອງ­ການ​ປີນ​ພູ­ເຂົາ​ທີ່​ສູງ​ທີ່​ສຸດ​ຂອງ​ໂລກ ຍ້ອນ​ກອງ​ຂີ້​ເຫຍື້ອ​ທີ່​ນັບ​ມື້​ສູງ​ຂຶ້ນ​ນີ້​ເອງ ພູ­ເຂົາ​ແຫ່ງ​ນີ້​ຈຶ່ງ​ໄດ້​ຊື່​ນ້ອຍ​ຫ້ອຍ​ທ້າຍ​ວ່າ​ເປັນ “ຖັງ​ຂີ້​ເຫຍື້ອ​ທີ່​ສູງ​ທີ່​ສຸດ​ໃນ​ໂລກ” ພາຍ​ໃຕ້​ຂໍ້​ຫ້າມ​ນຳ​ໃຊ້​ຖົງ ແລະ ຜະ­ລິດ​ຕະ​ພັນ​ປລາ​ສ​ຕິກ ຊຶ່ງ​ຈະ​ເລີ່ມ​ມີ​ຜົນ​ສັກ­ສິດ​ນັບ​ແຕ່​ວັນ​ທີ 1 ມັງ­ກອນ 2020 ເປັນ­ຕົ້ນ​ໄປ​ນັ້ນ ຄົນ​ທ້ອງ­ຖິ່ນ ກໍ​ຄື ນັກ​ທ່ອງ​ທ່ຽວ​ຈະ​ບໍ່​ມີ​ສິດ​ນຳ​ຖົງ​ປລາ​ສ​ຕິກ ແລະ ຕຸກ​ນ້ຳ​ທີ່​ເຮັດ​ດ້ວຍ​ຢາງ​ເຂົ້າ​ໄປ​ຄຸມ​ບູ ປາ​ຊັງ ລາ​ມູ ຊຶ່ງ​ນອນ​ຢູ່​ເຂດ​ພູ­ເຂົາ ອີ​ເວ​ເຣັດ ເດັດ­ຂາດ ນອກ­ຈາກ​ເຄື່ອງ​ດື່ມ​ປະ­ເພດ​ບັນ­ຈຸ​ໃນ​ກະ​ປ໋ອງ ເພາະ​ກະ​ປ໋ອງ​ນັ້ນ​ມີ​ບ່ອນ​ຣີ​ໄຊ​ເກິນ​ຮອງ​ຮັບ​ແລ້ວ.

ຂ່າວທີ່ກ່ຽວຂ້ອງ