ອາຊຽນມີດ ກັບໂອກາດຂອງທຸລະກິດທ່ອງທ່ຽວ

2.530 12 ທ.ວ. 2019 ຫົວຂໍ້ຂ່າວອື່ນໆ
ອາຊຽນມີດ ກັບໂອກາດຂອງທຸລະກິດທ່ອງທ່ຽວ

   ຄື​ດັ່ງ​ທີ່​ຮູ້​ນຳ​ກັນ​ແລ້ວ​ວ່າ ໃນ​ເດືອນ​ຜ່ານ​ມາ ອົງ​ການ­ທ່ອງ­ທ່ຽວ​ມາ​ເລ​ເຊຍ ຈັດ​ງານ ອາ​ຊຽນ​ມີດ 2019 (ASEANMEET 2019) ຂຶ້ນ​ເພື່ອ​ເສີມ​ສ້າງ​ເຄືອ​ຄ່າຍ​ຜູ້​ປະ­ສານ​ງານ​ດ້ານ​ການ­ທ່ອງ­ທ່ຽວ ຕົວ​ແທນ​ບໍ​ລິ​ສັກ​ທ່ອງ​ທ່ຽວ ແລະ ສື່​ມວນ​ຊົນ ໃນ​ບັນ­ດາ​ປະ­ເທດ​ອາ​ຊຽນ ພ້ອມ​ທັງ​ເປັນ​ການ​ໂຄ­ສະ­ນາ​ສົ່ງ­ເສີມ​ປີ​ທ່ອງ​ທ່ຽວ​ມາ​ເລ​ເຊຍ ປີ 2020 ທີ່​ໄດ້​ວາງ​ຄາດ­ໝາຍ​ໃນ​ການ​ດຶງ​ດູດ​ນັກ​ທ່ອງ​ທ່ຽວ​ຈາກ​ຕ່າງ­ປະ­ເທດ​ເຂົ້າ​ມາ​ໃນ​ມາ​ເລ​ເຊຍ​ໃຫ້​ໄດ້​ເຖິງ 30 ລ້ານ​ຄົນ ແລະ ໄດ້​ວາງ​ໂຕ​ເລກ​ເປົ້າ​ໝາຍ​ໃນ​ການ​ສ້າງ​ລາຍ​ຮັບ​ໃຫ້​ປະ­ເທດ​ໄດ້ 100 ຕື້​ຣິງ​ກິດ(ເງິນ​ມາ​ເລ​ເຊຍ) ຫຼື ປະ­ມານ 211.500 ຕື້​ກີບ ນອກ​ນັ້ນ​ການ​ຈັດ​ງານ​ຄັ້ງ​ນີ້ ແມ່ນ​ໄດ້​ນຳ​ຜູ້​ເຂົ້າ​ຮ່ວມ​ງານ​ໄປ​ສຳ​ພັດ​ບັນ­ຍາ­ກາດ​ຕົວ​ຈິງ​ໃນ​ບັນ­ດາ​ລັດ​ຕ່າງໆ​ໃນ​ມາ​ເລ​ເຊຍ​ເຊັ່ນ: ປີ​ນັງ ເຕ​ລັງ­ກາ​ນູ ຈໍ​ຫໍ ສາ​ຣາ​ວັກ ແລະ ຊາ​ບະ.

   ງານ​ດັ່ງ­ກ່າວ ບໍ­ລິ­ສັດ​ທ່ອງ​ທ່ຽວ​ຈາກ ສປປ ລາວ ໄດ້​ຖືກ​ເຊີນ​ເຂົ້າ​ຮ່ວມ​ທັງ​ໝົດ 4 ບໍ­ລິ­ສັດ ເພື່ອ​ໄປ​ພົບ​ປະ​ແລກ­ປ່ຽນ​ບົດ­ຮຽນ ຊອກ​ຫາ​ຄູ່​ຮ່ວມ​ທຸ­ລະ​ກິດ​ດ້ານ​ການ­ທ່ອງ­ທ່ຽວ ຜ່ານ​ການ​ເຂົ້າ​ຮ່ວມ​ງານ​ຄັ້ງ​ນີ້ ຫຼາຍ​ທ່ານ​ກໍ​ໃຫ້​ຄວາມ​ຄິດ​ເຫັນ​ທີ່​ແຕກ​ຕ່າງ​ກັນ​ໄປ ແຕ່​ສິ່ງ​ແນ່ໆ​ແມ່ນ​ງານ​ຄັ້ງ​ນີ້ ຈະ​ເປັນ​ເງື່ອນ­ໄຂ​ໃນ​ການ​ເຊື່ອມ​ໂຍງ​ທຸ­ລະ​ກິດ​ການ­ທ່ອງ­ທ່ຽວ​ລະ­ຫວ່າງ​ປະ­ເທດ​ໃນ​ພາກ​ພື້ນ​ອາ​ຊຽນ​ໄດ້​ຫຼາຍ​ຂຶ້ນ.

   ທ່ານ ອຸ່ນ​ນາ​ລິນ ພາ​ນາ​ວັນ ຫົວ­ໜ້າ​ຝ່າຍ​ສັນ­ຍາ ການ​ຮ່ວມ​ມື-ການ​ຈັບ­ຈອງ ບໍ­ລິ­ສັດ ມີ­ນາ ທ່ອງ​ທ່ຽວ ໃຫ້​ສຳ­ພາດ​ວ່າ: ໃນ​ນາມ​ທີ່​ເປັນ​ຕາງ­ໜ້າ​ໃຫ້​ກັບ​ບໍ­ລິ­ສັດ​ມີ­ນາ ທ່ອງ​ທ່ຽວ ເຫັນ​ໄດ້​ວ່າ​ງານ​ຄັ້ງ​ນີ້​ແມ່ນ​ມີ​ຄວາມ​ສຳ​ຫຼາຍ ເພາະ​ມີ​ທຸ­ລະ​ກິດ​ທ່ອງ​ທ່ຽວ​ໃນ​ບັນ­ດາ​ປະ­ເທດ​ອາ​ຊຽນ​ເຂົ້າ​ຮ່ວມ​ງານ ເຊິ່ງ​ເປັນ​ການ​ສ້າງ​ເງື່ອນ­ໄຂ ແລະ ເປັນ​ໂອ­ກາດ​ອັນ​ດີ​ໃນ​ການ​ພົວ­ພັນ​ທາງ​ດ້ານ​ທຸ­ລະ​ກິດ ໂດຍ​ສະ­ເພາະ​ແມ່ນ​ການ​ແລກ­ປ່ຽນ​ນັກ​ທ່ອງ​ທ່ຽວ​ເຊັ່ນ ການ​ນຳ​ນັກ​ທ່ອງ​ທ່ຽວ​ລາວ​ໄປ​ທ່ຽວ​ຢູ່​ປະ­ເທດ​ມາ​ເລ​ເຊຍ ນຳ​ນັກ​ທ່ອງ​ທ່ຽວ​ຈາກ​ປະ­ເທດ​ມາ​ເລ​ເຊຍ​ມາ​ທ່ຽວ​ລາວ ໄປ​ທ່ຽວ​ກຳ­ປູ­ເຈຍ ແລະ ອື່ນໆ ນອກ­ຈາກ​ນີ້​ຍັງ​ເຮັດ​ໃຫ້​ພວກ​ເຮົາ​ມີ​ໂອ­ກາດ​ໃນ​ການ​ແລກ ປ່ຽນ​ຄວາມ​ຮູ້ ທັກ​ສະ​ດ້ານ​ການ­ທ່ອງ­ທ່ຽວ ເຊິ່ງ​ຈະ​ເປັນ​ບົດ­ຮຽນ​ອັນ​ສຳ­ຄັນ​ໃນ​ການ​ພັດ­ທະ­ນາ​ຂະ­ແໜງ ການ­ທ່ອງ­ທ່ຽວ​ເຊັ່ນ​ການ​ບໍ­ລິ­ການ ພັດ­ທະ­ນາ​ສະ­ຖານ­ທີ່​ທ່ອງ​ທ່ຽວ ແລະ ອື່ນໆ​ໃນ​ປະ­ເທດ​ລາວ​ເຮົາ​ໃຫ້​ດີ​ຂຶ້ນ ເພື່ອ​ສ້າງ​ຄວາມ​ປະ​ທັບ​ໃຈ​ໃຫ້​ກັບ​ນັກ​ທ່ອງ​ທ່ຽວ​ທີ່​ເດີນ­ທາງ​ເຂົ້າ​ມາ​ຢ້ຽມ­ຢາມ ສປປ ລາວ.

   ງານ​ຄັ້ງ​ນີ້ ທາງ​ເຈົ້າ­ພາບ​ແມ່ນ​ໄດ້​ລົງ­ທຶນ​ຫຼາຍ​ສົມ­ຄວນ ໃນ​ການ​ເຊື້ອ​ເຊີນ​ເອົາ​ທຸ­ລະ​ກິດ​ທ່ອງ​ທ່ຽວ​ຈາກ​ບັນ­ດາ​ປະ­ເທດ​ຕ່າງໆ​ເຂົ້າ​ຮ່ວມ ແຕ່​ມັນ​ຈະ​ສ້າງ​ຜົນ​ດີ​ໃຫ້​ກັບ​ປະ­ເທດ​ມາ​ເລ​ເຊຍ​ເອງ ນັ້ນ​ກໍ​ຄື​ສາ­ມາດ​ດຶງ​ດູດ​ນັກ​ທ່ອງ​ທ່ຽວ​ເຂົ້າ​ມາ​ປະ­ເທດ​ໃຫ້​ນັບ​ມື້​ຫຼາຍ​ຂຶ້ນ ແລະ ບໍ່​ພຽງ​ແຕ່​ປະ­ເທດ​ເຈົ້າ ພາບ​ເທົ່າ​ນັ້ນ ແຕ່​ເຫັນ​ໄດ້​ວ່າ​ທຸກໆ​ປະ­ເທດ​ຈະ​ໄດ້​ຮັບ​ສິດ­ທິ​ຜົນ​ປະ­ໂຫຍດ​ດ້ານ​ການ​ແລກ­ປ່ຽນ​ການ­ທ່ອງ­ທ່ຽວ​ເຊັ່ນ​ກັນ.

   ທ່ານ ກິ​ພອນ ວົງ​ສະ​ຫວັດ ຜູ້​ບໍ­ລິ­ຫານ​ບໍ­ລິ­ສັດ ທ່ອງ​ທ່ຽວ ເວີນ​ວາຍ ເວັນ​ເຈີ ເຊີ​ວິດ​ສ ໃຫ້​ສຳ­ພາດ​ວ່າ: ງານ​ຄັ້ງ​ນີ້​ແມ່ນ​ມີ​ຜົນ​ດີ​ຫຼາຍ​ໃນ​ການ​ດຳ­ເນີນ​ທຸ­ລະ​ກິດ​ທ່ອງ​ທ່ຽວ​ຂອງ​ບໍ­ລິ­ສັດ​ພວກ​ຂ້າ​ພະ​ເຂົ້າ ໂດຍ​ສະ­ເພາະ​ແມ່ນ​ການ​ຂະ­ຫຍາຍ​ຕະ­ຫຼາດ ເປີດ​ເສັ້ນ­ທາງ​ການ­ທ່ອງ­ທ່ຽວ​ໄປ​ຍັງ​ປະ­ເທດ​ມາ​ເລ​ເຊຍ ແລະ ອີກ​ຫຼາຍໆ​ປະ­ເທດ​ໃນ​ອາ​ຊຽນ ນອກ​ນັ້ນ​ອີກ​ສິ່ງ​ໜຶ່ງ​ທີ່​ຮູ້­ສຶກ​ເປັນ​ກຽດ​ໃນ​ການ​ເຂົ້າ​ຮ່ວມ​ໃນ​ງານ ແມ່ນ​ການ​ໄດ້​ພົບ​ປະ​ແລກ­ປ່ຽນ​ປະ­ສົບ​ການ​ກັບ​ບັນ­ດາ​ບໍ­ລິ­ສັດ​ທ່ອງ​ທ່ຽວ​ທີ່​ມີ​ປະ­ສົບ​ການ ເຊິ່ງ​ປະ​ເປັນ​ຈຸ​ເລີ່ມ​ຕົ້ນ​ໃນ​ການ​ຮ່ວມ​ມື​ເພື່ອ​ພັດ­ທະ­ນາ​ທຸ­ລະ​ກິດ​ໃຫ້​ມີ​ຄວາມ​ເຂັ້ມ­ແຂງ ແລະ ນັບ​ມື້​ເຕີບ​ໃຫຍ່​ເປັນ​ກ່າວໆ.

   ທ່ານ ຄຳ​ວິ­ສິດ ສີ​ລາ​ເພັດ ພົວ­ພັນ​ຕ່າງ­ປະ­ເທດ ຫົວ­ໜ້າ​ພະ​ແນກ​ປີ້​ຍົນ ບໍ­ລິ­ສັດ ເນັກ ທ່ອງ​ທ່ຽວ ຈຳ­ກັດ ໃຫ້​ສຳ­ພາດ​ວ່າ: ເຖິງ​ແມ່ນ​ວ່າ​ບໍ­ລິ­ສັດ​ພວກ​ເຮົາ​ຈະ​ເຮັດ​ແຕ່ Outbound ກໍ​ຄື​ການ​ຈັດ​ລາຍ­ການ ທົວ​ສຳ­ລັບ​ຄົນ​ລາວ​ປະ​ຕ່າງ­ປະ­ເທດ ແຕ່​ກໍ​ເຫັນ​ໄດ້​ວ່າ​ງານ​ຄັ້ງ​ນີ້​ແມ່ນ​ມີ​ຄວາມ​ສຳ­ຄັນ​ຫຼາຍ​ໃຫ້​ກັບ​ທຸ­ລະ​ກິດ​ການ­ທ່ອງ­ທ່ຽວ​ໃນ​ພາກ​ພື້ນ ເພາະ​ຈະ​ເປັນ​ການ​ແລກ­ປ່ຽນ ສົ່ງ­ເສີມ​ການ​ຮ່ວມ​ມື​ທຸ­ລະ​ກິດ​ດ້ານ​ນີ້​ໃນ​ພາກ​ພື້ນ​ໃຫ້​ເຕີບ​ໃຫຍ່​ເຂັ້ມ­ແຂງ ໂດຍ​ສະ­ເພາະ​ທຸ­ລະ​ກິດ​ທ່ອງ​ທ່ຽວ​ລາວ​ເຮົາ ທີ່​ຕ້ອງ​ໄດ້​ເກັບ​ກ່ຽບ​ປະ­ສົບ​ການ​ເພື່ອ​ນຳ­ໄປ​ປັບ­ປຸງ​ທຸ­ລະ​ກິດ​ການ­ທ່ອງ­ທ່ຽວ​ໃນ​ປະ­ເທດ ​ໃຫ້​ມີ​ການ​ຂະ­ຫຍາຍ­ຕົວ​ຢ່າງ​ຕໍ່​ເນື່ອງ.

   ທ່ານ ນາງ ພອນ​ສະ­ຫວັນ ອຸ່ນ​ເຮືອນ ຕາງ­ໜ້າ ບໍ­ລິ­ສັດ ອາ­ນາ​ລິນ ທ່ອງ​ທ່ຽວ ໃຫ້​ສຳ­ພາດ​ວ່າ: ການ​ເຂົ້າ​ຮ່ວມ​ງານ​ຄັ້ງ​ນີ້ ຂ້າ­ພະ­ເຈົ້າ​ສາ­ມາດ​ຮຽນ​ຮູ້​ໄດ້​ຫຼາຍໆ​ຢ່າງ ເຊັ່ນ ການ​ພົວ­ພັນ​ຮ່ວມ​ມື​ກັນ​ລະ­ຫວ່າງ​ທຸ­ລະ​ກິດ​ທ່ອງ​ທ່ຽວ​ແຕ່​ລະ​ປະ ເທດ ການ​ນຳ​ສະ­ເໜີ​ສະ­ຖານ­ທີ່​ບໍ­ລິ­ການ​ໂຮງ​ແຮມ​ມ ຮ້ານ​ອາ­ຫານ ແລະ ອື່ນໆ ພິ­ເສດ​ແມ່ນ​ໄດ້​ສຳ​ພັດ​ກັບ​ສະ­ຖານ­ທີ່​ທ່ອງ​ທ່ຽວ​ຫຼາຍໆ​ແຫ່ງ ເຊິ່ງ​ແຕ່​ລະ​ແຫ່ງ​ເຂົາ ເຈົ້າ​ໄດ້​ເອົາ­ໃຈ­ໃສ່​ໃນ​ການ​ອະ­ນຸ­ລັກ​ຮັກ­ສາ​ເອ­ກະ­ລັກ ແລະ ຮີດ­ຄອງ​ປະ­ເພ­ນີ​ໄວ້​ໄດ້​ເປັນ​ຢ່າງ​ດີ ເຊິ່ງ​ປະ­ສົບ​ການ​ທີ່​ຂ້າ​ພະ ເຈົ້າ​ເກັບ​ກ່ຽວ​ຄັ້ງ​ນີ້ ຄິດ​ວ່າ​ຈະ​ເປັນ​ສ່ວນ​ໜຶ່ງ​ໃນ​ການ​ປະ­ກອບ­ສ່ວນ​ເຂົ້າ​ໃນ​ການ​ພັດ­ທະ­ນາ​ສະ­ຖານ­ທີ່​ບໍ­ລິ­ການ ສະ­ຖານ­ທີ່​ທ່ອງ​ທ່ຽວ​ໃນ​ປະ­ເທດ​ລາວ​ເຮົາ​ໄດ້​ດີ​ສົມ­ຄວນ.

   ທັງ​ໝົດ​ນີ້​ເປັນ­ຄວາມ​ຄິດ​ເຫັຍ​ຂອງ​ບັນ­ດາ​ຕົວ​ແທນ​ບໍ­ລິ­ສັດ​ທ່ອງ​ທ່ຽວ​ກ່ຽວ​ກັບ​ການ​ຈັດ​ງານ​ອາ​ຊຽນ​ມີດ ແລະ ຍັງ​ເຊື່ອ​ອີກ​ແນ່​ວ່າ ໄລ­ຍະ​ຜ່ານ​ມາ ກໍ​ຄື ປັດ­ຈຸ­ບັນ​ມີ​ຫຼາຍ​ບໍ­ລິ­ສັດ ທີ່​ໄດ້​ເຂົ້າ​ຮ່ວມ​ງານ​ໃນ​ຮູບ​ແບບ​ນີ້ ເຊິ່ງ​ເປັນ​ການ​ສ້າງ​ໂອ­ກາດ​ເຮັດ​ໃຫ້​ທຸ­ລະ​ກິດ​ນັບ​ມື້​ເຕີບ​ໃຫຍ່​ຂຶ້ນ​ເລື້ອຍໆ.

ຂ່າວທີ່ກ່ຽວຂ້ອງ