ກວດພົບຫຼາຍບັນຫາ ໃນການປະຕິບັດວຽກງານເສດຖະກິດ-ແຜນການ

1.000 13 ທ.ວ. 2019 ຂ່າວໜ້າ​ໜຶ່ງ

   ກອງ​ປະ­ຊຸມ​ຄົບ​ຄະ­ນະ​ຂອງ​ກຳ­ມາ​ທິ​ການ​ເສດ­ຖະ­ກິດ ແຜນ­ການ ແລະ ການ​ເງິນ ເທື່ອ​ທີ VII ຂອງ​ສະ­ພາ​ປະ­ຊາ­ຊົນ ນະ­ຄອນ­ຫຼວງ​ວຽງ​ຈັນ (ສປ ນວ) ຊຸດ​ທີ I ຈັດ​ຂຶ້ນ​ວັນ​ທີ 10 ທັນ­ວາ 2019 ຢູ່​ຫ້ອງ​ວ່າ­ການ​ປົກ­ຄອງ ນວ ໂດຍ​ເປັນ​ປະ­ທານ​ຂອງ​ທ່ານ ຈັນ­ທອນ ລັດ​ຖະ​ຈັກ ປະ­ທານ​ຄະ­ນະ​ກຳ­ມະ­ການ​ເສດ­ຖະ­ກິດ ແຜນ­ການ ແລະ ການ​ເງິນ ສປ ນວ ມີ​ທ່ານ ອາ­ນຸ­ພາບ ຕຸ​ນາ​ລົມ ປະ­ທານ ສປ ນວ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

   ກອງ​ປະ­ຊຸມ​ຄັ້ງ​ນີ້ ໄດ້​ຮັບ​ຟັງ​ການ​ລາຍ​ງານ​ການ­ເຄື່ອນ­ໄຫວ​ວຽກ​ງານ ປະ­ຈຳ​ປີ 2019 ແລະ ທິດ​ທາງ​ແຜນ­ການ​ປີ 2020 ຂອງ​ຄະ­ນະ​ກຳ­ມະ­ການ​ດັ່ງ­ກ່າວ ແລະ ການ​ຕິດ­ຕາມ​ກວດ­ກາ ຊຸກ­ຍູ້​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແລະ ແຜນ​ງົບ­ປະ­ມານ​ແຫ່ງ​ລັດ 10 ເດືອນ ແລະ ການ​ຄາດ​ຄະ­ເນ​ໝົດ​ປີ 2019 ຢູ່​ພະ​ແນກ ການ ຫົວ­ໜ່ວຍ​ທຸ­ລະ​ກິດ​ອ້ອມ​ຂ້າງ ນວ ເຊິ່ງ​ຜ່ານ​ການ​ຕິດ­ຕາມ​ກວດ­ກາ​ຂອງ​ຄະ­ນະ​ກຳ­ມະ­ການ​ໄລ­ຍະ​ຜ່ານ​ມາ ພົບ​ເຫັນ​ຫຼາຍ​ບັນ­ຫາ​ທີ່​ເປັນ​ການ​ກົດ​ໜ່ວງ​ໃຫ້​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແຜນ​ງົບ­ປະ­ມານ ທີ່​ຕ້ອງ​ໃຫ້​ພາກ­ສ່ວນ​ກ່ຽວ­ຂ້ອງ​ເລັ່ງ​ສືບ­ຕໍ່​ແກ້​ໄຂ ເປັນ­ຕົ້ນ ບັນ­ຫາ​ການ​ເກັບ​ລາຍ​ຮັບ​ຈາກ​ຂະ­ແໜງ​ພາ­ສີ ຖ້າ​ທຽບ­ໃສ່​ຕົວ​ເລກ​ສູ້​ຊົນ​ທີ່​ກະ­ຊວງ​ການ​ເງິນ​ມອບ​ໃຫ້​ຈັດ​ຕັ້ງ​ປະ­ຕິ­ບັດ ຍັງ​ພົບ​ຄວາມ​ຫຍຸ້ງ­ຍາກ ລາຍ​ຮັບ​ຫຼັກ​ໄດ້​ມາ​ຈາກ​ການ​ນຳ​ເຂົ້າ​ນ້ຳ­ມັນ ຈຳ­ນວນ​ລົດ​ນຳ​ເຂົ້າ​ກໍ​ມີ​ການ​ຫຼຸດ​ລົງ ຍ້ອນ​ໂຄງ­ການ​ຕ່າງໆ​ບໍ່​ເຄື່ອນ​ໄຫວ​ເປັນ​ປົກ­ກະ­ຕິ ແລະ ບາງ​ໂຄງ­ການ​ໃຫຍ່​ມີ​ການ​ຍົກ­ເລີກ​ພາ­ສີ​ນຳ​ເຂົ້າ​ນ້ຳ­ມັນ ເຊັ່ນ: ໂຄງ­ການ​ກໍ່­ສ້າງ​ທາງ​ລົດ­ໄຟ ລາວ-ຈີນ.

   ການ​ເກັບ​ລາຍ​ຮັບ​ຫັນ​ເປັນ​ທັນ​ສະ­ໄໝ ຍັງ​ມີ​ບາງ​ຫົວ­ໜ່ວຍ​ທຸ­ລະ​ກິດ​ແຈ້ງ​ຂໍ້​ມູນ​ລາຍ​ຮັບ​ຂອງ​ຕົນ​ບໍ່​ຊັດ​ເຈນ ເຄື່ອງ­ມື ລະ­ບົບ​ການ​ເກັບ​ລາຍ​ຮັບ​ທີ່​ນຳ​ໃຊ້​ປັດ­ຈຸ­ບັນ​ຍັງ​ບໍ່​ມີ​ປະ​ສິດ­ທິ​ຜົນ​ສູງ​ເທົ່າ​ທີ່​ຄວນ ເຮັດ​ໃຫ້​ບໍ່​ສາ­ມາດ​ເກັບ​ກຳ​ລາຍ​ຮັບ​ຕົວ​ຈິງ​ຂອງ​ຫົວ­ໜ່ວຍ​ທຸ­ລະ​ກິດ​ໄດ້ ແລະ ເຮັດ​ໃຫ້​ເກີດ​ມີ​ຊ່ອງ​ຫວ່າງ​ການ­ເຄື່ອນ­ໄຫວ​ທຸ­ລະ​ກິດ​ຂອງ​ຫົວ­ໜ່ວຍ​ທຸ­ລະ​ກິດ​ຂະ­ໜາດ​ໃຫຍ່​ຫຼຸດ​ລົງ ເຊິ່ງ​ລາຍ​ຮັບ​ສ່ວນ​ຫຼາຍ​ແມ່ນ​ເກັບ​ຈາກ​ອາ­ກອນ​ມູນ​ຄ່າ​ເພີ່ມ​ກວມ 50% ຂອງ​ລາຍ​ຮັບ​ລວມ ການ​ນຳ​ເຂົ້າ​ພືດ-ຜັກ ແລະ ໝາກ​ໄມ້ ບໍ່​ທັນ​ໄດ້​ຮັບ​ການ​ຕິດ­ຕາມ​ກວດ­ກາ​ຢ່າງ​ເປັນ​ປົກ­ກະ­ຕິ ເຮັດ​ໃຫ້​ມາດ­ຕະ­ຖານ​ຄຸນ​ນະ​ພາບ​ຂອງ​ສິນ­ຄ້າ​ບໍ່​ມີ​ປະ​ສິດ­ທິ​ຜົນ ແລະ ບໍ່​ທັນ​ມີ​ບັນ­ຊີ​ພືດ​ຄວບ​ຄຸມ​ຢ່າງ​ຈະ­ແຈ້ງ ແລະ ອື່ນໆ.

   ກອງ​ປະ­ຊຸມ​ຄັ້ງ​ນີ້ ຍັງ​ໄດ້​ປະ­ກອບ​ຄຳ​ຄິດ​ເຫັນ​ໃສ່​ການ​ປະ­ຕິ­ບັດ​ແຜນ­ການ​ດັ່ງ­ກ່າວ ໂດຍ​ສະ­ເພາະ​ຂອດ​ການ​ປະ­ສານ​ງານ ລະ­ຫວ່າງ​ຄະ­ນະ​ກຳ­ມະ­ການ​ເສດ­ຖະ­ກິດ ແຜນ­ການ ແລະ ການ​ເງິນ ກັບ​ພະ­ແນກ­ການ ແລະ ເມືອງ ຮັບ​ຟັງ​ການ​ລາຍ​ງານ​ການ​ແກ້​ໄຂ​ຄຳ​ຮ້ອງ​ຂໍ​ຄວາມ​ເປັນ​ທຳ​ຂອງ​ພະ­ນັກ­ງານ-ກຳ­ມະ­ກອນ 46 ຄົນ ທີ່​ບໍ່​ໄດ້​ຮັບ​ເງິນ­ເດືອນ ແລະ ຄ່າ​ແຮງ​ງານ​ໃນ​ໂຄງ­ການ​ສ້ອມ­ແປງ​ທາງ ນວ ຄືບ​ໜ້າ​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ​ລົດ­ໄຟ ລາວ-ຈີນ ໂຄງ­ການ​ທາງ​ດ່ວນ​ໄລ­ຍະ 1 (ນວ-ວັງ​ວຽງ) ໂຄງ­ການ​ສ້ອມ­ແປງ​ທາງ​ຫຼວງ​ແຫ່ງ​ຊາດ​ເລກ​ທີ 13 ເໜືອ ຄວາມ​ຄືບ​ໜ້າ​ຜົນ​ການ​ແກ້​ໄຂ​ຄຳ​ຮ້ອງ​ຂໍ​ຄວາມ​ເປັນ​ທຳ​ຂອງ​ປະ­ຊາ­ຊົນ ທີ່​ຖືກ​ຜົນ​ກະ­ທົບ​ຈາກ​ສະ­ໜາມ​ກ໊ອບ​ລ່ອງ​ແທັງ ແລະ ສາງ​ເກັບ​ມ້ຽນ​ສິນ­ຄ້າ​ໂຄງ­ການ​ລົດ­ໄຟ ລາວ-ໄທ ເພື່ອ​ຮ່ວມ​ກັນ​ປືກ​ສາ​ຫາ­ລື ແລະ ສະ­ເໜີ​ຂັ້ນ​ເທິງ​ພິ­ຈາ­ລະ­ນາ​ແກ້​ໄຂ​ໃຫ້​ຖືກ­ຕ້ອງ.

ຂ່າວທີ່ກ່ຽວຂ້ອງ