ຫາລື ການຄຸ້ມຄອງທຸລະກິດຮ້ານນວດ-ສະປາ ຢູ່ນະຄອນຫຼວງ

1.178 13 ທ.ວ. 2019 ຂ່າວໜ້າ​ໜຶ່ງ
ຫາລື ການຄຸ້ມຄອງທຸລະກິດຮ້ານນວດ-ສະປາ ຢູ່ນະຄອນຫຼວງ

   ເພື່ອ​ແນ­ໃສ່​ຊຸກ­ຍູ້​ການ­ເຄື່ອນ­ໄຫວ​ດຳ­ເນີນ​ທຸ­ລະ​ກິດ ຂົງ­ເຂດ​ວຽກ​ງານ​ທ່ອງ​ທ່ຽວ​ໃນ ນວ ທັງ​ເປັນ​ການ​ຮັບ­ປະ­ກັນ​ໃນ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ຈຸດ​ສຸມ ໃຫ້​ໄດ້​ຕາມ​ລະ­ດັບ​ຄາດ­ໝາຍ ເພື່ອ​ຫາ­ລື​ກ່ຽວ​ກັບ​ການ​ຄຸ້ມ​ຄອງ ແລະ ດຳ­ເນີນ​ທຸ­ລະ​ກິດ​ອົບ​ນວດ ນວດ​ແຜນ​ບູ­ຮານ ແລະ ນວດ​ເພື່ອ​ສຸ­ຂະ­ພາບ ທີ່​ຕິດ​ພັນ​ກັບ​ຂະ­ແໜງ­ການ​ກ່ຽວ­ຂ້ອງ​ຂອງ​ສູນ​ກາງ ແລະ ນວ.

   ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ນະ­ຄອນ­ຫຼວງ​ວຽງ​ຈັນ (ຖວ​ທ ນວ) ຈັດ​ກອງ​ປະ­ຊຸມ​ປຶກ­ສາ​ຫາ­ລື​ກ່ຽວ​ກັບ​ການ​ຄຸ້ມ​ຄອງ​ຮ້ານ​ນວດ​ແຜນ​ບູ­ຮານ ແລະ ຮ້ານ​ສະ​ປາ ຂຶ້ນ​ວັນ​ທີ 12 ທັນ­ວາ 2019 ຢູ່​ພະ​ແນກ​ດັ່ງ­ກ່າວ ໂດຍ​ເປັນ​ປະ­ທານ​ຂອງ​ທ່ານ​ນາງ ວິ­ໄລ​ວອນ ຈັນ­ທະ​ລາ­ຕີ ຫົວ­ໜ້າ​ພະ​ແນກ ຖວ​ທ ນວ ມີ​ທ່ານ ບຸນ​ມາ ເພັດ​ສາ​ວົງ ຫົວ­ໜ້າ​ກົມ​ຄຸ້ມ​ຄອງ​ທ່ອງ​ທ່ຽວ ກະ­ຊວງ ຖວ​ທ ພ້ອມ​ດ້ວຍ​ຜູ້­ຕາງ­ໜ້າ​ຈາກ​ບັນ­ດາ​ພະ­ແນກ­ການ ຫ້ອງ­ການ ຖວ​ທ 9 ເມືອງ ແລະ ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

   ທ່ານ​ນາງ ວິ­ໄລ​ວອນ ຈັນ­ທະ​ລາ­ຕີ ກ່າວ​ວ່າ: ໄລ­ຍະ​ຜ່ານ​ມາ​ການ​ຄຸ້ມ​ຄອງ ແລະ ການ​ດຳ­ເນີນ​ທຸ­ລະ​ກິດ​ອົບ​ນວດ ນວດ​ແຜນ​ບູ­ຮານ ແລະ ນວດ​ເພື່ອ​ສຸ­ຂະ­ພາບ​ຢູ່ ນວ ກໍ​ຄື ທົ່ວ​ປະ­ເທດ ບໍ່​ມີ​ພາກ­ສ່ວນ​ໃດ​ອອກ​ໃບ​ອະ­ນຸ­ຍາດ​ດຳ­ເນີນ​ທຸ­ລະ​ກິດ ແລະ ຄຸ້ມ​ຄອງ ແຕ່​ທຸ­ລະ​ກິດ​ດັ່ງ­ກ່າວ​ໄດ້​ແຜ່​ຂະ­ຫຍາຍ​ຫຼາຍ​ໃນ ນວ ແລະ ເປັນ​ທີ່​ນິ­ຍົມ​ຂອງ​ຄົນ​ຢູ່​ຕົວ​ເມືອງ ເປັນ­ຕົ້ນ: ຮ້ານ​ນວດ ນວດ​ເພື່ອ​ສຸ­ຂະ­ພາບ ແລະ ອື່ນໆ ເຊິ່ງ​ມີ​ຫາງ​ສຽງ​ຈາກ​ສັງ­ຄົມ​ວ່າ​ເປີດ​ຮ້ານ​ນວດ​ມີ​ການ​ແອບ​ແຝງ ເຮັດ​ໃຫ້​ສັງ­ຄົມ​ບໍ່​ເຂົ້າ­ໃຈ ຄິດ​ໃນ​ແງ່​ລົບ​ຕໍ່​ການ​ເຮັດ​ບໍ­ລິ­ການ​ນວດ ພ້ອມ​ນີ້ ຍັງ​ຮຽກ­ຮ້ອງ​ໃຫ້​ການ­ຈັດ­ຕັ້ງ​ລັດ​ຄຸ້ມ​ຄອງ​ການ​ດຳ­ເນີນ​ທຸ­ລະ​ກິດ​ໃຫ້​ຖືກ­ຕ້ອງ ເຊິ່ງ​ຜູ້​ປະ­ກອບ​ການ​ຕ້ອງ​ມີ​ການ­ເຄື່ອນ­ໄຫວ​ໃຫ້​ຖືກ­ຕ້ອງ ການ­ຈັດ­ຕັ້ງ​ປະ­ຕິ­ບັດ​ຂອງ​ພະ​ແນກ ຖວ​ທ ນວ ແລະ ຫ້ອງ­ການ ຖວ​ທ ເມືອງ ກໍ​ຮຽກ­ຮ້ອງ​ຢາກ​ປະ­ຕິ­ບັດ​ໜ້າ­ທີ່​ໃຫ້​ຖືກ​ຕາມ​ພາ­ລະ​ບົດ­ບາດ ເຊິ່ງ​ຫຼາຍ​ເມືອງ​ກໍ​ໄດ້​ຈັດ​ຕັ້ງ​ປະ­ຕິ­ບັດ​ໄປ​ກ່ອນ ບາງ​ເມືອງ​ກຳ­ລັງ​ຂຸ້ນ­ຂ້ຽວ​ກຳ­ລັງ​ຮ່າງ​ນິ­ຕິ​ກຳ​ອອກ​ມາ​ເພື່ອ​ຄຸ້ມ​ຄອງ​ເອງ ເຊິ່ງ​ຮຽກ­ຮ້ອງ​ໃຫ້​ບັນ­ດາ​ທ່ານ​ທີ່​ເປັນ​ຕົວ​ແທນ​ເຮັດ​ໜ້າ­ທີ່​ຢູ່​ຮາກ​ຖານ ໂດຍ​ສະ­ເພາະ ຫ້ອງ­ການ ຖວ​ທ 9 ເມືອງ ຈົ່ງ​ໄດ້​ເອົາ­ໃຈ­ໃສ່​ແລກ­ປ່ຽນ​ຄຳ​ຄິດ​ເຫັນ ຍົກ​ໃຫ້​ເຫັນ​ສະ­ພາບ​ການ​ຕົວ​ຈິງ​ທີ່​ໄດ້​ຈັດ​ຕັ້ງ​ປະ­ຕິ­ບັດ ໄດ້​ພົບ­ພໍ້ ໃຫ້​ສະ­ເໜີ​ແລກ­ປ່ຽນ ເພື່ອ​ຫາ​ທາງ​ແກ້​ຊ່ວຍ​ກັນ ໂດຍ​ອີງ­ໃສ່​ກົດ​ລະ­ບຽບ​ທີ່​ມີ ເພື່ອ​ໃຫ້​ພວກ​ເຮົາ​ໄດ້​ເຄື່ອນ​ໄຫວ​ຖືກ­ຕ້ອງ ແລະ ເປັນ​ເອ­ກະ​ພາບ​ກັນ ຖ້າ​ຢູ່ ນວ ເລີ່ມ​ກ່ອນ ກໍ​ຈະ​ເປັນ​ບົດ­ຮຽນ​ໃຫ້​ແຂວງ​ອື່ນໆ​ໄດ້​ເຄື່ອນ​ໄຫວ​ໄດ້​ຢ່າງ​ຖືກ­ຕ້ອງ.

   ໂອ­ກາດ​ນີ້ ຜູ້​ເຂົ້າ​ຮ່ວມ ຍັງ​ໄດ້​ປຶກ­ສາ​ຫາ­ລື ແລະ ແລກ­ປ່ຽນ ໂດຍ​ສະ­ເພາະ​ຮ້ານ​ນວດ ຮົມ​ຢາ ທີ່​ຕັ້ງ​ຢູ່​ທີ່​ພັກ​ແຮມ ພັດ​ຕະ​ຄານ​ຕ່າງໆ ແລະ ເປັນ​ການ​ລົງ­ທຶນ​ຂອງ​ຕ່າງ­ປະ­ເທດ ໃຫ້​ລະ­ດັບ ນວ ຫຼື ເມືອງ​ຄຸ້ມ​ຄອງ ຮ້ານ​ນວດ ຮົມ​ຢາ​ສະ­ເພາະ ມີ​ການ​ລົງ­ທຶນ​ບໍ່​ສູງ ເປັນ​ການ​ລົງ­ທຶນ​ພາຍ​ໃນ ມອບ​ໃຫ້​ລະ­ດັບ​ເມືອງ​ຄຸ້ມ​ຄອງ ການ​ມີ​ສ່ວນ​ຮ່ວມ​ຂອງ​ຂະ­ແໜງ­ການ​ກ່ຽວ­ຂ້ອງ ການ​ປະ­ສານ​ສົມ­ທົບ​ດ້ານ​ວິ­ຊາ​ສະ­ເພາະ​ວິ­ຊາ​ຊີບ​ໃຫ້​ໄດ້​ມາດ­ຕະ­ຖານ ການ​ຕິດ­ຕາມ​ກວດ­ກາ ແມ່ນ​ປະ­ສານ​ສົມ­ທົບ​ກັບ​ອຳ­ນາດ​ການ​ປົກ­ຄອງ​ທ້ອງ­ຖິ່ນ ພາຍ­ຫຼັງ​ອອກ​ອະ­ນຸ­ຍາດ ເພື່ອ​ຫຼີກ​ລ້ຽງ ປາ­ກົດ­ການ​ຫຍໍ້­ທໍ້​ທີ່​ແອບ​ແຝງ​ຢັ້ງ­ຢືນ​ໃບ​ດຳ­ເນີນ​ກິດ­ຈະ­ການ​ດັ່ງ­ກ່າວ ເຊັ່ນ: ການ​ຄ້າ​ປະ­ເວ­ນີ ການ​ພະ­ນັນ ຢາ​ເສບ​ຕິດ ຈະ​ນຳ​ໃຊ້​ມາດ­ຕະ­ຖານ​ຂອງ​ອາ​ຊຽນ​ສ່ວນ​ໃດ​ໜຶ່ງ ເພື່ອ​ກຳ­ນົດ​ສະ­ຖານ­ທີ່ ແລະ ມາດ­ຕະ­ຖານ​ຍູ້​ໃຫ້​ບໍ­ລິ­ການ ຫຼື ຜູ້​ປະ­ກອບ​ການ​ທີ່​ຕ້ອງ​ໄດ້​ຮັບ​ການ​ຢັ້ງ­ຢືນ​ຈາກ​ຂະ­ແໜງ​ສາ­ທາ­ລະ­ນະ​ສຸກ.

ຂ່າວທີ່ກ່ຽວຂ້ອງ