ຄວາມ​ບໍ່​ສົມ​ດຸນ​ຂອງ​ສັງຄົມ

4.412 18 ທ.ວ. 2019 ນານາສາລະ

     ຄວາມ​ຈິງ​ຂອງ​ໂລກ​ໜ່ວຍ​ນີ້ ໃຜ​ກໍ​ຮູ້​ວ່າ ໂລກ​ໜ່ວຍ​ນີ້​ຍ່ອມ​ບໍ່​ມີ​ຄວາມ​ຮາບ​ພຽງ​ທັງ​ໝົດ ເຊັ່ນດຽວ​ກັນ​ກັບ​ຊີວິດ​ມະນຸດ​ໃນ​ສັງຄົມ ບ່ອນ​ໜາວ​ຫຼາຍ​ກໍ​ມີ ບ່ອນ​ຮ້ອນ​ຫຼາຍ​ກໍ​ມີ ບ່ອນ​ລວຍ​ຫຼາຍ​ກໍ​ມີບ່ອນ​ທຸກ​ຈົນ​ກໍ​ຫຼາຍ ເຊິ່ງ​ພວກ​ເຮົາ​ສາມາດ​ເຫັນ​ໄດ້​ວ່າສັງຄົມ​ຂອງ​ມະນຸດ​ນັ້ນ ຖ້າ​ຫາກ​ເອົາ​ເຫດຜົນ ແລະ ຄວາມ​ເມດ​ຕາ​ເອື້ອເຟື້ອແບ່ງປັນ​ນ້ຳໃຈ​ກັນຄົງ​ສາມາດ​ເປັນ​ແຮງ​ດຶງ​ດູດ​ໃຫ້​ສັງຄົມ​ໜ້າ​ຢູ່​ຫຼາຍ​ຂຶ້ນ ໂດຍ​ສະເພາະການ​ຢູ່​ຮ່ວມ​ກັນ​ໂດຍ​ຢຶດ​ຖື​ປະຕິບັດ​ສິນ​ລະ​ທຳ ແລະ ຮີດຄອງ​ປະເພນີ.

   ຜູ້​ຂຽນ​ມີ​ໂອກາດ​ໄດ້​ຮ່ວມ​ນັ່ງ​ດື່ມ​ກາເຟ​ໃນ​ຮ້ານ​ກາເຟ​ແຫ່ງ​ໜຶ່ງໄດ້​ຮັບ​ຟັງ​ບັນດາ​ຄໍ​ກາເຟ​ລົມ​ກັນ ແລກປ່ຽນ​ຫຼາຍ​ບັນຫາ ຈຶ່ງ​ຢາກ​ນຳ​ມາ​ເລົ່າ​ຕໍ່​ສູ່​ກັນຟັງ​ບາງ​ປະເດັນ ເຊັ່ນ: ເລື່ອງ​ການ​ປິ່ນປົວ​ສຸຂະພາບ​ລະຫວ່າງ​ໂຮງໝໍ​ລັດ ແລະ ເອກະ​ຊົນ ຫຼື ຄລີ​ນິກ​ເອກະ​ຊົນ ທີ່​ເຫັນ​ວ່າ ຄລີ​ນິກ​ເອກະ​ຊົນ​ບາງ​ແຫ່ງ​ເກັບ​ຄ່າ​ປິ່ນປົວ​ແພງ​ເກີນ (ແບບ​ມະຫາ​ໂຫດ) ຊ້ຳບໍ່ໜຳ​ບາງ​ແຫ່ງ​ຮູ້​ວ່າ ໝົດ​ຄວາມ​ສາມາດ​ປົວ ແລ້ວ ແຕ່​ກໍ​ຍັງ​ໃຫ້​ຄົນ​ປ່ວຍ​ພັກ​ເປັນ​ມື້​ສອງ​ມື້​ແລ້ວ ຈຶ່ງ​ຄ່ອຍ​ບອກ​ວ່າ ໝົດ​ຄວາມ​ສາມາດ ເຊິ່ງ​ພວກ ເຂົາ​ຖາມ​ຄືນ ຄື​ບໍ່​ບອກ​ແຕ່​ຕົ້ນ? ເພາະ​ການ​ເຮັດ ແບບ​ນັ້ນ ຄື​ວິທີ​ຢາກ​ໄດ້​ເງິນ​ຈົນ​ຂາດ​ຈັນ​ຍາ​ບັນ!.

    ບັນຫາ​ການ​ປິ່ນປົວ​ຢູ່​ບາງ​ສະຖານທີ່ ຖ້າວ່າ ເກັບ​ແພງ​ເກີນ​ຈົນ​ຂາດ​ເຫດຜົນ​ແບບ​ນີ້ ຜູ້​ປະສົບ ມາ​ແບບ​ນັ້ນ ເຂົາ​ຍັງ​ຝາກ​ຖາມ​ສັງຄົມ​ຕື່ມ​ວ່າ​ໂພດ​ເກີນ​ໄປ​ບໍ? ເຮົາ​ຄວນ​ມີ​ວິທີ​ການ​ກວດກາ ແນະນຳ ຄຸ້ມ​ຄອງ​ກັນ​ພໍ​ບໍ່​ໃຫ້​ເຮັດ​ພຶດຕິ​ກຳ​ໜ້າ​ເລືອດ​ເກີນ​ໄປ ທັງໆ​ທີ່​ເຮົາ​ກະ​ຮູ້ຈັກ​ຄຳ​ວ່າ ທຶນ​ນິຍົມ​ດີ ເຊິ່ງ​ປະ ເທດ​ເຮົາ ແມ່ນ​ສັງຄົມ​ນິຍົມ ! ແນ່ນອນ​ການ​ເຮັດ​ທຸລະ​ກິດ​ຍ່ອມ​ຕ້ອງການ​ຜົນ​ກຳໄລ ແຕ່​ຖ້າ​ກຳໄລເກີນ​ຂອບ​ເຂດມັນ​ກໍ​ສ້າງ​ຊ່ອງ​ຫວ່າງສັງຄົມ​ຫຼຸດ​ໂຕນ​ເກີນ​ໄປ ໃນ​ທາງ​ທິດ​ສະ​ດີ ຍ່ອມ​ຕ້ອງ​ຊ່ວຍ​ເບິ່ງ ແນ່ນອນເພາະ​ຖ້າ​ປ່ອຍ​ໃຫ້​ໃຜ​ມື​ຍາວ​ສາວ​ໄດ້​ສາວ ເອົາ​ແບບ​ນັ້ນ ຄົງ​ຈະ​ນຳ​ມາ​ເຊິ່ງ​ຄວາມ​ໝົດ​ສັດທາ.

   ຜ່ານ​ມາ ພວກ​ເຮົາ​ເຄີຍ​ເວົ້າ​ປາກົດການ​ຫຍໍ້ທໍ້ ຂອງ​ພະນັກງານ​ບາງ​ບ່ອນ ບາງ​ຄົນ​ທີ່​ຮ່ວມ​ຫົວ ກັບ​ນັກທຸລະກິດສ້າງ​ຄວາມ​ເສຍ​ຫາຍ​ແກ່​ສ່ວນ​ລວມ ບາງ​ບ່ອນ​ກໍ​ແກ້​ໄດ້​ໄລ່​ທັນ​ແຕ່​ບາງ​ບ່ອນ​ແກ້ ຍາກ? ຫາງ​ສຽງ​ຂອງ​ສັງຄົມ​ຍ່ອມ​ສຳຄັນ​ສະເໝີ​ຄວາມ​ຫຼຸດ​ໂຕນ ຫຼື ບໍ່​ສົມ​ດຸນ​ຂອງ​ສັງຄົມ​ຍັງ​ເກີດ ມີ​ຫຼາຍ​ສາຂາ​ອາຊີບ​ຄໍ​ກາເຟ​ຍັງ​ຊຸບ​ຊິບ​ມາ​ອີ​ກວ່າ ເຂົາ​ກິນ​ອັນ​ໃດ ເຮັດ​ອັນ​ໃດ ກໍ​ເນັ້ນ​ຮັດກຸມ ບໍ່​ໃຫ້​ມີ ຊ່ອງ​ໂຫວ່...ຄຸ້ມ​ຄອງ​ສັງຄົມ​ໃຫ້​ໜ້າ​ຢູ່ ເປັນ​ທຳ ນັ້ນ​ຄື​ສິ່ງ​ປາຖະໜາ​ຂອງ​ສັງຄົມ.

ຂ່າວທີ່ກ່ຽວຂ້ອງ