ເບິ່ງບ້ານເຂົາເອົາບົດຮຽນ 26-12-2019

707 26 ທ.ວ. 2019 ຫົວຂໍ້ຂ່າວອື່ນໆ

   ຄໍ​ລຳ​ມື້­ນີ້​ມີ​ຂ່າວ​ກ່ຽວ​ກັບ​ໂທດ​ຂອງ​ການ​ປ່ອຍ​ຂ່າວ​ປອມ​ຢູ່​ຟີ​ລິບ​ປິນ ແຜນ​ປົກ​ປັກ​ຮັກ­ສາ​ກຳ­ແພງ​ໃຫຍ່​ເມືອງ​ຈີນ​ໃຫ້​ຍືນ​ຍົງ​ຕະ­ຫຼອດ​ໄປ ແລະ ເລື່ອງ​ການ​ປັບ​ຫຼຸດ​ເກນ​ອາ­ຍຸ​ຜູ້​ມີ​ສິດ​ເລືອກ​ຕັ້ງ​ໃນ​ມາ​ເລ​ເຊຍ.

   ທີ່ ຟີ​ລິບ​ປິນ: ຂ່າວ​ໜັງ­ສື­ພິມ​ເດິ​ເນ​ເຊິນ (The Nation) ປະ­ຈຳ​ວັນ​ທີ 2 ກັນ­ຍາ 2017 ໃຫ້​ຮູ້​ວ່າ: ທ່ານ ໂຣ​ດຼິ​ໂກ ດູ​ເຕັກ​ເຕ ປະ­ທາ­ນາ­ທິ­ບໍ­ດີ ຟີ​ລິບ​ປິນ ໄດ້​ລົງ​ນາມ​ຮັບ­ຮອງ​ເອົາ​ຂໍ້­ຄວາມ​ປັບ​ກົດ­ໝາຍ​ອາ­ຍາ​ທີ່​ກຳ­ນົດ​ມາດ­ຕາ​ລົງ­ໂທດ​ຢ່າງ​ໜັກ​ຕໍ່​ຜູ້​ເຜີຍ­ແຜ່​ຂ່າວ​ບໍ່​ມີ​ມູນ​ຄວາມ​ຈິງ (ຂ່າວ​ປອມ) ດ້ວຍ​ການ​ປັບ​ໃໝ​ສູງ​ເຖິງ 4.000 ໂດ​ລາ​ສະ­ຫະ­ລັດ ແລະ ຈຳ​ຄຸກ​ສູງ​ເຖິງ 6 ເດືອນ ມາດ­ຕາ 154 ຂອງ​ກົດ­ໝາຍ​ໄດ້​ກຳ­ນົດ​ໂທດ​ຂັ້ນ​ໜັກ​ຕໍ່ “ການ​ພິມ​ເຜີຍ­ແຜ່​ສິ່ງ​ຜິດ​ກົດ­ໝາຍ ແລະ ການ­ສະ­ແດງ​ທາງ​ວາ­ຈາ​ທີ່​ຜິດ​ກົດ­ໝາຍ” ພາຍ​ໃຕ້​ກົດ­ໝາຍ​ນີ້​ຜູ້​ເຜີຍ­ແຜ່​ຂ່າວ​ປອມ​ທີ່​ເປັນ​ອັນ­ຕະ­ລາຍ​ຕໍ່​ຄວາມ​ເປັນ​ລະ­ບຽບ​ຮຽບ​ຮ້ອຍ​ຂອງ​ສັງ­ຄົມ ທຳ­ລາຍ​ຜົນ​ປະ­ໂຫຍດ ແລະ ກຽດ​ສັກ​ສີ​ຂອງ​ລັດ​ຈະ​ໄດ້​ຮັບ​ໂທດ​ຖືກ​ຈຳ​ຄຸກ​ຕ່ຳ​ສຸດ​ແຕ່ 1 ເດືອນ​ກັບ 1 ວັນ ແລະ ສູງ​ສຸດ 6 ເດືອນ ພ້ອມ​ດ້ວຍ​ໂທດ​ປັບ​ໃໝ​ແຕ່ 800 ເຖິງ 4.000 ໂດ​ລາ​ສະ­ຫະ­ລັດ ນີ້​ຄື​ບາງ​ເນື້ອ​ໃນ​ສຳ­ຄັນ​ຂອງ​ມາດ​ຕະ­ການ​ລົງ­ໂທດ​ທີ່​ກົດ­ໝາຍ​ສະ­ບັບ​ນີ້​ໄດ້​ກຳ­ນົດ​ຕໍ່​ຜູ້​ກະ­ທຳ​ຜິດ.

   ທີ່ ສປ ຈີນ: ມີ​ຂ່າວ​ກ່ຽວ​ກັບ​ມາດ​ຕະ­ການ​ອັນ​ຈຳ­ເປັນ​ຂອງ​ທາງ​ການ​ຈີນ ເພື່ອ​ປົກ​ປັກ​ຮັກ­ສາ​ກຳ­ແພງ​ໃຫຍ່​ເມືອງ​ຈີນ​ໄວ້​ໃຫ້​ຍືນ​ຍົງ​ຄົງ​ໝັ້ນ​ເປັນ​ສະ­ຖານ­ທີ່​ມະ­ຫັດ­ສະ­ຈັນ​ແຫ່ງ​ໜຶ່ງ​ຂອງ​ມວນ​ມະ­ນຸດ​ຕະ­ຫຼອດ​ໄປ ກຳ­ແພງ​ໃຫຍ່​ທີ່​ບາງ​ຍ່ານ​ມີ​ອາ­ຍຸ​ຫຼາຍ​ກວ່າ 2.000 ປີ ແຫ່ງ​ນີ້ ພວມ​ປະ​ເຊີນ​ກັບ​ຫຼາຍ​ບັນ­ຫາ​ທ້າ​ທາຍ​ທີ່​ກະ­ທົບ​ຕໍ່​ຄວາມ​ຍືນ​ຍົງ​ຂອງ​ມັນ ເຊັ່ນ: ບັນ­ຫາ​ທີ່​ເກີດ​ຈາກ​ຈຳ­ນວນ​ນັກ​ທ່ອງ​ທ່ຽວ​ເຂົ້າ​ຊົມ​ຫຼາຍ​ເກີນ​ໄປ ການ​ລັກ­ລອບ​ຂຸດ​ເຈາະ​ເອົາ​ວັດ­ຖຸ ເຊັ່ນ: ຫີນ ດິນ­ຈີ່ ຈາກ​ໂຕ​ກຳ­ແພງ​ໂດຍ​ຄົນ​ທ້ອງ­ຖິ່ນ ຜົນ​ກະ­ທົບ​ຈາກ​ວິ­ທີ​ທຳ​ມາ​ຫາ​ກິນ​ຂອງ​ປະ­ຊາ­ຊົນ​ຢູ່​ຕາມ​ບໍ­ລິ­ເວນ​ກຳ­ແພງ ນອກ​ນັ້ນ​ກໍ​ຍັງ​ມີ​ຜົນ​ກະ­ທົບ​ຈາກ​ທຳ​ມະ​ຊາດ ເຊັ່ນ: ກະ­ແສ​ລົມ​ແຮງ ການ​ເຜົາ​ໄໝ້​ຈາກ​ຄວາມ​ຮ້ອນ​ຂອງ​ແສງ​ຕາ­ເວັນ ໄພ​ແຜ່ນ­ດິນ​ໄຫວ ຝົນ­ຕົກ​ໜັກ-ດິນ​ເຈື່ອນ ແລະ ອື່ນໆ ວິ­ທີ​ແກ້​ໄຂ​ສະ­ເພາະ​ໜ້າ ກໍ​ຄື ຕ້ອງ​ໄດ້​ຈຳ­ກັດ​ຈຳ­ນວນ​ນັກ​ທ່ອງ​ທ່ຽວ​ຕາມ​ສະ­ຖິ­ຕິ​ທາງ​ການ​ຂອງ​ຈີນ ໃນ​ປີ 2018 ຈຳ­ນວນ​ຜູ້​ທ່ອງ​ທ່ຽວ​ຂຶ້ນ​ໄຕ່​ຊົມ​ກຳ­ແພງ​ໃຫຍ່​ເຂດ​ຈຸດ​ບາ​ຕາ​ຫຼິງ ໃກ້ໆ​ນະ­ຄອນ­ຫຼວງ​ປັກ​ກິ່ງ​ນັ້ນ ມີ​ຫຼາຍ​ກວ່າ 10 ລ້ານ​ຄົນ ທາງ​ການ​ຈີນ​ມີ​ແຜນ​ຈຳ­ກັດ​ນັກ​ທ່ອງ​ທ່ຽວ​ເຂົ້າ​ທ່ຽວ​ກຳ­ແພງ​ໃຫຍ່​ໃນ­ຕໍ່­ໜ້າ​ບໍ່​ໃຫ້​ເກີນ 65.000 ຄົນ​ຕໍ່​ວັນ ໂດຍ​ຕ້ອງ​ໄດ້​ຊື້​ປີ້​ລ່ວງ​ໜ້າ​ຜ່ານ​ລະ­ບົບ​ອອນ​ລາຍ ໝາຍ​ຄວາມ​ວ່າ​ບໍ່​ສາ­ມາດ​ຊື້​ປີ້​ໄດ້​ກັບ​ທີ່​ຄື​ເມື່ອ​ກ່ອນ ວິ­ທີ​ການ​ຈຳ­ກັດ​ຈຳ­ນວນ​ຜູ້​ເຂົ້າ​ຊົມ​ເພື່ອ​ຄວາມ​ຍືນ​ຍົງ​ຂອງ​ສະ­ຖານ­ທີ່​ສຳ­ຄັນ​ນີ້ ຫຼາຍ​ປະ­ເທດ​ກໍ​ໄດ້​ປະ­ຕິ­ບັດ ເຊັ່ນ: ຢູ່​ອະ­ນຸ­ສອນ​ສະ­ຖານ ຄາດ​ສະ​ມາ​ຮານ ຂອງ​ອິນ​ເດຍ ອັງ​ກໍ​ວັດ ຂອງ​ກຳ­ປູ­ເຈຍ ແລະ ອື່ນໆ.

   ທີ່ ມາ​ເລ​ເຊຍ: ແຕ່­ໃດໆ​ມາ ເກນ​ອາ­ຍຸ​ທາງ​ການ​ຂອງ​ພົນ­ລະ­ເມືອງ​ທີ່​ມີ​ສິດ​ອອກ­ສຽງ​ເລືອກ​ຕັ້ງ​ໃນ​ມາ​ເລ​ເຊຍ​ນັ້ນ ແມ່ນ 21 ປີ ຊຶ່ງ​ນັບ​ວ່າ​ສູງ​ຫຼາຍ ແລະ ມີ​ບໍ່​ເທົ່າ​ປະ­ເທດ​ທີ່​ກຳ­ນົດ​ສູງ​ຄື​ແນວ​ນີ້ ແຕ່​ແລ້ວ​ຂ່າວ​ທີ່​ລາຍ​ງານ​ໃຫ້​ຮູ້​ໃນ​ວັນ​ທີ 17 ເດືອນ​ກໍ­ລະ­ກົດ​ປີ​ນີ້ ບອກ​ວ່າ ສະ­ພາ​ຜູ້​ແທນ​ລາ­ຊະ​ດອນ​ມາ​ເລ​ເຊຍ ໄດ້​ຕົກ­ລົງ​ເຫັນ​ດີ​ແກ້​ໄຂ​ກົດ­ໝາຍ​ເລືອກ​ຕັ້ງ​ເປັນ​ທີ່​ຮຽບ​ຮ້ອຍ​ແລ້ວ ໂດຍ​ໄດ້​ປັບ​ຫຼຸດ​ເກນ​ອາ­ຍຸ​ສຳ­ລັບ​ຜູ້​ມີ​ສິດ​ເລືອກ​ຕັ້ງ​ລົງ​ເປັນ 18 ປີ (ຈາກ 21 ປີ) ບໍ່​ພຽງ​ແຕ່​ເທົ່າ​ນັ້ນ ກົດ­ໝາຍ​ຍັງ​ໄດ້​ກຳ­ນົດ​ສິດ​ລົງ​ສະ­ໝັກ​ຮັບ​ເລືອກ​ຕັ້ງ​ຂອງ​ພົນ­ລະ­ເມືອງ​ໃນ​ເກນ​ອາ­ຍຸ 18 ປີ ຂຶ້ນ​ໄປ​ອີກ​ດ້ວຍ ການ​ປ່ຽນ­ແປງ​ທາງ​ດ້ານ​ກົດ­ໝາຍ​ຄັ້ງ​ນີ້ ຈະ​ເຮັດ​ໃຫ້​ຈຳ­ນວນ​ຜູ້​ມີ​ສິດ​ເລືອກ​ຕັ້ງ​ໃນ​ມາ​ເລ​ເຊຍ​ເພີ່ມ​ຂຶ້ນ​ຕື່ມ 7,8 ລ້ານ​ຄົນ ພາຍ​ໃນ​ປີ 2023 ການ​ເລືອກ​ຕັ້ງ​ຄັ້ງ​ຜ່ານ​ມາ (2018) ມີ​ຈຳ­ນວນ​ຜູ້​ມີ​ສິດ​ເລືອກ​ຕັ້ງ​ທົ່ວ​ໄປ 14,9 ລ້ານ​ຄົນ.

ຂ່າວທີ່ກ່ຽວຂ້ອງ