ມ່ວນຊື່ນຢ່າງມີສະຕິ

2.246 30 ທ.ວ. 2019 ນານາສາລະ

   ສຳ­ລັບ​ທ້າຍ​ເດືອນ​ທັນ­ວາ​ກ້າວ​ເຂົ້າ​ສູ່​ວັນ​ທີ​ໜຶ່ງ​ມັງ­ກອນ ເປັນ​ໄລ­ຍະ​ເວ­ລາ​ທີ່​ສັງ­ຄົມ​ພາ­ກັນ​ສະ­ຫຼອງ​ຄວາມມ່ວນ­ຊື່ນ​ໂຮ​ແຊວ ເຊິ່ງ​ຄວາມ​ຈິງ​ມັນ​ກໍ​ແມ່ນ​ປີ​ໃໝ່​ສາກົນ ແຕ່​ວັດ­ທະ­ນະ­ທຳ​ສາ­ກົນ​ຫຼາຍ​ອັນ​ມັນ​ກໍ​ປົນ​ເປ​ເຂົ້າ​ມາ​ກັບ​ຄ່າ​ນິ­ຍົມ​ຂອງ​ວັດ­ຖຸ​ນິ­ຍົມ ແລະ ບໍ­ລິ­ໂພກ​ນິ­ຍົມ ຂໍ​ພຽງ​ມີ​ແຕ່​ປັນ­ຍາ​ພຽງ­ພໍ ປັບ​ໂຕ​ເລືອກ​ເອົາ​ໃຫ້​ເໝາະສົມ ຈົນ​ບໍ່​ຫຼົງ​ລືມ​ຮາກ​ເຫງົ້າ​ຂອງ​ຕົນ​ເອງ ກໍ​ຖື​ວ່າ​ດີ​ແລ້ວ ການ​ສະ­ຫຼອງ​ປີ​ໃໝ່​ສາ­ກົນ​ປີ​ນີ້ ທາງ ປກສ ນະ­ຄອນຫຼວງ ໄດ້​ອອກ​ຂໍ້​ແນະ­ນຳ ແລະ ຂໍ້​ຫ້າມ​ຫຼາຍ​ຂໍ້ ເພື່ອ​ໃຫ້ທຸກ​ຄົນ​ໄດ້​ມີ​ສະ­ຕິ​ຈັດ​ຕັ້ງ​ປະ­ຕິ­ບັດ​ໃນ​ການ​ສະ­ຫຼອງ​ປີ​ໃໝ່​ສາ­ກົນໃຫ້​ມ່ວນ­ຊື່ນ ແລະ ສະ­ຫງົບ​ສຸກ.

   ແຈ້ງ​ການ​ຂອງ​ກອງ​ບັນ­ຊາ​ການ ປກສ ນະ­ຄອນ­ຫຼວງ ລົງ​ວັນ​ທີ 13 ທັນ­ວາ 2019 ເຖິງ​ໜ່ວຍ​ງານ ທັງ​ພາກລັດ-ເອ­ກະ​ຊົນ ຊາວ​ນະ­ຄອນ­ຫຼວງ​ວຽງ​ຈັນ ຕ້ອງ​ໄດ້​ເອົາໃຈ​ໃສ່​ຂໍ້​ແນະ­ນຳ​ລຸ່ມ​ນີ້: (1) ແຕ່­ລະ­ຄົນ ແລະ ຄອບ­ຄົວ ບ້ານ ສຳ­ນັກ­ງານ ໂຮງ­ງານ ໂຮງ­ໝໍ ແລະ ອົງ​ການ­ຈັດ­ຕັ້ງ​ສັງ­ຄົມ​ອື່ນ... ຕ້ອງ​ມີ​ສະ­ຕິ​ເຄົາ­ລົບ​ປະ­ຕິ­ບັດ​ຕາມລັດ​ຖະ​ທຳ​ມະ­ນູນ ພ້ອມ​ທັງ​ກົດ­ໝາຍ ແລະ ແຈ້ງ​ການທຸກ​ຂັ້ນ​ທີ່​ວາງ​ອອກ (2) ເອົາ­ໃຈ­ໃສ່​ປ້ອງ​ກັນ​ເວນ­ຍາມ ແກ້​ໄຂ​ປາ­ກົດ­ການ​ບໍ່​ດີ​ຕ່າງໆ​ໃນ​ສັງ­ຄົມ (3) ເປັນ​ເຈົ້າ​ການ​ປະ­ຕິ­ບັດ​ລະ­ບຽບ ແລະ ກົດ​ຈະ­ລາ­ຈອນ​ຢ່າງ​ເຂັ້ມ​ງວດ (4) ຍົກ​ສູງ​ສະ­ຕິ​ລະ­ວັງ​ຕົວ ຮັກ­ສາ​ຊັບ​ສົມ­ບັດ​ຂອງຕົນ ກວດ­ກາ​ສະ­ຖານ­ທີ່​ເຮືອນ​ຊານ ເພື່ອ​ປ້ອງ​ກັນ​ບໍ່​ໃຫ້ເກີດ​ອັກ­ຄີ​ໄພ (5) ທຸກ​ພາກ­ສ່ວນ​ອົງ​ການ­ຈັດ­ຕັ້ງພາກ​ລັດ ບໍ່​ໃຫ້​ອະ­ນຸ­ຍາດຂົນ­ສົ່ງ-ນຳ​ເຂົ້າສິນ­ຄ້າຕ້ອງ​ຫ້າມ ເຊັ່ນ: ໝາກ​ກະ­ໂພກ ບັ້ງ­ໄຟ­ດອກ ໂຄມ­ໄຟ​ລອຍ​ຟ້າ​ທຸກ ປະ­ເພດ​ທຸກ​ຊະ­ນິດ ແລະ ທຸກ​ຂະ­ໜາດ.

   ສຳ­ລັບ​ແຈ້ງ​ການ​ດັ່ງ­ກ່າວ ຍັງ​ໄດ້​ອອກ​ຂໍ້​ຫ້າມ​ອີກ 5 ຂໍ້ ເຊັ່ນ: (1) ຫ້າມ​ບໍ່​ໃຫ້​ຊື້​ຂາຍ​ສິນ­ຄ້າ​ທີ່​ມີ​ສຽງ​ແຕກ-ສຽງ​ດັງ​ທຸກ​ປະ­ເພດ ບໍ່​ໃຫ້​ຈູດ​ໝາກ​ກະ­ໂພກ ບັ້ງ­ໄຟ­ດອກ ໂຄມ­ໄຟ​ລອຍ​ຟ້າ​ທຸກ​ປະ­ເພດ​ທຸກ​ຂະ­ໜາດ (2) ຫ້າມ​ບໍ່​ໃຫ້​ນຸ່ງ​ເຄື່ອງ​ສັ້ນ ເຂີນ ຍົ້ວ​ຍວນ ທີ່​ບໍ່​ຖືກ­ຕ້ອງ​ຕາມ​ຮີດຄອງ​ປະ­ເພ­ນີ (3) ຫ້າມ​ເປີດ​ສຽງ​ດັງ​ເກີນ​ຂອບ​ເຂດ ຫ້າມ​ຂີ່​ລົດ​ເປັນ​ພືງ​ເປັນ​ແພ (4) ຫ້າມ​ນັ່ງ​ຫົວ​ລົດ ຫ້າມ​ລົດ​ບັນ­ທຸກ​ຂົນ­ສົ່ງ​ສິນ­ຄ້າ​ເກີນ​ຂອບ​ເຂດ (5) ການ​ສະ­ຫຼອງ​ວັນ​ຄຼິດ​ສະ­ມາດ​ເລີ່ມ​ແຕ່ 24 ທັນ­ວາ ຮອດ​ວັນ​ທີ 2 ມັງ­ກອນ 2020 ບັນ­ດາ​ຮ້ານ​ບັນ­ເທີງ ກິນ​ດື່ມ ບໍ­ລິ­ຫານ​ຮອດ 23 ໂມງ 30 ນາ­ທີ ຕ້ອງ​ຢຸດ​ເຊົາ​ບໍ­ລິ­ການ​ຢ່າງ​ເດັດ­ຂາດ.

   ແຈ້ງ​ການ​ຂອງ ປກສ ນະ­ຄອນ­ຫຼວງ ຍັງ​ໄດ້​ອອກມາດ​ຕະ­ການ​ຕໍ່​ຜູ້​ລະ­ເມີດ​ຕື່ມ​ອີກ ເຊັ່ນ: ທຸກ​ການ​ກະ­ທຳທີ່​ລະ­ເມີດ​ຂໍ້​ຫ້າມ​ສະ­ບັບ​ນີ້ ດ້ວຍ​ເຈດ​ຕະ​ນາ ຫຼື ບໍ່​ເຈດຕະ​ນາ ລ້ວນ​ແຕ່​ຖືກ​ສຶກ​ສາ​ອົບ­ຮົມ ກ່າວ​ເຕືອນ ປັບ​ໃໝ ລົງ­ໂທດ​ຕາມ​ລະ­ບຽບ​ທີ່​ວາງ​ອອກ ທີ່​ສຳ­ຄັນ​ເພິ່ນ​ຍັງ​ໄດ້ເນັ້ນ​ໃຫ້​ປົກ­ຄອງ​ບ້ານ ຕຳ­ຫຼວດ​ກຸ່ມ ປກສ ບ້ານ ຕິດຕາມ​ກວດ­ກາ... ລາຍ​ງານ​ໃຫ້​ຂັ້ນ​ເທິງ​ຊາບ​ໃນ​ເວ­ລາອັນ​ຄວນ.

   ຜູ້​ຂຽນ​ເຫັນ​ວ່າ: ແຈ້ງ​ການ​ດັ່ງ­ກ່າວ ທຸກ​ພາກ­ສ່ວນສັງ­ຄົມ​ຄວນ​ຮັບ​ຮູ້ ແລະ ມີ​ສະ­ຕິ​ປະ­ຕິ­ບັດ​ພ້ອມ​ກັນ ໂດຍ​ສະ­ເພາະ ຂັ້ນ​ບ້ານ​ ຄວນ​ເອົາ­ໃຈ­ໃສ່​ເຂັ້ມ​ງວດ ເຈົ້າ​ໜ້າ­ທີ່​ຈະ­ລາ­ຈອນ​ກໍ​ຕ້ອງ​ໄດ້​ເຂັ້ມ​ງວດ ປັບ​ໃໝໃສ່​ໂທດ​ພວກ​ເມົາ​ແລ້ວ​ຂັບ ຂີ່​ລົດ​ແຂ່ງ​ເປັນ​ພຶງ​ເປັນ​ແພ ເພື່ອ​ໃຫ້​ສັງຄົມ​ໄດ້​ເປັນ​ລະ­ບຽບ ຊົມ­ເຊີຍ ປກສ ນະ­ຄອນ­ຫຼວງ ອອກແຈ້ງ​ການ​ທັນ​ການ ແລະ ຮັດ­ກຸມ.

ຂ່າວທີ່ກ່ຽວຂ້ອງ