ເລັ່ງແກ້ໄຂບັນຫາຄົງຄ້າງ ໃຫ້ທັນກັບການພັດທະນາໃນໄລຍະໃໝ່

982 06 ມ.ກ. 2020 ຂ່າວໜ້າ​ໜຶ່ງ

   ເມື່ອ​ທຽບ­ໃສ່​ຄວາມ​ຕ້ອງ­ການ​ຂອງ​ໜ້າ­ທີ່​ການ­ເມືອງ​ແລ້ວ ກະ­ຊວງ​ແຜນ­ການ ແລະ ການ​ລົງ­ທຶນ (ຜທ) ຍັງ​ມີ​ຂໍ້­ຄົງ­ຄ້າງ​ຫຼາຍ​ດ້ານ​ທີ່​ຍັງ​ບໍ່​ບັນ­ລຸ ເຊິ່ງ​ຕ້ອງ​ໄດ້​ເລັ່ງ​ການ​ແກ້​ໄຂ​ເພື່ອ​ໃຫ້​ແທດ­ເໝາະ​ກັບ​ການ​ເລັ່ງ​ທວງ​ຂອງ​ການ​ພັດ ທະ​ນາ​ໃນ​ໄລ­ຍະ​ໃໝ່ ເຊິ່ງ​ຕ້ອງ​ໄດ້​ເອົາ­ໃຈ­ໃສ່​ແກ້​ໄຂ​ຢ່າງ​ວ່ອງ­ໄວ ແລະ ໃຫ້​ໄດ້​ຮັບ​ປະ​ສິດ­ທິ​ຜົນ​ດີ​ຂຶ້ນ​ກວ່າ​ເກົ່າ.

   ສະ­ຫາຍ ສອນ​ໄຊ ສີ​ພັນ​ດອນ ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ ຜທ ໄດ້​ກ່າວ​ໃນ​ກອງ​ປະ­ຊຸມ​ຄົບ​ຄະ­ນະ​ບໍ­ລິ­ຫານ​ງານ​ພັກ​ກະ­ຊວງ ຜທ ຄັ້ງ​ທີ 4 ສະ­ໄໝ​ທີ III ວັນ​ທີ 31 ທັນ­ວາ ຜ່ານ​ມາ​ວ່າ: ບັນ­ຫາ​ທີ່​ຍັງ​ຄົງ​ຄ້າງ​ບໍ່​ທັນ​ບັນ­ລຸ​ໄດ້​ຕາມ​ຄວາມ​ຕ້ອງ­ການ ແລະ ການ​ເລັ່ງ​ທວງ​ຂອງ​ການ​ພັດ­ທະ­ນາ​ໃນ​ໄລ­ຍະ​ໃໝ່​ທີ່​ຕ້ອງ​ໄດ້​ແກ້​ໄຂ ປະ­ກອບ​ມີ​ການ​ເຜີຍ­ແຜ່​ແນວ­ທາງ​ນະ­ໂຍ­ບາຍ​ຂອງ​ພັກ​ໃຫ້​ສະ­ມາ­ຊິກ​ພັກ-ພະ­ນັກ­ງານ ເຖິງ​ວ່າ​ໄດ້​ດຳ­ເນີນ​ຫຼາຍ​ຄັ້ງ ແຕ່​ຄວາມ​ຮັບ​ຮູ້-ເຂົ້າ­ໃຈ ແລະ ການ​ເຊື່ອມ​ຊຶມ​ຂອງ​ສະ­ມາ­ຊິກ ຍັງ​ບໍ່​ທັນ​ເລິກ­ເຊິ່ງ ບໍ່​ທັນ​ບຸກ​ທະ­ລຸ​ດ້ານ​ຈິນ­ຕະ­ນາ­ການ ຄວາມ​ເປັນ​ເຈົ້າ​ການ​ຕື່ນ​ຕົວ ແລະ ຄວາມ​ຮັບ­ຜິດ­ຊອບ​ຕໍ່­ໜ້າ​ທີ່​ການ­ເມືອງ​ທີ່​ໄດ້​ຮັບ​ມອບ​ໝາຍ​ຍັງ​ບໍ່​ສູງ​ເທົ່າ​ທີ່​ຄວນ ການ​ຂະ­ຫຍາຍ​ສະ­ມາ­ຊິກ​ພັກ​ຢູ່​ແຕ່​ລະ​ໜ່ວຍ​ພັກ​ມີ​ຈຳ­ນວນ​ເພີ່ມ​ຂຶ້ນ ແຕ່​ຄຸນ​ນະ​ພາບ​ຂອງ​ສະ­ມາ­ຊິກ​ພັກ​ບໍ່​ທັນ​ສົມ​ຄູ່​ກັບ​ຈຳ­ນວນ​ທີ່​ມີ ຍ້ອນ​ການ​ຄັດ​ເລືອກ​ເອົາ​ມະ­ຫາ­ຊົນ​ເຂົ້າ​ພັກ ບໍ່​ມີ​ການ​ເລືອກ­ເຟັ້ນ​ທີ່​ດີ ການ​ຂະ­ຫຍາຍ​ພັກ​ຍັງ​ເບິ່ງ​ແຕ່​ຜູ້​ເຂົ້າ​ການ​ກ່ອນ ມີ​ອາ­ຍຸ​ການ​ຫຼາຍ​ປີ  ຍັງ​ບໍ່​ເຍືອງ​ໃສ່​ມາດ­ຖານ​ເງື່ອນ­ໄຂ​ທີ່​ກຳ­ນົດ​ໄວ້​ໃນ​ກົດ​ລະ­ບຽບ​ຂອງ​ພັກ​ຢ່າງ​ເຂັ້ມ​ງວດ ກົງ­ຈັກ​ໜ່ວຍ​ພັກ​ມີ​ຄົບ​ຖ້ວນ ແຕ່​ຍັງ​ອ່ອນ​ໃນ​ການ​ນຳ­ພາ​ປະ­ຕິ­ບັດ​ໜ້າ­ທີ່​ການ­ເມືອງ​ທີ່​ໄດ້​ຮັບ​ມອບ​ໝາຍ ການ​ປະ­ຕິ­ບັດ​ກົດ​ລະ­ບຽບ​ຂອງ​ພັກ​ຫຼ້າ­ຫຼັງ ບໍ່​ເຂັ້ມ​ງວດ​ເທົ່າ​ທີ່​ຄວນ ໂດຍ​ສະ­ເພາະ ການ​ຮ່ວມ​ຊີ­ວິດ​ພັກ​ປະ­ຈຳ​ເດືອນ​ຍັງ​ດຳ­ເນີນ​ບໍ່​ປົກ­ກະ­ຕິ ເຖິງ​ວ່າ​ໄດ້​ມີ​ການ​ຮ່ວມ​ຊີ­ວິດ​ພັກ ແຕ່​ເນື້ອ​ໃນ​ບໍ່​ເລິກ­ເຊິ່ງ ບໍ່​ກ້າ­ຫານ​ຕິ​ຊົມ​ຕົນ​ເອງ ເພື່ອນ​ສະ­ຫາຍ​ເພື່ອ​ກໍ່­ສ້າງ​ກັນ ການ​ປະ­ຕິ­ບັດ​ລະ­ບອບ​ປະ­ຊຸມ 3 ເດືອນ​ຕໍ່​ຄັ້ງ ເຮັດ​ບໍ່​ໄດ້​ຕໍ່​ເນື່ອງ ການ​ກໍ່­ສ້າງ​ໜ່ວຍ​ພັກ​ປອດ​ໃສ ເຂັ້ມ­ແຂງ ແລະ ໜັກ​ແໜ້ນ ຍັງ​ມີ​ລັກ­ສະ­ນະ​ຮູບ​ການ​ຫຼາຍ​ກວ່າ ບໍ່​ມີ​ແຜນ­ການ ແລະ ໜ້າ­ທີ່​ຈຸດ​ສຸມ​ຈັດ​ຕັ້ງ​ປະ­ຕິ­ບັດ​ລະ­ອຽດ​ແຕ່​ລະ​ດ້ານ ຂອດ​ການ​ປະ​ເມີນ​ຍັງ​ຕີ​ລາ­ຄາ​ແບບ​ຜິວ​ເຜີນ ເຮັດ​ໃຫ້​ຄຸນ​ນະ​ພາບ​ບໍ່​ສູງ.

   ພະ­ນັກ­ງານ​ຢູ່​ແຕ່​ລະ​ກົມ​ກອງ​ມີ​ຫຼາຍ ແຕ່​ຄວາມ​ສາ­ມາດ​ການ​ເຮັດ​ບົດ­ບາດ​ເປັນ​ເສ­ນາ​ທິ​ການ​ໃນ​ການ​ຕິດ­ຕາມ ແລະ ຄຸ້ມ​ຄອງ​ເສດ­ຖະ­ກິດ​ມະ­ຫາ​ພາກ ໂດຍ​ສະ­ເພາະ ການ​ຕີ​ລາ­ຄາ ແລະ ຄາດ​ຄະ­ເນ​ສະ­ພາບ​ເສດ­ຖະ­ກິດ​ມະ­ຫາ​ພາກ ການ​ຄົ້ນ­ຄວ້າ​ຊອກ​ຫາ​ມາດ​ຕະ­ການ​ແກ້​ໄຂ ຫຼື ການ​ຮັບ​ມື​ກັບ​ສະ­ພາບ​ຄວາມ​ຫຍຸ້ງ­ຍາກ​ດ້ານ​ເສດ­ຖະ­ກິດ-ການ​ເງິນ​ບໍ່​ເລິກ­ເຊິ່ງ ບໍ່​ທັນ​ສ່ອງ​ແສງ​ໄດ້​ທັນ​ສະ­ພາບ​ຕົວ​ຈິງ​ຂອງ​ການ​ປ່ຽນ­ແປງ ຂອດ​ການ​ບໍ­ລິ­ການ ແລະ ການ​ສ້າງ​ເງື່ອນ­ໄຂ​ສະ­ດວກ​ໃຫ້​ນັກ​ລົງ­ທຶນ​ພາຍ​ໃນ ແລະ ຕ່າງ­ປະ­ເທດ ເຮັດ​ບໍ່​ໄດ້​ດີ ແລະ ມີ​ລັກ­ສະ­ນະ​ແກ່­ຍາວ ການ​ກວດ­ກາ​ຄຸ້ມ​ຄອງ​ໂຄງ­ການ​ຢູ່​ພາກ​ສະ­ໜາມ​ບໍ່​ທົ່ວ​ເຖິງ ມີ​ບາງ​ໂຄງ­ການ​ແຕະ­ຕ້ອງ​ຜົນ​ປະ­ໂຫຍດ​ຂອງ​ປະ­ຊາ­ຊົນ ໂດຍ​ສະ­ເພາະ​ບັນ­ຫາ​ການ​ສຳ​ປະ­ທານ​ທີ່​ດິນ ການ​ຮ່າງ ແລະ ປະ­ຕິ­ບັດ​ສັນ­ຍາ​ຂອງ​ຫຼາຍ​ໂຄງ­ການ​ບໍ່​ຮັດ­ກຸມ ແລະ ຕົກ​ຢູ່​ໃນ​ທ່າ​ເສຍ­ປຽບ ການ​ກຳ­ນົດ​ແຜນ​ງານ​ໂຄງ­ການ​ໄດ້​ເຮັດ​ຢ່າງ​ເປັນ​ລະ­ບົບ ແຕ່​ການ​ຕິດ­ຕາມ​ຄຸ້ມ​ຄອງ​ການ​ປະ­ຕິ­ບັດ​ແຜນ­ການ ແລະ ໂຄງ­ການ​ລົງ­ທຶນ​ຂອງ​ລັດ​ບໍ່​ທົ່ວ​ເຖິງ ການ​ປະ­ສານ​ງານ​ກັບ​ຂະ­ແໜງ­ການ​ກ່ຽວ­ຂ້ອງ​ນັບ​ທັງ​ສູນ​ກາງ ແລະ ທ້ອງ­ຖິ່ນ​ເຮັດ​ບໍ່​ໄດ້​ດີ ຫຼາຍ​ໂຄງ­ການ​ຍັງ​ບໍ່​ທັນ​ຮັບ­ປະ­ກັນ​ໃຫ້​ເປົ້າ​ໝາຍ​ບຸກ​ທະ­ລຸ​ຂອງ​ລັດ­ຖະ­ບານ ໂດຍ​ສະ­ເພາະ ການ​ຊຸກ­ຍູ້​ສົ່ງ­ເສີມ​ເສດ­ຖະ­ກິດ​ຂອງ​ທ້ອງ­ຖິ່ນ ການ​ສະ­ໜອງ​ຂໍ້​ມູນ​ຂ່າວ­ສານ ແລະ ສະ­ຖິ­ຕິ​ກ່ຽວ​ກັບ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ບໍ່​ທັນ​ຕອບ​ສະ­ໜອງ​ໄດ້​ຕາມ​ຄວາມ​ຕ້ອງ­ການ​ຂອງ​ສັງ­ຄົມ ແລະ ຍັງ​ບໍ່​ລົງ​ຮອດ​ຮາກ​ຖານ ຈຶ່ງ​ຮຽກ­ຮ້ອງ​ມາ​ຍັງ​ສະ­ມາ­ຊິກ​ພັກ-ພະ­ນັກ­ງານ ທົ່ວ​ກະ­ຊວງ ຜທ ເອົາ­ໃຈ­ໃສ່ ແລະ ພ້ອມ​ກັນ​ປະ­ຕິ­ບັດ​ຂໍ້­ຄົງ­ຄ້າງ​ຕ່າງໆ​ໃຫ້​ບັນ­ລຸ​ຜົນ​ທັງ​ດ້ານ​ປະ​ສິດ­ທິ​ຜົນ ແລະ ປະ­ລິ­ມານ ເພື່ອ​ເຮັດ​ໃຫ້​ຂະ­ແໜງ​ດັ່ງ­ກ່າວ ມີ​ທ່າ​ກ້າວ​ໃໝ່ ແລະ ຄຸນ​ນະ​ພາບ​ໃໝ່ ໃຫ້​ສົມ​ຄູ່​ກັບ​ການ​ພັດ­ທະ­ນາ​ໃນ​ປັດ­ຈຸ­ບັນ.

ຂ່າວທີ່ກ່ຽວຂ້ອງ