ມີ​ຜູ້​ເສຍ​ຊີວິດ​ຫຼາຍ​ແສນ​ຄົນ​ຈາກ​ສົງຄາມ​ຢູ່​ໃນ​ຊີ​ຣີ

2.471 07 ມ.ກ. 2020 ຂ່າວຕ່າງປະເທດ
ມີ​ຜູ້​ເສຍ​ຊີວິດ​ຫຼາຍ​ແສນ​ຄົນ​ຈາກ​ສົງຄາມ​ຢູ່​ໃນ​ຊີ​ຣີ

     ບົດ​ລາຍ​ງານ​ຂອງ​ອົງການ​ຕິດຕາມ​ສິດທິ​ມະນຸດ​ຊີ​ຣີ (SOHR) ຊຶ່ງ​ມີ​ສຳນັກງານ​ຕັ້ງ​ຢູ່​ໃນ​ນະຄອນຫຼວງ ລອນ​ດອນ ຂອງ​ອັງກິດ ທີ່​ໄດ້​ນຳ​ອອກ​ມາ​ປະກາດ​ເມື່ອ​ວັນ​ທີ 4 ມັງກອນ​ທີ່​ຜ່ານ​ມາ ໃຫ້​ຮູ້​ວ່າ ມີ​ຜູ້​ເສຍ​ຊີວິດ 380.000 ກວ່າ​ຄົນ ຢູ່​ໃນ​ສົງຄາມ​ແກ່ຍາວ​ເປັນ​ເວລາ 9 ປີ ທີ່​ຜ່ານ​ມາ ຢູ່​ໃນ​ຊີ​ຣີ ຊຶ່ງ​ໃນ​ຈຳນວນ​ຜູ້​ເສຍ​ຊີວິດ​ນັ້ນ ມີ​ສາມັນ​ຊົນ​ລວມ​ຢູ່​ນຳ 115.000 ກວ່າ​ຄົນ. ບົດ​ລາຍ​ງານ​ໃໝ່​ຫຼ້າ​ສຸດ​ດັ່ງກ່າວ​ຂອງ SOHR ຊີ້​ແຈງ​ວ່າ ໃນ​ຈຳນວນ​ສາມັນ​ຊົນ​ທີ່​ເສຍ​ຊີວິດ 115.000 ກວ່າ​ຄົນ​ນັ້ນ ມີ 22.000 ຄົນ​ເປັນ​ເດັກນ້ອຍ ແລະ  13.612 ຄົນ ເປັນ​ແມ່ຍິງ.

ນອກຈາກ​ນັ້ນແລ້ວ ກໍ​ມີ​ທະຫານ​ຈາກ​ຂອງ​ຝ່າຍ​ລັດຖະບານ​ຊີ​ຣີ ລວມ​ເຖິງ​ບັນດາ​ສະມາຊິກ​ຂອງ​ທະຫານ​ທ້ອງຖິ່ນ ແລະ ພົນທະຫານ​ຂອງ​ກອງ​ກຳລັງ​ປະສົມ​ຂອງ​ຕ່າງປະເທດ ລວມ 128.100 ກວ່າ​ຄົນ ກໍ​ເສຍ​ຊີວິດ​ຢູ່​ໃນ​ສົງຄາມ​ໃນ​ຊີ​ຣີ ນັບ​ແຕ່​ປີ 2011 ເປັນຕົ້ນ​ມາ.

     ໄປ​ຄຽງ​ຄູ່​ກັນ​ນັ້ນ ພວກ​ນັກຮົບ​ທີ່​ລຸກ​ຮື​ຂຶ້ນ ແລະ ຝ່າຍ​ຄ້ານ ລວມ​ເຖິງ​ບັນດາ​ນັກຮົບ​ຊາວ​ເຄີດ ຈຳນວນ 69.100 ກວ່າ​ຄົນ ແລະ ສະມາຊິກ​ຂອງ​ອົງການ ລັດ​ອິ​ສລາມ (IS) ແລະ ກຸ່ມ HTS ຈຳນວນ 67.000 ກວ່າ​ຄົນ ຕ່າງ​ກໍ​ໄດ້​ເສຍ​ຊີວິດ​ຢູ່​ໃນ​ສົງຄາມ​ດັ່ງກ່າວ.

    ໃນ​ຂະນະ​ດຽວ​ກັນ ບົດ​ລາຍ​ງານ​ກໍ​ຊີ້​ໃຫ້​ເຫັນ​ວ່າ ການ​ພິພາດ ໄດ້​ເຮັດ​ໃຫ້​ຊາວ​ຊີ​ຣີ​ປະມານ  13 ລ້ານ​ຄົນ ຕ້ອງ​ໄດ້​ອອກ​ໄປ​ຈາກ​ເຮືອນ​ຊານ​ເພື່ອ​ໜີ​ໄພ. ໃນ​ຂະນະ​ດຽວ​ກັນ ບົດ​ລາຍ​ງານ​ຂອງ SOHR ກໍ​ຄາດ​ວ່າ ສົງຄາມ​ທີ່​ເກີດ​ຂຶ້ນ​ນັ້ນ ຈະ​ເຮັດ​ໃຫ້​ເສດຖະກິດ​ຂອງ​ຊີ​ຣີ ຖອຍຫຼັງ​ໄປ 3 ທົດ​ສະ​ວັດ.

ຂ່າວທີ່ກ່ຽວຂ້ອງ