ພະອິນແມ່ນໃຜ ?

2.450 08 ມ.ກ. 2020 ນານາສາລະ

   ບົດ​ກ່ອນ​ເຄີຍ​ຂຽນ​ເລື່ອງ ພົມ­ວິ­ຫານ​ສີ່ ຫຼື ພະ​ພົມ ຈຶ່ງ​ຢາກ​ຂຽນ​ຕໍ່ ເພາະ​ພະ​ອິນ​ມັກ​ກ່ຽວ­ຂ້ອງ​ໃກ້­ຊິດ​ກັບ​ພະ​ພົມ ເຊັ່ນ: ເວ­ລາ​ຜູ້​ຄົນ​ເກີດ​ຮ້າຍ​ໂມ­ໂຫ​ຂຶ້ນ​ມາ ກໍ​ມັກ​ຈະ​ອຸ­ທານ​ອອກ​ມາ​ວ່າ: ບໍ່​ເກງ​ໃຈ​ໜ້າ​ອິນ​ໜ້າ​ພົມ ນີ້​ສະ­ແດງ​ວ່າ ພະ​ອິນ​ໃຫຍ່​ກວ່າ​ພະ​ພົມ ແຕ່​ຈະ​ໃຫຍ່​ກວ່າ​ທາງ​ອຳ­ນາດ​ໜ້າ­ທີ່​ໃນ​ການ​ຮັບ­ຜິດ­ຊອບ​ໃດ​ນັ້ນ ຄົງ​ຈະ​ຂຶ້ນ​ຢູ່​ກັບ​ຄຸນ​ນະ​ທຳ​ທີ່​ພະ​ອິນ​ໄດ້​ປະ­ຕິ­ບັດ​ເປັນ​ແບບ­ຢ່າງ ໃນ​ການ​ປະ­ກອບ​ອາ­ຊີບ ຊີ­ວິດ​ການ​ງານ ເພາະ​ຖ້າ​ທຽບ​ພະ​ພົມ​ຄື​ຜູ້​ປະ­ເສີດ ທຽບ​ໄດ້​ກັບ​ຜູ້​ບໍ­ລິ­ຫານ​ລະ­ດັບ​ກາງ​ພຽງ ແຕ່​ປະ­ກອບ​ມີ​ຄຸນ​ນະ​ທຳ​ສີ່​ປະ­ການ​ເທົ່າ​ນັ້ນ.

   ພະ­ພຸດ­ທະ­ເຈົ້າ​ສອນ​ວ່າ: ພະ​ອິນ ກໍ​ຄື ຄົນ​ເຮົາ​ນີ້​ແຫຼະ​ທີ່​ຕ້ອງ​ມີ​ຄຸນ​ນະ​ທຳ 7 ປະ­ການ ໃນ​ການ​ດຳ­ເນີນ​ຊີ­ວິດ ເພື່ອ​ໃຫ້​ຍາດ​ພີ່­ນ້ອງ ແລະ ຄົນ​ໃນ​ສັງ­ຄົມ​ເຄົາ­ລົບ​ນັບ­ຖື​ຄຸນ​ນະ​ທຳ 7 ປະ­ການ​ນັ້ນ​ຄື: (1) ຮູ້­ຈັກ​ລ້ຽງ​ດູ​ບິ­ດາ​ມານ​ດາ (2) ປະ­ພຶດ​ຕົນ​ອ່ອນ​ນ້ອມ​ຕໍ່​ຜູ້​ໃຫຍ່ (3) ມີ​ວາ­ຈາ​ອ່ອນ​ຫວານ​ສະ­ໝານ​ໄມ­ຕີ (4) ບໍ່​ເວົ້າ​ຄຳ​ສໍ່​ສຽດ​ກໍ່­ໃຫ້­ເກີດ​ກຽດ​ຊັງ​ກັນ (5) ເປັນ​ຜູ້​ໃຈ­ກວ້າງ ບໍ່​ຂີ້​ຖີ່​ຊັບ (6) ເວົ້າ​ແຕ່​ຄວາມ​ຈິງ ບໍ່​ຕົວະ​ຕົ້ມ​ຫຼອກ​ລວງ​ເພື່ອ​ປະ­ໂຫຍດ​ຕົນ (7) ເປັນ​ຜູ້​ຢູ່​ເໜືອ​ຄວາມ​ໂກດ​ຮ້າຍ (ຄື​ສາ­ມາດ​ເອົາ​ຊະ­ນະ​ຄວາມ​ໂກດ​ຮ້າຍ​ໄດ້).

   ຄຸນ​ນະ​ທຳ 7 ປະ­ການ​ນີ້ ບໍ່​ພຽງ​ແຕ່​ຈະ​ເຮັດ​ໃຫ້​ຄົນ​ທຳ​ມະ​ດາ​ກາຍ­ເປັນ​ພະ​ອິນ​ໄດ້ ແຕ່​ຍັງ​ສາ­ມາດ​ເຮັດ​ໃຫ້​ຜູ້​ບໍ­ລິ­ຫານ ຫຼື ຫົວ­ໜ້າ​ຄົນ​ໄດ້​ຮັບ​ຄວາມ​ເຄົາ­ລົບ​ນັບ­ຖື​ຈາກ​ລູກ​ນ້ອງ ເຊິ່ງ​ບົດ​ກ່ອນ​ໄດ້​ຂຽນ​ເລື່ອງ​ພະ​ພົມ​ພຽງ​ແຕ່​ປະ­ຕິ­ບັດ​ຄຸນ​ນະ​ທຳ 4 ປະ­ການ​ກໍ​ສາ­ມາດ​ເປັນ​ຄົນ​ດີ ເປັນ​ຜູ້​ປະ­ເສີດ​ໄດ້ ດັ່ງ­ນັ້ນ ຄຸນ​ນະ​ທຳ 7 ປະ­ການ​ສຳ­ລັບ​ຄົນ​ທີ່​ຕ້ອງ­ການ​ເປັນ​ໃຫຍ່​ຄື​ພະ​ອິນ ຍ່ອມ​ຂາດ​ບໍ່​ໄດ້ ຕ້ອງ​ມີ​ຄຸນ­ສົມ­ບັດ 7 ປະ­ການ ຈຶ່ງ​ເຮັດ​ໃຫ້​ຄົນ​ອ້ອມ​ຂ້າງ​ເຄົາ­ລົບ​ນັບ­ຖື​ຍົກ­ຍ້ອງ ເຊິ່ງ​ພະ­ພຸດ­ທະ­ເຈົ້າ​ໄດ້​ສອນ​ໄວ້​ແຈ້ງ​ແລ້ວ​ວ່າ ຄົນ​ເຮົາ​ຈະ​ເປັນ​ພະ​ລາ­ຊາ ເປັນ​ພະ​ພິກ­ຂຸ ຫຼື ພະ​ອິນ ພະ​ພົມ ກໍ​ສາ­ມາດ​ເປັນ​ໄດ້​ດ້ວຍ​ຄຸມ​ສົມ­ບັດ ແລະ ລະ­ບຽບ​ວິ­ໄນ ບໍ່​ແມ່ນ​ປາດ​ຖະ​ໜາ​ເປັນ​ແບບ​ເຟີ້​ຝັນ​ກາງ­ເວັນ.

   ຄຸນ​ນະ​ທຳ​ຂອງ​ພະ​ອິນ 7 ປະ­ການ​ນັ້ນ ສ່ວນ​ຕົວ​ເຊື່ອ​ວ່າ​ຜູ້​ບໍ­ລິ­ຫານ ຫຼື ຜູ້­ນຳ​ຫຼາຍ​ທ່ານ​ໄດ້​ປະ­ຕິ­ບັດ​ຄົບ​ຖ້ວນ​ໄວ້​ແລ້ວ ຈິ່ງ​ຕອບ​ຄຳ​ຖາມ​ຫົວ­ຂໍ້​ຂ້າງ​ເທິງ​ນັ້ນ​ໄວ້​ວ່າ ພະ​ອິນ​ແມ່ນ​ໃຜ ? ພະ​ອິນ​ຄື​ບຸກ­ຄົນ​ຕ້ອງ­ການ​ຄວາມ​ເປັນ​ໃຫຍ່ ເຊິ່ງ​ຕ້ອງ​ປະ­ກອບ​ມີ​ຄຸນ​ນະ​ທຳ 7 ປະ­ການ​ຂ້າງ​ເທິງ​ນັ້ນ ຈຶ່ງ​ສາ­ມາດ​ເປັນ​ໄດ້ ຖ້າ­ວ່າ​ຜູ້­ກ່ຽວ​ຂາດ​ຄວາມ​ຊື່­ສັດ ໃຈ­ແຄບ ມາດ​ໃຫຍ່ ບໍ່​ອ່ອນ​ນ້ອມ​ຖ່ອມ​ຕົນ.... ກໍ​ເປັນ​ໃຫຍ່​ໄດ້​ຍາກ !.

ຂ່າວທີ່ກ່ຽວຂ້ອງ