ເບິ່ງບ້ານເຂົາເອົາບົດຮຽນ 08-01-2020

1.305 08 ມ.ກ. 2020 ຫົວຂໍ້ຂ່າວອື່ນໆ

   ຄໍ​ລຳ​ປະ­ຈຳ​ວັນ​ນີ້ ເລີ່ມ​ຈາກ​ຂ່າວ​ກ່ຽວ​ກັບ​ກົດ­ໝາຍ​ຫ້າມ​ຕັດ​ຕໍ່​ພາບ ສຽງ ວິ​ດີ​ໂອ ເພື່ອ​ປະ­ກອບ​ເປັນ​ຂ່າວ​ປອມ​ທີ່​ເໝືອນ​ຈິງ​ຢູ່ ສປ ຈີນ ຕໍ່​ໃສ່​ແຜນ​ຜະ­ເດັດ​ເສິກ​ຂອງ​ກາ​ນາ​ດາ ເພື່ອ​ກຳ​ຈັດ­ການ​ໃຊ້​ຜະ­ລິດ​ຕະ​ພັນ​ຢາງ​ທີ່​ໃຊ້​ພຽງ​ຄັ້ງ​ດຽວ.

   ທີ່ ສປ ຈີນ: ຕາມ​ກົດ­ໝາຍ​ສະ­ບັບ​ໃໝ່​ຂອງ ສປ ຈີນ ທີ່​ໄດ້​ຮັບ​ການ​ເຜີຍ­ແຜ່​ໃນ​ວັນ​ທີ 29 ເດືອນ​ພະ­ຈິກ ປີ 2019 ນັ້ນ ການ​ສ້າງ​ພາບ​ວິ​ດີ​ໂອ ແລະ ສຽງ​ປະ­ກອບ​ຂ່າວ​ທີ່​ບໍ່​ມີ​ມູນ​ຄວາມ​ຈິງ ນັ້ນ​ຖື​ເປັນ​ການ​ກະ­ທຳ​ທີ່​ມີ​ໂທດ​ທາງ​ອາ­ຍາ ທີ່​ຜູ້​ມີ​ຄວາມ​ຜິດ​ຕ້ອງ​ໄດ້​ຮັບ­ຜິດ­ຊອບ​ເຕັມ​ອັດ­ຕາ ກົດ­ໝາຍ​ໄດ້​ກຳ­ນົດ​ລາຍ​ລະ­ອຽດ​ວ່າ: ພາບ ແລະ ສຽງ​ໃນ​ວິ​ດີ​ໂອ​ທີ່​ຜະ­ລິດ​ດ້ວຍ​ເຕັກ​ໂນ​ໂລ​ຊີ​ຕັດ​ຕໍ່​ເພີ່ມ​ຕື່ມ​ໃຫ້​ເໝືອນ​ຈິງ ແຕ່​ບໍ່​ມີ​ມູນ​ຄວາມ​ຈິງ​ນັ້ນ ເປັນ​ອັນ­ຕະ­ລາຍ​ຕໍ່​ສັງ­ຄົມ ດັ່ງ­ນັ້ນ ໃຜ​ກໍ​ຕາມ​ທີ່​ຜະ­ລິດ​ພາບ ແລະ ສຽງ​ລັກ­ສະ­ນະ​ນີ້ ຕ້ອງ​ຕິດ​ຄຳ­ເຕືອນ​ໃຫ້​ຜູ້​ຊົມ­ໃຊ້​ຢ່າງ​ຈະ­ແຈ້ງ ເພື່ອ​ບໍ່​ໃຫ້​ຫຼົງ​ເຊື່ອ​ວ່າ​ເປັນ​ຂອງ​ຈິງ.

   ໃນ​ກໍ­ລະ­ນີ​ການ​ສ້າງ​ພາບ ແລະ ສຽງ​ເໝືອນ​ຈິງ ເພື່ອ​ເປົ້າ​ໝາຍ​ກໍ່­ໃຫ້­ເກີດ​ມີ​ຄວາມ​ເຂົ້າ­ໃຈ​ຜິດ ຫຼື ມີ​ຜົນ​ທາງ​ລົບ​ຕໍ່​ສັງ­ຄົມ​ນັ້ນ ຜູ້​ລະ­ເມີດ​ກົດ­ໝາຍ​ສະ­ບັບ​ນີ້​ຕ້ອງ​ໄດ້​ຮັບ​ໂທດ ໃນ​ປັດ­ຈຸ­ບັນ ບັນ­ຫາ​ການ​ສ້າງ​ພາບ ແລະ ສຽງ​ປອມ​ແປງ​ໃຫ້​ເໝືອນ​ຈິງ​ນັ້ນ ໄດ້​ກາຍ­ເປັນ​ບັນ­ຫາ​ແຜ່​ລະ­ບາດ​ໃນ​ຫຼາຍໆ​ປະ­ເທດ ແລະ ໄດ້​ກາຍ­ເປັນ​ເຄື່ອງ­ມື​ຂອງ​ພວກ​ບໍ່​ຫວັງ​ດີ ໃນ​ການ​ສ້າງ​ຄວາມ​ບໍ່​ສະ­ຫງົບ ເພື່ອ​ໃສ່​ຮ້າຍ​ປ້າຍ​ສີ ແລະ ທຳ­ລາຍ​ກຽດ​ສັກ​ສີ​ຂອງ​ຄົນ​ອື່ນ ກົດ­ໝາຍ​ຫ້າມ​ໃຊ້​ໂປຣ​ແກຣມ​ຕັດ​ຕໍ່​ພາບ ແລະ ສຽງ ເພື່ອ​ສ້າງ​ຂ່າວ​ປອມ​ຂອງ​ຈີນ​ສະ­ບັບ​ນີ້ ບໍ່​ໄດ້​ກຳ­ນົດ​ບົດ​ລົງ­ໂທດ​ລະ­ອຽດ​ຕໍ່​ຜູ້​ກະ­ທຳ​ຜິດ.

   ທີ່ ກາ​ນາ​ດາ: ສະ­ໜາມ­ຮົບ​ຕ້ານ​ການ​ໃຊ້​ຖົງ​ຢາງ​ປະ­ເພດ​ໃຊ້​ເທື່ອ​ດຽວ​ແລ້ວ​ຖິ້ມ​ນັ້ນ ປາ­ກົດ​ວ່າ​ປະ­ເທດ​ກາ​ນາ​ດາ ມາ​ແຮງ​ແຊງ​ໜ້າ​ປະ­ເທດ​ອື່ນ ເພາະ​ໄດ້​ມີ​ການ​ກຳ­ນົດ​ເວ­ລາ​ຢ່າງ​ຈະ​ແຈ້ງ­ວ່າ ພາຍ​ໃນ​ປີ 2022 ປະ­ເທດ​ນີ້​ຕ້ອງ​ປະ­ກາດ​ໃຊ້​ກົດ­ໝາຍ​ຫ້າມ​ໃຊ້​ຜະ­ລິດ​ຕະ​ພັນ​ທີ່​ເຮັດ​ດ້ວຍ​ຢາງ​ທັງ​ໝົດ ເຊັ່ນ: ຖົງ​ຢາງ ຫຼອດ​ດູດ​ນ້ຳ ຈອກ​ຢາງ ບ່ວງ ແລະ ສ້ອມ ເຄື່ອງ​ຫຸ້ມ​ຫໍ່​ອາ­ຫານ ແລະ ອື່ນໆ ເພື່ອ​ເຮັດ​ໃຫ້​ແຜນ­ການ​ດັ່ງ­ກ່າວ ທີ່​ທ່ານ ຈັດ​ສະ​ຕິນ ຕຼູ​ໂດ ນາ­ຍົກ­ລັດ­ຖະ­ມົນ­ຕີ ກາ​ນາ​ດາ ເຄີຍ​ປະ­ກາດ​ອອກ​ມາ​ປາ­ກົດ​ຜົນ​ເປັນ​ຈິງ ຫຼາຍ​ຕົວ​ເມືອງ​ໃຫຍ່​ໃນ​ກາ​ນາ​ດາ ກໍ​ໄດ້​ອອກ​ກົດ­ໝາຍ​ຫ້າມ​ນຳ​ໃຊ້​ຖົງ​ຢາງ​ປະ­ເພດ​ໃຊ້​ເທື່ອ​ດຽວ ເຊັ່ນ: ນະ­ຄອນ​ແວນ​ຄູ​ເວີ (Vancouver) ທາງ​ພາກ​ຕາ­ເວັນ​ອອກ​ຂອງ​ກາ​ນາ​ດາ​ນັ້ນ ກໍ​ໄດ້​ອອກ​ກົດ­ໝາຍ​ສະ­ເພາະ ເຊິ່ງ​ຈະ​ມີ​ຜົນ​ບັງ­ຄັບ​ໃຊ້​ໃນ​ເດືອນ​ເມ­ສາ ປີ 2020 ທີ່​ກຳ­ນົດ​ຫ້າມ​ນຳ​ໃຊ້​ຖົງ​ຢາງ ຫຼອດ​ດູດ​ນ້ຳ ຈອກ ບ່ວງ ສ້ອມ ກັບ​ໂຟມ ຖ້ວຍ ຈານ ທີ່​ເຮັດ​ດ້ວຍ​ຢາງ​ປະ­ເພດ​ໃຊ້​ເທື່ອ​ດຽວ​ທັງ​ໝົດ.

   ກົດ­ໝາຍ​ດັ່ງ­ກ່າວ​ມີ​ຂັ້ນ​ຕອນ​ປະ­ຕິ­ບັດ​ຢ່າງ​ຈະ­ແຈ້ງ ຄື: ຂັ້ນ​ຕອນ​ຫ້າມ​ໃຊ້​ປະ­ເພດ​ຫຼອດ​ດູດ​ນ້ຳ​ຈະ​ປະ­ຕິ­ບັດ​ກ່ອນ ຈາກ​ນັ້ນ ຈະ​ຕໍ່​ໃສ່​ຂັ້ນ​ຕອນ​ຫ້າມ​ການ​ໃຊ້​ຜະ­ລິດ​ຕະ​ພັນ​ຊະ­ນິດ​ອື່ນໆ ທາງ​ການ​ນະ­ຄອນ​ແວນ​ຄູ​ເວີ ຕັ້ງ​ເປົ້າ​ໝາຍ​ເອົາ​ໄວ້​ວ່າ​ຈະ​ສາ­ມາດ​ຫ້າມ​ໃຊ້​ຖົງ​ຢາງ​ປະ­ເພດ​ໃຊ້​ເທື່ອ​ດຽວ​ທັງ​ໝົດ​ໄດ້ ພາຍ​ໃນ​ວັນ​ທີ 1 ມັງ­ກອນ ປີ 2021 ທ່ານ​ນາ­ຍົກ ກາ​ນາ​ດາ ເຊື່ອ​ວ່າ ແຜນ​ຍຸດ​ທະ​ສາດ​ດ້ານ​ສິ່ງ­ແວ­ດລ້ອມ ຈະ​ສາ­ມາດ​ດັດ​ປັບ​ພຶດ­ຕິ​ກຳ​ຂອງ​ຄົນ ກາ​ນາ​ດາ ທີ່​ເປັນ​ຜົນ​ທາງ​ລົບ​ຕໍ່​ສິ່ງ­ແວ­ດລ້ອມ ແລ້ວ​ຫັນ​ມາ​ເປັນ​ສ່ວນ​ໜຶ່ງ​ຂອງ​ປະ­ເທດ ໃນ​ບົດ­ບາດ​ການ​ເປັນ​ຜູ້­ນຳ​ດ້ານ​ການ​ຫຼຸດ­ຜ່ອນ​ມົນ​ລະ​ພິດ ແລະ ຂີ້​ເຫຍື້ອ​ທາງ​ທະ­ເລ ກາ​ນາ​ດາ ມີ​ແຄມ​ຝັ່ງ​ທີ່​ຕິດ​ກັບ​ທະ­ເລ​ຍາວ​ທີ່​ສຸດ​ໃນ​ໂລກ.

ຂ່າວທີ່ກ່ຽວຂ້ອງ