ທາງລົດໄຟ ລາວ-ຈີນ ປະຕິບັດໄດ້ສຳເລັດ 83%

1.153 08 ມ.ກ. 2020 ຂ່າວໜ້າ​ໜຶ່ງ

   ບໍ­ລິ­ສັດ ທາງ​ລົດ­ໄຟ ລາວ-ຈີນ ຈຳ­ກັດ ໄດ້​ຈັດ​ກອງ​ປະ­ຊຸມ​ພະ­ນັກ­ງານ ປະ­ຈຳ​ປີ 2020 ເພື່ອ​ສະ­ຫຼຸບ​ວຽກ​ງານ​ໃນ​ໜຶ່ງ​ປີ​ທີ່​ຜ່ານ​ມາ ແລະ ສ້າງ​ແຜນ­ການ​ທີ່​ສຳ­ຄັນ​ສຳ­ລັບ​ປີ 2020 ພ້ອມ​ມອບ​ໃບ​ຍ້ອງ­ຍໍ​ໃຫ້​ພະ​ແນກ​ດີ­ເດັ່ນ ພະ­ນັກ­ງານ​ດີ­ເດັ່ນ ແລະ ພະ­ນັກ­ງານ​ກ້າວ­ໜ້າ ໃນ​ວັນ​ທີ 6 ມັງ­ກອນ 2020 ທີ່​ນະ­ຄອນ­ຫຼວງ​ວຽງ​ຈັນ.

   ໂອ­ກາດ​ນີ້ ທ່ານ ຄຳ​ປ່ຽນ ອິນ​ທະ​ລື­ຊາ ຮອງ​ຫົວ­ໜ້າ​ຄະ­ນະ​ຄຸ້ມ​ຄອງ​ໂຄງ­ການ​ທາງ​ລົດ­ໄຟ ລາວ-ຈີນ ກ່າວ​ວ່າ: ໂຄງ­ການ​ກໍ່­ສ້າງ​ທາງ​ລົດ­ໄຟ ລາວ-ຈີນ ແມ່ນ​ໂຄງ­ການ​ຮ່ວມ​ມື ລະ­ຫວ່າງ​ລັດ­ຖະ­ບານ​ຂອງ​ສອງ​ປະ­ເທດ ລາວ-ຈີນ ເຊິ່ງ​ເປັນ​ສັນ­ຍະ­ລັກ​ແຫ່ງ​ສາຍ​ພົວ­ພັນ​ທີ່​ເປັນ​ມູນ­ເຊື້ອ ແລະ ຄູ່​ຮ່ວມ​ຍຸດ​ທະ​ສາດ​ຮອບ­ດ້ານ ໝັ້ນ­ຄົງ ແລະ ຍາວ​ນານ ທັງ​ເປັນ​ການ­ຈັດ­ຕັ້ງ​ປະ­ຕິ­ບັດ​ຍຸດ​ທະ​ສາດ​ຂອງ ສປປ ລາວ ໃນ​ການ​ຫັນ​ປະ­ເທດ​ທີ່​ບໍ່​ມີ​ຊາຍ​ແດນ​ຕິດ​ກັບ​ທະ­ເລ ແລະ ປະ­ຕິ­ບັດ​ຍຸດ​ທະ​ສາດ​ຂອງ ສປ ຈີນ “ໜຶ່ງ​ແລວ​ໜຶ່ງ​ເສັ້ນ­ທາງ”. ສະ­ນັ້ນ ໂຄງ­ການ​ນີ້​ຈຶ່ງ​ມີ​ຄວາມ​ໝາຍ​ດ້ານ​ປະ­ຫວັດ­ສາດ ແລະ ຍຸດ​ທະ​ສາດ​ຂອງ​ສອງ​ປະ­ເທດ ລາວ-ຈີນ ການ​ດຳ­ເນີນ​ການ​ກໍ່­ສ້າງ​ທາງ​ລົດ­ໄຟ ລາວ-ຈີນ ແມ່ນ​ມີ​ຄວາມ​ຈຳ­ເປັນ​ຕ້ອງ​ຮັບ­ປະ­ກັນ​ໃຫ້​ໄດ້​ຄາດ­ໝາຍ​ທາງ​ດ້ານ​ຄຸນ​ນະ​ພາບ ສຳ­ເລັດ​ຕາມ​ແຜນ­ການ ມີ​ຄວາມ​ສະ­ຫງົບ​ປອດ​ໄພ ແລະ ປອດ​ໃສ​ສະ­ອາດ.

   ມາ​ຮອດ​ວັນ​ທີ 30 ພະ­ຈິກ 2019 ຄະ­ນະ​ກຳ­ມະ­ການ​ໄກ່​ເກ່ຍ​ຂັ້ນ​ແຂວງ ແລະ ນະ­ຄອນ­ຫຼວງ​ວຽງ​ຈັນ ສາ­ມາດ​ມອບ​ພື້ນ​ທີ່​ໃຫ້​ແກ່​ການ​ກໍ່­ສ້າງ​ໄດ້​ທັງ​ໝົດ 406,8 ກິ­ໂລ­ແມັດ ເທົ່າ​ກັບ 99,59% ຂອງ​ແລວ​ທາງ​ທັງ​ໝົດ ຈຳ­ນວນ 409 ກິ­ໂລ­ແມັດ ວຽກ​ກໍ່­ສ້າງ​ປະ­ຕິ­ບັດ​ໄດ້​ສຳ­ເລັດ 83% ຂອງ​ວຽກ​ກໍ່­ສ້າງ​ພື້ນ­ຖານ​ໂຄງ​ລ່າງ​ຂອງ​ທາງ​ລົດ­ໄຟ​ທັງ​ໝົດ ການ​ຊົດ​ເຊີຍ​ສິ່ງ​ກີດ­ຂວາງ ແມ່ນ​ນຳ​ໃຊ່​ຮ່ວງ​ເງິນ​ຂອງ​ບໍ­ລິ­ສັດ ທາງ​ລົດ­ໄຟ ລາວ-ຈີນ ມູນ​ຄ່າ 416,83 ຕື້​ກີບ ແລະ ຮ່ວງ​ເງິນ​ລັດ­ຖະ­ບານ​ລາວ ມູນ​ຄ່າ 249,98 ຕື້​ກີບ ລວມ​ມູນ​ຄ່າ​ການ​ເບີກ​ຈ່າຍ ທັງ​ໝົດ 666,81 ຕື້​ກີບ.

   ທ່ານ ຫຼີ ປີ້ງ​ສວນ ຜູ້­ອຳ­ນວຍ­ການ​ໃຫຍ່ ບໍ­ລິ­ສັດ ທາງ​ລົດ­ໄຟ ລາວ-ຈີນ ຈຳ­ກັດ ສະ­ແດງ​ຄວາມ​ເຊື່ອ​ໝັ້ນ​ວ່າ: ພະ­ນັກ­ງານ​ຂອງ ບໍ­ລິ­ສັດ ທາງ​ລົດ­ໄຟ ລາວ-ຈີນ ຈຳ­ກັດ ມີ​ຄວາມ​ພາກ­ພູມ​ໃຈ ມີ​ຄວາມ​ຕັ້ງ​ໝັ້ນ ແລະ ເຊື່ອ​ວ່າ ໂຄງ­ການ​ທາງ​ລົດ­ໄຟ ລາວ-ຈີນ ຈະ​ສາ­ມາດ​ບັນ­ລຸ​ເປົ້າ​ໝາຍ ແລະ ໄດ້​ຮັບ​ໝາກ­ຜົນ​ໃນ​ປີ​ໃໝ່​ນີ້ ໃນ​ປີ 2019 ໂຄງ­ການ​ທາງ​ລົດ­ໄຟ ລາວ-ຈີນ ໄດ້​ສຳ­ເລັດ​ການ​ລົງ­ທຶນ​ປະ­ຈຳ​ປີ ຈຳ­ນວນ 6,8 ຕື້​ຢວນ ກວມ​ເອົາ 49,8% ຂອງ​ການ​ລົງ­ທຶນ​ທັງ​ໝົດ ການ​ຊີ​ເຈາະ​ອຸ​ໂມງ​ໄດ້​ສຳ­ເລັດ​ແລ້ວ 170 ກວ່າ​ກິ­ໂລ­ແມັດ ເຊິ່ງ​ກວມ​ເອົາ 86,5% ຂອງ​ການ​ອອກ​ແບບ ໃນ​ນັ້ນ ໄດ້​ສຳ­ເລັດ​ຊີ​ເຈາະ​ແລ້ວ 52 ອຸ​ໂມງ ຂອງ​ທັງ​ໝົດ 75 ອຸ​ໂມງ) ລວມ​ເຖິງ​ອຸ​ໂມງ​ທີ່​ຍາວ​ທີ່​ສຸດ ກໍ​ຄື​ອຸ​ໂມງ​ພູ­ຜາ​ງ່າມ ຍາວ 9.384 ແມັດ ເຊິ່ງ​ສຳ­ເລັດ​ກ່ອນ​ແຜນ­ການ 7 ເດືອນ ການ​ກໍ່­ສ້າງ​ຂົວ​ສຳ­ເລັດ​ທັງ​ໝົດ 36 ກວ່າ​ກິ­ໂລ­ແມັດ ກວມ​ເອົາ 59,3% ຂອງ​ການ​ອອກ​ແບບ ວຽກ​ດິນ​ຈົກ​ດິນ​ຖົມ ປະ­ຕິ­ບັດ​ໄດ້ 97,3% ວຽກ​ເດີ່ນ​ໜ້າ​ສະ­ຖາ­ນີ​ໄດ້​ສຳ­ເລັດ​ແລ້ວ 78,7% ແລະ ການ​ເຊື່ອມ​ຈອດ​ລາງ​ລົດ­ໄຟ​ຍາວ 500 ແມັດ​ທຳ​ອິດ ໄດ້​ສຳ­ເລັດ​ໃນ​ວັນ​ທີ 2 ທັນ­ວາ.

   ໃນ ປີ 2020 ບໍ­ລິ­ສັດ ຈະ​ສຸມ​ໃສ່​ໃຫ້​ບັນ­ລຸ​ເປົ້າ​ໝາຍ​ການ​ລົງ­ທຶນ​ປະ­ຈຳ​ປີ ແລະ ໃຫ້​ສຳ­ເລັດ​ເປົ້າ​ໝາຍ​ຄຸນ​ນະ​ພາບ ຄວາມ​ປອດ​ໄພ ຄວາມ​ຄືບ​ໜ້າ ການ​ລົງ­ທຶນ ແລະ ສິ່ງ­ແວ­ດລ້ອມ.

ຂ່າວທີ່ກ່ຽວຂ້ອງ