ແຂ່ງຂັນ​ກີລາ​ນັກຮຽນ 5 ແຂວງ​ພາກ​ເໜືອ-ແຂວງ​ດຽນ​ບຽນ​ຟູ

621 09 ມ.ກ. 2020 ວົງຈອນກີລາ
ແຂ່ງຂັນ​ກີລາ​ນັກຮຽນ 5 ແຂວງ​ພາກ​ເໜືອ-ແຂວງ​ດຽນ​ບຽນ​ຟູ

   ພິທີ​ເປີດ​ແຂ່ງຂັນ​ກີລາ ແລະ ແລກປ່ຽນ​ສິລະ​ປະ-ວັນນະຄະດີ ແລະ ວັດທະນະທຳ ນັກຮຽນ​ມັດ ທະ​ຍົມ​ສຶກ​ສາ 5 ແຂວງ​ພາກ​ເໜືອ ​ສປປ ລາວ ແລະ ແຂວງ​ດຽນ​ບຽນ​ຟູ ​ສສ ຫວຽດນາມ ຄັ້ງ​ທີ XII ຈັດ​ຂຶ້ນ​ວັນ​ທີ 6 ມັງກອນ ຜ່ານ​ມາ ຢູ່​ສະໜາມ​ກີລາ​ແຂວງ​ບໍ່​ແກ້ວ ໂດຍ​ມີ​ທ່ານ ບົວ​ຄົງ ນາມ​ມະ​ວົງ ເຈົ້າແຂວງ​ບໍ່​ແກ້ວ ພ້ອມ​ດ້ວຍ​ເຈົ້າແຂວງ-ຮອງ​ເຈົ້າແຂວງ ແລະ ພາກສ່ວນ​ກ່ຽວຂ້ອງ ເຂົ້າ​ຮ່ວມ.  

    ທ່ານ ວັນ​ດີ ທຳ​ມະ​ວົງ ຮັກສາ​ການ​ຫົວໜ້າ​ພະ​ແນກ​ສຶກ​ສາ​ທິ​ການ ແລະ ກີລາ​ແຂວງ​ບໍ່​ແກ້ວ ກ່າວ​ວ່າ: ການ​ແຂ່ງຂັນ​ຄັ້ງ​ນີ້​ຈະ​ດຳເນີນ​ແຕ່​ວັນ​ທີ 6-10 ມັງກອນ 2020 ເພື່ອ​ສ້າງ​ຄວາມ​ສາມັກຄີ ໄມຕີ​ຈິດ​ມິດຕະພາບ ລະຫວ່າງ ລາວ-ຫວຽດນາມ ທັງ​ເປັນ​ການ​ສ້າງ​ຄວາມ​ເຂັ້ມແຂງ​ການ​ຮຽນ-ການ​ສອນ​ຫຼັກ ສູດ​ວິຊາ​ພະລະ ແລະ ສິລະ​ປະ​ສຶກ​ສາ ຫຼິ້ນ​ກີລາ​ເພື່ອ​ສຸຂະພາບ ມິດຕະພາບ ຄວາມ​ສາມັກຄີ ເພື່ອ​ຫ່າງ​ໄກ​ຈາກ​ສິ່ງ​ເສບ​ຕິດ ເຊິ່ງ 5 ແຂວງ​ພາກ​ເໜືອ ​ສປປ ລາວ ປະກອບ​ມີ: ບໍ່​ແກ້ວ ຫຼວງ​ພະ​ບາງ ອຸດົມ​ໄຊ ຜົ້ງ​ສາລີ ຫຼວງ​ນ້ຳ​ທາ ແລະ ແຂວງ​ດຽນ​ບຽນ​ຟູ ​ສສ ຫວຽດນາມ ເຂົ້າ​ຮ່ວມ ແຂ່ງຂັນ 4 ປະເພດ ຄື: ບານເຕະ​ຊາຍ ດອກ​ປີກ​ໄກ່​ຍິງ-ຊາຍ ກະຕໍ້​ຍິງ-ຊາຍ ໜ້າ​ເກັກ​ຍິງ-ຊາຍ ນອກ​ນີ້​ຍັງ​ມີ​ການ​ແຂ່ງຂັນ​ສິລະ​ປະ-ວັນນະຄະດີ ຕື່ມ​ອີກ.

    ທ່ານ ບົວ​ຄົງ  ນາມ​ມະ​ວົງ ກ່າວ​ວ່າ: ງານ​ແຂ່ງຂັນ​ກີລາ ແລະ ແລກປ່ຽນ​ສິລະ​ປະ-ວັນນະຄະດີ ຄັ້ງ​ນີ້ ເຕັມ​ໄປ​ດ້ວຍ​ຄວາມ​ມີ​ນ້ຳໃຈ ໄມຕີ​ຈິດ ມິດຕະພາບ ຄວາມ​ສາມັກຄີ​ຮັກແພງ ແລະ ເປັນ​ສັນຍາ​ລັກ​ແຫ່ງ​ການ​ມີ​ວິໄນ​ທີ່​ເຂັ້ມ​ງວດ​ຂອງ​ນັກກີລາ ທັງ​ເປັນ​ການສະແດງ​ໃຫ້​ເຫັນ​ການ​ເຕີບ​ໃຫຍ່​ຂະຫຍາຍຕົວ​ຂອງ​ວົງ​ການ​ກີລາ​ລາວ ແລະ ຫວຽດນາມ ເວົ້າ​ສະເພາະ​ກີລາ​ນັກຮຽນ​ຊັ້ນ​ມັດທະຍົມ​ສຶກ​ສາ​ຂອງ 5ແຂວງ​ພາກ​ເໜືອ ​ສປປ ລາວ ແລະ ແຂວງ​ດຽນ​ບຽນ​ຟູ ​ສສ ຫວຽດນາມ ໃນ​ລະດັບ​ຊາດ ກໍ​ຄື​ລະດັບ​ອາ​ຊຽນ ຄຽງ​ຄູ່​ຢ່າງ​ຍືນ​ຍົງ. 

ຂ່າວທີ່ກ່ຽວຂ້ອງ