ສະຫະພັນ​ເພາະ​ກາຍ​ລາວ ກຽມ​ເປັນ​ເຈົ້າພາບ ຊີງ​ແຊັມ​ອາ​ຊຽນ 2020

697 09 ມ.ກ. 2020 ວົງຈອນກີລາ
ສະຫະພັນ​ເພາະ​ກາຍ​ລາວ ກຽມ​ເປັນ​ເຈົ້າພາບ ຊີງ​ແຊັມ​ອາ​ຊຽນ 2020

   ສະຫະພັນ​ເພາະ​ກາຍ​ອາ​ຊຽນ ໄດ້​ອະນຸມັດ​ມອບ​ໝາຍ​ໃຫ້​ສະຫະພັນ​ເພາະ​ກາຍ​ແຫ່ງ​ຊາດ​ລາວ ເປັນ​ເຈົ້າພາບ​ຈັດການ​ແຂ່ງຂັນ​ເພາະ​ກາຍ​ຊີງ​ແຊັມ​ອາ​ຊຽນ ຄັ້ງ​ທີ 17 (South East Asian 17th Bodybuilding and Physique Sport Championships) ຄາດ​ວ່າ​ຈະ​ຈັດ​ຂຶ້ນ​ໃນ​ລະຫວ່າງ​ວັນ​ທີ 11-16 ມິຖຸນາ ປີ 2020 ທີ່​ນະຄອນຫຼວງ​ວຽງ​ຈັນ.

    ການ​ອະນຸມັດ​ຄັ້ງ​ນີ້ ຜ່ານ​ການ​ຕົກລົງ​ເຫັນ​ດີ​ເປັນ​ເອກະສັນ​ໃນ​ກອງ​ປະຊຸມ​ໃຫຍ່​ປະຈຳ​ປີ ຂອງ​ສະ ຫະ​ພັນ​ເພາະ​ກາຍ​ອາຊີ (Asian Bodybuilding and Physique Sport Federation) ທີ່​ບາ​ຕ້ຳ ປະເທດ​ອິນ​ໂດ​ເນ​ເຊຍ ເມື່ອ​ເດືອນ​ກັນຍາ​ປີ 2019 ຜ່ານ​ມາ.

    ເປັນ​ຄັ້ງ​ທຳ​ອິດ​ທີ່ ​ສປປ ລາວ ກໍ​ຄື ສະຫະພັນ​ເພາະ​ກາຍ​ແຫ່ງ​ຊາດ​ລາວ ຈະ​ໄດ້​ຮັບ​ກຽດ​ເປັນ​ເຈົ້າພາບ​ງານ​ຊີງ​ແຊັມ​ລະດັບ​ອາ​ຊຽນ ຫຼັງ​ປະສົບ​ຜົນສຳເລັດ​ການ​ແຂ່ງຂັນ​ພາຍ​ໃນ​ທີ່​ມີ​ມາດຖານ​ລະດັບ​ສາກົນ ລວມ​ເຖິງ​ມີ​ຜົນງານ​ການ​ເຂົ້າ​ຮ່ວມ​ແຂ່ງຂັນ​ລະດັບ​ນາໆຊາດ​ຫຼາຍ​ລາຍການ ເຊິ່ງ​ເປັນ​ໂອກາດ​ທີ່​ດີ​ທີ່ ​ສປປ ລາວ ກໍ​ຄື ພາກສ່ວນ​ທີ່​ກ່ຽວຂ້ອງ​ຈະ​ໄດ້​ສະແດງ​ສັກກະ​ຍະ​ພາບ ແລະ ຄວາມ​ສາດ​ມາດ​ໃນ​ການ​ເປັນ​ເຈົ້າພາບ​ງານ​ນີ້ ເພື່ອ​ຕໍ່​ຍອດ​ສູ່​ການ​ຊີງ​ສິດ​ເປັນ​ເຈົ້າພາບ​ງານ​ລະດັບ​ທະວີບ ແລະ ລະດັບ​ໂລກ​ຕໍ່​ໄປ​ໃນ​ອະນາຄົດ.

    ການ​ເປັນ​ເຈົ້າພາບ​ງານ​ຄັ້ງ​ນີ້ ຈະ​ເປັນ​ປະໂຫຍດ​ຢ່າງ​ຍິ່ງ​ໃນ​ການ​ຊຸກຍູ້-ສົ່ງເສີມ​ບຸກ​ຄະລາ​ກອນ​ເພາະ​ກາຍ​ລາວ ເປັນຕົ້ນ​ຄູ​ເຝິກ ນັກກີລາ ກຳມະການ​ຕັດສິນ ແລະ ວິຊາ​ການ​ດ້ານ​ຕ່າງໆ ເພື່ອ​ຍົກ​ລະດັບ ແລະ ບົດບາດ​ຂອງ​ຕົນ​ເອງ​ໃນ​ເວທີ​ພາກ​ພື້ນ ແລະ ສາກົນ ນອກຈາກ​ນີ້ ຍັງ​ເປັນ​ການ​ຊຸກຍູ້​ການທ່ອງທ່ຽວ ​ສປປ ລາວ ສ້າງ​ລາຍ​ຮັບ​ໃຫ້​ແກ່​ປະຊາຊົນ​ຜູ້​ປະກອບ​ການ​ທຸລະ​ກິດ​ຕ່າງໆ.

    ສຳລັບ​ການ​ແຂ່ງຂັນ​ເພາະ​ກາຍ​ຊີງ​ແຊັມ​ອາ​ຊຽນ​ຄັ້ງ​ຜ່ານ​ມາ ປີ 2019 ປະເທດ​ມຽນ​ມາ ເປັນ​ເຈົ້າພາບ ຢູ່​ນະຄອນ​ຢາງ​ກຸ້ງ ໃນ​ລະຫວ່າງ​ວັນ​ທີ 16-21 ພຶດສະພາ 2019 ເຊິ່ງ​ຜົນງານ​ຂອງ​ນັກກີລາ​ລາວ​ສົ່ງ​ເຂົ້າ 2 ຄົນ ນາງ ກອງ​ແພງ ຂຸນ​ວິໄນ ອາຍຸ 28 ປີ ລົງ​ແຂ່ງຂັນ​ໃນ​ປະເພດ​ຍິງ​ຫຸ່ນ​ງາມ (Model physique) ຄວາມ​ສູງ​ບໍ່​ເກີນ 160 ຊັງ​ຕີ​ແມັດ ເຊິ່ງ​ເປັນ​ການ​ເຂົ້າ​ຮ່ວມ​ລະດັບ​ອາ​ຊຽນ​ຄັ້ງ​ທຳ​ອິດ​ຂອງ ກອງ​ແພງ ສາມາດ​ຜ່ານ​ຮອບ​ຄັດ​ເລືອກ ເຂົ້າ​ສູ່​ຮອບ 5 ຄົນ​ສຸດ​ທ້າຍ ຫຼື ຮອບ​ຊີງ​ຊະນະ​ເລີດ ໄດ້​ອັນ​ດັບ 5 ມາ​ຄອງ ຖື​ວ່າ​ເປັນ​ຜົນງານ​ທີ່​ໜ້າ​ພໍໃຈ.

    ຂະນະ​ທີ່ ທ້າວ ນັນທະ​ລັກ ສຸ​ນາ​ເຄນ ອາຍຸ 31 ປີ ລົງ​ແຂ່ງຂັນ​ໃນ​ປະເພດ​ຊາຍ​ຫຸ່ນ​ງາມ (Men sport physique) ຄວາມ​ສູງ​ບໍ່​ເກີນ 170 ຊັງ​ຕີ​ແມັດ ເປັນ​ອີກ​ໜຶ່ງ​ນັກກີລາ​ໜ້າ​ໃໝ່ ເຖິງ​ວ່າ​ບໍ່​ຜ່ານ​ຮອບ​ຄັດ​ເລືອກ ແຕ່​ເປັນ​ປະສົບ​ການ​ທີ່​ດີ​ຂອງ ນັນທະ​ລັກ ເພື່ອ​ພັດທະນາ​ຕົນ​ເອງ​ຕໍ່​ໄປ.

ຂ່າວທີ່ກ່ຽວຂ້ອງ