ປກສ ເຜີຍແຜ່ວຽກງານຕ້ານການຟອກເງິນ

975 09 ມ.ກ. 2020 ຂ່າວໜ້າ​ໜຶ່ງ

   ກະ­ຊວງ​ປ້ອງ​ກັນ​ຄວາມ​ສະ­ຫງົບ (ປກສ) ແລະ ສຳ­ນັກ­ງານ​ຂໍ້​ມູນ​ຕ້ານ​ການ​ຟອກ​ເງິນ (ສຕຟງ) ທະ­ນາ­ຄານ​ແຫ່ງ ສປປ ລາວ  ໄດ້​ຈັດ​ເຜີຍ­ແຜ່​ວຽກ​ງານ​ການ​ຕ້ານ ສະ­ກັດ​ກັ້ນ​ການ​ຟອກ​ເງິນ ແລະ ການ​ສະ­ໜອງ​ທຶນ​ໃຫ້​ແກ່​ການ​ກໍ່​ການ​ຮ້າຍ​ຂຶ້ນ​ວັນ​ທີ 8 ມັງ­ກອນ 2020 ທີ່ ກະ­ຊວງ ປກສ ເປັນ​ປະ­ທານ​ຂອງ​ທ່ານ ພົນ​ຕີ ກົງ​ທອງ  ພົງ​ວິ­ຈິດ ຮອງ​ລັດ­ຖະ­ມົນ­ຕີ​ກະ­ຊວງ​ປ້ອງ​ກັນ​ຄວາມ​ສະ­ຫງົບ ຮອງ​ປະ­ທານ​ຄະ­ນະ​ກຳ­ມະ­ການ​ແຫ່ງ​ຊາດ​ເພື່ອ​ຕ້ານ​ການ​ຟອກ​ເງິນ ແລະ​ການ​ສະ­ໜອງ​ທຶນ​ໃຫ້​ແກ່​ການ​ກໍ່​ການ​ຮ້າຍ ມີ​ບັນ­ດາ​ນາຍ​ຕຳ­ຫຼວດ​ຈາກ​ກົມ​ກອງ​ວິ­ຊາ​ການ​ທີ່​ກ່ຽວ­ຂ້ອງ​ອ້ອມ​ຂ້າງ​ກະ­ຊວງ ພ້ອມ​ທັງ​ຄະ­ນະ​ອະ­ນຸ​ກຳ­ມະ­ການ​ຮັບ­ຜິດ­ຊອບ​ການ​ປະ​ເມີນ​ວຽກ​ງານ​ຕ້ານ​ການ​ຟອກ​ເງິນ ແລະ ການ​ສະ­ໜອງ​ທຶນ​ໃຫ້​ແກ່​ການ​ກໍ່​ການ​ຮ້າຍ​ຂອງ​ລາວ ເຂົ້າ​ຮ່ວມ.

   ການ​ເຜີຍ­ແຜ່​ຄັ້ງ​ນີ້​ເປັນ​ການ​ເປີດ​ກວ້າງ​ຄວາມ​ຮັບ​ຮູ້​ກ່ຽວ​ກັບ​ວຽກ​ງານ​ຕ້ານ​ການ​ຟອກ​ເງິນ​ຕາມ​ແຜນ​ການ­ຈັດ­ຕັ້ງ​ປະ­ຕິ­ບັດ​ຂອງ​ຄະ­ນະ​ສະ­ເພາະ​ກິດ​ແຫ່ງ​ຊາດ​ເພື່ອ​ຕ້ານ​ການ​ຟອກ​ເງິນ ແນ­ໃສ່​ສ້າງ​ຄວາມ​ຮັບ​ຮູ້​ເຂົ້າ­ໃຈ​ໃຫ້​ກັບ​ນາຍ ແລະ ພົນ​ຕຳ­ຫຼວດ​ທົ່ວ​ກະ­ຊວງ​ປ້ອງ​ກັນ​ຄວາມ​ສະ­ຫງົບ ຕໍ່​ກັບ​ຜົນ​ການ​ປະ​ເມີນ​ຄວາມ​ສ່ຽງ​ແຫ່ງ​ຊາດ ແລະ ແຜນ​ການ­ຈັດ­ຕັ້ງ​ປະ­ຕິ­ບັດ​ແກ້​ໄຂ​ໃນ­ຕໍ່­ໜ້າ ໂດຍ​ລົງ​ເລິກ​ສະ­ເພາະ​ໜ້າ​ວຽກ​ທີ່​ຕິດ​ພັນ ເປັນ­ຕົ້ນ ພັນ­ທະ​ຂອງ​ເຈົ້າ​ໜ້າ­ທີ່​ຕໍ່​ວຽກ​ງານ​ດັ່ງ­ກ່າວ ການ​ສືບ­ສວນ-ສອບ​ສວນ​ຄະ­ດີ​ຟອກ​ເງິນ ຄຽງ​ຄູ່​ກັບ​ຄະ­ດີ​ສະ­ຖານ​ການ​ກະ­ທຳ​ຜິດ​ທາງ​ອາ­ຍາ ບັນ­ດາ​ໄພ​ຂົ່ມ­ຂູ່​ທີ່​ເປັນ​ຜົນ​ມາ​ຈາກ​ການ​ປະ​ເມີນ​ຄວາມ​ສ່ຽງ​ທີ່​ຕ້ອງ​ເອົາ­ໃຈ­ໃສ່ ໃຫ້​ກັບ​ເຈົ້າ​ໜ້າ­ທີ່​ເພື່ອ​ຮັບ​ຮູ້​ເຂົ້າ­ໃຈ​ຢ່າງ​ເລິກ­ເຊິ່ງ ແລະ ສາ­ມາດ​ນຳ­ໄປ​ຜັນ​ຂະ­ຫຍາຍ​ເຂົ້າ​ໃນ​ໜ້າ­ທີ່​ຮັບ­ຜິດ­ຊອບ​ຂອງ​ຕົນ​ໄດ້​ຢ່າງ​ມີ​ປະ​ສິດ­ທິ​ຜົນ ພ້ອມ​ທັງ​ຍັງ​ເປັນ​ການ​ກະ­ກຽມ​ຄວາມ​ພ້ອມ​ໃນ​ການ​ປະ​ເມີນ​ລະ­ດັບ​ຊາດ​ວຽກ​ງານ​ຕ້ານ​ການ​ຟອກ​ເງິນ ຄັ້ງ​ທີ 2 (2020-2021).

   ທ່ານ ຈິນ­ດາ​ໄມ ວິ­ໄລ​ຫົງສ໌ ຮອງ​ຫົວ­ໜ້າ ສຕຟງ ໄດ້​ນຳ​ສະ­ເໜີ​ພາບ​ລວມ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ຕ້ານ​ການ​ຟອກ​ເງິນ ແລະ ການ​ສະ­ໜອງ​ທຶນ​ໃຫ້​ແກ່​ການ​ກໍ່​ການ​ຮ້າຍ ເປັນ­ຕົ້ນ ຂະ​ບວນ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ຕ້ານ​ການ​ຟອກ​ເງິນ​ໃນ​ລາວ​ທີ່​ປະ­ກອບ​ມີ ຄະ­ນະ​ກຳ­ມະ­ການ​ແຫ່ງ​ຊາດ ແລະ ຄະ­ນະ​ວິ­ຊາ​ການ​ຮັບ­ຜິດ­ຊອບ​ວຽກ​ງານ​ດັ່ງ­ກ່າວ​ປະ­ກອບ​ຈາກ​ແຕ່​ລະ​ພາກ­ສ່ວນ​ທີ່​ຕິດ​ພັນ 13 ກະ­ຊວງ ສິດ ແລະ ໜ້າ­ທີ່ຂອງ​ສຳ­ນັກ­ງານ​ຂໍ້​ມູນ​ຕ້ານ​ການ​ຟອກ​ເງິນ ເປັນ­ຕົ້ນ ການ​ວິ­ເຄາະ​ຂ່າວ​ກອງ ໂດຍ​ການ​ເກັບ​ກຳ​ຂໍ້​ມູນ ການ​ວິ­ເຄາະ ການ​ເຜີຍ­ແຜ່ ການ​ດຳ­ເນີນ​ຄະ­ດີ​ສະ­ຖານ​ການ​ຟອກ​ເງິນ​ຄຽງ​ຄູ່​ກັບ​ການ​ດຳ­ເນີນ​ຄະ­ດີ​ສະ­ຖານ​ຄວາມ​ຜິດ​ທາງ​ອາ­ຍາ​ຕ່າງໆ ແລະ ການ​ຕິດ­ຕາມ​ກວດ­ກາ​ບັນ­ດາ​ຫົວ­ໜ່ວຍ​ທີ່​ມີ­ໜ້າ​ທີ່​ລາຍ​ງານ ຊຸກ­ຍູ້​ໃຫ້​ບັນ­ດາ​ຫົວ­ໜ່ວຍ ທີ່​ມີ­ໜ້າ​ທີ່​ລາຍ​ງານ​ປະ­ຕິ­ບັດ​ພັນ­ທະ​ວຽກ​ງານ​ຕ້ານ​ການ​ຟອກ​ເງິນ ແລະ ການ​ສະ­ໜອງ​ທຶນ​ໃຫ້​ແກ່​ການ​ກໍ່​ການ​ຮ້າຍ ພ້ອມ​ທັງ​ການ​ກະ­ກຽມ​ການ​ປະ​ເມີນ​ຜົນ​ຮອບ­ດ້ານ​ປີ 2020-2021 ຂອງ​ລາວ.

   ການ​ຟອກ​ເງິນ​ແມ່ນ​ການ​ປ່ຽນ​ຮູບ ນຳ​ໃຊ້ ເຄື່ອນ​ຍ້າຍ ແລກ­ປ່ຽນ ໄດ້​ມາ​ຄອບ​ຄອງ ໂອນ​ກຳ­ມະ­ສິດ​ທີ່­ແທ້​ຈິງ​ຂອງ​ເງິນ ຫຼື ຊັບ​ສິນ​ອື່ນໆ ທີ່​ບຸກ­ຄົນ ນິ­ຕິ­ບຸກ­ຄົນ ຫຼື ການ­ຈັດ­ຕັ້ງ ໂດຍ​ທີ່​ຮູ້ ໄດ້​ຮູ້ ຫຼື ສົງ­ໄສ​ວ່າ ເງິນ ຫຼື ຊັບ​ສິນ​ນັ້ນ​ມາ​ຈາກ​ການ​ກະ­ທຳ​ຜິດ​ຕົ້ນ ເພື່ອ​ປົກ​ປິດ ຫຼື ຊຸກ­ເຊື່ອງ ຄຸນ​ລັກ­ສະ­ນະ ທີ່​ມາ​ຂອງ​ເງິນ ທີ່​ຕັ້ງ​ຂອງ​ຊັບ​ສິນ ເພື່ອ​ເຮັດ​ໃຫ້​ເງິນ ຫຼື ຊັບ​ສິນ​ດັ່ງ­ກ່າວ​ຖືກ­ຕ້ອງ​ຕາມ​ກົດ­ໝາຍ ແລະ ການ​ກະ­ທຳ​ທີ່​ເປັນ​ການ​ຟອກ​ເງິນ​ແມ່ນການ​ປ່ຽນ​ຮູບ ການ​ໂອນ​ເງິນ ຫຼື ຊັບ​ສິນ​ອື່ນ​ໂດຍ​ມີ​ຈຸດ­ປະ­ສົງ​ປົກ​ປິດ ຫຼື ເຊື່ອງ­ອຳ​ຜົນ​ຈາກ​ການ​ກະ­ທຳ​ຜິດ​ຕົ້ນ ໃຫ້­ການ​ຊ່ວຍ­ເຫຼືອ​ຜູ້​ກະ­ທຳ​ຜິດ​ຕົ້ນ​ເພື່ອ​ຫຼົບ​ຫຼີກ​ຈາກ​ຜົນ​ສະ­ທ້ອນ​ທາງ​ດ້ານ​ກົດ­ໝາຍ ໄພ​ຂົ່ມ­ຂູ່​ດ້ານ​ການ​ຟອກ​ເງິນ​ທີ່​ເປັນ​ບຸ­ລິ­ມະ­ສິດ​ມີ 7 ລາຍ­ການ​ຈາກ​ການ​ກະ­ທຳ​ຜິດ​ຕົ້ນ​ຈາກ 29 ລາຍ­ການ ໃນ​ນີ້​ມີ ການ​ຜະ­ລິດ ແລະ ຄ້າ­ຂາຍ​ຢາ​ເສບ​ຕິດ ການ​ປອມ​ແປງ​ແຊັກ ການ​ນຳ​ໃຊ້​ແຊັກ ຫຼື ພັນ­ທະ­ບັດ​ອື່ນ​ໂດຍ​ບໍ່​ຖືກ­ຕ້ອງ​ຕາມ​ກົດ­ໝາຍ ອາ​ຊະ​ຍາ​ກຳ​ສິ່ງ­ແວ­ດລ້ອມ ການ​ລັກ​ຊັບ​ພົນ­ລະ­ເມືອງ ການ​ປອມ​ແປງ​ເງິນ ຫຼື ການ​ໃຊ້​ເງິນ​ປອມ ການ​ປອມ​ແປງ​ເອ­ກະ­ສານ ຫຼື ການ​ໃຊ້​ເອ­ກະ­ສານ​ປອມ ແລະ ການ​ສໍ້​ໂກງ​ຊັບ​ພົນ­ລະ­ເມືອງ.

ຂ່າວທີ່ກ່ຽວຂ້ອງ