ພຸດທະສາສະນິກະຊົນ ຮ່ວມໃຈຫຼໍ່ຍອດເກດພະເຈົ້າອົງຫຼວງປາງປະທານພອນ

936 10 ມ.ກ. 2020 ຂ່າວໜ້າ​ໜຶ່ງ
ພຸດທະສາສະນິກະຊົນ ຮ່ວມໃຈຫຼໍ່ຍອດເກດພະເຈົ້າອົງຫຼວງປາງປະທານພອນ

   ພິ­ທີ​ຫຼໍ່​ຍອດ​ເກດ​ພະ​ເຈົ້າ​ອົງ​ຫຼວງ​ປາງ​ປະ­ທານ​ພອນ ຈັດ​ຂຶ້ນ​ວັນ​ທີ 9 ມັງ­ກອນ 2020 ຢູ່​ວັດ​ອົງ​ຕື້​ມະ­ຫາ​ວິ ຫານ ນະ­ຄອນ­ຫຼວງ​ວຽງ​ຈັນ (ນວ) ໂດຍ​ມີ​ທ່ານ ພັນ​ຄຳ ວິ­ພາ​ວັນ ຮອງ​ປະ­ທານ​ປະ­ເທດ ທ່ານ ບຸນ​ຕົ້ນ ຈັນ­ທະ​ພອນ ເຈົ້າ­ແຂວງ​ຊຽງ​ຂວາງ ທ່ານ ອາດ​ສະ­ພັງ​ທອງ ສີ​ພັນ​ດອນ ຮອງ​ເຈົ້າ​ຄອງ ນວ ພ້ອມ​ດ້ວຍ​ພັນ​ລະ​ຍາ​ການ ນຳ ອົງ­ການ​ພຸດ​ທະ​ສາ­ສະ­ໜາ ແລະ ຊາວ​ພຸດ​ທະ​ສາ​ສະ​ນິ​ກະ​ຊົນ​ພາຍ​ໃນ ແລະ ຕ່າງ­ປະ­ເທດ ເຂົ້າ​ຮ່ວມ.

   ທ່ານ ບຸນ​ຕົ້ນ ຈັນ­ທະ​ພອນ ກ່າວ​ວ່າ: ການ​ກໍ່­ສ້າງ​ພະ​ເຈົ້າ​ອົງ​ຫຼວງ​ປາງ​ປະ­ທານ​ພອນ ທີ່​ປະ­ດິດ­ສະ­ຖານ​ຢູ່​ທີ່​ວັດ​ໄຫ​ຫີນ​ມີ​ໄຊ​ຍາ​ຣາມ ເມືອງ​ແປກ ແຂວງ​ຊຽງ​ຂວາງ ເລີ່ມ​ກໍ່­ສ້າງ​ແຕ່​ປີ 2014 ເປັນ­ຕົ້ນ​ມາ ແລະ ໄດ້​ວາງ​ສີ​ລາ ລຶກ​ເປັນ​ທາງ​ການ ວັນ​ທີ 11 ທັນ­ວາ 2015 ໂດຍ​ການ​ນຳ­ພາ​ຂອງ​ຄະ­ນະ​ພັກ-ອົງ­ຄະ​ນະ​ພັກ​ແຂວງ ສົມ­ທົບ​ກັບ​ສູນ​ກາງ ອົງ­ການ​ພຸດ​ທະ​ສາ­ສະ­ໜາ​ສຳ­ພັນ​ລາວ ແລະ ອົງ­ການ​ພຸດ​ທະ​ສາ­ສະ­ໜາ​ແຂວງ​ຊຽງ​ຂວາງ.

   ການ​ຫຼໍ່​ຍອດ​ເກດ​ຄັ້ງ​ນີ້ ມີ​ຈຸດ­ປະ­ສົງ​ເພື່ອ​ນຳ​ເອົາ​ວັດ­ຖຸ​ປັດ​ໄຈ​ມີ­ຄ່າ ຄື: ເງິນ ຄຳ ທີ່​ໄດ້​ຮັບ​ຈາກ​ການ​ໂມ­ທະ­ນາ​ຈາກ​ເຈົ້າ­ພາບ-ເຈົ້າ​ສັດ­ທາ​ໃນ​ໄລ­ຍະ​ຜ່ານ​ມາ ເພື່ອ​ຫຼໍ່​ເປັນ​ຍອດ​ເກດ​ຂອງ​ພະ​ເຈົ້າ​ອົງ​ຫຼວງ​ປາງ​ປະ­ທານ​ພອນ ຕາມ​ຈຸດ­ປະ­ສົງ​ຂອງ​ເຈົ້າ​ສັດ­ທາ​ທັງ­ຫຼາຍ ເຊິ່ງ​ເປັນ​ການ​ຫຼໍ່​ຄັ້ງ​ສຸດ​ທ້າຍ ຄາດ​ວ່າ​ຈະ​ນຳ​ໃຊ້​ຄຳ 4 ກິ​ໂລ ຜ່ານ​ມາ​ປະ­ຕິ­ບັດ​ໄດ້ 2,6 ກິ​ໂລ ສະ­ນັ້ນ ບັນ­ດາ​ທ່ານ​ທີ່​ຢາກ​ຮ່ວມ​ໂມ­ທະ­ນາ ສາ­ມາດ​ປະ­ກອບ­ສ່ວນ​ໄດ້​ຢູ່​ວັດ​ອົງ​ຕື້ ແລະ ຢູ່​ຫ້ອງ​ວ່າ ການ​ປົກ­ຄອງ​ແຂວງ​ຊຽງ​ຂວາງ ເບີ­ໂທລະ­ສັບ 020 22344099.

   ພະ​ເຈົ້າ​ອົງ​ຫຼວງ​ປາງ​ປະ­ທານ​ພອນ ມີ​ນ້ຳ­ໜັກ 108 ໂຕນ ສູງ 24 ແມັດ ໜ້າ​ຕັກ​ກວ້າງ 16 ແມັດ ມີ​ແທ່ນ​ສູງ 14 ແມັດ ລວມ​ທັງ​ໝົດ 38 ແມັດ ເມື່ອ​ກໍ່­ສ້າງ​ສຳ­ເລັດ​ຈະ​ກາຍ­ເປັນ​ພຸດ​ທະ​ສະ­ຖານ ແລະ ສູນ​ລວມ​ດ້ານ​ຈິດ ໃຈ​ຂອງ​ພຸດ​ທະ​ສາ​ສະ​ນິ​ກະ​ຊົນ​ໃນ​ພາກ​ພື້ນ​ທີ່​ໝັ້ນ­ຄົງ ທັງ​ເປັນ​ການ​ອຸ­ທິດ​ສ່ວນ​ບຸນ​ກຸ­ສົນ​ແດ່​ດວງ​ຈິດ​ວິນ​ຍານ​ຂອງ​ນັກຮົບ​ປະ­ຕິ­ວັດ ແລະ ປະ­ຊາ­ຊົນ ທີ່​ເສຍ­ສະ­ຫຼະ​ຊີ­ວິດ​ໃນ​ພາ­ລະ­ກິດ​ຕໍ່­ສູ້​ປົດ​ປ່ອຍ­ປະ​ເທດ​ຊາດ.

ຂ່າວທີ່ກ່ຽວຂ້ອງ