ສ້າງ​ຄວາມ​ເປັນ​ເອກະ​ພາບ​ຍຸດ​ທະ​ສາດ​ລະດົມ​ທຶນ​ຊ່ວຍເຫຼືອ

531 14 ມ.ກ. 2020 ຂ່າວໜ້າ​ໜຶ່ງ
ສ້າງ​ຄວາມ​ເປັນ​ເອກະ​ພາບ​ຍຸດ​ທະ​ສາດ​ລະດົມ​ທຶນ​ຊ່ວຍເຫຼືອ

    ເພື່ອ​ເປັນ​ເອກະ​ພາບ​ຕໍ່​ຄວາມ​ສຳຄັນ ແລະ ໂຄງ​ຮ່າງ​ຍຸດ​ທະ​ສາດ​ການ​ລະດົມ​ທຶນ​ຊ່ວຍເຫຼືອ​ທາງ​ການ ເພື່ອ​ການ​ພັດທະນາ​ປີ 2030 ກະຊວງ​ແຜນການ ແລະ ການ​ລົງທຶນ (​ຜທ) ໄດ້​ຈັດ​ກອງ​ປະຊຸມ​ປືກ​ສາ​ຫາລື​ລະດັບ​ລັດຖະມົນຕີ ກ່ຽວ​ກັບ​ຮ່າງ​ຍຸດ​ທະ​ສາດ​ດັ່ງກ່າວ​ຂຶ້ນ​ວັນ​ທີ 13 ມັງກອນ 2020 ທີ່​ກະຊວງ ​ຜທ  ໂດຍ​ເປັນ​ປະທານ​ຂອງ​ທ່ານ ສອນ​ໄຊ ສີ​ພັນ​ດອນ ຮອງ​ນາຍົກລັດຖະມົນຕີ ລັດຖະມົນຕີ​ກະຊວງ ​ຜທ ມີ​ບັນດາ​ຮອງ​ລັດຖະມົນຕີ ຜູ້ຕາງໜ້າ​ຈາກ​ບັນດາ​ກະຊວງ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

    ກອງ​ປະຊຸມ​ໄດ້​ຕີ​ລາຄາ​ສະພາບ​ການ​ລະດົມ ແລະ ການ​ນຳ​ໃຊ້ ODA ໃນ​ໄລຍະ​ຜ່ານ​ມາ  ແລະ ກຳນົດ​ວິໄສ​ທັດ​ການ​ດຳເນີນ​ແຜນ​ງານ​ຂອງ​ຍຸດ​ທະ​ສາ​ດັ່ງກ່າວ ເປັນຕົ້ນ ການ​ຄຸ້ມ​ຄອງ ແລະ ນຳ​ໃຊ້​ທຶນ​ຊ່ວຍເຫຼືອ​ທາງ​ການ​ເພື່ອ​ການ​ພັດທະນາ​ຢ່າງ​ມີ​ປະ​ສິດທິ​ຜົນ ເພື່ອ​ຮັບປະກັນ​ໃຫ້​ແກ່​ການ​ສ້າງ​ຊັບ​ພະຍາ ກອນ​ມະນຸດ​ທີ່​ເຂັ້ມແຂງ ສ້າງ​ພື້ນຖານ​ໂຄງ​ລ່າງ​ທີ່​ເອື້ອ​ອຳນວຍ​ໃຫ້​ແກ່​ການ​ບໍລິການ ແລະ ການ​ຜະລິດ​ທັນ​ສະໄໝ​ທີ່​ເປັນ​ມິດ​ຕໍ່​ສິ່ງແວດລ້ອມ ເຊິ່ງ​ການ​ກຳນົດ​ທິດ​ທາງ​ໃນ​ການ​ລະດົມ​ທຶນ​ໄດ້​ແບ່ງ​ອອກ​ເປັນ​ແຕ່​ລະ​ໄລຍະ ຄື: ໄລຍະ​ປີ 2020-2021 ເປັນ​ໄລຍະ​ການ​ສຸມ​ໃສ່​ພັດທະນາ​ເພື່ອ​ໃຫ້​ລາວ​ຫຼຸດ​ພົ້ນ​ອອກ​ຈາກ​ສະຖານະ​ພາບ​ປະເທດ​ດ້ອຍ​ພັດທະນາ ໄລຍະ​ປີ 2020-2024 ເປັນ​ໄລຍະ​ຮັບປະກັນ​ການ​ຫຼຸດ​ພົ້ນ​ອອກ​ຈາກ​ປະເທດ​ດ້ອຍ​ພັດທະນາ​ຢ່າງ​ຖາວອນ ແລະ ໄລຍະ​ປີ 2025-2030 ໄລຍະ​ການ​ກະກຽມ​ຄວາມ​ພ້ອມ​ໃຫ້​ປະເທດ​ຊາດ​ບັນລຸ​ລາຍ​ຮັບ​ປານ​ກາງ ແລະ ບັນລຸ​ເປົ້າ​ໝາຍ​ພັດທະນາ​ທີ່​ຍືນ​ຍົງ.

   ສຳລັບ​ບຸລິມະສິດ​ໃນ​ແຕ່​ລະ​ໄລຍະ ແມ່ນ​ເລັ່ງ​ໃສ່​ການ​ປະຕິບັດ​ແຜນ​ງານ​ດ້ານ​ເສດຖະກິດ-ສັງຄົມ ສິ່ງແວດລ້ອມ ແລະ ວຽກ​ງານ​ປິ່ນ​ອ້ອມ​ອື່ນໆ​ທີ່​ກ່ຽວຂ້ອງ​ສະເພາະ​ໃນ​ດ້ານ​ເສດຖະກິດ ຈະ​ສຸມ​ໃສ່​ການ​ຂະຫຍາຍ​ຕາ​ຂ່າຍ​ໄຟຟ້າ ປັບປຸງ​ພື້ນຖານ​ໂຄງ​ລ່າງ ເສັ້ນທາງ​ຫຼວງ​ແຫ່ງ​ຊາດ  ແລະ ທາງ​ລົດໄຟ ສ້າງ​ຄວາມ​ເຂັ້ມແຂງ​ຂະແໜງການ​ເງິນ​ພາກ​ລັດ ປັບປຸງ​ແຜນການ ແລະ ກົນ​ໄກ​ໃນ​ການ​ເຂົ້າ​ເຖິງ​ແຫຼ່ງ​ທຶນ ສົ່ງເສີມ SME ພັດທະນາ ແລະ ສ້າງ​ລະບົບ​ການ​ຂົນສົ່ງ ສົ່ງເສີມ ແລະ ພັດທະນາ​ການທ່ອງທ່ຽວ​ແບບ​ອະນຸ​ຮັກ​ທຳ​ມະ​ຊາດ ແລະ ເຊື່ອມ​ໂຍງ ປັບປຸງ​ສະພາບ​ແວດ​ລ້ອມ​ໃນ​ການ​ດຳເນີນ​ທຸລະ​ກິດ ຫຼຸດຜ່ອນ​ຕົ້ນ​ທຶນ​ດ້ານ​ການ​ຄ້າ ແລະ ສົ່ງເສີມ​ການ​ເຂົ້າ​ສູ່​ຕະຫຼາດ​ໃຫ້​ຫຼາຍ​ຂຶ້ນ.

ຂ່າວທີ່ກ່ຽວຂ້ອງ