ຂະແໜງ​ສ່ວຍ​ສາ​ອາກອນ ເກັບ​ລາຍ​ຮັບ​ໄດ້​ຫຼາຍ​ກວ່າ 11 ພັນ​ຕື້​ກີບ

498 14 ມ.ກ. 2020 ຂ່າວໜ້າ​ໜຶ່ງ
ຂະແໜງ​ສ່ວຍ​ສາ​ອາກອນ ເກັບ​ລາຍ​ຮັບ​ໄດ້​ຫຼາຍ​ກວ່າ 11 ພັນ​ຕື້​ກີບ

   ກອງ​ປະຊຸມ​ສະຫຼຸບ​ຕີ​ລາຄາ​ວຽກ​ງານ​ສ່ວຍ​ສາ​ອາກອນ ປະຈຳ​ປີ 2019 ແລະ ທິດ​ທາງ​ແຜນການ ປີ 2020 ຈັດ​ຂຶ້ນ​ວັນ​ທີ 13-14 ມັງກອນ 2020 ທີ່​ກົມ​ສ່ວຍ​ສາ​ອາກອນ ເປັນ​ປະທານ​ຂອງ​ທ່ານ ພູ​ທະນູ​ເພັດ ໄຊ​ສົມບັດ ຫົວໜ້າ​ກົມ​ສ່ວຍ​ສາ​ອາກອນ ມີ​ທ່ານ ສົມ​ດີ ດວງ​ດີ ຮອງ​ນາຍົກລັດຖະມົນຕີ ລັດຖະມົນຕີ​ກະຊວງ​ການ​ເງິນ ບັນດາ​ຮອງ​ຫົວໜ້າ​ກົມ ຫົວໜ້າ​ພະ​ແນກ​ສ່ວຍ​ສາ​ອາກອນ​ທົ່ວ​ປະເທດ ແລະ ພະນັກງານ​ກ່ຽວຂ້ອງ​ເຂົ້າ​ຮ່ວມ.

    ທ່ານ ພູ​ທະນູ​ເພັດ ໄຊ​ສົມບັດ ກ່າວ​ວ່າ: ປີ 2019 ຂະແໜງ​ສ່ວຍ​ສາ​ອາກອນ ໄດ້​ປະຕິບັດ​ເກັບ​ລາຍ​ຮັບ​ສ່ວຍ​ສາ​ອາກອນ​ໃນ​ເງື່ອນໄຂ​ມີ​ທັງ​ຂໍ້​ສະດວກ ແລະ ຂໍ້​ຫຍຸ້ງຍາກ ສິ່ງ​ທ້າ​ທາຍ​ທົດ​ສອບ​ທີ່​ເປັນ​ອຸປະສັກ​ຕໍ່​ການ​ປະຕິບັດ​ໜ້າທີ່​ວິຊາ​ສະເພາະ ໂດຍ​ໄດ້​ສຸມ​ໃສ່​ຍົກ​ສູງ​ປະສິດທິພາບ​ໃນ​ການຈັດຕັ້ງ​ປະຕິບັດ​ການ​ຈັດ​ເກັບ​ໃຫ້​ຄົບ​ຖ້ວນ ຖືກຕ້ອງ​ຕາມ​ກົດໝາຍ ແລະ ທັນ​ເວລາ ຫັນ​ການ​ຄຸ້ມ​ຄອງ​ຖານ​ຫົວໜ່ວຍ​ທຸລະ​ກິດ ຖານ​ລາຍ​ຮັບ ແລະ ການ​ຊຳລະ​ເຂົ້າ​ສູ່​ລະບົບ​ທັນ​ສະໄໝ ຜ່ານ​ລະບົບ​ທະນາຄານ ປັບປຸງ​ກົນ​ໄກ​ການ​ຄຸ້ມ​ຄອງ​ບໍລິສັດ​ນຳ​ເຂົ້າ​ນ້ຳມັນ​ເຊື້ອ​ໄຟ ພາຫະນະ ແລະ ສິນຄ້າ​ຕົ້ນຕໍ ໃຫ້​ສາມາດ​ຄຸ້ມ​ຄອງ​ແຕ່​ການ​ສະໜອງ​ຕົ້ນ​ທາງ​ຮອດ​ຂອດ​ຈຳໜ່າຍ ປັບປຸງ​ການ​ເກັບ​ອາກອນ​ຊົມໃຊ້​ຈາກ​ເຄື່ອງ​ດື່ມ​ທີ່​ມີ​ທາດ​ເຫຼົ້າ ຢາສູບ​ໃຫ້​ຍຸຕິ​ທຳ​ສຳລັບ​ຜູ້​ຜະລິດ​ພາຍ​ໃນ ແລະ ຜູ້ນຳ​ເຂົ້າ ຜັນ​ຂະຫຍາຍ​ການ​ປະຕິ​ຮູບ​ຂະແໜງ​ສ່ວຍ​ສາ​ອາກອນ​ໄປ​ຕາມ 4 ແຜນ​ງານ​ໃຫຍ່ ແລະ 11 ໂຄງການ ສາມາດ​ສ້າງ ແລະ ປັບປຸງ​ກົດໝາຍ​ໄດ້ 3 ສະບັບ ແລະ ນິຕິ​ກຳ​ລຸ່ມ​ກົດໝາຍ​ຈຳນວນ​ຫຼາຍ​ສະບັບ ເພີ່ມ​ປະສິດທິພາບ​ໃນ​ການ​ປັບປຸງ​ລະບົບ ແລະ ກົນ​ໄກ​ເກັບ​ລາຍ​ຮັບ​ໃຫ້​ໄດ້​ສູງ​ຂຶ້ນ ເພີ່ມ​ປະສິດທິພາບ​ໃນ​ການ​ບໍລິຫານ​ຄວາມ​ສ່ຽງ ປັບປຸງ​ວຽກ​ງານ​ການ​ແຈ້ງ​ລາຍ​ຮັບ​ໃນ​ການ​ຕິດຕາມ​ກວດກາ ການ​ປະຕິບັດ​ພັນທະ​ຜູ້​ເສຍ​ອາກອນ​ໃຫ້​ສອດຄ່ອງ​ກັບ​ລະບຽບ​ກົດໝາຍ ສືບຕໍ່​ຜັນ​ຂະຫຍາຍ​ການ​ນຳ​ໃຊ້​ລະບົບ​ການ​ຈັດ​ເກັບ​ລາຍ​ຮັບ​ສ່ວຍ​ສາ​ອາກອນ​ຜ່ານ​ລະບົບ TaxRIS ໄດ້​ທັງ​ໝົດ 18 ແຂວງ 10 ເມືອງ ຫັນ​ການ​ຊຳລະ​ຄ່າ​ທຳນຽມ​ທາງ ພາສີ​ທີ່​ດິນ​ຜ່ານ​ລະບົບ​ທະນາຄານ ເພີ່ມ​ປະສິດທິພາບ​ໃຫ້​ເສຍ​ພັນທະ​ຊຳລະ​ເງິນ​ຜ່ານ​ທະນາຄານ​ຫຼາຍ​ຂຶ້ນ ຜ່ານ​ປ່ອງ​ບໍລິການ  ເຊິ່ງ​ຂະ​ບວນ​ການ​ສົ່ງເສີມ​ການ​ແຈ້ງ​ລາຍ​ຮັບ ແລະ ມອບ​ລາຍ​ຮັບ​ດ້ວຍ​ຕົນ​ເອງ​ຜ່ານ​ລະບົບ​ທະນາຄານ ກວມ 80% ຂອງ​ລາຍ​ຮັບ​ສ່ວຍ​ສາ​ອາກອນ ປີ 2019.

    ຜ່ານ​ການຈັດຕັ້ງ​ປະຕິບັດ​ບັນດາ​ມາດ​ຕະການ​ຕ່າງໆ​ທີ່​ກຳນົດ​ໄວ້​ແຕ່​ຕົ້ນ​ປີ​ສາມາດ​ປະຕິບັດ​ລາຍ​ຮັບ​ສ່ວຍ​ສາ​ອາກອນ​ໄດ້ 11.422 ຕື້​ກີບ ເທົ່າ​ກັບ 92,72% ຂອງ​ແຜນການ​ປີ (ຕົວ​ເລກ​ເບື້ອງ​ຕົ້ນ​ບໍ່​ທັນ​ສະຫຼຸບ​ຂາດ​ຕົວ) ທຽບໃສ່​ໄລຍະ​ດຽວ​ກັນ​ຂອງ​ປີຜ່ານມາ​ເພີ່ມ​ຂຶ້ນ 580 ຕື້​ກີບ ເທົ່າ​ກັບ 5,8% ໃນ​ນີ້ ກົມ​ສ່ວຍ​ສາ​ອາກອນ​ເກັບ​ໄດ້ 6.658,29 ຕື້​ກີບ ເທົ່າ​ກັບ 88,61% ຂອງ​ແຜນການ​ປີ ທຽບໃສ່​ປີຜ່ານມາ​ເພີ່ມ​ຂຶ້ນ 9,10% ບັນດາ​ແຂວງ ນະຄອນຫຼວງ​ເກັບ​ໄດ້ 4.764,35 ຕື້​ກີບ ເທົ່າ​ກັບ 99,09% ຂອງ​ແຜນການ​ປີ ທຽບໃສ່​ປີຜ່ານມາ​ເພີ່ມ​ຂຶ້ນ 0,5% ເຊິ່ງ​ເຫັນ​ວ່າ​ຫຼາຍ​ທ້ອງຖິ່ນ​ສາມາດ​ປະຕິບັດ​ໄດ້​ຕາມ​ແຜນການ ລື່ນ​ແຜນການ ແລະ ຫຼາຍ​ທ້ອງຖິ່ນ​ບໍ່​ສາມາດ​ບັນລຸ​ຕາມ​ແຜນການ​ສາເຫດ​ຈາກ​ຫຼາຍ​ປັດ​ໄຈ.

    ສຳລັບ​ແຜນການ ແລະ ຄາດໝາຍ​ສູ້​ຊົນ​ປີ 2020 ຈຳນວນ 13.590 ຕື້​ກີບ ເທົ່າ​ກັບ 7,8% ຂອງ​ລວມ​ຍອດ​ຜະລິດ​ຕະ​ພັນ​ພາຍ​ໃນ (GDP) ທຽບໃສ່​ແຜນການ​ປີຜ່ານມາ​ເພີ່ມ​ຂຶ້ນ 13,2% ໃນ​ນີ້ ກົມ​ສ່ວຍ​ສາ​ອາກອນ​ຄາດ​ຄະເນ 8.650 ຕື້​ກີບ ເທົ່າ​ກັບ 4,84% ຂອງ GDP ທຽບໃສ່​ປີຜ່ານມາ​ເພີ່ມ​ຂຶ້ນ 15,15% ສ່ວນ​ທ້ອງຖິ່ນ​ປະມານ 5.300 ຕື້​ກີບ ເທົ່າ​ກັບ 2,96% ຂອງ GDP ທຽບໃສ່​ປີຜ່ານມາ​ເພີ່ມ​ຂຶ້ນ 10,23% ພ້ອມ​ດຽວ​ກັນ​ນີ້ ຂະແໜງການ​ອື່ນໆ​ຈະ​ເອົາໃຈໃສ່​ສືບຕໍ່​ປັບປຸງ​ໃຫ້​ດີ​ຂຶ້ນ.

ຂ່າວທີ່ກ່ຽວຂ້ອງ