ອາ​ເມ​ຣິ​ກາ ສະໜັບສະໜູນ​ສະກັດ​ກັ້ນ ແລະ ຕ້ານ​ການ​ຄ້າ​ມະນຸດ

514 14 ມ.ກ. 2020 ຂ່າວໜ້າ​ໜຶ່ງ
ອາ​ເມ​ຣິ​ກາ ສະໜັບສະໜູນ​ສະກັດ​ກັ້ນ ແລະ ຕ້ານ​ການ​ຄ້າ​ມະນຸດ

    ລັດຖະບານ​ສະຫະລັດ​ອາ​ເມ​ຣິ​ກາ ສະໜັບສະໜູນ​ທຶນ 2,3 ລ້ານ​ໂດ​ລາ​ສະຫະລັດ  ຫຼື  ປະມານ 20,3 ຕື້​ກີບ ເຂົ້າ​ໃນ​ໂຄງການ​ຫຼຸດຜ່ອນ​ຄວາມ​ສ່ຽງ​ຈາກ​ການ​ຄ້າ​ມະນຸດ ພິທີ​ເຊັນ​ບົດ​ບັນທຶກ​ຄວາມ​ເຂົ້າໃຈ ຈັດ​ຂຶ້ນ​ວັນ​ທີ 13 ມັງກອນ 2020 ທີ່​ໂຮງແຮມ​ລາວ​ພລາ​ຊາ ນະຄອນຫຼວງ​ວຽງ​ຈັນ ລະຫວ່າງ ທ່ານ ວິໄລ​ພົງ ສີ​ສົມ​ຫວັງ ຫົວໜ້າ​ກົມ​ສັງຄົມ​ສົງເຄາະ ກະຊວງ​ແຮງ​ງານ ແລະ ສະຫວັດດີ​ການ​ສັງຄົມ ແລະ ທ່ານ ນາງ ຊູ​ກຽດ ປັນຍາ​ນຸ​ວົງ ຫົວໜ້າ​ໂຄງການ​ຕ້ານ​ການ​ຄ້າ​ມະນຸດ (CTIP program) ມີ​ທ່ານ​ນາງ ໃບ​ຄຳ ຂັດ​ທິ​ຍະ ຮອງ​ລັດຖະມົນຕີ​ກະຊວງ​ແຮງ​ງານ ແລະ ສະຫວັດດີ​ການ​ສັງຄົມ ທ່ານ ນາງ ຣີ​ນາ ບິດ​ເຕີ ເອກ​ອັກ​ຄະ​ລັດ​ຖະ​ທູດ​ສະຫະລັດ​ອາ​ເມ​ຣິ​ກາ ປະຈຳ​ລາວ ພ້ອມ​ດ້ວຍ​ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

    ໂຄງການ​ຫຼຸດຜ່ອນ​ຄວາມ​ສ່ຽງ​ຈາກ​ການ​ຄ້າ​ມະນຸດ ມີ​ໄລຍະ​ຈັດ​ຕັ້ງ​ປະຕິບັດ 4 ປີ (2019-2022) ໄດ້​ເລີ່ມ​ມາ​ແລ້ວ 2 ປີ ເຊິ່ງ​ເປັນ​ໄລຍະ​ສືບຕໍ່​ໂຄງການ​ຈະ​ຈັດ​ຕັ້ງ​ປະຕິບັດ​ຢູ່​ໃນ​ນະຄອນຫຼວງ​ວຽງ​ຈັນ ແຂວງ​ສະຫວັນ​ນະ​ເຂດ ຈຳປາ​ສັກ ແລະ ແຂວງ​ສາລະ​ວັນ ຈຸດປະສົງ​ຫຼຸດຜ່ອນ​ການ​ຄ້າ​ມະນຸດ ໂດຍ​ການ​ສົ່ງເສີມ​ຄວາມ​ເຂັ້ມແຂງ​ໃຫ້​ພະນັກງານ​ລັດ ຜູ້​ບັງຄັບ​ໃຊ້​ກົດໝາຍ ອຳນາດ​ການ​ປົກຄອງ​ທ້ອງຖິ່ນ​ໃນ​ການ​ປະຕິບັດ​ໜ້າທີ່​ສະກັດ​ກັ້ນ ແລະ ຕ້ານ​ທຸກ​ຮູບ​ແບບ​ຂອງ​ການ​ຄ້າ​ມະນຸດ ແລະ ເພີ່ມ​ທະວີ​ການ​ຊ່ວຍເຫຼືອ​ຜູ້​ຖືກ​ເຄາະ​ຮ້າຍ​ໃຫ້​ສາມາດ​ເຂົ້າ​ເຖິງ​ການ​ບໍລິການ​ຕ່າງໆ ລວມ​ທັງ​ໂອກາດ​ທາງ​ດ້ານ​ເສດຖະກິດ ການ​ສ້າງ​ອາຊີບ ແລະ ວຽກ​ເຮັດ​ງານ​ທຳ​ໃຫ້​ກັບ​ກຸ່ມ​ເປົ້າ​ໝາຍ.

    ທ່ານ ນາງ ຣີ​ນາ ບິດ​ເຕີ  ກ່າວ​ວ່າ: ການ​ຢຸດຕິ​ການ​ຄ້າ​ມະນຸດ​ຖື​ເປັນ​ບຸລິມະສິດ​ສຳຄັນ​ຂອງ​ສະຫະລັດ​ອາ​ເມ​ຣິ​ກາ ແລະ ເປັນ​ເປົ້າ​ໝາຍ​ດຽວ​ກັບ​ລັດຖະບານ​ລາວ  ລັດຖະບານ​ສະຫະລັດ​ອາ​ເມ​ຣິ​ກາ ຍິນ​ດີ​ໃຫ້ການ​ສະໜັບສະໜູນ​ລັດຖະບານ​ລາວ​ໃນ​ວຽກ​ງານ​ສະກັດ​ກັ້ນ ແລະ ຕ້ານ​ການ​ຄ້າ​ມະນຸດ ແລະ ຈະ​ສືບຕໍ່​ເພີ່ມ​ທະວີ​ຮ່ວມ​ມື​ຊ່ວຍເຫຼືອ ແລະ ເສີມ​ສ້າງ ​ສປປ ລາວ ໃຫ້​ມີ​ຄວາມ​ເຂັ້ມແຂງ ໝັ້ນຄົງ ແລະ ສາມາດ​ບັນລຸ​ຕາມ​ເປົ້າ​ໝາຍ​ການ​ພັດທະນາ​ແບບ​ຍືນ​ຍົງ.

ຂ່າວທີ່ກ່ຽວຂ້ອງ