ຄາດ​ວ່າ​ຈະ​ມີ​ການ​ຊື້-ຂາຍ​ຜະລິດ​ຕະ​ພັນ​ເຟີ​ນີ​ເຈີ​ໄມ້ ປະມານ 16 ຕື້​ກີບ

533 14 ມ.ກ. 2020 ຂ່າວໜ້າ​ໜຶ່ງ
ຄາດ​ວ່າ​ຈະ​ມີ​ການ​ຊື້-ຂາຍ​ຜະລິດ​ຕະ​ພັນ​ເຟີ​ນີ​ເຈີ​ໄມ້ ປະມານ 16 ຕື້​ກີບ

     ພິທີ​ເປີດ​ງານ​ວາງສະແດງ​ຜະລິດ​ຕະ​ພັນ​ເຟີ​ນີ​ເຈີ​ໄມ້​ລາວ ຄັ້ງ​ທີ VI ຈັດ​ຂຶ້ນ​ວັນ​ທີ 13 ມັງກອນ 2020 ທີ່​ສູນ​ການ​ຄ້າ​ລາວ-ໄອ​ເຕັກ ນະຄອນຫຼວງ​ວຽງ​ຈັນ ເປັນ​ປະທານ​ຂອງ​ທ່ານ ກອງ​ມາລາ ພົມມາ​ໄລ ຮອງ​ປະທານ​ເຟີ​ນີ​ເຈີ​ລາວ ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ນາງ ເຂັມ​ມະນີ ພົນ​ເສນາ ລັດຖະມົນຕີ​ກະຊວງ​ອຸດສາຫະກຳ ແລະ ການ​ຄ້າ ພ້ອມ​ດ້ວຍ​ຫົວໜ່ວຍ​ທຸລະ​ກິດ ຜູ້​ປະກອບ​ການ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

    ທ່ານ ກອງ​ມາລາ ພົມມາ​ໄລ ກ່າວ​ວ່າ: ງານ​ວາງສະແດງ​ຜະລິດ​ຕະ​ພັນ​ເຟີ​ນີ​ເຈີ​ໄມ້​ລາວ ຄັ້ງ​ທີ VI ຈັດ​ຂຶ້ນ​ວັນ​ທີ 11-19 ມັງກອນ 2020 ທີ່​ສູນ​ການ​ຄ້າ​ລາວ-ໄອ​ເຕັກ ປະກອບ​ມີ​ຫ້ອງ​ວາງສະແດງ-ຂາຍ​ສິນຄ້າ​ທັງ​ໝົດ 150 ຫ້ອງ ໃນ​ນັ້ນ ມີ 66 ຫົວໜ່ວຍ​ທຸລະ​ກິດ 25 ຫົວໜ່ວຍ​ຜະລິດ​ຕະ​ພັນ​ໂອ​ດ໋ອບ ມາ​ຈາກ​ຕ່າງ​ແຂວງ 11 ຫົວໜ່ວຍ​ທຸລະ​ກິດ​ມີ 13 ຫ້ອງ ຈາກ 8 ແຂວງ​ທົ່ວ​ປະເທດ ນອກ​ນັ້ນ ຍັງ​ມີ 2 ບໍລິສັດ ຈາກ​ປະເທດ​ໄທ ເຊິ່ງ​ຄາດ​ຄະເນ​ຈະ​ມີ​ມູນ​ຄ່າ​ຈໍ​ລະ​ຈອນ​ຊື້-ຂາຍ​ສິນຄ້າ​ລວມ​ທັງ​ໝົດ​ໃນ​ງານ ປະມານ 20 ຕື້​ກີບ ແລະ ຄາດ​ວ່າ​ຈະ​ມີ​ການ​ຊື້-ຂາຍ​ໄດ້ ປະມານ 80% ລວມ​ມູນ​ຄ່າ 16 ຕື້​ກີບ.

    ນອກຈາກ​ນີ້ ງານ​ວາງສະແດງ​ຍັງ​ມີ​ພາກສ່ວນ​ອື່ນໆ​ເຂົ້າ​ຮ່ວມ​ສ້າງ​ກິດຈະກຳ​ຕ່າງໆ ເປັນຕົ້ນ ສະ​ຖາ​ບັນ​ວິຈິດ​ສິນ​ແຫ່ງ​ຊາດ ສະ​ຖາ​ບັນ​ພັດທະນາ​ອາຊີວະ​ສຶກ​ສາ ສະ​ຖາ​ບັນ​ພັດທະນາ​ກຳມະບານ​ລາວ ສະພາ​ທີ່​ປຶກສາ​ອາຊີວະ​ສຶກ​ສາ ແລະ ພັດທະນາ​ສີມື​ແຮງ​ງານ ໂຮງຮຽນ​ເຕັກນິກ​ແຂວງ​ວຽງ​ຈັນ ແລະ ໂຄງການ IV-JAPAN ພ້ອມ​ທັງ​ການສະແດງ​ສິລະ​ປະ​ວັນນະຄະດີ​ຕ່າງໆ ແລະ ຈັບ​ສະຫຼາກ​ມອບ​ລາງວັນ.

    ສຳລັບ​ຈຸດປະສົງ​ການ​ຈັດ​ງານ​ຄັ້ງ​ນີ້ ເພື່ອ​ເປັນ​ການ​ໂຄສະນາ​ເຟີ​ນີ​ເຈີ​ໄມ້​ລາວ ເປັນ​ການ​ແລກປ່ຽນ​ບົດຮຽນ ແລະ ປະສົບ​ການ​ດ້ວຍ​ກັນ​ຂອງ​ຫົວໜ່ວຍ​ທຸລະ​ກິດ ຫົວໜ່ວຍ​ການ​ຜະລິດ​ເຟີ​ນີ​ເຈີ ເຮັດ​ໃຫ້​ມີ​ຜະລິດ​ຕະ​ພັນ​ເຟີ​ນີ​ເຈີ​ຈາກ​ໄມ້​ລາວ​ອອກ​ມາ​ຮັບ​ໃຊ້​ສັງຄົມ​ໃຫ້​ຫຼາຍ​ຂຶ້ນ ທັງ​ເປັນ​ການສະແດງ​ຜົນງານ​ຜະລິດ​ຕະ​ພັນ​ເຟີ​ນີ​ເຈີ​ທີ່​ໄດ້​ໃຊ້​ຫົວຄິດ​ປະດິດ​ສ້າງ​ໂດຍ​ໃຊ້​ນາຍ​ຊ່າງ​ທີ່​ມີ​ຄວາມ​ຊຳນິ​ຊຳນານ ແລະ ຄວາມ​ປານີດ ສາມາດ​ສ້າງ​ໄດ້​ຫຼາຍ​ຜະລິດ​ຕະ​ພັນ ຫຼາຍ​ຮູບ​ແບບ​ໃຫ້​ສາມາດ​ມາ​ເລືອກ​ຊື້ ແລະ ຊົມໃຊ້​ໄດ້.

ຂ່າວທີ່ກ່ຽວຂ້ອງ