ສ້າງ​ຄວາມ​ເຂົ້າໃຈ​ກ່ຽວ​ກັບ​ວຽກ​ງານຕ້ານ​ການ​ຟອກ​ເງິນ ໃຫ້​ສື່​ມວນ​ຊົນ

660 14 ມ.ກ. 2020 ຂ່າວໜ້າ​ໜຶ່ງ
ສ້າງ​ຄວາມ​ເຂົ້າໃຈ​ກ່ຽວ​ກັບ​ວຽກ​ງານຕ້ານ​ການ​ຟອກ​ເງິນ ໃຫ້​ສື່​ມວນ​ຊົນ

     ກອງ​ປະຊຸມ​ເຜີຍແຜ່​ວຽກ​ງານ​ຕ້ານ​ການ​ຟອກ​ເງິນ ແລະ ການ​ສະໜອງ​ທຶນ ໃຫ້​ແກ່​ການ​ກໍ່​ການ​ຮ້າຍ (AML/CFT) ໃຫ້​ແກ່​ພາກສ່ວນ​ກະຊວງ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ (ຖວ​​ທ) ແລະ ສື່​ມວນ​ຊົນ​ຕ່າງໆ​ຈັດ​ຂຶ້ນ​ວັນ​ທີ 13 ມັງກອນ 2020 ຢູ່​ທະນາຄານ​ແຫ່ງ ​ສປປ ລາວ ໂດຍ​ເປັນ​ປະທານ​ຂອງ​ທ່ານ ພຸດ​ທະ​ໄຊ ສີວິໄລ ຮອງ​ຜູ້​ວ່າການ​ທະນາຄານ​ແຫ່ງ ​ສປປ ລາວ ແລະ ທ່ານ ສະຫວັນ​ຄອນ ຣາ​​ຊ​ມຸນຕີ ຮອງ​ລັດຖະມົນຕີ​ກະຊວງ ຖວ​​ທ.

   ທ່ານ ພຸດ​ທະ​ໄຊ ສີວິໄລ ກ່າວ​ວ່າ: ວຽກ​ງານ​ດັ່ງກ່າວ ເປັນ​ວຽກ​ໜຶ່ງ​ທີ່​ມີ​ຄວາມ​ສຳຄັນ​ຕໍ່​ສະພາບ​ການ​ດຳເນີນ​ເສດຖະກິດ​ໃນ​ປະເທດ ​ສປປ ລາວ ກໍ​ຄື ລັດຖະບານ​ໄດ້​ເລັງ​ເຫັນ​ຄວາມ​ສຳຄັນ ແລະ ໄດ້​ສ້າງ​ຄະນະ​ກຳມະການ​ລະດັບ​ຊາດ​ຂຶ້ນ ໂດຍ​ປະກອບ​ມີ ທ່ານ ສົມ​ດີ ດວງ​ດີ ຮອງ​ນາຍົກລັດຖະມົນຕີ ເປັນ​ປະທານ ແລະ ຍັງ​ໄດ້​ປະກອບ​ມີ​ລັດຖະມົນຕີ ແລະ ຮອງ​ລັດຖະມົນຕີ ຈາກ 13 ກະຊວງ ແລະ ທຽບ​ເທົ່າ​ເຂົ້າ​ຮ່ວມ​ໃນ​ຄະນະ ເພື່ອ​ສຸມ​ໃສ່​ຈັດ​ຕັ້ງ​ປະຕິບັດ​ວຽກ​ງານ​ດັ່ງກ່າວ​ນີ້​ບົນ​ພື້ນຖານ​ເງື່ອນໄຂ 40 ຂໍ້​ແນະນຳ​ຂອງ​ສາກົນ​ທີ່ ​ສປປ ລາວ ເປັນ​ພາຄີ.

     ໃນ​ໄລຍະ​ຜ່ານ​ມາ ​ສປປ ລາວ ໄດ້​ຮັບ​ການ​ປະ​ເມີນ​ຜົນ​ຮອບດ້ານ​ຄັ້ງ​ທຳ​ອິດ​ໃນ​ປີ 2010 ເຊິ່ງ​ຜົນ​ການ​ປະ​ເມີນ​ໃນ​ຄັ້ງ​ນັ້ນ ​ສປປ ລາວ ແມ່ນ​ຕົກ​ຢູ່​ໃນ​ບັນຊີ​ເທົາ ເຮັດ​ໃຫ້ ​ສປປ ລາວ ພົບ​ກັບ​ຄວາມ​ຫຍຸ້ງຍາກ​ຫຼາຍ​ດ້ານ ເປັນຕົ້ນ ລະບົບ​ໃນ​ການ​ຊຳລະ​ເງິນ​ກັບ​ສາກົນ​ຖືກ​ຈຳກັດ ບໍ່​ສາມາດ​ໂອນ​ໄປ​ຊຳລະ​ຄ່າ​ສິນຄ້າ-ບໍລິການ ພາບ​ພົດ​ຂອງ​ປະເທດ​ທີ່​ສາກົນ​ເບິ່ງ ​ສປປ ລາວ ແມ່ນ​ເປັນ​ປະເທດ​ທີ່​ມີ​ຄວາມ​ສ່ຽງ​ດ້ານ​ຟອກ​ເງິນ ແລະ ສະໜອງ​ທຶນ ໃຫ້​ແກ່​ການ​ກໍ່​ການ​ຮ້າຍ ນັກ​ລົງທຶນ​ຕ່າງປະເທດ​ຫຼຸດ​ລົງ ແລະ ບັນຫາ​ອື່ນໆ ເຖິງ​ຢ່າງໃດ​ກໍ​ດີ ​ສປປ ລາວ ໄດ້​ສູ້​ຊົນ​ປັບປຸງ​ແກ້​ໄຂ​ຂໍ້ຄົງຄ້າງ​ຕ່າງໆ ເປັນຕົ້ນ ອອກ​ບັນດາ​ນິຕິ​ກຳ​ທີ່​ຕິດ​ພັນ ຈຳນວນ 24 ສະບັບ ເພື່ອ​ເປັນ​ບ່ອນ​ອີງ​ໃນ​ການຈັດຕັ້ງ​ປະຕິບັດ​ວຽກ​ງານ​ຕ້ານ​ການ​ຟອກ​ເງິນ​ໃຫ້​ສອດຄ່ອງ​ຕາມ​ມາດຕະຖານ​ສາກົນ ສ້າງ​ກົນ​ໄກ ແລະ ຂັ້ນ​ຕອນ​ຕ່າງໆ ປະຕິບັດ​ໃຫ້​ເກີດ​ປະ​ສິດທິ​ຜົນ​ຕາມ​ນິຕິ​ກຳ​ທີ່​ວາງ​ອອກ​ໄດ້​ຈຳນວນ​ໜຶ່ງ ມາ​ຮອດ​ປີ 2017 ຈຶ່ງ​ເຮັດ​ໃຫ້ ​ສປປ ລາວ ສາມາດ​ອອກ​ຈາກ​ບັນຊີ​ເທົາ​ຂອງ​ສາກົນ.

  ເພື່ອ​ກະກຽມ​ການ​ປະ​ເມີນ​ຜົນ​ຮອບດ້ານ​ຄັ້ງ​ທີ 2 ໃນ​ສົກ​ປີ 2020-2021 ພ້ອມ​ດຽວ​ກັນ​ນີ້ ລັດຖະບານ​ໄດ້​ສ້າງຕັ້ງ​ຄະນະ​ສະເພາະ​ກິດ​ຂຶ້ນ ເຊິ່ງ​ນຳ​ໂດຍ​ທ່ານ​ລັດຖະມົນຕີ ແລະ ຮອງ​ລັດຖະມົນຕີ ຈຳນວນ 25 ທ່ານ ປະກອບ​ມີ​ຢູ່​ໃນ​ຄະນະ​ກຳມະການ ແລະ ໄດ້​ແບ່ງ​ອອກ​ເປັນ 4 ກຸ່ມ​ວຽກ ຄື: ວຽກ​ງານ​ເຜີຍແຜ່ ແລະ ເຊື່ອມ​ຊຶມ ວຽກ​ງານ​ນິຕິ​ກຳ ແລະ ກົນ​ໄກ ວຽກ​ງານ​ຄຸ້ມ​ຄອງ ແລະ ວຽກ​ງານ​ການ​ດຳເນີນ​ຄະດີ ໃນ​ນັ້ນ ສຳລັບ​ກຸ່ມ​ວຽກ​ງານ​ເຜີຍແຜ່ ແລະ ເຊື່ອມ​ຊຶມ ແມ່ນ​ນຳ​ໂດຍ​ທ່ານ​ຮອງ​ຜູ້​ວ່າການ​ທະນາຄານ​ແຫ່ງ ​ສປປ ລາວ ເຊິ່ງ​ລວມ​ມີ​ພາກສ່ວນ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ແລະ ກົມ​ກອງ​ທີ່​ກ່ຽວຂ້ອງ​ປະກອບ​ຢູ່​ໃນ​ຄະນະ ເຊິ່ງ​ມີ​ສຳນັກງານ​ຂໍ້​ມູນ​ຕ້ານ​ການ​ຟອກ​ເງິນ​ເປັນ​ກອງ​ເລຂາ​ເຮັດ​ວຽກ​ໃນ​ການ​ປະສານ​ງານ.

    ທ່ານ ສະຫວັນ​ຄອນ ຣາ​​ຊ​ມຸນຕີ ໄດ້​ກ່າວ​ວ່າ: ກອງ​ປະຊຸມ​ຄັ້ງ​ນີ້ ຖື​ວ່າ​ເປັນ​ຄັ້ງ​ທຳ​ອິດ​ທີ່​ໄດ້​ຈັດ​ໃຫ້​ພາກສ່ວນ​ສື່​ມວນ​ຊົນ​ໄດ້​ເຂົ້າໃຈ​ເຖິງ​ວຽກ​ງານ​ຕ້ານ ສະກັດ​ກັ້ນ​ການ​ຟອກ​ເງິນ ແລະ ການ​ສະໜອງ​ທຶນ​ໃຫ້​ແກ່​ການ​ກໍ່​ການ​ຮ້າຍ ໃນ​ໄລຍະ​ທີ່​ຜ່ານ​ມາ​ວຽກ​ງານ​ດັ່ງກ່າວ​ໄດ້​ມີ​ມາ​ແຕ່​ປີ 2007 ພາຍ​ໃຕ້​ການ​ຊີ້​ນຳ​ຂອງ​ຄະນະ​ກຳມະການ​ແຫ່ງ​ຊາດ ແລະ ແມ່ນ​ໜ້າ​ວຽກ​ໜຶ່ງ​ທີ່​ສຳຄັນ​ຕໍ່​ຂົງເຂດ​ເສດຖະກິດ​ພາຍ​ໃນ​ປະເທດ​ເຮົາ ເນື່ອງ​ຈາກ​ຖ້າ​ລາວ​ເຮົາ​ບໍ່​ສາມາດ​ຈັດ​ຕັ້ງ​ປະຕິບັດ​ເງື່ອນໄຂ​ມາດຕະຖານ 40 ຂໍ້​ແນະນຳ ຂອງ​ສາກົນ​ວາງ​ອອກ​ໄດ້ ກໍ​ຈະ​ເຮັດ​ໃຫ້​ສາກົນ​ຂຶ້ນ​ບັນຊີ​ເປັນ​ສີ​ເທົາ ເທົາ​ເຂັ້ມ ແລະ ບັນຊີ​ດຳ​ຕາມ​ລຳດັບ ເຮັດ​ໃຫ້​ສົ່ງ​ຜົນ​ກະທົບ​ຕໍ່​ພາບ​ພົດ​ຊື່​ສຽງ​ຂອງ​ປະເທດ​ເຮົາ ເປັນຕົ້ນ ທາງ​ດ້ານ​ການເມືອງ​ກໍ​ຈະ​ຕົກ​ເປັນ​ປະເທດ​ຄວາມ​ສ່ຽງ​ສູງ​ໃນ​ການ​ຟອກ​ເງິນ ແລະ ການ​ສະໜອງ​ທຶນ​ໃຫ້​ແກ່​ການ​ກໍ່​ການ​ຮ້າຍ ດ້ານ​ເສດຖະກິດ​ກໍ​ຖືກ​ຈຳກັດ ພ້ອມ​ທັງ​ການ​ລົງທຶນ​ຈາກ​ຕ່າງປະເທດ​ກໍ​ຖົດ​ຖອຍ​ລົງ ເຊິ່ງ​ເອກະສານ​ທີ່​ນຳ​ມາ​ເຜີຍແຜ່​ຄັ້ງ​ນີ້ ປະກອບ​ມີ​ພາບ​ລວມ​ການຈັດຕັ້ງ​ປະຕິບັດ​ວຽກ​ງານ​ໃນ​ໄລຍະ​ຜ່ານ​ມາ ການ​ກະກຽມ​ການ​ປະ​ເມີນ​ຜົນ​ຮອບດ້ານ​ວຽກ​ງານ​ຕ້ານ​ການ​ຟອກ​ເງິນ ແລະ ການ​ສະໜອງ​ທຶນ​ໃຫ້​ແກ່​ການ​ກໍ່​ການ​ຮ້າຍ ແຜນການ​ໃນຕໍ່ໜ້າ ແລະ ເອກະສານ​ທີ່​ກ່ຽວຂ້ອງ ເພື່ອ​ລິ​ເລີ່ມ​ສ້າງ​ຄວາມ​ເຂົ້າໃຈ​ຕໍ່​ກັບ​ບັນຫາ​ດັ່ງກ່າວ​ໃຫ້​ທົ່ວ​ສັງຄົມ​ຮັບ​ຊາບ ຈຶ່ງ​ຈຳເປັນ​ຕ້ອງ​ໄດ້​ມີ​ການ​ເຜີຍແຜ່​ໃຫ້​ຂະແໜງການ​ສື່​ມວນ​ຊົນ ທີ່​ເປັນ​ກະບອກ​ສຽງ​ສຳຄັນ​ຂອງ​ພັກ-ລັດ ໄດ້​ເຂົ້າໃຈ​ເສຍ​ກ່ອນ ເພື່ອ​ເປັນ​ກຳລັງ​ແຮງ​ໜຶ່ງ​ຊ່ວຍ​ຄະນະ​ກຳມະການ​ລະດັບ​ຊາດ​ໃນ​ການ​ເຜີຍແຜ່ ແລະ ການເຄື່ອນໄຫວ​ປະຕິບັດ​ໜ້າທີ່​ໃຫ້​ເກີດ​ປະ​ສິດທິ​ຜົນ​ສູງ​ໄດ້.

ຂ່າວທີ່ກ່ຽວຂ້ອງ