ສັງ​ທອງ ໄດ້​ຮັບ​ການ​ສົ່ງເສີມ​ຈົດ​ທະບຽນ​ເຄື່ອງໝາຍ​ເຂົ້າ​ຫອມ

1.191 14 ມ.ກ. 2020 ຂ່າວໜ້າ​ໜຶ່ງ

    ກອງ​ປະຊຸມ​ກ່ຽວ​ກັບ​ການ​ຊຸກຍູ້​ສົ່ງເສີມ​ການ​ຈົດ​ທະບຽນ​ເຄື່ອງໝາຍ​ລວມ​ໜູ່​ເຂົ້າ​ຫອມ​ສັງ​ທອງ ນະຄອນຫຼວງ​ວຽງ​ຈັນ ຈັດ​ຂຶ້ນ​ທີ 10 ມັງກອນ 2020 ທີ່​ສະໂມສອນ​ເມືອງ ເປັນ​ປະທານ​ຮ່ວມ​ຂອງ​ທ່ານ ດາວ​ເພັດ ອາ​ລຸນ ເຈົ້າເມືອງ​ສັງ​ທອງ ແລະ ທ່ານ ນາງ ຂັນ​ລາສີ ແກ້ວ​ບຸນ​ພັນ ຫົວໜ້າ​ກົມ​ຊັບ​ສິນ​ທາງ​ປັນຍາ ກະຊວງ​ວິທະຍາສາດ ແລະ ເຕັກ​ໂນ​ໂລ​ຊີ ມີ​ບັນດາ​ຜູ້ຕາງໜ້າ​ຈາກ​ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

     ກອງ​ປະຊຸມ​ຄັ້ງ​ນີ້ ຜູ້​ເຂົ້າ​ຮ່ວມ​ໄດ້​ຮຽນ​ຮູ້​ກ່ຽວ​ກັບ​ການ​ສ້າງ​ເຄື່ອງໝາຍ​ການ​ຄ້າ​ທີ່​ມີ​ເງື່ອນໄຂ ໄດ້​ຮັບ​ໃບຢັ້ງຢືນ ແລະ ໄດ້​ຮັບ​ການ​​ປົກ​ປ້ອງ ໂດຍ​ກົດໝາຍ​ວ່າ​ດ້ວຍ​ຊັບ​ສິນ​ທາງ​ປັນຍາ ໂດຍ​ສະເພາະ ນິຕິ​ກຳ ເນື້ອ​ໃນ​ນຳ​ສະເໜີ​ເຄື່ອງໝາຍ​ແມ່ນ​ຫຍັງ ເງື່ອນໄຂ​ທີ່​ຈະ​ໄດ້​ຮັບ​ໃບຢັ້ງຢືນ​ເຄື່ອງໝາຍ​ການ​ຄ້າ ເຄື່ອງໝາຍ​ທີ່​ບໍ່​ສາມາດ​ໃຫ້​ຈົດ​ທະບຽນ​ເຄື່ອງໝາຍ​ການ​ຄ້າ ແນວ​ຄວາມ​ຄິດ​ການ​ສ້າງ​ເຄື່ອງໝາຍ​ການ​ຄ້າ ນອກ​ນັ້ນ ຍັງ​ໄດ້​ຮຽນ​ຮູ້​ເຖິງ​ລະບຽບ​ການ​ນຳ​ໃຊ້​ເຄື່ອງໝາຍ​ລວມ​ໝູ່ ໂດຍ​ສະເພາະ ຂໍ້​ດີ​ຂອງ​ເຄື່ອງໝາຍ​ລວມ​ໜູ່​ຕໍ່​ກັບ​ຜູ້​ລະເມີດ ຜູ້​ປະກອບ​ການ​ລັກສະນະ​ພິເສດ​ຂອງ​ເຄື່ອງໝາຍ​ຮັບຮອງ ຜົນ​ປະໂຫຍດ​ເຄື່ອງໝາຍ​ຮັບຮອງ ເຄື່ອງໝາຍ​ການ​ຄ້າ VS ເຄື່ອງໝາຍ​ລວມ​ໜູ່ VS ເຄື່ອງໝາຍ​ຮັບຮອງ​ສິດ​ຂອງ​ເຈົ້າ​ຂອງ​ເຄື່ອງ  ໝາຍ​ການ​ຄ້າ ຄວາມ​ສຳຄັນ​ຂອງ​ເຄື່ອງໝາຍ​ການ​ຄ້າ​ຕໍ່​ກັບ​ທຸລະ​ກິດ.

     ທັງ​ນີ້​ເພື່ອ​ເປັນ​ສັນຍະລັກ​ໃດ​ໜຶ່ງ ຫຼື ສັນຍະລັກ​ລວມ​ກັນ​ທີ່​ສາມາດ​ຈຳແນກ​ສິນຄ້າ ຫຼື ຄ່າ​ບໍລິການ​ຂອງ​ບໍລິສັດ​ໃດ​ໜຶ່ງ​ແຕກ​ຕ່າງ​ຈາກ​ບໍລິສັດ​ອື່ນ ທັງ​ເປັນ​ເຄື່ອງໝາຍ​ການ​ຄ້າ​ທີ່​ເຈົ້າ​ຂອງ​ໄດ້​ອະນຸຍາດ​ໃຫ້​ບຸກຄົນ​ຫຼື ການຈັດຕັ້ງ​ອື່ນໆ​ນຳ​ໃຊ້​ກັບ​ສິນຄ້າ ຫຼື ການ​ບໍລິການ​ຂອງ​ບຸກຄົນ ແລະ ການຈັດຕັ້ງ​ນັ້ນ ເພື່ອ​ຢັ້ງຢືນ​ຄຸນ​ລັກສະນະ​ທີ່​ພົວພັນ​ເຖິງ​ແຫຼ່ງ​ທີ່​ມາ​ວັດຖຸ​ດິບ ແລະ ວິທີ​ການ​ຜະລິດ​ສິນຄ້າ ຫຼື ວ່າ​ວິທີ​ການ​ໃຫ້​ບໍລິການ​ຊະນິດ​ຄຸນ​ນະ​ພາບ ຄວາມ​ປອດ​ໄພ ຄຸນ​ລັກສະນະ​ອື່ນໆ​ຂອງ​ສິນຄ້າ ແລະ ຄ່າ​ບໍລິການ.

ຂ່າວທີ່ກ່ຽວຂ້ອງ