ປາກ​ງື່ມ ຈະ​ປັກ​ດຳ​ເຂົ້ານາແຊງ​ໃຫ້​ສຳເລັດ​ໃນ​ເດືອນ​ມັງກອນ​ນີ້

654 14 ມ.ກ. 2020 ຂ່າວໜ້າ​ໜຶ່ງ
ປາກ​ງື່ມ ຈະ​ປັກ​ດຳ​ເຂົ້ານາແຊງ​ໃຫ້​ສຳເລັດ​ໃນ​ເດືອນ​ມັງກອນ​ນີ້

    ໃນ​ລະດູ​ການ​ຜະລິດ​ເຂົ້ານາແຊງ ສົກ​ປີ 2019-2020 ຊາວ​ກະສິກອນ​ເມືອງ​ປາກ​ງື່ມ ນະຄອນຫຼວງ​ວຽງ​ຈັນ ກຳລັງ​ຂຸ້ນຂ້ຽວ​ປັກ​ດຳ​ເຂົ້ານາແຊງ​ພາຍຫຼັງ​ໄດ້​ລົງມື​ຕົກກ້າ​ໃນ​ທ້າຍ​ເດືອນ​ພະຈິກ 2019 ແລະ ປັດຈຸບັນ​ການ​ປັກ​ດຳ ສຳເລັດ 90% ແລະ ຄາດ​ວ່າ​ຈະ​ໃຫ້​ສຳເລັດ 100% ໃນ​ທ້າຍ​ເດືອນ​ມັງກອນ 2020.

     ທ່ານ ຄຳ​ແສນ ສົມພານ​ດີ ຮອງ​ຫົວໜ້າ​ຫ້ອງການ​ກະສິກຳ ແລະ ປ່າໄມ້ ເມືອງ​ປາກ​ງື່ມ ໄດ້​ໃຫ້​ສຳພາດ​ເມື່ອ​ບໍ່​ດົນ​ວ່າ: ໃນ​ລະດູ​ການ​ຜະລິດ​ເຂົ້ານາແຊງ ສົກ​ປີ 2019-2020 ເມືອງ​ປາກ​ງື່ມ​ມີ​ເນື້ອທີ່​ແຜນການ 2.196 ເຮັກຕາ ໃນ 14 ໂຄງການ​ຊົນລະປະທານ ເຊິ່ງ​ການ​ນຳ​ຂັ້ນ​ເມືອງ ກໍ​ຄື ຂະແໜງການ​ກ່ຽວຂ້ອງ​ໄດ້​ລົງ​ຊຸກຍູ້​ປຸກລະດົມ​ໃຫ້​ປະຊາຊົນ​ມີ​ຄວາມ​ຕື່ນ​ຕົວ​ໃນ​ການ​ຜະລິດ​ສະບຽງ​ອາຫານ ແລະ ຜະລິດ​ເປັນ​ສິນຄ້າ​ໃຫ້​ເປັນ​ຂະ​ບວນ​ການ​ຟົດຟື້ນ ປະກອບສ່ວນ​ໃນ​ການ​ປັບປຸງ​ສ້ອມແປງ​ລະບົບ​ຊົນລະປະທານ ຄອງເໝືອງ​ຕ່າງໆ ເພື່ອ​ເຮັດ​ໃຫ້ການ​ຜະລິດ​ໄດ້​ທ່ວງ​ທັນ​ກັບ​ລະດູ​ການ ແລະ ຮັບປະກັນ​ການ​ສະໜອງ​ນ້ຳ​ໄດ້​ຢ່າງ​ພຽງພໍ​ຕາມ​ເນື້ອທີ່​ແຜນການ​ທີ່​ວາງ​ໄວ້​ມາ​ຮອດ​ປັດຈຸບັນ​ການ​ປັກ​ດຳ​ນາແຊງ ສາມາດ​ປະຕິບັດ​ໄດ້ 90% ໃນ​ເນື້ອທີ່​ແຜນການ ສະເພາະ​ປີ​ນີ້ ນາຫວ່ານ ກວມ​ເອົາ​ເນື້ອທີ່ 70% ແລະ ນາ​ດຳ​ດ້ວຍ​ກົນ​ຈັກ​ທີ່​ທັນ​ສະໄໝ ນາ​ຢອດ ແລະ ນາ​ໂຍນ 30% ຂະນະ​ທີ່​ການ​ຜະລິດ​ປີ 2019 ເມືອງ​ປາກ​ງື່ມ​ສາມາດ​ປະຕິບັດ​ເກັບ​ກ່ຽວ​ຜົນ​ຜະລິດ​ໄດ້​ທັງ​ໝົດ 11.200 ເຮັກຕາ ແລະ ໄດ້​ຮັບ​ຜົນ​ເສຍ​ຫາຍ​ຈາກ​ທຳ​ມະ​ຊາດ​ປະມານ 1.500 ເຮັກຕາ.

    ສຳລັບ​ການ​ຜະລິດ​ພືດ​ຜັກ​ໄດ້​ເລັ່ງ​ໃສ່​ຢູ່​ບ້ານ​ໝາກ​ນາວ ເຂດ​ຫ້ວຍ​ໝາກ​ຮຽວ ແລະ ເຂດ​ບ້ານ​ທ່າ​ຊ້າງ ເພື່ອ​ເປັນ​ສິນຄ້າ​ສົ່ງ​ອອກ​ສູ່​ຕະຫຼາດ ເຊິ່ງ​ຜົນ​ຜະລິດ​ໃນ​ປີຜ່ານມາ​ສາມາດ​ສະໜອງ​ຜົນ​ຜະລິດ​ໃຫ້​ນະຄອນ ຫຼວງ​ວຽງ​ຈັນ ໄດ້​ອາທິດ​ໜຶ່ງ​ປະມານ 15 ໂຕນ  ພ້ອມ​ນັ້ນ ປະຊາຊົນ​ໃນ​ເຂດ​ດັ່ງກ່າວ​ຍັງ​ມີ​ຄວາມ​ຕື່ນ​ຕົວ​ໃນ​ການ​ປູກຝັງ​ຜະລິດ​ພືດ​ຕາມ​ລະດູ​ການ​ທີ່​ສັງຄົມ​ໃຫ້​ຄວາມ​ຕ້ອງການ​ເຊັ່ນ: ໝາກໂມ ໝາກແຕງ ສາລີ​ຫວານ ແລະ ພືດ​ຜັກ ພືດ​ກະສິກຳ​ອິນ​ຊີ​ອື່ນໆ​ຕື່ມ​ອີກ.

ຂ່າວທີ່ກ່ຽວຂ້ອງ