ກອງຄຸ້ມຄອງພາຫະນະ ມີແຜນຂະຫຍາຍສາຂາໄປທຸກເມືອງ

766 14 ມ.ກ. 2020 ຂ່າວໜ້າ​ໜຶ່ງ
ກອງຄຸ້ມຄອງພາຫະນະ ມີແຜນຂະຫຍາຍສາຂາໄປທຸກເມືອງ

   ທ່ານ ບຸນ​ປອນ ບຸນ​ສົມ​ຫວັງ ຫົວ­ໜ້າ​ກອງ​ຄຸ້ມ​ຄອງ​ພາ­ຫະ­ນະ ແລະ ການ​ຂັບ​ຂີ່ ພະ​ແນກ​ໂຍ­ທາ​ທິ​ການ ແລະ ຂົນ­ສົ່ງ ນະ­ຄອນ­ຫຼວງ​ວຽງ​ຈັນ (ນວ) ໃຫ້​ສຳ­ພາດ​ວັນ​ທີ 7 ມັງ­ກອນ 2020 ວ່າ: ປີ 2019 ກອງ​ຄຸ້ມ​ຄອງ​ພາ­ຫະ­ນະ ແລະ ການ​ຂັບ​ຂີ່ ນວ ໄດ້​ປະ­ກອບ­ສ່ວນ​ສ້າງ​ເສດ­ຖະ­ກິດ-ສັງ­ຄົມ​ໃນ ນວ ດ້ວຍ​ການ​ຂຶ້ນ​ທະ­ບຽນ​ຍານ­ພາ­ຫະ­ນະ​ກວດ­ກາ​ເຕັກ­ນິກ ແລະ ສອບ­ເສັງ​ບໍ­ລິ­ການ​ປ່ຽນ​ໃບ​ຂັບ​ຂີ່​ໃນ ນວ ແລະ ໃນ​ໜຶ່ງ​ປີ­ຜ່ານ­ມາ ສາ­ມາດ​ບໍ­ລິ­ການ​ຂຶ້ນ​ທະ­ບຽນ​ຍານ­ພາ­ຫະ­ນະ​ໄດ້​ທັງ​ໝົດ 54.754 ເທື່ອ​ຄັນ ທຽບ­ໃສ່​ປີ 2018 ຫຼຸດ​ລົງ 1% ສອບ­ເສັງ​ການ​ຂັບ​ຂີ່​ທຸກ​ປະ­ເພດ​ໄດ້ 8.064 ເທື່ອ​ຄົນ ບໍ­ລິ­ການ​ປ່ຽນ​ໃບ​ຂັບ​ຂີ່​ທາງ​ພາຍ​ໃນ ແລະ ນອກ​ສະ­ຖານ­ທີ່ (ບໍ­ລິ­ການ​ເຄື່ອນ​ທີ່​ລົງ​ໃກ້​ປະ­ຊາ­ຊົນ​ເວ­ລາ​ມີ​ວັນ​ສຳ­ຄັນ​ຕ່າງໆ) ໄດ້ 47.157 ໃບ ສາ­ມາດ​ສ້າງ​ລາຍ​ຮັບ​ໄດ້​ທັງ​ໝົດ 25,35 ຕື້​ກີບ ມອບ​ພັນ­ທະ​ເຂົ້າ​ງົບ­ປະ­ມານ 8,91 ຕື້​ກີບ ທຽບ­ໃສ່​ແຜນ­ການ​ລື່ນ 700 ກວ່າ​ລ້ານ​ກີບ ໄປ​ພ້ອມ​ກັບ​ການ​ຈະ­ເລີນ​ເຕີບ​ໂຕ​ຂອງ​ວຽກ​ງານ ທາງ​ກອງ​ໄດ້​ຫັນ​ບໍ­ລິ­ການ​ເຂົ້າ​ສູ່​ປະ­ຊາ­ຊົນ ໂດຍ​ການ​ຂະ­ຫຍາຍ​ສາ­ຂາ​ໄປ​ເມືອງ​ນາ​ຊາຍ​ທອງ ສະ­ຖານ­ທີ່​ຕັ້ງ​ຢູ່​ນ້ຳ​ຊ່ວງ ເພື່ອ​ອຳ­ນວຍ​ຄວາມ​ສະ­ດວກ​ໃຫ້​ພະ­ນັກ­ງານ ທະ­ຫານ ຕຳ­ຫຼວດ ແລະ ປະ­ຊາ­ຊົນ​ທີ່​ມາ​ບໍ­ລິ­ການ​ຂຶ້ນ​ທະ­ບຽນ​ປ່ຽນ​ປ້າຍ​ລົດ ຕໍ່​ເຕັກ­ນິກ (ສູນ​ເຕັກ­ນິກ​ແຫ່ງ​ນີ້​ສາ­ມາດ​ກວດ​ເຊັກ​ລົດ​ໄດ້​ທຸກ​ປະ­ເພດ) ຖື​ວ່າ​ຈຸດ​ບໍ­ລິ­ການ​ທົ່ງ​ປົ່ງ​ມີ​ຫຍັງ​ຢູ່​ສູນ​ເມືອງ​ນາ​ຊາຍ​ທອງ​ກໍ​ມີ​ເຊັ່ນ​ກັນ ຜູ້​ບໍ­ລິ­ການ​ບໍ່​ຈຳ­ເປັນ​ຕ້ອງ​ມາ​ບໍ­ລິ­ການ​ຢູ່​ທົ່ງ​ປົ່ງ​ຖື​ວ່າ​ໃກ້​ບ່ອນ​ໃດ​ບໍ­ລິ­ການ​ບ່ອນ​ນັ້ນ ປັດ­ຈຸ­ບັນ​ທາງ​ກອງ​ໄດ້​ນຳ​ໃຊ້​ລະ­ບົບ​ໄອ​ທີ​ເຂົ້າ​ມາ​ຊ່ວຍ​ໃນ​ການ​ປະ­ຕິ­ບັດ​ວຽກ​ງານ ລະ­ບົບ​ສອບ­ເສັງ​ໃບ​ຂັບ​ຂີ່​ໄດ້​ນຳ​ໃຊ້​ລະ­ບົບ​ທັນ​ສະ­ໄໝ​ເຊັ່ນ ລະ­ບົບ​ສອບ­ເສັງ​ພາກ​ສະ­ໜາມ​ຈະ​ບໍ່​ມີ​ກຳ­ມະ­ການ ພາກ​ທິດ​ສະ​ດີ​ໃຊ້​ລະ­ບົບ​ປາ​ລະ​ໄນ​ມີ​ຄຳ​ຖາມ​ຂຶ້ນ​ໜ້າ​ຈໍ​ຄອມ​ພີວ​ເຕີ ນັກ​ສອບ ເສັງ​ສາ­ມາດ​ເລືອກ​ຕອບ​ໄດ້ 3-4 ຄຳ​ຖາມ ໃຊ້​ລະ­ບົບ​ເຄື່ອງ​ທົດ​ສອບ​ວັດ­ແທກ​ປະ­ຕິ­ກິ­ລິ­ຍາ ແທນ​ໃບ​ກວດ​ສຸ­ຂະ­ພາບ​ຄື​ສອບ​ສາຍ­ຕາ​ທາງ​ເລິກ ທາງ​ກວ້າງ  ທາງ​ສະ­ໝອງ​ດ້ວຍ​ລະ­ບົບ​ເບກ ແລະ ອື່ນໆ.

   ລະ­ບົບ​ຂຶ້ນ​ທະ­ບຽນ ແລະ ກວດ­ກາ​ເຕັກ­ນິກ​ໄດ້​ມີ​ການ​ພັດ­ທະ­ນາ​ນຳ​ໃຊ້​ເຄື່ອງ​ເອ​ເລັກ​ໂຕຣ​ນິກ ເຂົ້າ​ຊ່ວຍ​ຢັ້ງ­ຢືນ​ກວດ­ກາ​ທາງ​ດ້ານ​ເຕັກ­ນິກ ສູນ​ກວດ­ກາ​ເຕັກ­ນິກ​ຢູ່​ທົ່ງ​ປົ່ງ​ຈະ​ມີ​ສາມ​ເລນ​ທີ່​ໄດ້​ມາດ­ຕະ­ຖານ ກວດ​ຄວັນ​ດຳ ກວດ​ສຽງ ກວດ​ໂຄມ­ໄຟ​ຕາ ກວດ​ລະ­ບົບ​ຊ່ວງ​ລ່າງ ກວດ​ລູກ​ໝາກ ປີກ​ນົກ ຄັນ​ຊົງ ສູນ​ລໍ້ ນ້ຳ­ໜັກ ເບກ ເຄື່ອງ​ສາ­ມາດ​ກວດ​ໄດ້ 12 ເພົ້າ​ໄດ້​ມາດ­ຕະ­ຖານ​ສາ­ກົນ ທຳ​ມະ​ດາ​ລົດ​ມີ​ແຕ່ 3-4 ເພົ້າ ໂຄງ­ການ​ນີ້​ໄດ້​ເລີ່ມ​ພັດ­ທະ­ນາ​ມາ​ແຕ່​ປີ 2016 ແລະ ສຳ­ເລັດ​ປີ 2018 ມາ​ຮອດ​ປີ 2019 ໄດ້​ຂະ­ຫຍາຍ​ໄປ​ສ້າງ​ຢູ່​ນ້ຳ​ຊ່ວງ ແລະ ຄາດ​ວ່າ​ຈະ​ສຳ­ເລັດ​ປີ 2020 ເຊິ່ງ​ການ​ໃຊ້​ລະ­ບົບ​ນີ້ ເຂົ້າ​ໃນ​ການ​ເຮັດ​ວຽກ​ກວດ­ກາ​ເຕັກ­ນິກ​ຂອງ​ພະ­ນັກ­ງານ ມີ​ຄວາມ​ສະ­ດວກ​ສະ­ບາຍ ແລະ ຕໍ່​ກັບ​ສັງ­ຄົມ​ໃນ​ການ​ຕໍ່​ທະ­ບຽນ ແລະ ເຮັດ​ໃບ​ຂັບ​ຂີ່​ວ່ອງ­ໄວ​ທັນ­ໃຈ ສາ­ມາດ​ໄດ້​ໃນ​ຕອນ​ດຽວ​ໃນ​ການ​ໃຊ້​ລະ­ບົບ​ໄອ​ທີ ສາ­ມາດ​ຕີ​ຖອຍ​ຫາງ​ສຽງ​ຈົ່ມ​ວ່າ​ຂອງ​ສັງ­ຄົມ ນັບ​ມື້​ຫຼຸດ​ລົງ​ທຽບ­ໃສ່​ເມື່ອ​ກ່ອນ.

   ສຳ­ລັບ​ອະ­ນາ­ຄົດ​ຈະ​ມີ​ການ​ພັດ­ທະ­ນາ​ໃຫ້​ດີ​ຂຶ້ນ​ໄປ​ເລື້ອຍໆ ເນື່ອງ​ຈາກ​ໃນ​ຜ່ານ​ມາ​ກໍ​ໄດ້​ຮັບ​ການ​ຕຳ​ນິ­ຕິ​ຊົມ​ຂອງ​ສັງ­ຄົມ​ທີ່​ມາ​ໃຊ້​ບໍ­ລິ­ການ ໂດຍ​ທາງ​ກອງ​ຈະ​ມີ​ການ​ປັບ­ປຸງ ແລະ ພັດ­ທະ­ນາ​ໄອ​ທີ​ໄປ​ເລື້ອຍໆ​ຢ່າງ​ບໍ່​ຢຸດ​ຢັ້ງ ເປັນ­ຕົ້ນ​ປັບ­ປຸງ​ດ້ານ​ສະ­ຖານ­ທີ່​ການ​ບໍ­ລິ­ການ​ທີ່​ຍັງ​ຄັບ­ແຄບ ພາຍ­ຫຼັງ​ສຳ­ເລັດ​ຕຶກ​ໃໝ່​ຕົ້ນ​ປີ 2020 ທີ່​ມີ​ການ​ອອກ​ແບບ​ທັນ​ສະ­ໄໝ​ກໍ​ຈະ​ສະ­ດວກ​ຂຶ້ນ​ຕື່ມ ສ່ວນ​ສາ­ຂາ​ນອກ­ຈາກ​ຂະ­ຫຍາຍ​ໄປ​ເມືອງ​ນາ​ຊາຍ​ທອງ​ປີ 2019 ແລະ ປີ 2020 ມີ​ແຜນ​ຂະ­ຫຍາຍ​ສາ­ຂາ​ໄປ​ເມືອງ​ໄຊ​ທາ­ນີ​ຢູ່​ເຂດ​ຫຼັກ 16 (ສະ­ໜາມ​ກີ­ລາ) ເພື່ອ​ຮອງ​ຮັບ​ສາຍ​ໃຕ້ ສາ­ຂາ​ເມືອງ​ໄຊ​ເສດ​ຖາ​ຢູ່​ເຂດ​ບ້ານ​ເມືອງ​ນ້ອຍ​ບ້ານ​ຊຽງ​ດາ ແລະ ມີ​ແຜນ​ຂະ­ຫຍາຍ​ໄປ​ທຸກ​ເມືອງ ເພື່ອ​ສ້າງ​ຄວາມ​ສະ­ດວກ​ໃຫ້​ສັງ­ຄົມ​ໃກ້​ບ່ອນ​ໃດ​ບໍ­ລິ­ການ​ບ່ອນ​ນັ້ນ.

ຂ່າວທີ່ກ່ຽວຂ້ອງ