ສາເຫດຊີ້ນໝູຢູ່ຕະຫຼາດແພງ ຍ້ອນປາຍທາງ

435 15 ມ.ກ. 2020 ຂ່າວໜ້າ​ໜຶ່ງ
ສາເຫດຊີ້ນໝູຢູ່ຕະຫຼາດແພງ ຍ້ອນປາຍທາງ

   ລາ­ຄາ​ຊີ້ນ ໂດຍ​ສະ­ເພາະ ຊີ້ນ​ໝູ​ຕາມ​ຕະ­ຫຼາດ​ຢູ່​ນະ­ຄອນ­ຫຼວງ​ວຽງ​ຈັນ (ນວ) ທີ່​ມີ​ການ​ປັບ​ລາ­ຄາ​ຂຶ້ນ​ຄືນ​ຈາກ​ລາ­ຄາ​ຕາມ​ແຈ້ງ​ການ​ພະ​ແນກ​ອຸດ­ສາ­ຫະ­ກຳ ແລະ ການ​ຄ້າ (ນວ) ວາງ​ອອກ ໃນ​ໄລ­ຍະ​ສະ­ເຫຼີມ­ສະ­ຫຼອງ​ສົ່ງ​ທ້າຍ​ປີ​ເກົ່າ 2019 ແລະ ຕ້ອນ­ຮັບ​ປີ​ໃໝ່​ສາ­ກົນ 2020 ມາ​ຮອດ​ປັດ­ຈຸ­ບັນ​ລາ­ຄາ​ຍັງ​ແພງ​ຄື­ເກົ່າ​ຄື​ຊີ້ນ​ກ້ອນ ລາ­ຄາ 45.000 ກີບ​ຕໍ່​ກິ​ໂລ ແລະ ຊີ້ນ​ປົນ​ດູກ​ລາ­ຄາ 35.000 ກີບ​ຕໍ່​ກິ​ໂລ ອັນ​ໄດ້​ສົ່ງ​ຜົນ​ກະ­ທົບ​ຕໍ່​ຜູ້​ບໍ­ລິ­ໂພກ ກໍ​ຄື ຜູ້​ທີ່​ມີ​ລາຍ​ຮັບ​ຕ່ຳ ດັ່ງ­ນັ້ນ ຈຶ່ງ​ຝາກ​ເຖິງ​ພາກ­ສ່ວນ​ກ່ຽວ­ຂ້ອງ​ລົງ​ກວດ­ກາ​ຕິດ­ຕາມ​ແກ້​ໄຂ​ໂດຍ​ດ່ວນ ເພື່ອ​ບໍ່​ໃຫ້​ແກ່­ຍາວ​ໄປ​ກວ່າ​ນີ້ ສາ­ເຫດ​ຍ້ອນ​ຈາກ​ພໍ່­ຄ້າ​ນາຍ­ຮ້ອຍ ແລະ ລູກ​ຂຽງ ສ່ວນ​ລາ­ຄາ​ຢູ່​ໂຮງ­ງານ​ລາ­ຄາ​ຍັງ​ຄື­ເກົ່າ​ປະ­ຕິ­ບັດ​ຕາມ​ແຈ້ງ​ການ​ພະ​ແນກ​ອຸດ­ສາ­ຫະ­ກຳ ແລະ ການ​ຄ້າ ນວ.

ທ່ານ ຄຳ​ຫຼ້າ ແສງ​ດາ​ວົງ ອຳ­ນວຍ​ການ​ລັດ​ວິ​ສາ​ຫະ​ກິດ​ສະ­ບຽງ​ອາ­ຫານ ນວ ໃຫ້​ສຳ­ພາດ ວັນ​ທີ 13 ມັງ­ກອນ 2020 ວ່າ: ການ​ສະ­ໜອງ​ຊີ້ນ​ໃຫ້ ນວ ລັດ​ວິ​ສາ​ຫະ​ກິດ​ສະ­ບຽງ​ອາ­ຫານ ກໍ​ຄື ໂຮງ­ງານ​ຂ້າ​ສັດ​ດອນ​ດູ່ ໄດ້​ສຸມ​ໃສ່​ປັບ­ປຸງ​ລະ­ບົບ​ພື້ນ­ຖານ​ໂຄງ​ລ່າງ​ໂຮງ­ງານ​ຂ້າ​ສັດ​ມາ​ແຕ່​ຕົ້ນ​ປີ 2019 ເປັນ­ຕົ້ນ​ມາ ປັດ­ຈຸ­ບັນ​ເຫັນ​ການ​ສະ­ໜອງ​ຊີ້ນ​ໃນ​ຕະ­ຫຼາດ​ມີ​ການ​ຜັນ​ແປ ໂດຍ​ສະ­ເພາະ ທຽບ­ໃສ່​ບັນ­ດາ​ປະ­ເທດ​ໃກ້​ຄຽງ ດັ່ງ­ນັ້ນ ລັດ​ວິ​ສາ​ຫະ​ກິດ​ໄດ້​ສົມ­ທົບ​ກັບ​ຜູ້​ປະ­ກອບ​ການ​ລ້ຽງ​ໝູ ໂດຍ​ສະ­ເພາະ ບໍ­ລິ­ສັດ ຊີ​ພີ​ລາວ ຮ່ວມ​ມື​ກັນ​ເຮັດ​ລະ­ບົບ​ຕ່ອງ​ໂສ້​ການ​ຜະ­ລິດ ບໍ­ລິ­ສັດ ຊີ​ພີ ເປັນ​ຜູ້​ຜະ­ລິດ ແລະ ໂຮງ­ງານ​ດອນ​ດູ່​ເປັນ​ຜູ້​ແປ​ຮູບ​ສູ່​ຕະ­ຫຼາດ  ໂດຍ​ການ​ຄຸ້ມ​ຄອງ​ລາ­ຄາ​ແມ່ນ​ອີງ​ຕາມ​ແຈ້ງ​ການ​ພະ​ແນກ​ອຸດ­ສາ­ຫະ­ກຳ ແລະ ການ​ຄ້າ ນວ ໂດຍ​ອີງ​ຕາມ​ເສດ­ຖະ­ກິດ-ສັງ­ຄົມ ແຕ່​ລະ​ໄລ­ຍະ ປັດ­ຈຸ­ບັນ​ເຫັນ​ວ່າ­ການ​ຊື້​ຂາຍ​ທົ່ວ​ໄປ​ມີ​ການ​ເໜັງ​ຕີງ​ລາ­ຄາ​ຂຶ້ນ ສະ­ນັ້ນ​ລັດ​ວິ​ສາ​ຫະ​ກິດ​ສະ­ບຽງ​ອາ­ຫານ ໄດ້​ສົມ­ທົບ​ກັບ ຊີ​ພີ​ລາວ ຄຸ້ມ​ຄອງ​ລາ­ຄາ​ຕາມ​ແຈ້ງ​ການ​ພະ​ແນກ​ອຸດ­ສາ­ຫະ­ກຳ ແລະ ການ​ຄ້າ ນວ ໃຫ້​ຄົງ​ໂຕ ໂດຍ​ໄດ້​ເພີ່ມ​ການ​ຂ້າ​ໝູ​ເພີ່ມ​ຂຶ້ນ 500 ໂຕ​ຕໍ່​ວັນ ເພື່ອ​ແບ່ງ​ໃຫ້​ຜູ້​ປະ­ກອບ​ການ​ຂາຍ​ຊີ້ນ​ໝູ​ໃນ​ແຕ່​ລະ​ຕະ­ຫຼາດ​ໃຫ້​ໄດ້​ສະ​ໝ່ຳ​ສະ­ເໜີ​ກັນ ແນ­ໃສ່​ໃຫ້​ຜູ້​ບໍ­ລິ­ໂພກ​ໄດ້​ບໍ­ລິ­ໂພກ​ເປັນ​ປົກ­ກະ­ຕິ ສ່ວນ​ລາ­ຄາ​ຊີ້ນ​ໝູ​ຂາຍ​ອອກ​ຈາກ​ໂຮງ­ງານ​ໝູ​ຊີກ 24.500 ກີບ​ຕໍ່​ກິ​ໂລ ແລະ ຊີ້ນ​ໝູ​ປະ­ເພດ​ຕ່າງໆ​ຂາຍ​ບໍ່​ເກີນ​ກິ​ໂລ​ລະ 36.000 ກີບ ໃນ​ລາ­ຄາ​ນີ້​ລູກ​ຄ້າ​ສາ­ມາດ​ຊື້​ໄດ້​ທີ່​ລັດ​ວິ​ສາ​ຫະ​ກິດ​ສະ­ບຽງ​ອາ­ຫານ ຫຼື ໂຮງ­ງານ​ຂ້າ​ສັດ​ດອນ​ດູ່​ເທົ່າ​ນັ້ນ ສ່ວນ​ລາ­ຄາ​ຂາຍ​ຢູ່​ໜ້າ​ຂຽງ​ຕາມ​ຕະ­ຫຼາດ​ຈະ​ບໍ່​ໄດ້​ຄວບ​ຄຸມ​ລາ­ຄາ​ແມ່ນ​ພາກ­ສ່ວນ​ທີ່​ກ່ຽວ­ຂ້ອງ​ເປັນ​ຜູ້​ຄຸ້ມ​ຄອງ.

   ທ່ານ ຄຳ​ຫຼ້າ ແສງ​ດາ​ວົງ ຍັງ​ໃຫ້​ຮູ້​ຕື່ມ​ວ່າ: ເລີ່ມ​ແຕ່​ວັນ​ທີ 25 ທັນ­ວາ 2019 ເປັນ­ຕົ້ນ​ມາ ຊີ​ພີ​ໄດ້​ຢຸດ​ການ​ສົ່ງ​ອອກ​ໝູ​ເປັນ​ໃຫ້​ໂຮງ­ງານ​ຂ້າ​ສັດ​ຂະ­ໜາດ​ນ້ອຍ​ທີ່​ບໍ່​ໄດ້​ມາດ­ຕະ­ຖານ ຍ້ອນ​ເຫັນ​ວ່າ​ໂຮງ­ງານ​ຂ້າ​ສັດ​ດອນ​ດູ່​ມີ​ເຄື່ອງ​ຈັກ​ໃຫຍ່ ມີ​ຄວາມ​ສະ­ອາດ ແລະ ມີ​ຄວາມ​ປອດ​ໄພ​ສູງ​ໄດ້​ມາດ­ຕະ­ຖານ ພ້ອມ​ນີ້ ລະ­ບົບ​ການ​ລ້ຽງ​ຂອງ​ຊີ​ພີ​ລາວ ກໍ​ໄດ້​ມາດ­ຕະ­ຖານ​ຈຶ່ງ​ໄດ້​ຫັນ​ມາ​ສະ­ໜອງ​ໃຫ້​ໂຮງ­ງານ​ດອນ​ດູ່​ບໍ­ລິ­ການ​ຂ້າ​ໃນ​ລາ­ຄາ​ໜ້າ​ໂຮງ­ງານ 24.500 ກີບ​ຕໍ່​ກິ​ໂລ ແຕ່​ຖ້າ​ໃຫ້​ບໍ­ລິ­ສັດ​ໄປ​ສົ່ງ​ເອງ​ບໍ່​ຜ່ານ​ພໍ່­ຄ້າ​ນາຍ­ຮ້ອຍ​ບໍ­ລິ­ສັດ​ເພີ່ມ​ຄ່າ​ບໍ­ລິ­ການ​ຕື່ມ 800 ກີບ​ເປັນ 25.300 ກີບ​ຕໍ່​ກິ​ໂລ ສ່ວນ​ສາ­ເຫດ​ທີ່​ລາ­ຄາ​ຊີ້ນ​ໝູ​ຢູ່​ຕະ­ຫຼາດ​ແພງ​ນັ້ນ ຍ້ອນ​ພໍ່­ຄ້າ​ນາຍ­ຮ້ອຍ ແລະ ລູກ​ຂຽງ​ຂຶ້ນ​ລາ­ຄາ​ຕາມ​ລຳ­ພັງ​ໃຈ​ຈະ​ບໍ່​ແມ່ນ​ຍ້ອນ​ໂຮງ­ງານ​ແຕ່​ຢ່າງ­ໃດ ຖື​ວ່າ​ບໍ່​ຍ້ອນ​ຕົ້ນ​ທາງ​ຍ້ອນ​ປາຍ­ທາງ​ເອງ ເມື່ອ​ກ່ອນ​ພໍ່­ຄ້າ​ນາຍ­ຮ້ອຍ​ມາ​ຊື້​ໝູ​ຊີກ​ຢູ່​ໜ້າ​ໂຮງ­ງານ​ຈະ​ບວກ​ລາ­ຄາ 500-1.000 ກີບ​ຕໍ່​ກິ​ໂລ​ແລ້ວ​ສົ່ງ​ໃຫ້​ລູກ​ຂຽງ ແຕ່​ປັດ­ຈຸ­ບັນ​ພໍ່­ຄ້າ​ນາຍ­ຮ້ອຍ​ບວກ 2.000-3.000 ກີບ​ຕໍ່​ກິ​ໂລ ເມື່ອ​ນາຍ­ຮ້ອຍ​ເພີ່ມ​ລູກ​ຂຽງ​ກໍ​ເພີ່ມ​ລາ­ຄາ​ຂຶ້ນ​ຕື່ມ​ອີກ ພາຍ­ຫຼັງ​ທີ່​ຢຸດ­ຕິ​ພະ­ຍາດ​ອະ­ຫິ​ວາ​ໝູ​ເຮັດ​ໃຫ້​ຕົວ​ເລກ​ການ​ລ້ຽງ​ໝູ​ຢູ່ ນວ ຍັງ​ຕ່ຳ ຍ້ອນ​ຈຳ­ນວນ​ໜຶ່ງ​ໄດ້​ຮັບ​ຜົນ​ກະ­ທົບ​ຈາກ​ພະ­ຍາດ​ກໍ​ເຊົາ​ລ້ຽງ ນອກ​ນີ້ ໝູ​ຢູ່​ປະ­ເທດ​ອ້ອມ​ຂ້າງ​ກໍ​ມີ​ລາ­ຄາ​ເພີ່ມ​ຂຶ້ນ ເປັນ­ຕົ້ນ ຢູ່​ປະ­ເທດ​ໄທ ຫວຽດ­ນາມ ແລະ ກຳ­ປູ­ເຈຍ ແຕ່​ປະ­ເທດ​ລາວ​ເຮົາ​ລາ­ຄາ​ຍັງ​ຕ່ຳ​ຢູ່ ເມື່ອ​ກ່ອນ​ໝູ​ສົ່ງ​ມາ​ແຕ່​ພາກ​ໃຕ້​ສູ່ ນວ ວັນ​ລະ 2 ຄັນ​ລົດ ແຕ່​ປັດ­ຈຸ­ບັນ​ບໍ່​ມີ ບັນ­ດາ​ຟາມ​ໝູ​ຢູ່​ພາກ​ໃຕ້​ໄດ້​ຂາຍ​ໝູ​ເປັນ​ໃຫ້​ປະ­ເທດ​ຫວຽດ­ນາມ ທີ່​ມີ​ລາ­ຄາ​ໝູ​ສູງ​ກວ່າ​ຢູ່ ນວ ຍັງ​ເຫຼືອ​ແຕ່​ຊີ​ພີ​ລາວ ທີ່ ນວ ໄດ້​ລະ­ດົມ​ໃຫ້​ບໍ­ລິ­ສັດ​ບໍ່​ໃຫ້​ຂາຍ​ອອກ​ຕ່າງ​ແຂວງ ແລະ ຕ່າງ­ປະ­ເທດ ໃຫ້​ສະ­ໜອງ​ແຕ່ ນວ ພຽງ​ຢ່າງ​ດຽວ ວັນ​ໜຶ່ງ 520-530 ໂຕ ຊ່ວຍ ນວ ໃຫ້​ພົ້ນ​ວິ​ກິດ​ຄັ້ງ​ນີ້​ໄປ​ກ່ອນ ເພື່ອ​ຮັກ­ສາ​ປະ­ລິ­ມານ​ໝູ​ບໍ່​ໃຫ້​ຫຼຸດ​ຄວາມ​ຕ້ອງ­ການ.

ຂ່າວທີ່ກ່ຽວຂ້ອງ