ໂຄງການ ຜ-ບສພ ສ້າງຄວາມເຂັ້ມແຂງໃຫ້ຂະແໜງສາທາຫຼາຍດ້ານ

998 15 ມ.ກ. 2020 ຂ່າວໜ້າ​ໜຶ່ງ

   ການ­ຈັດ­ຕັ້ງ​ປະ­ຕິ­ບັດ​ໂຄງ­ການ ຜ-ບສພ ທຶນ​ກູ້​ຢືມ​ຈາກ​ທະ­ນາ­ຄານ​ພັດ­ທະ­ນາ​ອາ­ຊີ ໄດ້​ຈັດ​ຕັ້ງ​ປະ­ຕິ­ບັດ​ມາ​ປີ 2015-2019 ມູນ​ຄ່າ 23 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 203 ຕື້​ກີບ ໃນ​ນີ້ 150 ຕື້​ກີບ ນຳ​ໃຊ້​ເຂົ້າ​ໃນ​ການ​ດຸນ​ດ່ຽງ​ງົບ­ປະ­ມານ 53 ຕື້​ກີບ ນຳ​ໃຊ້​ເຂົ້າ​ໃນ​ການ​ຊ່ວຍ­ເຫຼືອ​ດ້ານ​ວິ­ຊາ​ການ 17 ຕື້​ກີບ ໃຫ້­ການ​ຊ່ວຍ­ເຫຼືອ​ລ້າ ເພື່ອ​ນຳ​ໃຊ້​ເຂົ້າ​ໃນ​ການ​ສ້າງ​ຄວາມ​ເຂັ້ມ­ແຂງ​ດ້ານ​ວິ­ຊາ​ການ ​ສະ­ໜັບ­ສະ­ໜູນ​ວຽກ​ງານ​ເຊັ່ນ: ສ້າງ​ຄວາມ​ເຂັ້ມ­ແຂງ​ໃຫ້​ຂະ​ບວນ​ການ​ປະ­ຕິ​ຮູບ​ສາ­ທາ­ລະ­ນະ​ສຸກ ເພີ່ມ​ທະ­ວີ​ວຽກ​ງານ​ປົກ​ປ້ອງ​ສັງ­ຄົມ ສຳ­ລັບ​ຜູ້​ທຸກ​ຍາກ ແລະ ປັບ­ປຸງ​ໃຫ້­ການ​ບໍ­ລິ­ການ​ສຸ­ຂະ­ພາບ ໂດຍ​ສະ­ເພາະ ການ​ຮັກ­ສາ​ສຸ­ຂະ­ພາບ​ແມ່ ແລະ ເດັກ ແລະ ເດັກ­ນ້ອຍ​ລຸ່ມ 5 ປີ ໂດຍ​ບໍ່​ເສຍ​ຄ່າ ຜ່ານ​ກອງ​ທຶນ​ປະ­ກັນ​ສຸ­ຂະ­ພາບ​ແຫ່ງ​ຊາດ ສ້າງ​ຄວາມ​ເຂັ້ມ­ແຂງ​ດ້ານ​ຄວາມ​ສາ­ມາດ​ໃນ​ການ​ຄຸ້ມ​ຄອງ​ຊັບ­ພະ­ຍາ­ກອນ​ມະ­ນຸດ ສ້າງ​ຄວາມ​ເຂັ້ມ­ແຂງ​ດ້ານ​ການ​ຄຸ້ມ​ຄອງ​ດ້ານ​ການ​ເງິນ​ສາ­ທາ­ລະ­ນະ​ສຸກ ແລະ ການ​ສ້າງ​ແຜນ​ເພື່ອ​ປະ­ກອບ­ສ່ວນ​ບັນ­ລຸ​ເປົ້າ​ໝາຍ​ຕາມ​ທີ່​ສະ­ພາ​ແຫ່ງ​ຊາດ​ຮັບ­ຮອງ​ໃນ​ການ­ຈັດ­ຕັ້ງ​ປະ­ຕິ­ບັດ​ແຜນ 5 ປີ (2016-2020) ຕາມ​ທິດ​ຍຸດ​ທະ​ສາດ​ການ​ປະ­ຕິ​ຮູບ​ສາ­ທາ­ລະ­ນະ​ສຸກ.

   ກອງ​ປະ­ຊຸມ​ສະ­ຫຼຸບ​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ-ແຜນ​ງານ​ຄຸ້ມ​ຄອງ​ບໍ­ລິ­ຫານ​ສາ­ທາ­ລະ­ນະ​ສຸກ (ຜ-ບສພ) ທຶນ​ກູ້​ຢືມ​ຈາກ​ທະ­ນາ­ຄານ​ພັດ­ທະ­ນາ​ອາ­ຊີ ຈັດ​ຂຶ້ນ​ວັນ​ທີ 14 ມັງ­ກອນ 2020 ທີ່​ໂຮງ­ແຮມ​ດອນ​ຈັນ​ພາ​ເລດ ມີ​ທ່ານ ພູ­ທອນ ເມືອງ​ປາກ ຮອງ​ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ທ່ານ ປອນ​ເມກ ດາ­ລາ​ລອຍ ປະ­ທານ​ສະ­ພາ​ຄຸ້ມ​ຄອງ​ວິ­ຊາ​ຊີບ​ການ​ປິ່ນ­ປົວ ພ້ອມ​ດ້ວຍ​ຂະ­ແໜງ­ການ​ກ່ຽວ­ຂ້ອງ​ເຂົ້າ​ຮ່ວມ.

   ຕະ­ຫຼອດ 5 ປີ­ຜ່ານ­ມາ ໂຄງ­ການ​ໄດ້​ສຳ­ເລັດ​ຫຼາຍ​ດ້ານ ເປັນ­ຕົ້ນ ການ​ຍົກ​ລະ­ດັບ​ວຽກ​ງານ​ຄຸ້ມ​ຄອງ ບໍ­ລິ­ຫານ​ສາ­ທາ­ລະ­ນະ​ສຸກ ໃຫ້​ຖືກ­ຕ້ອງ​ຕາມ​ລະ­ບຽບ​ກົດ­ໝາຍ ມີ​ຄວາມ​ໂປ່ງ​ໃສ ສາ­ມາດ​ກວດ​ສອບ​ໄດ້​ໃນ​ລະ­ດັບ​ຕ່າງໆ ຍົກ​ລະ­ດັບ​ການ​ບໍ­ລິ­ການ​ສຸ­ຂະ­ພາບ​ໃຫ້​ມີ​ຄຸນ​ນະ​ພາບ ຮັບ­ປະ­ກັນ​ໃຫ້​ປະ­ຊາ­ຊົນ​ເຂົ້າ​ເຖິງ​ການ​ບໍ­ລິ­ການ ແລະ ປະ­ກອບ­ສ່ວນ​ເຂົ້າ​ໃນ​ການ​ສ້າງ​ພື້ນ­ຖານ​ນຳ­ພາ​ປະ­ເທດ​ຊາດ​ຫຼຸດ​ພົ້ນ​ອອກ​ຈາກ​ສະ­ຖາ­ນະ​ພາບ​ດ້ອຍ​ພັດ­ທະ­ນາ ແລະ ການ​ປົກ​ຄຸມ​ສຸ­ຂະ­ພາບ​ທົ່ວ​ປວງ​ຊົນ ປີ 2025 ແລະ ເປັນ​ພື້ນ­ຖານ​ກ້າວ​ໄປ​ສູ່​ການ​ພັດ­ທະ­ນາ​ແບບ​ຍືນ​ຍົງ​ຂອງ​ຂະ­ແໜງ​ສາ­ທາ­ລະ­ນະ​ສຸກ ປີ 2030 ຕາມ​ນະ­ໂຍ­ບາຍ​ຂອງ ພັກ-ລັດ.

   ສຳ­ລັບ ແຜນ­ການ ປີ 2021-2025 ສຸມ​ໃສ່​ໜ້າ​ວຽກ​ກົນ​ໄກ​ການ​ຄຸ້ມ​ຄອງ​ບໍ­ລິ­ຫານ ຮັບ­ປະ­ກັນ​ການ​ປັບ­ປຸງ ແລະ ຍົກ​ລະ­ດັບ​ຄຸນ​ນະ​ພາບ ພັດ­ທະ­ນາ​ພະ­ນັກ­ງານ​ສາ­ທາ­ລະ­ນະ​ສຸກ ໃຫ້​ມີ​ຄວາມ​ເຂັ້ມ­ແຂງ​ໃນ​ການ​ໃຫ້​ບໍ­ລິ­ການ​ສຸ­ຂະ­ພາບ​ທີ່​ມີ​ຄຸນ​ນະ​ພາບ ປັບ­ປຸງ​ຄຸນ​ນະ​ພາບ ແລະ ສະ­ຖານ­ທີ່​ການ​ບໍ­ລິ­ການ ໂດຍ​ປະ­ຕິ­ບັດ​ຕາມ​ທິດ 3 ສ້າງ ສຸມ​ໃສ່​ຍົກ​ສູງ​ຄຸນ​ນະ­ພາ​ບວຽກ​ງານ​ຮັກ­ສາ​ສຸ­ຂະ­ພາບ​ຂັ້ນ​ຕົ້ນ ການ​ຫັນ​ໂຮງ­ໝໍ​ກຸ້ມ​ຕົນ​ເອງ​ເທື່ອ​ລະ​ກ້າວ​ໃຫ້​ເລີ່ມ​ທົດ​ລອງ​ບາງ​ສະ­ຖານ­ທີ່ ປີ 2021 ສ້ອມ­ແປງ​ຍົກ​ລະ­ດັບ​ສະ​ຖາ​ບັນ​ການ​ສຶກ​ສາ​ສາ­ທາ­ລະ­ນະ​ສຸກ ຂຶ້ນ​ທະ­ບຽນ ແລະ ອອກ​ໃບ​ອະ­ນຸ­ຍາດ​ວິ­ຊາ​ຊີບ​ການ​ປິ່ນ­ປົວ​ຕິດ​ພັນ​ກັບ​ການ​ສ້າງ​ຊ່ຽວ­ຊານ​ລົງ​ເລິກ​ສະ­ເພາະ​ດ້ານ ຈັດ​ຕັ້ງ​ປະ­ຕິ­ບັດ​ວຽກ​ງານ 5 ດີ 1 ພໍ­ໃຈ ແລະ ອື່ນໆ​ໃຫ້​ນັບ​ມື້​ດີ​ຂຶ້ນ.

ຂ່າວທີ່ກ່ຽວຂ້ອງ