ສ ເກົາຫຼີ ສືບຕໍ່ໃຫ້ທຶນຊ່ວຍເຫຼືອ ເພື່ອຮັບມືກັບໄພທຳມະຊາດ

971 15 ມ.ກ. 2020 ຂ່າວໜ້າ​ໜຶ່ງ
ສ ເກົາຫຼີ ສືບຕໍ່ໃຫ້ທຶນຊ່ວຍເຫຼືອ ເພື່ອຮັບມືກັບໄພທຳມະຊາດ

   ພິ­ທີ​ເຊັນ​ບົດ​ບັນ­ທຶກ​ການ​ຮ່ວມ​ມື​ລະ­ຫວ່າງ ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ (ຮສສ) ແລະ ອົງ­ການ​ຮ່ວມ​ມື​ສາ­ກົນ (ກອຍ​ກາ) ສ ເກົາ­ຫຼີ ປະ­ຈຳ​ລາວ ພາຍ​ໃຕ້​ການ​ສ້າງ​ຄວາມ​ເຂັ້ມ­ແຂງ ເພື່ອ​ຮັບ​ມື​ກັບ​ສະ­ພາບ​ດິນ​ຟ້າ​ອາ­ກາດ​ແບບ​ປະ­ສົມ​ປະ­ສານ​ທີ່​ແຂວງ​ອັດ​ຕະ​ປື ຈັດ​ຂຶ້ນ​ວັນ​ທີ 14 ມັງ­ກອນ 2019 ທີ່​ກະ­ຊວງ ຮສສ ຮ່ວມ​ລົງ​ນາມ​ລະ­ຫວ່າງ​ທ່ານ ວິ­ໄລ​ພົງ ສີ​ສົມ​ຫວັງ ຫົວ­ໜ້າ​ກົມ​ສັງ­ຄົມ​ສົງ­ເຄາະ ແລະ ທ່ານ ຊັງ​ຊູ ໂອ ຕາງ­ໜ້າ​ອົງ­ການ​ກອຍ​ກາ ມີ​ທ່ານ ນາງ ໃບ​ຄຳ ຂັດ​ທິ​ຍະ ຮອງ​ລັດ­ຖະ­ມົນ­ຕີ​ກະ­ຊວງ ຮສສ ທ່ານ Shin Sung-Soon ເອກ​ອັກ​ຄະ​ລັດ​ຖະ​ທູດ ສ ເກົາ­ຫຼີ ປະ­ຈຳ​ລາວ ທ່ານ ອຸ່ນ​ຫຼ້າ ໄຊ​ຍະ​ສິດ ຮອງ​ເຈົ້າ­ແຂວງ​ອັດ​ຕະ​ປື ພ້ອມ​ດ້ວຍ​ພາກ­ສ່ວນ​ທີ່​ກ່ຽວ­ຂ້ອງ​ເຂົ້າ​ຮ່ວມ.

   ທ່ານ ນາງ ໃບ​ຄຳ ຂັດ​ທິ​ຍະ ກ່າວ​ວ່າ: ປັດ­ຈຸ­ບັນ ພັກ ແລະ ລັດ­ຖະ­ບານ ພວມ​ສຸມ​ໃສ່​ສືບ­ຕໍ່​ໃຫ້­ການ​ຊ່ວຍ­ເຫຼືອ​ບັນ­ເທົາ​ທຸກ​ເພີ່ມ​ເຕີມ ແລະ ເລັ່ງ​ໃສ່​ປະ­ຕິ­ບັດ​ການ​ຟື້ນ​ຟູ​ຄືນ­ໃໝ່​ກັບ​ບັນ­ດາ​ສິ່ງ​ທີ່​ເສຍ​ຫາຍ​ຈາກ​ໄພ­ພິ­ບັດ ໂດຍ​ສະ­ເພາະ ການ​ຟື້ນ​ຟູ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ ແລະ  ພື້ນ­ຖານ​ໂຄງ​ລ່າງ​ຕ່າງໆ ຢູ່​ເມືອງ​ສະ­ໜາມ​ໄຊ ແຂວງ​ອັດ​ຕະ​ປື ແລະ ແຂວງ​ອື່ນໆ ທີ່​ໄດ້​ຮັບ​ຜົນ​ກະ­ທົບ​ຈາກ​ໄພ­ພິ­ບັດ ເຊິ່ງ​ລັດ­ຖະ­ບານ​ກຳ­ລັງ​ດຳ­ເນີນ​ສືບ­ຕໍ່​ການ​ຊ່ວຍ­ເຫຼືອ​ບັນ­ເທົາ​ທຸກ ແລະ ເລັ່ງ​ໃສ່​ການ​ຟື້ນ​ຟູ​ຮີບ​ດ່ວນ ເປັນ­ຕົ້ນ ການ​ສ້າງ​ທີ່­ຢູ່​ອາ­ໄສ​ແບບ​ຖາ­ວອນ ການ​ຈັດ​ສັນ​ທີ່​ດິນ​ເພື່ອ​ໃຊ້​ເຂົ້າ​ໃນ​ການ​ທຳ​ມາ​ຫາ​ກິນ​ຂອງ​ປະ­ຊາ­ຊົນ ການ​ສ້ອມ­ແປງ ແລະ ການ​ສ້າງ​ເສັ້ນ­ທາງ ການ​ຈັດ​ຫາ​ວຽກ​ເຮັດ​ງານ​ທຳ ການ​ຊ່ວຍ­ເຫຼືອ​ດ້ານ​ການ​ແພດ ການ​ສຶກ​ສາ ແລະ ອື່ນໆ ສະ­ນັ້ນ ການ​ຊ່ວຍ­ເຫຼືອ​ໂຄງ­ການ​ຄັ້ງ​ນີ້ ສືບ­ຕໍ່​ຈາກ​ໂຄງ­ການ 6 ເດືອນ​ທ້າຍ​ປີ 2019 ມາ​ຮອດ​ປັດ­ຈຸ­ບັນ​ຢູ່​ໃນ​ໄລ­ຍະ​ສຸດ​ທ້າຍ ແລະ ເປັນ​ການ​ກະ­ກຽມ​ໃຫ້​ແກ່​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ​ໄລ­ຍະ​ຍາວ​ນີ້ ເຫັນ​ໄດ້​ວ່າ​ມີ​ຫຼາຍ​ດ້ານ​ທີ່​ມີ​ຜົນ­ສຳ­ເລັດ ເປັນ­ຕົ້ນ ການ​ເຝິກ​ວິ­ຊາ​ຊີບ​ໃນ​ສາ­ຂາ​ອາ­ຊີບ​ຕ່າງໆ ເພື່ອ​ໃຫ້​ເຂົາ­ເຈົ້າ​ສາ­ມາດ​ປະ­ກອບ​ອາ­ຊີບ​ໄດ້ ເຝິກ­ອົບ­ຮົມ​ການ​ສ້າງ​ຄວາມ​ເຂັ້ມ­ແຂງ​ທາງ​ດ້ານ​ຕາ​ໜ່າງ​ປົກ​ປ້ອງ​ເດັກ ການ​ສ້າງ​ຄວາມ​ເຂັ້ມ­ແຂງ​ໃນ​ຂະ­ແໜງ­ການ​ສຶກ​ສາ ໃນ​ການ​ຮັບ​ມື​ກັບ​ສະ­ພາບ​ໄພ­ພິ­ບັດ​ທີ່​ອາດ​ຈະ​ເກີດ​ຂຶ້ນ ສົ່ງ­ເສີມ​ຊີ­ວິດ​ການ​ເປັນ​ຢູ່​ພື້ນ­ຖານ ໂດຍ​ການ​ສະ­ໜອງ​ແນວ​ພັນ​ພືດ-ສັດ ແລະ ອຸ­ປະ­ກອນ​ຈຳ­ນວນ​ໜຶ່ງ​ເຂົ້າ​ໃນ​ການ​ປູກ-ການ​ລ້ຽງ ສະ­ໜັບ­ສະ­ໜູນ​ຢາ​ປົວ​ພະ­ຍາດ-ອຸ­ປະ­ກອນ​ການ​ແພດ ພ້ອມ​ທັງ​ເຝິກ­ອົບ­ຮົມ​ສະ­ເພາະ​ດ້ານ​ໃຫ້​ບຸ​ຄະ­ລາ​ກອນ​ແພດ ນີ້​ແມ່ນ​ບາງ​ຜົນ­ງານ​ທີ່​ຍາດ​ມາ​ໄດ້​ໃນ​ໄລ­ຍະ​ຕົ້ນ ສຳ­ລັບ​ໃນ​ໂຄງ­ການ​ໄລ­ຍະ​ໃໝ່ ປີ 2020-2023 ຈະ​ສືບ­ຕໍ່​ຈັດ​ຕັ້ງ​ປະ­ຕິ­ບັດ​ກິດ­ຈະ­ກຳ​ທີ່​ກ່າວ​ມາ​ຂ້າງ​ເທິງ​ນັ້ນ ແລະ ລວມ​ທັງ​ປັບ­ປຸງ​ລະ­ບົບ​ວຽກ​ງານ​ຄຸ້ມ​ຄອງ​ຄວາມ​ສ່ຽງ​ໄພ­ພິ­ບັດ​ໃນ​ລາວ ທັງ​ສູນ​ກາງ ແລະ ທ້ອງ­ຖິ່ນ ໃຫ້​ມີ​ຄວາມ​ເຂັ້ມ­ແຂງ ໂດຍ​ສະ­ເພາະ ຄະ­ນະ​ກຳ­ມະ­ການ​ຄຸ້ມ​ຄອງ​ໄພ­ພິ­ບັດ.

   ທ່ານ​ທູດ ສ ເກົາ­ຫຼີ ປະ­ຈຳ​ລາວ ກ່າວ​ວ່າ: ການ​ລົງ​ນາມ​ຊ່ວຍ­ເຫຼືອ​ຄັ້ງ​ນີ້ ລວມ​ມູນ​ຄ່າ 11,5 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 101,92 ຕື້​ກີບ ຈະ​ຈັດ​ຕັ້ງ​ປະ­ຕິ­ບັດ​ໃນ 5 ປີ (2019-2023) ໂຄງ­ການ​ນີ້​ປະ­ກອບ​ມີ​ໂຄງ­ການ​ສາ­ທາ­ລະ­ນະ​ສຸກ ການ​ສ້າງ​ລາຍ​ຮັບ​ເສີມ ການ​ປົກ​ປ້ອງ​ເດັກ ການ​ເຝິກ­ອົບ­ຮົມ​ວິ­ຊາ​ຊີບ ແລະ ການ​ຮັບ​ມື​ກັບ​ໄພ­ພິ­ບັດ ປະ­ກອບ​ມີ 5 ຂະ­ແໜງ­ການ​ຫຼັກ ເພື່ອ​ສ້າງ​ຄວາມ​ເຂັ້ມ­ແຂງ​ໃຫ້​ທ້ອງ­ຖິ່ນ​ແຂວງ​ອັດ​ຕະ​ປື ໃນ​ການ​ຕອບ​ໂຕ້​ໄພ­ພິ­ບັດ​ທຳ​ມະ​ຊາດ ທີ່​ເນື່ອງ​ມາ​ຈາກ​ການ​ປ່ຽນ­ແປງ​ດິນ​ຟ້າ​ອາ­ກາດ.

ຂ່າວທີ່ກ່ຽວຂ້ອງ