ເນັ້ນປັບປຸງກົນໄກການຊຳລະອາກອນ ດ້ວຍລະບົບທີ່ທັນສະໄໝ

968 15 ມ.ກ. 2020 ຂ່າວໜ້າ​ໜຶ່ງ
ເນັ້ນປັບປຸງກົນໄກການຊຳລະອາກອນ ດ້ວຍລະບົບທີ່ທັນສະໄໝ

   ວຽກ​ງານ​ສ່ວຍ​ສາ​ອາ­ກອນ​ເປັນ​ວຽກ​ງານ​ໜຶ່ງ​ທີ່​ມີ​ຄວາມ​ສຳ­ຄັນ ໃນ​ການ​ເກັບ​ລາຍ​ຮັບ​ແຫ່ງ​ຊາດ ກວມ​ເກືອບ​ເຄິ່ງ​ໜຶ່ງ​ຂອງ​ລາຍ​ຮັບ​ງົບ­ປະ­ມານ​ທັງ​ໝົດ ຜ່ານ​ການ­ຈັດ­ຕັ້ງ​ປະ­ຕິ­ບັດ​ບັນ­ດາ​ມາດ​ຕະ­ການ​ຕ່າງໆ​ທີ່​ກຳ­ນົດ​ໄວ້​ແຕ່​ຕົ້ນ​ປີ 2019 ສາ­ມາດ​ປະ­ຕິ­ບັດ​ລາຍ​ຮັບ​ສ່ວຍ​ສາ​ອາ­ກອນ​ໄດ້ 11.422 ຕື້​ກີບ ເທົ່າ​ກັບ 92,72% ຂອງ​ແຜນ­ການ​ປີ (ຕົວ​ເລກ​ເບື້ອງ​ຕົ້ນ​ບໍ່​ທັນ​ສະ­ຫຼຸບ​ຂາດ​ຕົວ) ທຽບ­ໃສ່​ໄລ­ຍະ​ດຽວ​ກັນ​ຂອງ​ປີ­ຜ່ານ­ມາ​ເພີ່ມ​ຂຶ້ນ 580 ຕື້​ກີບ ເທົ່າ​ກັບ 5,8% ໃນ​ນີ້ ກົມ​ສ່ວຍ​ສາ​ອາ­ກອນ​ເກັບ​ໄດ້ 6.658,29 ຕື້​ກີບ ເທົ່າ​ກັບ 88,61% ຂອງ​ແຜນ­ການ​ປີ ທຽບ­ໃສ່​ປີ­ຜ່ານ­ມາ​ເພີ່ມ​ຂຶ້ນ 9,10% ບັນ­ດາ​ແຂວງ ນະ­ຄອນ­ຫຼວງ​ເກັບ​ໄດ້ 4.764,35 ຕື້​ກີບ ເທົ່າ​ກັບ 99,09% ຂອງ​ແຜນ­ການ​ປີ ທຽບ­ໃສ່​ປີ­ຜ່ານ­ມາ​ເພີ່ມ​ຂຶ້ນ 0,5% ເຊິ່ງ​ເຫັນ​ວ່າ​ຫຼາຍ​ທ້ອງ­ຖິ່ນ​ສາ­ມາດ​ປະ­ຕິ­ບັດ​ໄດ້​ຕາມ​ແຜນ­ການ ລື່ນ​ແຜນ­ການ ແລະ ບໍ່​ສາ­ມາດ​ບັນ­ລຸ​ຕາມ​ແຜນ­ການ ແນວ­ໃດ​ກໍ​ຕາມ ປີ 2020 ແຕ່​ລະ​ຂະ­ແໜງ­ການ​ຕ້ອງ​ໄດ້​ສູ້​ຊົນ​ເກັບ​ລາຍ​ຮັບ​ໃຫ້​ໄດ້ 13.950 ຕື້​ກີບ ເທົ່າ​ກັບ 7,8% ຂອງ GDP ທຽບ­ໃສ່​ແຜນ­ການ​ປີ­ຜ່ານ­ມາ​ເພີ່ມ​ຂຶ້ນ 13,2% ຫຼື ເທົ່າ​ກັບ 1.630 ຕື້​ກີບ.

   ເພື່ອ​ເຮັດ​ໃຫ້​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ສ່ວຍ​ສາ​ອາ­ກອນ ບັນ­ລຸ​ຕາມ​ແຜນ­ການ​ທີ່​ກຳ­ນົດ​ໄວ້ ໃນ​ໂອ­ກາດ​ທີ່​ທ່ານ ສົມ​ດີ ດວງ​ດີ ຮອງ​ນາ­ຍົກ​ລັດ​ຖະ​ມົນ ລັດ­ຖະ­ມົນ­ຕີ​ກະ­ຊວງ​ການ​ເງິນ ເຂົ້າ​ຮ່ວມ​ກອງ​ປະ­ຊຸມ​ສະ­ຫຼຸບ​ຕີ​ລາ­ຄາ​ວຽກ​ງານ​ສ່ວຍ​ສາ​ອາ­ກອນ ປະ­ຈຳ​ປີ 2019 ແລະ ທິດ​ທາງ​ແຜນ­ການ​ປີ 2020 ຈັດ​ຂຶ້ນ​ວັນ​ທີ 13-14 ມັງ­ກອນ 2020 ທີ່​ກົມ​ສ່ວຍ​ສາ​ອາ­ກອນ ເປັນ​ປະ­ທານ​ຂອງ​ທ່ານ ພູ​ທະ­ນູ​ເພັດ ໄຊ​ສົມ­ບັດ ຫົວ­ໜ້າ​ກົມ​ສ່ວຍ​ສາ​ອາ­ກອນ ທ່ານ​ໄດ້​ເນັ້ນ​ໃຫ້​ພະ­ນັກ­ງານ​ຂະ­ແໜງ​ສ່ວຍ​ສາ​ອາ­ກອນ ໃນ​ຂອບ​ເຂດ​ທົ່ວ​ປະ­ເທດ ເອົາ­ໃຈ­ໃສ່​ປັບ­ປຸງ ແລະ ແກ້​ໄຂ​ບັນ­ຫາ​ຕ່າງໆ​ທີ່​ຍັງ​ຄົງ​ຄ້າງ ເປັນ­ຕົ້ນ​ສ້າງ​ລະ­ບົບ ແລະ ປັບ­ປຸງ​ກົນ​ໄກ​ການ​ຊຳ­ລະ​ອາ­ກອນ​ທຸກ​ປະ­ເພດ​ຜ່ານ​ລະ­ບົບ​ທະ­ນາ­ຄານ ດ້ວຍ​ການ​ແຈ້ງ​ຜ່ານ​ລະ­ບົບ​ເອ​ເລັກ​ໂຕຣ​ນິກ ໂດຍ​ບໍ່​ແຈ້ງ​ເສຍ​ອາ­ກອນ​ຜ່ານ​ເຈົ້າ​ໜ້າ­ທີ່​ສ່ວຍ​ສາ​ອາ­ກອນ ການ​ແບ່ງ​ຄວາມ​ຮັບ­ຜິດ­ຊອບ​ຕ້ອງ​ມີ​ຄວາມ​ຊັດ​ເຈນ ການ​ຄຸ້ມ​ຄອງ​ເກັບ​ພັນ­ທະ​ອາ­ກອນ​ຂອງ​ບັນ­ດາ​ບໍ­ລິ­ສັດ​ທີ່​ມີ​ສາ­ຂາ​ໄດ້​ເຄື່ອນ​ໄຫວ​ຢູ່​ທ້ອງ­ຖິ່ນ ຜັນ​ຂະ­ຫຍາຍ ແລະ ສືບ­ຕໍ່​ປັບ­ປຸງ​ລະ­ບົບ​ຄຸ້ມ​ຄອງ​ລາຍ​ຮັບ​ສ່ວຍ​ສາ​ອາ­ກອນ​ດ້ວຍ​ລະ­ບົບ TaxRIS ໃຫ້​ສາ­ມາດ​ຮອງ​ຮັບ​ໄດ້​ກັບ​ການ​ປ່ຽນ­ແປງ​ນິ­ຕິ​ກຳ ເປັນ­ຕົ້ນ ບັນ­ດາ​ກົດ­ໝາຍ​ໃໝ່​ທີ່​ຈະ​ນຳ​ໃຊ້​ໃນ​ປີ 2020 ແລະ ລາຍ​ຮັບ​ອື່ນໆ​ທີ່​ຍັງ​ບໍ່​ທັນ​ຢູ່​ໃນ​ລະ­ບົບ​ດັ່ງ­ກ່າວ ໃຫ້​ກ້າວ​ໄປ​ເຖິງ​ການ​ເຊື່ອມ​ຕໍ່​ລະ­ຫວ່າງ TaxRIS ແລະ ລະ­ບົບ​ໄອ​ທີ​ອື່ນໆ​ຂອງ​ລັດ­ຖະ­ບານ ສືບ­ຕໍ່​ຂະ­ຫຍາຍ​ຖານ​ລາຍ​ຮັບ​ອາ­ກອນ​ມູນ​ຄ່າ​ເພີ່ມ ດ້ວຍ​ການ​ນຳ​ໃຊ້​ເຄື່ອງ​ບັນ­ທຶກ​ການ​ຂາຍ (POS) ຫັນ​ເອົາ​ການ​ລວມ​ສູນ​ການ​ເກັບ​ລາຍ​ຮັບ​ຂະ­ແໜງ​ຊັບ​ສິນ​ຂອງ​ລັດ ແລະ ຄຸ້ມ​ຄອງ​ການ​ເງິນ​ວິ​ສາ​ຫະ​ກິດ ໃຫ້​ມາ​ຂຶ້ນ​ກັບ​ການ​ຄຸ້ມ​ຄອງ​ການ​ເກັບ​ລາຍ​ຮັບ​ຂອງ​ຂະ­ແໜງ​ສ່ວຍ​ສາ​ອາ­ກອນ ຄຸ້ມ​ຄອງ​ລາຍ​ຮັບ​ອາ­ກອນ​ຈາກ​ບັນ­ດາ​ຫົວ­ໜ່ວຍ​ທຸ­ລະ​ກິດ​ທີ່​ມີ​ລາຍ​ຮັບ​ເກີນ​ກວ່າ 50 ລ້ານ​ກີບ​ຂຶ້ນ​ໄປ ປັບ­ປຸງ​ກົນ​ໄກ​ການ​ສົ່ງ​ຄືນ​ເງິນ​ອາ­ກອນ​ໃຫ້​ມີ​ຄວາມ​ວ່ອງ­ໄວ ແລະ ຮັບ­ປະ­ກັນ​ຄວາມ​ຖືກ­ຕ້ອງ​ສອດ­ຄ່ອງ​ຕາມ​ກົດ­ໝາຍ​ກຳ­ນົດ​ເປົ້າ​ໝາຍ ແລະ ປັບ­ປຸງ​ກົນ​ໄກ​ການ​ກວດ­ກາ​ບັນ­ຊີ​ວິ​ສາ​ຫະ​ກິດ​ໃຫ້​ມີ​ຄວາມ​ຊັດ​ເຈນ ພ້ອມ​ທັງ​ຮັບ­ປະ­ກັນ​ຄວາມ​ຖືກ­ຕ້ອງ.

ຂ່າວທີ່ກ່ຽວຂ້ອງ