ເຈ​ບຼໍ​ເທີ ຄອງ​ແຊັມ​ເບ​​ສ​ບອນ​ລີກ​ຍິງ-ຊາຍ​ຊີງ​ຂັນ​ກອຍ​ກາ

441 15 ມ.ກ. 2020 ວົງຈອນກີລາ
ເຈ​ບຼໍ​ເທີ ຄອງ​ແຊັມ​ເບ​​ສ​ບອນ​ລີກ​ຍິງ-ຊາຍ​ຊີງ​ຂັນ​ກອຍ​ກາ

      ສະໂມສອນ​ເຈ​ບຼໍ​ເທີ​ສະຫະພັນ​ເບ​​ສ​ບອນ​ແຫ່ງ​ຊາດ​ລາວ​ຄອງ​ແຊັມ​ກີລາ​ເບ​​ສ​ບອນ​ລີກ​ລະດູ​ການ 2019 ທັງ​ປະເພດ​ທີມ​ຍິງ ແລະ ທີມ​ຊາຍ ຊີງ​ຂັນ​ກອຍ​ກາ ເພື່ອ​ສົ່ງເສີມ​ສ້າງ​ໃຫ້​ກີລາ​ເບ​​ສ​ບອນ​ລາວ ມີ​ການ​ພັດທະນາ​ກີລາ​ດັ່ງກ່າວ​ໃຫ້​ເຕີບ​ໃຫຍ່​ຂະຫຍາຍຕົວ​ໃຫ້​ຫຼາຍ​ຂຶ້ນ ເພື່ອ​ກາຍເປັນ​ກຳລັງ​ແຮງ​ພື້ນຖານ ສາມາດ​ກ້າວ​ຂຶ້ນ​ໄປ​ເປັນ​ນັກກີລາ​ທີມ​ຊາດ​ໃນ​ອະນາຄົດ.

      ພິທີ​ມອບ​ລາງວັນ​ໃຫ້​ນັກກີລາ​ແຂ່ງຂັນ​ກີລາ​ເບ​​ສ​ບອນ​ລີກ 2019 ຈັດ​ວັນ​ທີ 11 ມັງກອນ 2020 ຢູ່​ໂຮງແຮມ​ເມືອງ​ແທງ ນະຄອນຫຼວງ​ວຽງ​ຈັນ ມີ​ທ່ານ ຄຳ​ຜາຍ ສີ​ສະຫວັນ ຮອງ​ລັດຖະມົນຕີ ກະຊວງ​ສຶກ​ສາ​ທິ​ການ ແລະ ກີລາ ທັງ​ເປັນ​ປະທານ​ສະຫະພັນ​ເບ​​ສ​ບອນ​ແຫ່ງ​ຊາດ​ລາວ ທ່ານ ຊອງ​ຊຸນ​ຊິນ ເອກ​ອັກ​ຄະ​ລັດ​ຖະ​ທູດ ສ ເກົາຫຼີ ປະຈຳ​ລາວ ທ່ານ ແສງ​ພອນ ພົນ​ອາມາດ ຫົວໜ້າ​ກົມ​ກີລາ​ລະດັບ​ສູງ ຜູ້​ໃຫ້ການ​ສະໜັບສະໜູນ​ໃນ​ການ​ກໍ່ສ້າງ​ສະໜາມ​ກີລາ​ເບ​​ສ​ບອນ ຄະນະ​ນຳ ຄູ​ເຝິກ ຕະຫຼອດ​ຮອດ​ນັກກີລາ​ເຂົ້າ​ຮ່ວມ.

      ການ​ແຂ່ງຂັນ​ລາຍການ​ດັ່ງກ່າວ​ມີ​ນັກກີລາ​ຈາກ 3 ສະໂມສອນ​ຄື: ສະໂມສອນ​ເຈ​ບຼໍ​ເທີ ສະ​ໂມ ສອນ​ມະຫາວິທະຍາໄລ​ແຫ່ງ​ຊາດ​ລາວ ແລະ ສະໂມສອນ​ໂຮງຮຽນ ​ມສ ວຽງ​ຈັນ ສົ່ງ​ເຂົ້າ​ຮ່ວມ​ພາກສ່ວນ​ລະ 2 ທີມ​ຄື​ຍິງ 1 ທີມ ແລະ ຊາຍ 1 ທີມ ທັງ​ສອງ​ປະເພດ​ແຂ່ງຂັນ​ລະບົບ​ແບບ​ລີກ ມີ​ທັງ​ຮອບ​ຂາ​ໄປ ແລະ ຮອບ​ຂາ​ກັບ ມີ 24 ຮອບ ເລີ່ມ​ແຂ່ງຂັນ​ວັນ​ທີ 16 ພະຈິກ 2019 ເປັນຕົ້ນ​ມາ​ທີ່​ສະໜາມ​ກີລາ​ເບ​​ສ​ບອນ ສະໜາມ​ກີລາ​ແຫ່ງ​ຊາດ (ຫຼັກ16) ເມືອງ​ໄຊ​ທານີ ນະຄອນຫຼວງ​ວຽງ​ຈັນ.

     ຜ່ານ​ການ​ແຂ່ງຂັນ​ຜົນ​ປາກົດ​ວ່າ: ທີ 1 ທີມ​ເຈ​ບຼໍ​ເທີ ທີມ​ຍິງ ແລະ ທີມ​ຊາຍ ທີ 2 ທີມ​ຍິງ ແລະ ທີມ​ຊາຍ ມະຫາວິທະຍາໄລ​ແຫ່ງ​ຊາດ ແລະ ທີ 3 ທີມ​ຍິງ ແລະ ທີມ​ຊາຍ ໂຮງຮຽນ ​ມສ ວຽງ​ຈັນ ນອກ​ນີ້​ຍັງ​ມອບ​ລາງວັນ​ໃຫ້​ນັກກີລາ​ດີເດັ່ນ​ແຕ່​ລະ​ສະໂມສອນ​ອີກ​ດ້ວຍ. 

ຂ່າວທີ່ກ່ຽວຂ້ອງ