ລະວັງ ! ຢາຜິວຂາວ

4.488 17 ມ.ກ. 2020 ນານາສາລະ

   ເພື່ອນ​ຜູ້​ອ່ານ​ລາຍ​ໜຶ່ງ​ສົ່ງ​ຂ່າວ​ມາ​ອາ­ທິດ​ແລ້ວ­ນີ້ ? ບອກ​ວ່າ: ມີ​ໄວ​ລຸ້ນ (ຍິງ) ອາ­ຍຸ​ບໍ່​ທັນ​ຮອດ 15 ປີ ຍ້ອນ​ກິນ​ຢາ​ຟອກ​ຜິວ​ຂາວ​ວ່າ​ຊັ້ນ !

   ກ່ອນ​ໜ້າ​ນີ້​ນາງ​ສາວ​ຄົນ​ນີ້​ຮັບ​ຂາຍ​ຢາ​ຜິວ​ຂາວ ຮັບ­ປະ­ກັນ​ຄວາມ​ຂາວ-ງາມ​ທາງ​ອອນ​ລາຍ ລາວ​ເອງ​ກໍ​ທັງ​ກິນ​ທັງ​ຂາຍ​ໃຜ​ເຫັນ​ກໍ​ຍ້ອງ​ວ່າ ຂາວ-ງາມ ໃນ​ເວ­ລາ​ໜຶ່ງ​ປີ ນາງ​ສາວ​ຄົນ​ນີ້​ໄດ້​ເຂົ້າ​ປິ່ນ­ປົວ​ດ່ວນ(ຫ້ອງ​ມໍ​ລະ​ສຸມ) ຍ້ອນ​ອາ­ການ​ເສັ້ນ­ເລືອດ​ແຕກ... ຕົນ​ໂຕ​ໄຄ່​ບວມ​ປິ່ນ­ປົວ​ດົນ​ເຕີບ​ກໍ​ດີ​ຂຶ້ນ ໂດຍ​ໃສ່​ເລືອດ​ໃສ່​ຢາ​ໂຮງ­ໝໍ​ບ້ານ​ເຮົາ​ນີ້​ລະ ! ອອກ​ມາ​ພັກ­ຜ່ອນ​ຢູ່​ເຮືອນ...ຢູ່​ມາ​ໄດ້ 6 ເດືອນ ກໍ​ເກີດ​ອາ­ການ​ຊ໋ອກ​ກະ­ທັນ­ຫັນ​ສົ່ງ​ເຂົ້າ​ໂຮງ­ໝໍ​ຄືນ​ດຽວ​ມື້​ເຊົ້າ​ມາ​ເສຍ​ຊີ­ວິດ...

   ຟັງ​ເພື່ອນ​ຜູ້​ອ່ານ​ສ່ອງ​ແສງ​ມາ​ຫົດ​ຫູ່​ເຫຼືອ​ເກີນ ເພາະ​ເຫດ­ການ​ແບບ​ນີ້​ເຫັນ​ແຕ່​ຂ່າວ​ຈາກ​ປະ­ເທດ​ໃກ້​ຄຽງ ບໍ່​ຄິດ​ວ່າ​ມັນ​ຊິ​ມາ​ຮອດ​ປະ­ເທດ​ເຮົາ-ບ້ານ​ເຮົາ​ໄວ​ປານ​ນີ້...

   ຈາກ​ປາ­ກົດ­ການ ເຫດ­ການ​ນີ້​ພວກ​ເຮົາ​ຕ້ອງ​ໄດ້​ຕັ້ງ​ບັນ­ຫາ​ນຳ​ກັນ​ວ່າ ສິນ­ຄ້າ​ຫຍັງ​ກໍ​ຕາມ​ທີ່​ໂຄ­ສະ­ນາ​ຊວນ​ເຊື່ອ​ນັ້ນ ຄວນ​ໄດ້​ກວດ­ກາ-ໄຈ້​ແຍກ ອັນ​ໃດ​ຄວນ​ກິນ​ຄວນ​ດື່ມ ເຖິງ​ແມ່ນ​ວ່າ​ມັນ​ຊິ​ຂາວ​ຊິ​ງາມ​ປານ­ໃດ​ກໍ​ຕາມ ແຕ່​ມັນ​ຫຍໍ້​ຊີ­ວິດ​ແບບ​ນັ້ນ​ກະ​ບໍ່​ຄວນ​ນໍ ? ເວົ້າ​ເລື່ອງ​ຢາ ຫຼື ວ່າ​ອາ­ຫານ​ເສີມ​ຊ່ວຍ​ໃຫ້​ຂາວ-ໃຫ້​ງາມ ຫຼື ຫຼຸດ​ຄວາມ​ອ້ວນ-ຄວາມ​ພີ​ນີ້ ໂຄ­ສະ­ນາ​ກັນ​ຫຼາຍ​ແທ້ໆ​ຢູ່​ອອນ​ລາຍ ຖັດ​ມາ​ແມ່ນ​ກາ­ເຟ ຫຼື ຢາ​ກະ​ຕຸ້ນ​ທາງ​ເພດ​ສຳ­ລັບ​ທ່ານ​ຊາຍ ແຕ່​ໃນ​ຕົວ​ຈິງ​ບໍ່​ທັນ​ມີ​ໃຜ​ຢັ້ງ­ຢືນ​ວ່າ ມັນ​ດີ​ແທ້...ມັນ​ໄດ້​ດົນ​ປານ­ໃດ ມີ​ແຕ່​ຜູ້​ຈົ່ມ​ວ່າ​ຖືກ​ຫຼອກ ຫຼື ວ່າ​ປານ​ຕິດ​ຢາ ຄັນ​ບໍ່​ກິນ​ແມ່ນ​ບໍ່​ໄດ້​ເລື່ອງ​ວ່າ​ຊັ້ນ !

   ມັນ​ເຖິງ​ເວ­ລາ​ແລ້ວ​ທີ່​ການ­ຈັດ­ຕັ້ງ​ທີ່​ກ່ຽວ­ຂ້ອງ​ຕ້ອງ​ເອົາ​ຈິງ​ເອົາ​ຈັງ​ກ່ຽວ​ກັບ​ເລື່ອງ​ນີ້ ? ເປັນ­ຕົ້ນ ແມ່ນ​ການ​ກວດ­ກາ-ທຳ­ລາຍ ແລະ ປັບ​ໃໝ​ໃສ່​ໂທດ​ຜູ້​ຄ້າ-ຜູ້​ຂາຍ​ໃນ​ລະ­ດັບ​ສູງ ເພື່ອ​ໃຫ້​ຫຼາບ​ໃຫ້​ຈື່ ອັນ​ນັ້ນ​ແມ່ນ​ເວົ້າ​ເລື່ອງ​ການ­ຈັດ­ຕັ້ງ​ເນີ ! ບາດ­ນີ້​ຜູ້​ກ່ຽວ­ຂ້ອງ ເປັນ­ຕົ້ນ ແມ່ນ​ຜູ້​ຊື້​ກິນ​ນີ້ ! ບໍ່​ຄວນ​ເອົາ​ຊີ­ວິດ​ຕົນ​ເອງ​ໄປ​ສ່ຽງ​ແນວ​ນັ້ນ ? ຂໍ​ໂທດ​ເນີ ! ຄົນ​ເຮົາ​ເກີດ​ມາ​ຊາດ​ດຽວ​ໃດ໋ ? ທຳ​ມະ​ຊາດ​ສ້າງ​ມາ​ກໍ​ຄວນ​ຮັບ​ຮູ້​ຢ່າ​ຝືນ ການ​ຝືນ​ທຳ​ມະ​ຊາດ​ບໍ່​ມີ​ຫຍັງ​ຍືນ​ຍົງ​ໝັ້ນ­ຄົງ​ດອກ​ພີ່­ນ້ອງ​ເອີຍ!.

   ຮຽກ­ຮ້ອງ​ໃຫ້​ມີ​ສະ­ຕິ ແລະ ເຕືອນ​ກັນ​ກ່ອນ​ຊິ​ຊື້ ຊິ​ກິນ​ຢາ​ປະ­ເພດ​ໃດ​ກໍ​ຕາມ​ຈະ​ເປັນ​ອາ­ຫານ​ເສີມ ຫຼື ກະ​ຕຸ້ນ​ກໍ​ຕາມ​ແຕ່ ? ຕ້ອງ​ໄປ​ກວດ​ສຸ­ຂະ­ພາບ​ນຳ​ໂຮງ­ໝໍ ແລະ ກິນ​ຢາ​ຕາມ​ແພດ​ສັ່ງ​ຈະ​ດີ​ທີ່​ສຸດ.

   ຢ່າ​ເອົາ​ຊີ­ວິດ​ໄປ​ສ່ຽງ​ບໍ່​ແມ່ນ​ແນວ​ທົດ​ລອງ.

ຂ່າວທີ່ກ່ຽວຂ້ອງ