ເບິ່ງຄົນໃຫ້ອອກ

3.605 20 ມ.ກ. 2020 ນານາສາລະ

   ຜູ້​ຂຽນ​ເຊື່ອ​ວ່າ: ຜ່ານ​ມາ​ເຮົາ​ເຄີຍ​ສູນ​ເສຍ​ຄົນ​ດີ​ຄົນ​ເກ່ງ​ຍ້ອນ​ຫຼົງ​ເຊື່ອ​ຂ່າວ​ຈາກ​ຄົນ​ບໍ່​ດີ​ໃສ່​ຮ້າຍ​ປ້າຍ​ສີ​ກັນ ຫຼື ເພາະ­ວ່າ​ໄດ້­ຜົນ​ປະ­ໂຫຍດ​ຮ່ວມ​ກັນ ຈົນ​ເບິ່ງ​ບໍ່​ເຫັນ​ຄົນ​ດີ​ຄົນ​ເກ່ງ​ທີ່​ຈະ​ນຳ­ພາ​ໜ່ວຍ​ງານ​ໃຫ້​ກ້າວ­ໜ້າ ການ​ແກ້​ໄຂ​ບັນ­ຫາ​ເລື່ອງ​ຄົນ​ຍັງ​ເປັນ​ບັນ­ຫາ​ຊີ້​ຂາດ​ຊາ­ຕາ­ກຳ​ຂອງ​ອົງ­ການ ສຳ­ນັກ­ງານ​ຕ່າງໆ ເພາະ​ຕົວ­ຢ່າງ​ທີ່​ເກີດ​ຂຶ້ນ​ຖ້າ​ຄົນ​ເກ່ງ-ຄົນ​ດີ​ຖືກ​ຍົກ­ຍ້າຍ ຫຼື ໄລ່​ອອກ​ອາດ​ເຮັດ​ໃຫ້​ໜ່ວຍ​ງານ​ນັ້ນ ບໍ­ລິ­ຫານ​ຕົນ​ພຽງ​ແຕ່​ຢູ່​ລອດ​ແບບ​ມ້າມ​ແປະ​ພຸງ ແຕ່​ວ່າ​ຖ້າ​ມີ​ຄົນ​ເກ່ງ​ຢູ່​ຜັດ​ຢ້ານ​ເຂົາ​ໄດ້​ລື່ນ​ໜ້າ!.

   ສ່ວນ​ໜຶ່ງ​ຜ່ານ​ມາ​ການ​ແກ້​ບັນ­ຫາ​ຄົນ​ຂອງ​ບາງ​ບໍ­ລິ­ສັດ ຫຼື ໜ່ວຍ​ງານ​ທີ່​ສູນ​ເສຍ​ຄົນ​ເກ່ງ​ຍ້ອນ​ຫຼົງ​ເຊື່ອ​ຂ່າວ​ລື ຫຼົງ​ເຊື່ອ​ຄຳ​ຊຸບ​ຊິບ​ນິນ­ທາ ຜູ້​ບໍ­ລິ­ຫານ​ຫູ​ເບົາ ເຊື່ອ​ໄວ​ເຊື່ອ​ງ່າຍ ບັນ­ຫາ​ດັ່ງ­ກ່າວ​ມັນ​ຈິ່ງ​ສະ­ທ້ອນ​ໃຫ້​ເຫັນ​ວ່າ ເຮົາ​ຈະ​ມີ​ວິ­ທີ​ໃດ​ກັ່ນ​ຕ້ອງ​ເອົາ​ຄົນ​ເກ່ງ-ຄົນ​ດີ​ຮັບ​ໃຊ້​ປະ­ເທດ​ຊາດ​ບ້ານ​ເມືອງ ຫຼື ບາງ​ບ່ອນ​ເຮັດ​ການ​ແກ້​ບັນ­ຫາ​ທັງ​ຄົນ ແລະ ວຽກ ແບບ​ໂຍນ​ຄວາມ​ຮັບ­ຜິດ­ຊອບ​ໄປ​ມາ (ຖິ້ມ​ຂີ້​ໃສ່​ກັນ) ທັງໆ​ທີ່­ຢູ່​ກ້ອງ​ຄວາມ​ຮັບ­ຜິດ­ຊອບ​ຂອງ​ຕົນ ແຕ່​ຜັດ​ໂຍນ​ບັນ­ຫາ​ໃຫ້​ໜ່ວຍ​ງານ​ອື່ນ​ແກ້ ສົມ­ມຸດ​ວ່າ​ບັນ­ຫາ​ດັ່ງ­ກ່າວ​ເກີດ​ຂຶ້ນ​ໃນ​ໜ່ວຍ​ງານ​ລັດ​ກໍ​ເຮັດ​ໃຫ້​ພະ­ນັກ­ງານ​ເກີດ​ຄວາມ​ຫຍໍ້­ທໍ້​ແຜ່​ລາມ​ຍາວ​ນານ ເບິ່ງ​ຄື​ວ່າ​ເຮົາ​ລືມ​ເລື່ອງ​ບຸກ​ທະ­ລຸ​ດ້ານ​ລະ­ບຽບ​ການ​ບໍ­ລິ­ຫານ ທີ່​ຂາດ​ຄວາມ​ໂປ່ງ​ໃສ​ເປັນ​ທຳ ດອງ​ບັນ­ຫາ​ໃຫ້​ຍືດ​ເຍື້ອ​ຍາວ​ນານ.

   ການ​ຄັດ​ຄົນ​ເຂົ້າ​ໜ່ວຍ​ງານ​ນີ້ ເປັນ​ບັນ­ຫາ​ຊຳ​ເຮື້ອ​ຍ້ອນ​ວ່າ​ເບິ່ງ​ຄົນ​ຜິດ ແລະ ມີ​ອະ­ຄະ­ຕິ ຄື​ເຫັນ­ແກ່​ພັກ​ພວກ ຮູ້­ຈັກ​ກັນ...ການ​ເວ­ລາ​ຜ່ານ​ໄປ​ດົນ​ເຕີບ​ຄົນ​ທີ່​ຖືກ​ເລືອກ​ເຂົ້າ​ມາ​ອອກ​ລາຍ​ຈິ່ງ​ຮູ້​ນິດ​ໄສ​ວ່າ​ທັງ​ຂີ້­ຄ້ານ ຂາດ​ວຽກ ບໍ່​ເຄົາ­ລົບ​ລະ­ບຽບ ຫົວ­ໜ້າ​ເລີ່ມ​ຢາກ​ຍ້າຍ​ໄປ​ໄວ້​ໜ່ວຍ​ງານ​ອື່ນ ເຊິ່ງ​ຖ້າ​ຄົນ​ບໍ່​ດີ​ແລ້ວ­ໄປ​ຢູ່​ໃສ​ກໍ​ເຮັດ​ໃຫ້​ບ່ອນ​ນັ້ນ​ເສຍ­ຊື່​ເສຍ­ໜ້າ ແລະ ເສຍ​ວຽກ ເພາະ​ຫຼົງ​ເຊື່ອ​ຄົນ​ຜິດ ບັນ­ຫາ​ຫຍໍ້­ທໍ້​ເລື່ອງ​ເຊື່ອ​ຄົນ​ງ່າຍ ຫຼື ເບິ່ງ​ຄົນ​ຈາກ​ຖືກ​ເປັນ​ຜິດ ຫຼື ຈາກ​ຜິດ​ເປັນ​ຖືກ​ນີ້ ຫາກ​ມີ​ໃນ​ໜ່ວຍ​ງານ​ໃດ​ຍ່ອມ​ກາຍ­ເປັນ​ບັນ­ຫາ​ຊຳ​ເຮື້ອ​ຍາວ​ນານ ຖ້າ­ວ່າ​ແກ້​ໄຂ​ບໍ່​ເດັດ­ຂາດ ຫຼື ຖືກ​ອະ­ຄະ­ຕິ​ສີ່​ປະ­ການ​ຄອບ​ງຳ​ຄື ຮູ້­ສຶກ​ຢ້ານ​ຍ້ອນ​ເສັ້ນ​ໃຫຍ່ ເຫັນ­ແກ່​ຮູ້­ຈັກ​ກັນ ເຫັນ­ແກ່​ປະ­ໂຫຍດ ຫຼື ຫຼົງ​ເຂົ້າ­ໃຈ​ຜິດ​ວ່າ​ຜູ້­ກ່ຽວ​ເປັນ​ຄົນ​ດີ.

   ຜູ້​ຂຽນ​ຈິ່ງ​ຂໍ​ຝາກ​ແລກ­ປ່ຽນ​ນຳ​ທ່ານ​ຜູ້​ອ່ານ​ວ່າ: ການ​ຫຼົງ​ເຊື່ອ​ຄົນ​ງ່າຍ ຫູ​ໄວ ຫູ​ເບົາ ຫຼື ບໍ່​ໃຫ້​ຄວາມ​ສຳ­ຄັນ​ແກ່​ການ​ສ້າງ​ຄົນ ຄັດ​ເອົາ​ຄົນ​ດີ-ຄົນ​ເກ່ງ​ແທ້​ຈິງ​ຍ່ອມ​ເຮັດ​ໃຫ້​ໜ່ວຍ​ງານ​ກ້າວ­ໜ້າ​ໄດ້​ຊ້າ ຖ້າ​ທຽບ­ໃສ່​ຝ່າຍ​ເອ­ກະ​ຊົນ​ກໍ​ສ່ຽງ​ຕໍ່​ການ​ຂາດ­ທຶນ ເພາະ​ຜູ້­ກ່ຽວ​ສີ­ມື​ບໍ່​ເຖິງ​ພຽງ​ແຕ່​ມາດ​ລີ­ລາ​ທ່າ​ທາງ​ໃຫ້​ແຕ່​ສະ­ໝອງ​ຂີ້​ເລື່ອຍ ບັນ­ຫາ​ການ​ສ້າງ​ຄົນ ສົ່ງ­ເສີມ​ຄົນ​ດີ​ຄົນ​ເກ່ງ ໃຜ​ກໍ​ມີ​ບົດ­ຮຽນ​ຕ່າງ​ແຕ່​ວ່າ​ເຮົາ​ຈະ​ເປີດ​ໃຈ​ຍອມ­ຮັບ​ກ້າ​ສ້າງ​ເຂົາ ຫຼື ບໍ່ ?.

ໂດຍ: ດັ້ນ​ກີບ​ເມກ

ຂ່າວທີ່ກ່ຽວຂ້ອງ