ສະພາບໍລິຫານ ທຫລ ປະເມີນວຽກງານໃນໄລຍະຜ່ານມາ

1.350 22 ມ.ກ. 2020 ຂ່າວໜ້າ​ໜຶ່ງ

   ກອງ​ປະ­ຊຸມ​ສະ­ພາ​ບໍ­ລິ­ຫານ​ທະ­ນາ­ຄານ ແຫ່ງ ສປປ ລາວ ຈັດ​ຂຶ້ນ​ວັນ​ທີ 20 ມັງ­ກອນ 2020 ທີ່ ທຫລ ໂດຍ​ໃຫ້​ກຽດ​ເປັນ​ປະ­ທານ​ຂອງ​ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງການ​ເງິນ ປະ­ທານ​ສະ­ພາ​ບໍ­ລິ­ຫານ​ທະ­ນາ­ຄານ ແຫ່ງ ສປປ ລາວ ມີ​ທ່ານ ສອນ​ໄຊ ສິດ​ພະ​ໄຊ ຜູ້​ວ່າ­ການ​ທະ­ນາ­ຄານ ແຫ່ງ ສປປ ລາວ ຮອງ​ປະ­ທານ​ສະ­ພາ​ບໍ­ລິ­ຫານ-ບັນ­ດາ​ຄະ­ນະ​ກຳ­ມະ­ການ​ສະ­ພາ​ບໍ­ລິ­ຫານ ແລະ ບັນ­ດາ​ຫົວ­ໜ້າ​ກົມ​ທີ່​ກ່ຽວ­ຂ້ອງ ເຂົ້າ​ຮ່ວມ.

   ທ່ານ ເພັດ​ສະ­ຖາ­ພອນ ແກ້ວ​ວົງ​ວິ­ຈິດ ຫົວ­ໜ້າ​ຫ້ອງ­ການ ທຫລ ໄດ້​ລາຍ​ງານ​ການ­ເຄື່ອນ­ໄຫວ​ວຽກ​ງານ ປີ 2019 ແລະ ທິດ​ທາງ​ປີ 2020 ທຫລ ໃນ​ປີ 2019 ແລະ ທິດ​ທາງ​ແຜນ­ການ​ປີ 2020 ເຊິ່ງ​ປະ­ກອບ​ມີ: ການ­ຈັດ­ຕັ້ງ​ປະ­ຕິ­ບັດ​ແຜນ​ເງິນ­ຕາ ການ­ຈັດ­ຕັ້ງ​ປະ­ຕິ­ບັດ​ແຜນ​ງົບ­ປະ­ມານ ການ​ປະ­ຕິ­ບັດ​ລາຍ​ຮັບ-ລາຍ​ຈ່າຍ ການ​ກໍ່ ສ້າງ​ພື້ນ­ຖານ​ໂຄງ​ລ່າງ ແລະ ປະ­ກອບ​ວັດ­ຖຸ-ເຕັກ­ນິກ ແລະ ທ່ານ ພາ­ນຸ​ສັກ ແກ່ນ​ວົງ​ພະ­ຈັນ ຫົວ­ໜ້າ​ກົມ​ຈັດ​ຕັ້ງ ແລະ ພະ­ນັກ­ງານ ກໍ​ໄດ້​ນຳ​ສະ­ເໜີ​ລະ­ບຽບ​ການ​ພາຍ​ໃນ​ການ​ປະ­ຕິ­ບັດ​ນະ­ໂຍ­ບາຍ​ຂອງ ທຫລ ຈາກ​ນັ້ນ ຜູ້​ແທນ​ເຂົ້າ​ຮ່ວມ​ໃນ​ກອງ​ປະ­ຊຸມ ກໍ​ໄດ້​ປະ­ກອບ​ຄຳ​ຄິດ-ຄຳ​ເຫັນ​ໃສ່​ບັນ­ດາ​ເອ­ກະ­ສານ​ດັ່ງ­ກ່າວ ຢ່າງ​ກົງ​ໄປ​ກົງ​ມາ ແລະ ພິ­ຈາ­ລະ­ນາ​ຮັບ­ຮອງ​ເອົາ​ເອ­ກະ­ສານ​ສຳ­ຄັນ​ດັ່ງ­ກ່າວ.

   ໃນ​ໂອ­ກາດ​ນີ້ ທ່ານ ສົມ​ດີ ດວງ​ດີ ກໍ​ໄດ້​ຕີ​ລາ­ຄາ​ສູງ​ຕໍ່​ຜົນ­ງານ ແລະ ການ­ເຄື່ອນ­ໄຫວ​ຂອງ​ວຽກ​ງານ​ທະ­ນາ­ຄານ ແຫ່ງ ສປປ ລາວ ທີ່​ຍາດ​ມາ​ໄດ້​ໃນ 1 ປີ ຜ່ານ​ມາ ແລະ ໃຫ້​ສືບ­ຕໍ່​ເສີມ​ຂະ­ຫຍາຍ​ຜົນ­ງານ​ດັ່ງ­ກ່າວ ​ໃຫ້​ດີ​ຂຶ້ນ​ກວ່າ​ເກົ່າ ພ້ອມ​ນີ້ ທ່ານ​ຍັງ​ຮຽກ­ຮ້ອງ​ໃຫ້​ມີ​ການ​ປັບ­ປຸງ​ແກ້​ໄຂ​ບາງ​ບັນ­ຫາ ທີ່​ຕິດ​ພັນ​ກັບ​ການ​ປະ­ຕິ­ບັດ​ມາດ​ຕະ­ການ ແລະ ນະ­ໂຍ­ບາຍ​ໃນ​ການ​ຮັກ­ສາ​ສະ­ຖຽນ​ລະ​ພາບ​ເງິນ­ຕາ​ແຫ່ງ​ຊາດ ແນ­ໃສ່​ຮັບ­ປະ­ກັນ​ໃຫ້​ການ­ຈັດ­ຕັ້ງ​ປະ­ຕິ­ບັດ​ແຜນ​ເງິນ­ຕາ ກໍ​ຄື ວຽກ​ງານ​ຂະ­ແໜງ­ການ​ທະ­ນາ­ຄານ ມີ​ບາດ­ກ້າວ​ຫັນ­ປ່ຽນ​ໃໝ່​ທີ່​ຕັ້ງ­ໜ້າ ພ້ອມ​ນີ້ ກໍ​ໃຫ້​ພິ­ຈາ­ລະ­ນາ​ແຜນ​ງົບ­ປະ­ມານ ທຫລ ໃຫ້​ຮັບ­ປະ­ກັນ​ການ­ເຄື່ອນ­ໄຫວ ເພື່ອ​ຮັບ​ໃຊ້​ໜ້າ­ທີ່​ການ­ເມືອງ​ໃຫ້​ດີ ແລະ ໃຫ້​ຮັບ­ປະ­ກັນ​ການ­ຈັດ­ຕັ້ງ​ປະ­ຕິ­ບັດ​ການ​ຮັກ­ສາ​ສະ­ຖຽນ​ລະ​ພາບ​ໃຫ້​ໝັ້ນ​ທ່ຽງ.

ຂ່າວທີ່ກ່ຽວຂ້ອງ