ນາຍົກ ເນັ້ນສ້າງນັກຄົ້ນຄວ້າ ໃຫ້ເປັນນັກຊ່ຽວຊານຫຼາຍຂຶ້ນ

1.114 22 ມ.ກ. 2020 ຂ່າວໜ້າ​ໜຶ່ງ
ນາຍົກ ເນັ້ນສ້າງນັກຄົ້ນຄວ້າ ໃຫ້ເປັນນັກຊ່ຽວຊານຫຼາຍຂຶ້ນ

   ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ລົງ​ພົບ​ປະ​ໂອ້​ລົມ​ພະ­ນັກ­ງານ​ຫຼັກ​ແຫຼ່ງ​ສະ​ຖາ​ບັນ​ຄົ້ນ­ຄວ້າ​ເສດ­ຖະ­ກິດ​ແຫ່ງ​ຊາດ ວັນ​ທີ 21 ມັງ­ກອນ 2020 ຢູ່​ສະ​ຖາ​ບັນ​ດັ່ງ­ກ່າວ ໂດຍ​ໄດ້​ຮັບ​ການ​ຕ້ອນ­ຮັບ​ຈາກ​ທ່ານ ລີ​ເບີ ລີ​ບົວ​ປາວ ຮັກ­ສາ​ການ​ຫົວ­ໜ້າ​ສະ​ຖາ​ບັນ​ຄົ້ນ­ຄວ້າ​ເສດ­ຖະ­ກິດ​ແຫ່ງ​ຊາດ ແລະ ຄະ­ນະ.

   ທ່ານ ລີ​ເບີ ລີ​ບົວ​ປາວ ກ່າວ​ວ່າ: ໄລ­ຍະ​ຜ່ານ​ມາ ສະ​ຖາ​ບັນ​ຄົ້ນ­ຄວ້າ​ເສດ­ຖະ­ກິດ​ແຫ່ງ​ຊາດ ສາ­ມາດ​ເຮັດ​ສຳ­ເລັດ​ໜ້າ­ທີ່​ການ­ເມືອງ​ໃນ​ການ​ຄົ້ນ­ຄວ້າ​ທີ່​ພົ້ນ​ເດັ່ນ ຄື: ໄດ້​ມີ​ບົດ​ລາຍ​ງານ​ຕີ​ລາ­ຄາ​ສະ­ພາບ​ພົ້ນ​ເດັ່ນ​ເສດ­ຖະ­ກິດ​ມະ­ຫາ​ພາກ ແລະ ບາງ​ສິ່ງ​ທ້າ​ທາຍ ເພື່ອ​ແກ້​ໄຂ​ໃນ­ຕໍ່­ໜ້າ​ເປັນ​ແຕ່​ລະ​ໄລ­ຍະ ໄດ້​ຮ່ວມ​ກັບ​ຂະ  ແໜງ​ການ​ກ່ຽວ­ຂ້ອງ​ສຳ­ເລັດ​ການ​ສ້າງ​ຍຸດ​ທະ​ສາດ​ເຕີບ​ໂຕ​ສີ­ຂຽວ​ຂອງ ສປປ ລາວ ສຳ­ເລັດ​ການ​ຄົ້ນ­ຄວ້າ​ກ່ຽວ​ກັບ​ສະ­ພາບ ແລະ ໂຄງ​ສ້າງ​ລາ­ຄາ​ສິນ­ຄ້າ​ທີ່​ຈຳ­ເປັນ ໄດ້​ຮ່ວມ​ກັບ​ອົງ­ການ​ໄຈ​ກາ​ປະ­ເທດ​ຍີ່­ປຸ່ນ ເຮັດ ສຳ­ເລັດ​ການ​ຄົ້ນ­ຄວ້າ​ດ້ານ​ນະ­ໂຍ­ບາຍ ກ່ຽວ​ກັບ​ການ​ສ້າງ​ສະ­ຖຽນ​ລະ​ພາບ​ດ້ານ​ການ​ເງິນ​ຢູ່ ສປປ ລາວ ສຳ­ເລັດ​ການ​ຄົ້ນ­ຄວ້າ ປັບ­ປຸງ​ວິ​ສາ​ຫະ​ກິດ ແລະ ສະ­ຫະ­ກອນ​ໃນ​ຮູບ​ແບບ​ໃໝ່ ການ​ພັດ­ທະ­ນາ​ເຂດ​ເສດ­ຖະ­ກິດ​ພິ­ເສດ​ຢູ່ ສປປ ລາວ ແລະ ຫົວ­ຂໍ້​ຍ່ອຍ​ອື່ນໆ ສຳ­ລັບ​ທິດ​ທາງ​ໃນ­ຕໍ່­ໜ້າ​ຈະ​ສືບ­ຕໍ່​ສຸມ​ໃສ່​ຄົ້ນ­ຄວ້າ​ບັນ­ດາ​ຫົວ­ຂໍ້​ສຳ­ຄັນ​ທີ່​ລັດ­ຖະ­ບານ​ມອບ​ໝາຍ​ໃຫ້ ເຊັ່ນ: ສືບ­ຕໍ່​ຄົ້ນ­ຄວ້າ​ປະ​ເມີນ​ແກ້​ໄຂ​ຄວາມ­ທຸກ​ຍາກ​ໄລ­ຍະ​ຜ່ານ​ມາ ແລະ ທິດ​ທາງ​ແກ້​ໄຂ​ໃນ­ຕໍ່­ໜ້າ​ຕາມ​ທິດ​ຍືນ​ຍົງ ການ​ພັດ­ທະ­ນາ​ຂະ­ແໜງ​ພະ­ລັງ­ງານ ແລະ ບໍ່​ແຮ່ ຕາມ​ທິດ​ຍືນ​ຍົງ ການ​ຢຸດ­ຕິ​ການ​ຖາງ​ປ່າ​ເຮັດ​ໄຮ່ ຕັດ​ໄມ້​ທຳ­ລາຍ​ປ່າ ແລະ ການ​ສົ່ງ​ອອກ​ໄມ້​ທ່ອນ ການ​ສ້າງ​ແຜນ​ແມ່​ບົດ​ຄຸ້ມ​ຄອງ​ການ­ທ່ອງ­ທ່ຽວ​ເມືອງ​ວັງ​ວຽງ ຕາມ​ທິດ​ຍືນ​ຍົງ ແລະ ວຽກ​ງານ​ອື່ນໆ ຕາມ​ຄວາມ​ຈຳ­ເປັນ​ຂອງ​ການ​ພັດ ທະ​ນາ​ເສດ­ຖະ­ກິດ-ສັງ­ຄົມ ແລະ ຄວາມ​ຕ້ອງ­ການ​ຂອງ​ລັດ­ຖະ­ບານ​ໃນ­ຕໍ່­ໜ້າ.

   ໂອ­ກາດ​ນີ້ ທ່ານ ທອງ​ລຸນ ສີ​ສຸ​ລິດ ກໍ​ໄດ້​ສະ­ແດງ​ຄວາມ​ຊົມ­ເຊີຍ ແລະ ຕີ​ລາ­ຄາ​ສູງ​ຕໍ່​ຄວາມ​ພະ­ຍາ ຍາມ​ຂອງ​ຄະ­ນະ​ພັກ-ຄະ­ນະ​ນຳ ແລະ ພະ­ນັກ­ງານ​ສະ​ຖາ​ບັນ​ເສດ­ຖະ­ກິດ​ແຫ່ງ​ຊາດ ທີ່​ໄດ້​ເປັນ​ເຈົ້າ​ການ ມີ​ຄວາມ​ສາ­ມັກ­ຄີ​ເປັນ​ຈິດ​ໜຶ່ງ​ໃຈ​ດຽວ ປະ­ຕິ­ບັດ​ໜ້າ­ທີ່​ວຽກ​ງານ​ທີ່​ໄດ້​ຮັບ​ການ​ມອບ​ໝາຍ ແລະ ໃຫ້​ສືບ­ຕໍ່​ຮັກ­ສາ ເສີມ​ຂະ­ຫຍາຍ​ມູນ­ເຊື້ອ​ອັນ​ດີ­ງາມ​ດັ່ງ­ກ່າວ ພ້ອມ​ນີ້ ຍັງ​ໄດ້​ຍົກ​ເຖິງ​ບົດ­ບາດ​ສຳ­ຄັນ​ຂອງ​ວຽກ​ງານ ຄົ້ນ­ຄວ້າ​ຕໍ່​ກັບ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ຊາດ ເພາະ​ຜົນ​ການ​ຄົ້ນ­ຄວ້າ​ແຕ່​ລະ​ໄລ­ຍະ ເປັນ​ເອ­ກະ­ສານ​ສຳ­ຄັນ​ທີ່​ນຳ​ໃຊ້​ໃນ​ການ​ວາງ​ແຜນ ກໍ​ຄື ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ຊາດ​ໃຫ້​ມີ​ລັກ­ສະ­ນະ​ວິ­ທະ­ຍາ­ສາດ ແລະ ປະ​ສິດ­ທິ​ຜົນ​ສູງ ແນ­ໃສ່​ເຮັດ​ໃຫ້​ເສດ­ຖະ­ກິດ​ເຕີບ​ໂຕ​ຢ່າງ​ມີ​ຄຸນ​ນະ​ພາບ ຍືນ​ຍົງ ຕາມ​ແນວ­ທາງ​ທິດ​ທາງ​ຂອງ​ພັກ ແລະ ລັດ­ຖະ­ບານ​ກຳ­ນົດ​ໄວ້ ນອກ​ນີ້ ທ່ານ​ຍັງ​ໄດ້​ເນັ້ນ​ໃຫ້​ສະ​ຖາ​ບັນ​ເສດ­ຖະ­ກິດ​ແຫ່ງ​ຊາດ ເປັນ​ເຈົ້າ​ການ​ກຳ­ນົດ​ຫົວ­ຂໍ້​ວິ­ໄຈ ຕາມ​ຄວາມ​ສາ­ມາດ​ຕົວ​ຈິງ ທີ່​ວິ­ໄຈ​ໄດ້​ບໍ່​ໃຫ້​ລໍ­ຖ້າ​ແຕ່​ລັດ­ຖະ­ບານ​ສັ່ງ ຫຼື ມອບ​ໝາຍ​ຫົວ­ຂໍ້​ໃຫ້​ວິ­ໄຈ ໃຫ້​ເລັ່ງ​ໃສ່​ຍົກ​ລະ­ດັບ-ພັດ­ທະ­ນາ​ນັກ​ຄົ້ນ­ຄວ້າ​ໃຫ້​ເປັນ​ຊ່ຽວ­ຊານ​ຫຼາຍ​ຂຶ້ນ ຄົ້ນ­ຄວ້າ​ຫົວ­ຂໍ້​ທີ່​ແທດ­ເໝາະ​ກັບ​ສະ­ພາບ​ຕົວ​ຈິງ ແລະ ການ​ຄົ້ນ­ຄວ້າ​ຕ້ອງ​ມີ​ຈຸດ​ສຸມ​ຕາມ​ກຳ­ລັງ​ແຮງ ແລະ ອື່ນໆ ເພື່ອ​ຮັບ­ປະ­ກັນ​ໃຫ້­ການ​ປະ­ຕິ­ບັດ​ໜ້າ­ທີ່​ການ­ເມືອງ ຂອງ​ສະ​ຖາ​ບັນ​ຄົ້ນ­ຄວ້າ​ເສດ­ຖະ­ກິດ​ແຫ່ງ​ຊາດ ກາຍ­ເປັນ​ເສ­ນາ​ທິ​ການ​ວຽກ​ງານ ຄົ້ນ­ຄວ້າ​ບັນ­ຫາ​ດ້ານ​ເສດ­ຖະ­ກິດ​ທີ່​ມີ​ຄຸນ​ນະ​ພາບ ແລະ ປະ​ສິດ­ທິ​ຜົນ​ສູງ​ສຸດ.

ຂ່າວທີ່ກ່ຽວຂ້ອງ