ລັດຖະບານ ລົງທຶນ 47 ຕື້​ກີບ ຈັດ​ແຂ່ງຂັນ​ກີລາ​ແຫ່ງ​ຊາດ ຄັ້ງ​ທີ XI

771 23 ມ.ກ. 2020 ວົງຈອນກີລາ
ລັດຖະບານ ລົງທຶນ 47 ຕື້​ກີບ ຈັດ​ແຂ່ງຂັນ​ກີລາ​ແຫ່ງ​ຊາດ ຄັ້ງ​ທີ XI

   ສະຖານີ​ວິທະຍຸ​ກະຈາຍສຽງ​ແຫ່ງ​ຊາດ ລາຍ​ງານ​ເມື່ອ​ບໍ່​ດົນ​ມາ​ນີ້ ວ່າ: ລັດຖະບານ​ໄດ້​ອະນຸມັດ​ງົບ ປະມານ​ໃຫ້​ແຂວງ​ຊຽງ​ຂວາງ 47 ຕື້​ກີບ ເພື່ອ​ນຳ​ໃຊ້​ໃນ​ການ​ເປັນ​ເຈົ້າພາບ​ຈັດ​ມະ​ຫະ​ກຳ​ກີລາ​ແຫ່ງ​ຊາດ ຄັ້ງ​ທີ XI (ຊຽງ​ຂວາງ ເກມ 2020) ແຕ່​ວັນ​ທີ 22 ມີນາ-1 ເມສາ 2020 ຄ່ຽງ​ຄູ່​ກັບ​ການ​ສະເຫຼີມ​ສະ ຫຼອງ​ວັນ​ສ້າງຕັ້ງ​ພັກ​ປະຊາຊົນ​ປະຕິວັດ​ລາວ ຄົບຮອບ 65 ປີ ແລະ ສະເຫຼີມສະຫຼອງ​ທົ່ງ​ໄຫ​ຫີນ ຊຽງ​ຂວາງ ເປັນ​ມໍລະດົກ​ໂລກ.

    ທ່ານ ບຸນ​ຕົ້ນ ຈັນທະ​ພອນ ເຈົ້າແຂວງ​ຊຽງ​ຂວາງ ປະທານ​ຄະນະ​ກຳມະການ​ຈັດ​ງານ ຊຽງ​ຂວາງ ເກມ 2020 ໃຫ້​ສຳພາດ​ວ່າ: ລັດຖະບານ​ໄດ້​ໂອນ​ໃຫ້​ແຂວງ​ຊຽງ​ຂວາງ ເພື່ອ​ນຳ​ໃຊ້​ກະກຽມ​ວຽກ​ງານ​ຕ່າງໆ​ແລ້ວ 19 ຕື້​ກີບ ໂດຍ​ແຕ່​ລະ​ຄະນະ​ອະນຸ​ກຳມະການ​ໄດ້​ເບີກ​ຈ່າຍ​ງົບປະມານ​ດັ່ງກ່າວ​ໃນ​ການ​ກະ ກຽມ​ໜ້າ​ວຽກ​ທີ່​ຂຶ້ນ​ກັບ​ຄວາມ​ຮັບຜິດຊອບ ຖືກຕ້ອງ​ຕາມ​ລະບຽບ​ການ​ທີ່​ກະຊວງ​ການ​ເງິນ​ວາງ​ອອກ​ເພື່ອ ເຮັດ​ໃຫ້ການ​ກະກຽມ​ທຸກ​ວຽກ​ງານ​ຂອງ​ແຕ່​ລະ​ຄະນະ​ກຳມະການ​ດຳເນີນ​ໄປ​ດ້ວຍ​ດີ ປັດຈຸບັນ​ສາມາດ​ຕີ​ລາຄາ​ໄດ້​ວ່າການ​ກະກຽມ​ໃຫ້ 3 ງານ​ໃຫຍ່ ແຂວງ​ຊຽງ​ຂວາງ​ມີ​ຄວາມ​ພ້ອມ​ແລ້ວ​ຫຼາຍ​ກວ່າ 90%.

    ສ່ວນ​ຂໍ້​ມູນ​ຈາກ​ຄະນະ​ອະນຸ​ກຳມະການ​ເສດຖະກິດ ແລະ ລະດົມ​ທຶນ ໄດ້​ລາຍ​ງານ​ຕໍ່​ກອງ​ປະຊຸມ​ຄະນະ​ຮັບຜິດຊອບ​ລະດັບ​ຊາດ ງານ​ມະ​ຫະ​ກຳ​ກີລາ​ແຫ່ງ​ຊາດ ຄັ້ງ​ທີ XI ວັນ​ທີ 7-8 ມັງກອນ ຜ່ານ​ມາ ວ່າ: ການ​ນຳ​ໃຊ້​ເງິນ 19 ຕື້​ກີບ ໄດ້​ໃຊ້​ຈ່າຍ​ໄປ​ແລ້ວ 8.095.357.400 ກີບ ຍັງ​ຄ້າງ 10.964.812.600 ກີບ.

    ຊຽງ​ຂວາງ ເກມ 2020 ໄດ້​ກຳນົດ​ຊີງ​ໄຊ 385 ຫຼຽນ​ຄຳ 385 ຫຼຽນ​ເງິນ 627 ຫຼຽນ​ທອງ ໃນ 28 ປະເພດ​ກີລາ ຄື: ແລ່ນ-ລານ ລວຍ​ນ້ຳ ບານເຕະ ດອກ​ປີກ​ໄກ່ ມວຍ​ສາກົນ ເທ​ຄວັນ​ໂດ ມວຍ​ລາວ ຢູ​ໂດ ບານສົ່ງ​ໃນ​ຮົ່ມ-ບານສົ່ງ​ຫາດ​ຊາຍ ບານບ້ວງ ເທັນ​ນິດ ຍິງ​ປືນ ກະຕໍ້-ກະຕໍ້​ຊິນ​ລອນ ເປ​ຕັງ ປິ່ງ​ປ່ອງ ຊ່ວງ​ເຮືອ ຄາ​ຣາ​ເຄ​ໂດ ປັນ​ຈັກ​ສີ​ລັດ ມວຍ​ປ້ຳ ວູ​ຊູ ໜ້າ​ເກັກ-ຍິງ​ທະນູ ໝາກ​ຂ່າງ ​ກ໊ອຟ ໝາກເສິກ ໝາກ​ແລ້ ສະນຸກ​ເກີ ໂບ​ລິງ ແລະ ລົດຖີບ ນອກ​ນີ້​ຍັງ​ມີ​ກີລາ​ສາທິດ ຄື: ຣັກ​ບີ້.

                                                                                            

ຂ່າວທີ່ກ່ຽວຂ້ອງ