IMF ປັບ​ຂຶ້ນ​ການ​ຄາດ​ຄະເນ​ການ​ຂະຫຍາຍຕົວ​ຂອງ​ເສດຖະກິດ​ຈີນ ໃນ​ປີ 2020

1.180 23 ມ.ກ. 2020 ຂ່າວຕ່າງປະເທດ
IMF ປັບ​ຂຶ້ນ​ການ​ຄາດ​ຄະເນ​ການ​ຂະຫຍາຍຕົວ​ຂອງ​ເສດຖະກິດ​ຈີນ ໃນ​ປີ 2020

    ອົງການ​ກອງ​ທຶນ​ເງິນຕາ​ສາກົນ (IMF) ໄດ້​ເປີດເຜີຍ​ບົດ​ລາຍ​ງານ​ທ່າ​ອ່ຽງ​ເສດຖະກິດ​ໂລກ ສະບັບ​ຫຼ້າ​ສຸດ​ຢູ່ ດາວ​​ົສ (ປະເທດ​ສະ​ວິດ) ໃນ​ວັນ​ທີ 20 ມັງກອນ​ນີ້ ໂດຍ​ໄດ້​ປັບ​ການ​ຄາດ​ຄະເນ​ການ​ຂະຫຍາຍຕົວ​ຂອງ​ເສດຖະກິດ​ຈີນ ຈາກ 5,8% ທີ່​ເຄີຍ​ໄດ້​ຄາດ​ຄະເນ​ໃນ​ເດືອນ​ຕຸລາ​ປີ 2019 ຜ່ານ​ມາ ຂຶ້ນ​ເປັນ 6%.

    ບົດ​ລາຍ​ງານ​ດັ່ງກ່າວ ຄາດ​ຄະເນ​ວ່າ ປີ 2020 ເສດຖະກິດ​ຈີນ ຈະ​ຂະຫຍາຍຕົວ 6,0% ໃນ​ຂະນະ​ທີ່​ປີ 2021 ຈະ​ຂະຫຍາຍຕົວ 5,8% ທ່ານ ກິ​ຕາ ໂກ​ປິ​ນັດ  ຫົວໜ້າ​ນັກ​ເສດຖະສາດ​ຂອງ IMF ໄດ້​ຢືນຢັນ​ວ່າ ຈັງຫວະ​ການ​ຂະຫຍາຍຕົວ​ຂອງ​ເສດຖະກິດ​ຈີນ ຊັກ​ຊ້າ​ລົງ​ຕົ້ນຕໍ​ແມ່ນ​ເກີດ​ມາ​ຈາກ​ການ​ດຳເນີນ​ການ​ຫັນປ່ຽນ​ໂຄງ​ປະກອບ ໂດຍ​ຄາດ​ວ່າ ເສດຖະກິດ​ຈີນ​ຈະ​ຂະຫຍາຍຕົວ​ຊ້າ​ລົງ​ໃນ​ລະດັບ​ອັນ​ເໝາະ​ສົມ​ໃນ​ຫຼາຍ​ປີ​ຕໍ່ໜ້າ ຊຶ່ງ​ສາເຫດ​ຕົ້ນຕໍ​ກໍ​ແມ່ນ​ຍ້ອນ​ວ່າ ຈີນ​ໄດ້​ປັບປຸງ​ໂຄງ​ປະກອບ​ເສດຖະກິດ​ໂດຍ​ຫັນ​ຈາກ​ການ​ເນັ້ນ​ໃສ່​ການ​ສົ່ງ​ອອກ​ສິນຄ້າ ກ້າວ​ໄປ​ສູ່​ການ​ກະ​ຕຸ້ນ​ການ​ບໍລິໂພກ​ພາຍ​ໃນ​ປະເທດ ເພື່ອ​ເປັນ​ພະລັງ​ຂັບ​ເຄື່ອນ​ຂອງ​ການ​ເຕີບ​ໂຕ​ດ້ານ​ເສດຖະກິດ.

    ເຖິງ​ວ່າ ໄດ້​ປັບ​ການ​ຄາດ​ຄະເນ​ການ​ຂະຫຍາຍຕົວ​ຂອງ​ເສດຖະກິດ​ຈີນ​ຂຶ້ນ​ຕື່ມ​ກໍ​ຕາມ ແຕ່​ເວົ້າ​ໃນ​ຂອບ​ເຂດ​ທົ່ວ​ໂລກ​ແລ້ວ IMF ໄດ້​ປັບ​ຫຼຸດ​ການ​ຄາດ​ຄະເນ​ການ​ເຕີບ​ໂຕ​ຂອງ​ເສດຖະກິດ​ໂລກ​ໂດຍ​ລວມ ບົດ​ລາຍ​ງານ​ໄດ້​ຄາດ​ຄະເນ​ວ່າ ຈັງຫວະ​ການ​ເຕີບ​ໂຕ​ດ້ານ​ເສດຖະກິດ​ໃນ​ປີ​ນີ້ ແລະ ປີໜ້າ ຂອງ​ກຸ່ມ​ເສດຖະກິດ​ທີ່​ພັດທະນາ​ແລ້ວ ຈະ​ຮັກສາ​ຢູ່​ໃນ​ລະດັບ 1,6% ສ່ວນ​ຕະຫຼາດ​ຂອງ​ປະເທດ​ຈະເລີນ​ໃໝ່ ແລະ ກຸ່ມ​ເສດຖະກິດ​ທີ່​ກຳລັງ​ພັດທະນາ ຈະ​ຂະຫຍາຍຕົວ 4,4% ໃນ​ປີ​ນີ້  ແລະ  4,6% ໃນ​ປີໜ້າ.

ຂ່າວທີ່ກ່ຽວຂ້ອງ