ປະທານາທິບໍດີ ປູ​ຕິນ ຮັບຮອງ​ບັນຊີ​ລາຍ​ຊື່​ຄະນະ​ລັດຖະບານ​ໃໝ່​ຂອງ​ຣັດ​ເຊຍ

1.201 23 ມ.ກ. 2020 ຂ່າວຕ່າງປະເທດ
ປະທານາທິບໍດີ ປູ​ຕິນ ຮັບຮອງ​ບັນຊີ​ລາຍ​ຊື່​ຄະນະ​ລັດຖະບານ​ໃໝ່​ຂອງ​ຣັດ​ເຊຍ

   ວັນ​ທີ 21 ມັງກອນ​ນີ້ ປະທານາທິບໍດີ ວາ​ລາ​ດີ​ເມຍ ປູ​ຕິນ ຜູ້ນຳ​ຣັດ​ເຊຍ ໄດ້​ຮັບຮອງ​ບັນຊີ​ລາຍ​ຊື່​ຄະນະ​ລັດຖະບານ​ຊຸດ​ໃໝ່ ໂດຍ​ໃນ​ພາກສ່ວນ​ຂອງ​ລັດຖະບານ​ໃໝ່​ຂອງ​ທ່ານ ມີ​ຄາ​ອິນ ມີ​ຊຸ​​ສ​ຕິນ ນັ້ນ ປະທານາທິບໍດີ ປູ​ຕິນ ໄດ້​ແຕ່ງຕັ້ງ​ທ່ານ ອັງ​ເດຣ ເບ​ລູ​ຊອບ ທີ່​ປຶກສາ​ທາງ​ດ້ານ​ເສດຖະກິດ​ຂອງ​ປະທານາທິບໍດີ​ຣັດ​ເຊຍ ມາ​ຕັ້ງແຕ່​ປີ 2013 ໃຫ້​ຢູ່​ໃນ​ຕຳແໜ່ງ​ຮອງ​ນາຍົກລັດຖະມົນຕີ​ຜູ້​ທີ​ໜຶ່ງ ແທນ​ທ່ານ ອານ​ໂຕນ ຊີ​ລົວ​ນອບ ຜູ້​ຊຶ່ງ​ຢູ່​ໃນ​ຕຳແໜ່ງ​ນີ້​ມາ​ຕັ້ງແຕ່​ເດືອນ​ພຶດສະພາ ປີ 2018 ໃນ​ຂະນະ​ດຽວ​ກັນ ປະທານາທິບໍດີ ປູ​ຕິນ ກໍ​ໄດ້​ແຕ່ງຕັ້ງ​ທ່ານ ມາກ​ຊິມ ເຣ​ເຊດ​ນີ​ກອບ ໃຫ້​ດຳລົງ​ຕຳແໜ່ງ ລັດຖະມົນຕີ​ເສດຖະກິດ​ຄົນ​ໃໝ່ ແທນ​ທ່ານ ມາກ​ຊິມ ໂອ​ເຣ​​ສ​ຄິນ.

   ວັງ​ແກຣມ​ແລັງ ໃຫ້​ຮູ້​ວ່າ ບັນດາ​ເຈົ້າ​ໜ້າທີ່​ລະດັບ​ສູງ ເຊັ່ນ​ລັດຖະມົນຕີ​ກະຊວງ​ການ​ເງິນ  ອານ​ໂຕນ ຊີ​ລົວ​ນອບ ລັດຖະມົນຕີ​ພະລັງງານ ອາ​ເລັກ​ຊານ​ເດີ​​ຣ ໂນ​ວັກ ລັດຖະມົນຕີ​ກະສິກຳ ດີ​ມີ​ຕຣີ ປາ​ຕຣູ​ເຊບ ລັດຖະມົນຕີ​ປ້ອງ​ກັນ​ປະເທດ ແຊກ​ເກ ຊອຍ​ກູ ແລະ ລັດຖະມົນຕີ​ການ​ຕ່າງປະເທດ ແຊກ​ເກ ລາບ​ຣອບ ຕ່າງ​ກໍ​ຍັງ​ຢູ່​ໃນ​ຕຳແໜ່ງ​ຄືເກົ່າ ໃນ​ລັດຖະບານ​ຊຸດ​ໃໝ່​ຂອງ​ຣັດ​ເຊຍ.

   ຄະນະ​ລັດຖະບານ​ໃໝ່​ຂອງ​ຣັດ​ເຊຍ ປະກອບ​ມີ​ຮອງ​ນາຍົກລັດຖະມົນຕີ 9 ທ່ານ ໂດຍ​ໄດ້​ຮັບ​ການ​ສ້າງຕັ້ງ​ຂຶ້ນ​ມາ ໃນ​ເວລາ​ບໍ່​ເຖິງ​ໜຶ່ງ​ອາທິດ ຫຼັງ​ຈາກ​ທີ່​ປະທານາທິບໍດີ ປູ​ຕິນ ເປີດເຜີຍ​ເຖິງ​ການ​ປະຕິ​ຮູບ​ລະບົບ​ການເມືອງ​ຢ່າງຮອບດ້ານ ຈາກ​ນັ້ນ​ກໍ​ນຳໄປ​ສູ່​ການ​ຕົກລົງ​ລາ​ອອກ​ຈາກ​ຕຳແໜ່ງ​ຂອງ​ອະດີດ​ນາຍົກລັດຖະມົນຕີ ດີ​ມີ​ຕຣີ ເມດ​ເວ​ເດບ ແລະ ຄະນະ​ລັດຖະບານ​ຂອງ​ເຂົາ ຕໍ່​ມາ ປະທານາທິບໍດີ ປູ​ຕິນ ກໍ​ໄດ້​ຄັດ​ເລືອກ​ເອົາ​ທ່ານ ມີ​ຄາ​ອິນ ມີ​ຊຸ​​ສ​ຕິນ  (Mikhail Mishustin) ຫົວໜ້າ​ອົງການ​ພາສີ​ແຫ່ງ​ສະຫະພັນ​ຣັດ​ເຊຍ ໃຫ້​ເປັນ​ນາຍົກລັດຖະມົນຕີ​ຄົນ​ໃໝ່.

ຂ່າວທີ່ກ່ຽວຂ້ອງ