ອະດີດ​ປະທານ Interpol ຖືກ​ຕັດສິນ​ໃຫ້​ຈຳ​ຄຸກ 13 ປີ 6 ເດືອນ

1.593 23 ມ.ກ. 2020 ຂ່າວຕ່າງປະເທດ
ອະດີດ​ປະທານ Interpol ຖືກ​ຕັດສິນ​ໃຫ້​ຈຳ​ຄຸກ 13 ປີ 6 ເດືອນ

   ວັນ​ທີ 21 ມັງກອນ​ນີ້ ສານ​ປະຊາຊົນ​ໃນ​ນະຄອນ ທຽນ​ສິນ (ຈີນ) ໄດ້​ປະກາດ​ໂທດ​ຈຳ​ຄຸກ​ເປັນ​ເວລາ 13 ປີ 6 ເດືອນ (13 ປີ​ເຄິ່ງ) ຕໍ່​ທ່ານ ເມງ ຮົງ​ເວີຍ (Meng Hongwei) ອະດີດ​ຮອງ​ລັດຖະມົນຕີ​ກະຊວງ​ຕຳຫຼວດ​ຈີນ ຜູ້​ຊຶ່ງ​ເປັນ​ອະດີດ​ປະທານ​ອົງການ​ຕຳຫຼວດ​ອາຍາ​ສາກົນ (Interpol) ໃນ​ຂໍ້​ຫາ​ຮັບ​ສິນ​ບົນ.

    ຢູ່​ໃນ​ວາລະ​ການ​ດຳເນີນ​ຄະດີ​ຢູ່​ໃນ​ສານ​ນັ້ນ ທ່ານ ເມງ ຮົງ​ເວີຍ ໄດ້​ຍອມຮັບ​ຄວາມ​ຜິດ ແລະ ໃຫ້​ຮູ້​ວ່າ​ເຂົາ​ບໍ່​ສູ້​ຄະດີ ນອກຈາກ​ຖືກ​ຕັດສິນ​ຈຳ​ຄຸກ​ຄື​ດັ່ງກ່າວ​ແລ້ວ ທ່ານ ເມງ ຮົງ​ເວີຍ ຍັງ​ຖືກ​ປັບ​ໃໝ 2 ລ້ານ​ຢວນ (ເທົ່າ​ກັບ 290.000 ໂດ​ລາ​ສະຫະລັດ).

   ກ່ອນ​ໜ້າ​ນັ້ນ ຢູ່​ໃນ​ວາລະ​ດຳເນີນ​ການ​ພິຈາລະນາ​ຄະດີ​ຢູ່​ໃນ​ສານ ເມື່ອ​ເດືອນ​ມິຖຸນາ ປີ 2019 ທ່ານ ເມງ ຮົງ​ເວີຍ ໄດ້​ຍອມຮັບ​ຜິດ ແລະ ສະແດງ​ຄວາມ​ກິນແໜງ ຈາກ​ການ​ກະທຳ​ທີ່​ຜິດພາດ​ຂອງ​ຕົນ ຫຼັງ​ຈາກ​ທີ່​ບັນດາ​ໄອ​ຍະ​ການ ກ່າວ​ຫາ​ວ່າ​ເຂົາ​ຮັບ​ເງິນ​ສິນ​ບົນ 14,5 ລ້ານ​ຢວນ.

ຂ່າວທີ່ກ່ຽວຂ້ອງ