ເບິ່ງບ້ານເຂົາເອົາບົດຮຽນ 23-01-2020

1.923 24 ມ.ກ. 2020 ຫົວຂໍ້ຂ່າວອື່ນໆ

   ເລື່ອງ​ທີ່​ໜ້າ​ສົນ­ໃຈ​ປະ­ຈຳ​ຄໍ​ລຳ​ວັນ​ນີ້ ແມ່ນ​ຂ່າວ​ກ່ຽວ​ກັບ​ໂອ​ຕຣິດ​ຫ້າມ​ສູບ­ຢາ​ໃນ​ຮ້ານ​ອາ­ຫານ ນະ­ໂຍ­ບາຍ​ກ່ຽວ​ກັບ​ເກນ​ອາ­ຍຸ​ບຳ­ນານ​ຢູ່​ຫວຽດ­ນາມ ແລະ ເລື່ອງ​ການ​ຫ້າມ​ພົກ​ພາ​ປືນ​ຢູ່​ຟິ​ລິບ​ປິນ​ໃນ​ໄລ­ຍະ​ມະ​ຫະ​ກຳ​ກີ­ລາ​ອາ​ຊຽນ​ເກມ ຄັ້ງ​ທີ 30.

   ທີ່ ປະ­ເທດ​ໂອ​ຕຣິດ: ຢູ່​ທະ­ວີບ​ເອີ​ຣົບ ປະ­ເທດ​ສິງ​ອົມ​ຄວັນ​ໃນ​ລະ­ດັບ​ຫົວ​ແຖວ​ປະ­ເທດ​ໜຶ່ງ​ນັ້ນ ກໍ​ແມ່ນ​ປະ­ເທດ​ໂອ​ຕຣິດ ຍ້ອນ​ແນວ​ນີ້​ເອງ ມາດ​ຕະ­ການ​ຫຼຸດ­ຜ່ອນ​ການ​ສູບ­ຢາ​ຈຶ່ງ​ດຳ­ເນີນ​ໄປ​ແບບ​ຄ່ອຍ​ເປັນ​ຄ່ອຍ​ໄປ ແລະ ໃນ​ທີ່​ສຸດ​ກໍ​ມີ​ຂ່າວ​ອອກ​ມາ​ວ່າ ກົດ­ໝາຍ​ຫ້າມ​ສູບ­ຢາ​ພາຍ​ໃນ​ຮ້ານ​ອາ­ຫານ​ຢູ່​ທົ່ວ​ປະ­ເທດ​ໂອ​ຕຣິດ ໄດ້​ຖືກ​ປະ­ກາດ​ໃຊ້ ແລະ ມີ​ຜົນ​ສັກ­ສິດ​ນັບ​ແຕ່​ວັນ​ທີ 1 ເດືອນ​ພະ­ຈິກ ປີ 2019 ເປັນ­ຕົ້ນ​ມາ ແຕ່​ກໍ​ມີ​ຂໍ້​ຍົກ­ເວັ້ນ​ວ່າ: ໃນ​ຮ້ານ​ອາ­ຫານ ແລະ ຮ້ານ​ບັນ­ເທີງ​ທີ່​ມີ​ຄວາມ​ກວ້າງ​ຫຼາຍ​ກວ່າ 50 ແມັດ ແລະ ມີ​ພື້ນ​ທີ່​ແຍກ​ສ່ວນ​ສຳ­ລັບ​ສູບ­ຢາ​ນັ້ນ ທຸກ​ຄົນ​ຍັງ​ສາ­ມາດ​ສູບ­ຢາ​ໄດ້​ຄື­ເກົ່າ.

   ຂ່າວ​ບອກ​ວ່າ: ຄວາມ​ພະ­ຍາ­ຍາມ​ຜ່ານ​ກົດ­ໝາຍ​ຫ້າມ​ສູບ­ຢາ ຕາມ​ຮ້ານ​ອາ­ຫານ​ນີ້​ມີ​ມາ​ຫຼາຍ​ຄັ້ງ​ແລ້ວ ແຕ່​ກໍ​ຖືກ​ສຽງ​ຄັດ­ຄ້ານ ຈຶ່ງ​ຈຳ­ເປັນ​ຕ້ອງ​ແກ່​ຍືດ​ແກ່­ຍາວ​ມາ​ເປັນ​ເວ­ລາ​ຫຼາຍ​ປີ ໃນ​ທີ່​ສຸດ​ກໍ​ມີ​ການ​ເກັບ​ກຳ​ລາຍ​ເຊັນ​ຜູ້​ສະ­ໜັບ­ສະ­ໜູນ​ກົດ­ໝາຍ​ໃນ​ທົ່ວ​ປະ­ເທດ ເພື່ອ​ໃຊ້​ເປັນ​ບ່ອນ​ອີງ​ໃນ​ການ​ສ້າງ ແລະ ຮັບ­ຮອງ​ເອົາ​ກົດ­ໝາຍ​ທີ່​ກ່າວ​ມາ​ຂ້າງ​ເທິງ​ນີ້ ຜົນ​ອອກ​ມາ ກໍ​ຄື​ວ່າ ມີ​ຜູ້​ລົງ​ລາຍ​ເຊັນ​ສະ­ໜັບ­ສະ­ໜູນ​ໃຫ້​ມີ​ກົດ­ໝາຍ​ນີ້​ສູງ​ເຖິງ 9 ແສນ​ຄົນ ນີ້​ຄື​ກຳ­ລັງ​ແຮງ​ທີ່​ນຳ­ໄປ​ສູ່​ການ​ຮັບ­ຮອງ ແລະ ປະ­ກາດ​ໃຊ້​ກົດ­ໝາຍ​ສະ­ບັບ​ດັ່ງ­ກ່າວ

   ທີ່ ຫວຽດ­ນາມ: ຂ່າວ​ໃນ​ທ້າຍ​ເດືອນ​ພະ­ຈິກ ປີ 2019 ໃຫ້​ຮູ້​ວ່າ: ກົດ­ໝາຍ​ແຮງ​ງານ​ສະ­ບັບ​ປັບ­ປຸງ​ຂອງ​ຫວຽດ­ນາມ ໄດ້​ຜ່ານ​ມະ­ຕິ​ເຫັນ​ດີ​ຮັບ­ຮອງ​ເອົາ​ໂດຍ​ສະ­ພາ​ແຫ່ງ​ຊາດ​ຫວຽດ­ນາມ ເປັນ​ທີ່​ຮຽບ​ຮ້ອຍ​ແລ້ວ ແລະ ຈະ​ມີ​ຜົນ​ບັງ­ຄັບ​ໃຊ້​ໃນ​ວັນ​ທີ 1 ມັງ­ກອນ ປີ 2021 ເປັນ­ຕົ້ນ​ໄປ.

   ກົດ­ໝາຍ​ແຮງ​ງານ​ສະ­ບັບ​ປັບ­ປຸງ​ນີ້ ໄດ້​ປັບ​ຂຶ້ນ​ເກນ​ອາ­ຍຸ​ບຳ­ນານ ຈາກ 60 ປີ​ໃນ​ປັດ­ຈຸ­ບັນ ເປັນ 62 ປີ ສຳ­ລັບ​ເພດ​ຊາຍ ຈາກ 55 ປີ ສຳ­ລັບ​ເພດ​ຍິງ ມາ​ເປັນ 60 ປີ ແຕ່​ການ​ປັບ​ຂຶ້ນ​ນັ້ນ​ຈະ​ເຮັດ​ເປັນ​ແຕ່​ລະ​ບາດ­ກ້າວ​ໄປ ບໍ່​ແມ່ນ​ພຶບ​ບາດ​ດຽວ​ໂລດ ຕົວ­ຢ່າງ: ໃນ​ບາດ­ກ້າວ​ທຳ​ອິດ ກະ­ສຽນ​ບຳ­ນານ​ສຳ­ລັບ​ຜູ້​ຊາຍ​ຈະ​ຢູ່​ໃນ​ເກນ 60 ປີ ກັບ 3 ເດືອນ ສຳ­ລັບ​ແມ່­ຍິງ​ກໍ​ຈະ​ເປັນ 55 ປີ ກັບ 4 ເດືອນ ແລະ ກ້າວ​ຂຶ້ນ​ຈົນ​ຄົບ​ກັບ​ຕົວ​ເລກ​ອາ­ຍຸ​ທີ່​ກຳ­ນົດ​ໄວ້​ໃນ​ກົດ­ໝາຍ ການ​ເຮັດ​ເປັນ​ກ້າວໆ​ແບບ​ນີ້​ກໍ​ເພື່ອ​ໃຫ້​ຜູ້​ເຂົ້າ​ບຳ­ນານ​ປັບ​ຕົວ​ສະ­ດວກ ທັງ​ເປັນ​ການ​ຖອດ​ບົດ­ຮຽນ​ຕົວ​ຈິງ​ໃຫ້​ຜູ້​ທີ່​ຈະ​ເຂົ້າ​ບຳ­ນານ​ໃນ​ບາດ­ກ້າວ​ຕໍ່ໆ​ໄປ (ນີ້​ຄື​ຄຳ​ຄິດ​ຂອງ​ຜູ້​ສັງ​ລວມ).

   ທີ່ ຟິ​ລິບ​ປິນ: ເລື່ອງ​ການ​ມີ​ປືນ​ໄວ້​ໃນ​ຄອບ​ຄອງ ເພື່ອ​ປ້ອງ​ກັນ​ຕົວ​ສຳ­ລັບ​ບຸກ­ຄົນ​ທີ່​ບໍ່​ແມ່ນ​ທະ­ຫານ ຕຳ­ຫຼວດ​ນັ້ນ ທາງ​ການ​ຟິ​ລິບ​ປິນ​ໄດ້​ກຳ­ນົດ​ຕາມ​ປະ­ເພດ​ອາ­ຊີບ ເຊັ່ນ: ພະ­ນັກ­ງານ​ທະ­ນາ­ຄານ ທະ­ນາຍ­ຄວາມ ນັກ​ຂ່າວ ນັກ­ບວດ ແລະ ພະ­ນັກ­ງານ​ແພດ​ໝໍ ອາ­ຊີບ​ທີ່​ກ່າວ​ມາ​ຂ້າງ​ເທິງ​ນີ້ ຈັດ​ເປັນ​ອາ­ຊີບ​ສ່ຽງ ເຊິ່ງ​ຜູ້​ປະ­ກອບ​ສາ­ມາດ​ຂໍ­ອະ­ນຸ­ຍາດ​ຖື​ປືນ​ໄດ້.

   ແຕ່​ແນວ­ໃດ​ກໍ​ດີ ໃນ​ໄລ­ຍະ​ທີ່​ຟິ​ລິບ​ປິນ​ໄດ້​ເປັນ​ເຈົ້າ­ພາບ​ມະ​ຫະ​ກຳ​ກີ­ລາ​ອາ​ຊຽນ ຫຼື ອາ​ຊຽນ ເກມ ໃນ​ປີ 2019 ນີ້ ທາງ​ການ​ໄດ້​ປະ­ກາດ​ຍົກເລີກ​ຊົ່ວ­ຄາວ​ໃບ​ອະ­ນຸ­ຍາດ ໃຫ້​ຜູ້​ທີ່​ມີ​ອາ­ຊີບ​ດັ່ງ ກ່າວ​ມາ​ຂ້າງ​ເທິງ​ນັ້ນ​ມີ​ອາ­ວຸດ​ປ້ອງ​ກັນ​ປະ­ຈຳ​ຕົວ ທັງ​ນີ້ ກໍ​ເພື່ອ​ປ້ອງ​ກັນ​ຄວາມ​ປອດ​ໄພ​ລວມ​ໃຫ້​ແກ່ ປະ­ຊາ­ຊົນ ແລະ ນັກ­ກີ­ລາ​ທີ່​ເຂົ້າ​ຮ່ວມ​ອາ​ຊຽນ​ເກມ ຄັ້ງ​ທີ 30 ພາກ­ສ່ວນ​ທີ່​ຍັງ​ມີ​ສິດ​ຖື​ປືນ​ໃນ​ໄລ­ຍະ​ນີ້​ນັ້ນ ໄດ້­ແກ່ ເຈົ້າ​ໜ້າ­ທີ່​ທະ­ຫານ ຕຳ­ຫຼວດ ແລະ ເຈົ້າ​ໜ້າ­ທີ່​ທາງ​ການ​ທີ່​ກ່ຽວ­ຂ້ອງ ເຊິ່ງ​ໄດ້​ມີ​ການ​ກຳ­ນົດ​ເຄື່ອງ​ແບບ​ສະ­ເພາະ​ຢ່າງ​ຈະ​ແຈ້ງ­ວ່າ ພາກ­ສ່ວນ​ໃດ​ແດ່​ໄດ້​ຮັບ​ອະ­ນຸ­ຍາດ​ໃຫ້​ຖື​ປືນ​ໄດ້ ນີ້​ເປັນ​ການ​ຍົກ­ເລີກ​ຊົ່ວ­ຄາວ ເທົ່າ​ນັ້ນ ຫຼັງ​ຈາກ​ອາ​ຊຽນ​ເກມ ກົດ­ໝາຍ​ອະ­ນຸ­ຍາດ​ໃຫ້​ຖື​ປືນ​ປ້ອງ​ກັນ​ຕົວ ກໍ​ຈະ​ມີ​ຜົນ​ໃນ​ທາງ​ປະ­ຕິ­ບັດ​ຄື­ເກົ່າ.

ຂ່າວທີ່ກ່ຽວຂ້ອງ