ສ້າງຄວາມເຂົ້າໃຈ ການພັດທະນາວຽກງານທ່ອງທ່ຽວ

609 27 ມ.ກ. 2020 ຂ່າວໜ້າ​ໜຶ່ງ
ສ້າງຄວາມເຂົ້າໃຈ ການພັດທະນາວຽກງານທ່ອງທ່ຽວ

   ວັນ​ທີ 22 ມັງ­ກອນ 2020 ທ່ານ ຄຳ​ປະ­ດິດ ເຂັມ​ມາ­ນິດ ເຈົ້າ­ເມືອງ​ໄຊ​ທາ­ນີ ແລະ ທ່ານ ອິນ­ທີ ເດືອນ​ສະ­ຫວັນ ປະ­ທານ ບໍ­ລິ­ສັດ ອິນ­ທີ​ຣາ ກຼຸບ ໄດ້​ລົງ​ພົບ​ປະ​ພໍ່​ແມ່​ປະ­ຊາ­ຊົນ ບ້ານ​ເວີນ​ແທ່ນ ເມືອງ​ໄຊ​ທາ­ນີ ນະ­ຄອນ­ຫຼວງ​ວຽງ​ຈັນ ເພື່ອ​ອະ­ທິ­ບາຍ ແລະ ຊີ້​ແຈງ​ກ່ຽວ​ກັບ​ການ​ພັດ­ທະ­ນາ ບ້ານ​ເວີນ​ແທ່ນ ໃຫ້​ກາຍ ເປັນ​ແຫຼ່ງ​ທ່ອງ​ທ່ຽວ​ແຫ່ງ​ໃໝ່ ຂອງ​ນະ­ຄອນ­ຫຼວງ​ວຽງ​ຈັນ ມີ​ທ່ານ ວຽງ ເຜຍ​ສະ​ຂະ ນາຍ­ບ້ານ​ເວີນ​ແທ່ນ ແລະ ພໍ່​ແມ່​ປະ­ຊາ­ຊົນ​ພາຍ​ໃນ​ບ້ານ​ເຂົ້າ​ຮ່ວມ.

   ທ່ານ ຄຳ​ປະ­ດິດ ເຂັມ​ມາ­ນິດ ກ່າວ​ວ່າ: ໂຄງ­ການ​ພັດ­ທະ­ນາ​ການ­ທ່ອງ­ທ່ຽວ ຢູ່​ບ້ານ​ເວີນ​ແທ່ນ ເປັນ​ແຜນ­ທີ່​ພວກ​ເຮົາ​ໄດ້​ເອົາ​ເຂົ້າ​ຢູ່​ໃນ​ບັນ­ຊີ​ການ​ພັດ­ທະ­ນາ​ການ­ທ່ອງ­ທ່ຽວ ຂອງ​ນະ­ຄອນ­ຫຼວງ​ວຽງ​ຈັນ ມາ​ໄດ້​ຫຼາຍ​ປີ​ແລ້ວ ແລະ ເປັນ 1 ໃນ 15 ໂຄງ­ການ ຮຽກ​ການ​ລົງ­ທຶນ​ດ້ານ​ການ­ທ່ອງ­ທ່ຽວ ຂອງ​ນະ­ຄອນ­ຫຼວງ​ວຽງ​ຈັນ ການ​ເຂົ້າ​ມາ​ພັດ­ທະ­ນາ ບ້ານ​ເວີນ​ແທ່ນ​ແຫ່ງ​ນີ້ ກໍ​ເພື່ອ​ໃຫ້​ກາຍ­ເປັນ​ສະ­ຖານ­ທີ່​ທ່ອງ​ທ່ຽວ​ການ​ອະ­ນຸ​ຮັກ​ທຳ​ມະ​ຊາດ​ແຫ່ງ​ໃໝ່ ຂອງ​ນະ­ຄອນ­ຫຼວງ​ວຽງ​ຈັນ ທີ່​ຕິດ​ພັນ​ກັບ​ການ​ກະ­ເສດ ແລະ ຕິດ​ພັນ​ກັບ​ທຳ​ມະ​ຊາດ​ຢູ່​ໃນ​ເຂດ​ປ່າ​ສະ­ຫງວນ ເນື້ອ­ທີ່ 30 ກວ່າ​ເຮັກ­ຕາ ໃຫ້​ເປັນ​ສະ­ຖານ­ທີ່​ການ­ທ່ອງ­ທ່ຽວ​ທີ່​ມີ​ຄຸນ​ນະ​ພາບ ແລະ ປະ­ຊາ­ຊົນ​ພາຍ​ໃນ​ບ້ານ​ໄດ້​ມີ​ສ່ວນ​ຮ່ວມ ເປັນ​ການ​ສ້າງ​ລາຍ​ຮັບ​ໃຫ້​ແກ່​ພໍ່​ແມ່​ປະ­ຊາ­ຊົນ ພ້ອມ​ທັງ​ປະ­ກອບ ສ່ວນ​ເຂົ້າ​ໃນ​ການ​ພັດ­ທະ­ນາ​ບ້ານ ກໍ​ຄື ເມືອງ​ໄຊ​ທາ­ນີ.

   ບ້ານ​ເວີນ​ແທ່ນ ຕັ້ງ​ຢູ່​ພາກ​ຕາ­ເວັນ​ອອກ­ສຽງ​ເໜືອ ຂອງ​ເມືອງ​ໄຊ​ທາ­ນີ ນະ­ຄອນ­ຫຼວງ​ວຽງ​ຈັນ ມີ​ພົນ­ລະ­ເມືອງ​ທັງ​ໝົດ 760 ຄົນ ຍິງ 339 ຄົນ ມີ 153 ຫຼັງ­ຄາ​ເຮືອນ ມີ 169 ຄອບ­ຄົວ ມີ​ເນື້ອ­ທີ່​ທັງ​ໝົດ 1.502 ເຮັກ­ຕາ ປະ­ຊາ­ຊົນ​ສ່ວນ​ໃຫຍ່​ປະ­ກອບ​ອາ­ຊີບ​ປູກ­ຝັງ-ລ້ຽງ­ສັດ ຫັດ­ຖະ­ກຳ ຕຳ​ຫູກ ແລະ ອື່ນໆ.

ຂ່າວທີ່ກ່ຽວຂ້ອງ