ເບິ່ງບ້ານເຂົາເອົາບົດຮຽນ 28-01-2020

1.838 28 ມ.ກ. 2020 ຫົວຂໍ້ຂ່າວອື່ນໆ

   ພົບ​ກັນ​ວັນ​ນີ້ ຂໍ​ເລີ່ມ​ຈາກ​ຂ່າວ​ກ່ຽວ​ກັບ​ແຜນ​ມາດ​ຕະ­ການ​ລົງ­ໂທດ​ຂອງ​ມາ​ເລ​ເຊຍ ຕໍ່​ບັນ­ດາ​ບໍ­ລິ­ສັດ​ທີ່​ໄປ​ຈູດ​ປ່າ​ເພື່ອ​ການ​ຜະ­ລິດ​ຢູ່​ຕ່າງ­ປະ­ເທດ ຕໍ່​ໃສ່​ແຜນ​ປັບ­ປຸງ​ຄວາມ​ສະ­ດວກ​ສະ­ບາຍ​ໃນ​ລົດ​ປະ­ຈຳ​ທາງ​ຢູ່​ຫວຽດ­ນາມ ແລະ ປິດ​ທ້າຍ​ກັບ​ເລື່ອງ ສປ ຈີນ ເອົາ​ໂທດ​ຜູ້​ສ້າງ​ຂ່າວ​ປອມ​ໃຫ້​ເໝືອນ​ຈິງ.

   ທີ່ ມາ​ເລ​ເຊຍ: ມີ​ຂ່າວ​ອອກ​ມາ​ຈາກ​ມາ​ເລ​ເຊຍ​ໃນ​ທ້າຍ​ໄຕ​ມາດ​ທີ 3 ປີ 2019 ວ່າ: ລັດ­ຖະ­ບານ​ມາ​ເລ​ເຊຍ​ຈະ​ນຳ​ໃຊ້​ມາດ​ຕະ­ການ​ອັນ​ຈຳ­ເປັນ​ເພື່ອ​ໃຫ້​ບໍ­ລິ­ສັດ​ມາ​ເລ​ເຊຍ​ໃນ​ຕ່າງ­ປະ­ເທດ​ຮັບ ຜິດ​ຊອບ​ຕໍ່​ການ​ຈູດ​ປ່າ​ທີ່​ພາ­ໃຫ້​ເກີດ​ຄວັນ​ໄຟ​ປິວ​ປົກ​ຄຸມ​ພື້ນ​ທີ່​ຕ່າງໆ​ໃນ​ອາ­ຊີ​ຕາ­ເວັນ​ອອກ­ສຽງ​ໃຕ້​ນີ້​ຄື​ຄຳ​ເວົ້າ​ຂອງ​ທ່ານ ມາ​ຮາ ເທຍ ໂມ​ຮາ​ມັດ ນາ­ຍົກ­ລັດ­ຖະ­ມົນ­ຕີ​ມາ​ເລ​ເຊຍ (ວຽງ​ຈັນ​ທາມ 23 ກັນ­ຍາ 2019).

   ໂດຍ​ທ່ານ​ໄດ້​ບອກ​ວ່າ: ລັດ­ຖະ­ບານ​ມາ​ເລ​ເຊຍ​ອາດ​ພິ­ຈາ­ລະ­ນາ​ສ້າງ​ກົດ­ໝາຍ ເພື່ອ​ກຳ­ນົດ​ໃຫ້​ບໍ­ລິ­ສັດ​ຕ່າງໆ​ຂອງ​ມາ​ເລ​ເຊຍ​ຮັບ­ຜິດ­ຊອບ​ຕໍ່​ຜົນ​ຮ້າຍ​ຈາກ​ການ​ຈູດ​ປ່າ​ເພື່ອ​ດຳ­ເນີນ​ກິດ­ຈະ­ການ​ປູກ­ຝັງ​ຂອງ​ຕົນ​ຢູ່​ຕ່າງ­ປະ­ເທດ ຖ້າ​ພົບ​ວ່າ­ການ​ກະ ທຳ​ດັ່ງ­ກ່າວ​ໄດ້​ກໍ່­ໃຫ້­ເກີດ​ຄວັນ​ໄຟ​ທີ່​ເປັນ​ອັນ​ຕະ ລາຍ​ຕໍ່​ສຸ­ຂະ­ພາບ​ໃນ​ພື້ນ​ທີ່​ຂອງ​ອາ­ຊີ​ຕາ­ເວັນ​ອອກ­ສຽງ​ໃຕ້ ມາດ​ຕະ­ການ​ຄ້າຍ​ຄຽງ​ກັນ​ນີ້​ກໍ​ເຄີຍ​ປະ­ຕິ­ບັດ​ມາ​ແລ້ວ​ຢູ່​ປະ­ເທດ​ສິງ­ກະ­ໂປ ຄື: ທາງ​ການ​ໄດ້​ສັ່ງ​ຫ້າມ​ຊື້​ສິນ­ຄ້າ​ຂອງ​ບັນ­ດາ​ບໍ­ລິ­ສັດ​ທີ່​ພົວ­ພັນ​ກ່ຽວ​ກັບ​ການ​ກໍ່­ໃຫ້­ເກີດ​ມີ​ຄວັນ​ໄຟ​ໃນ​ການ​ດຳ­ເນີນ​ທຸ­ລະ​ກິດ​ຂອງ​ຕົນ​ຢູ່​ຕ່າງ­ປະ­ເທດ.

   ທີ່ ຫວຽດ­ນາມ: ຂ່າວ​ນີ້​ອ່າວ​ເກົ່າ​ແດ່ ອອກ​ມາ​ແຕ່​ທ້າຍ​ປີ 2016 ແຕ່​ກໍ​ເປັນ​ເລື່ອງ​ທີ່​ຄວນ​ເບິ່ງ​ໄວ້​ເປັນ​ບົດ­ຮຽນ ເພື່ອ​ປັບ­ປຸງ​ລະ­ບົບ​ການ​ໃຫ້​ບໍ­ລິ­ການ​ລົດ​ໂດຍ­ສານ​ສາ­ທາ­ລະ­ນະ​ຢູ່​ລາວ​ພວກ​ເຮົາ.

   ຂ່າວ​ບອກ​ວ່າ: ບໍ­ລິ­ສັດ​ໂດຍ­ສານ​ລົດ​ປະ­ຈຳ​ທາງ (ລົດ­ເມ) ຢູ່​ນະ­ຄອນ­ຫຼວງ​ຮ່າ​ໂນ້ຍ ໄດ້​ເລີ່ມ​ທົດ​ລອງ​ແລ່ນ​ລົດ­ເມ 2 ຄັນ ໝາຍ​ເລກ 36 ແລະ 38 ດ້ວຍ​ລະ­ບົບ GPS ທີ່​ເປັນ​ມິດ​ກັບ​ສິ່ງ­ແວ­ດລ້ອມ​ໃນ​ລະ­ດັບ​ມາດ​ຕະ­ການ​ຂອງ​ເອີ​ໂຣ-3 (Euro-3) ກ່ຽວ​ກັບ​ການ​ຄວບ​ຄຸມ​ການ​ປ່ອຍ​ຄວັນ​ພິດ ລົດ​ທົດ​ລອງ​ແຕ່​ລະ​ຄັນ​ບັນ­ຈຸ​ຜູ້­ໂດຍ­ສານ​ໄດ້​ຄັນ​ລະ 60 ຄົນ ມີ​ການ​ຕິດ​ຕັ້ງ​ລະ­ບົບ​ວາຍ​ຟາຍ (Wi-Fi) ບໍ່​ເສຍ​ຄ່າ ມີ​ເຄື່ອງ​ຂະ­ຫຍາຍ​ສຽງ​ເພື່ອ​ແຈ້ງ​ໃຫ້​ຜູ້­ໂດຍ­ສານ​ຊາບ​ກ່ຽວ​ກັບ​ຈຸດ­ໝາຍ​ປາຍ­ທາງ​ໃນ​ອະ­ນາ­ຄົດ​ອັນ​ໃກ້ໆ​ນີ້ ຄາດ​ວ່າ​ລົດ­ເມ​ປະ­ເພດ​ນີ້​ຈະ​ມີ​ແລ່ນ​ຕາມ​ທາງ​ທຸກ​ສາຍ​ຂອງ​ນະ­ຄອນ­ຫຼວງ​ຮ່າ​ໂນ້ຍ ສ່ວນ​ເຄື່ອງ​ແບບ​ຂອງ​ເຫຼົ່າ​ໂຊ​ເຟີ​ກໍ​ຈະ​ປ່ຽນ​ມາ​ເປັນ​ສີ­ຟ້າ​ຄື​ກັບ​ສີ​ຂອງ​ລົດ​ປະ­ຈຳ​ທາງ.

   ທີ່ ສປ ຈີນ: ໃນ​ທ້າຍ​ເດືອນ​ພະ­ຈິກ ປີ 2019 ສຳ­ນັກ­ງານ​ລັດ­ຖະ­ບານ​ຈີນ​ໄດ້​ເຜີຍ­ແຜ່​ໃຫ້​ທົ່ວ​ສັງ­ຄົມ​ຊາບ​ກ່ຽວ​ກັບ​ກົດ­ໝາຍ​ຫ້າມ​ນຳ​ໃຊ້​ໂປຼ​ແກຼມ​ຕັດ​ຕໍ່​ພາບ ແລະ ສຽງ ເພື່ອ​ສ້າງ​ຂ່າວ​ປອມ​ທີ່​ເບິ່ງ​ເໝືອນ​ຈິງ​ປານ​ປາດ​ແປະ ເຊິ່ງ​ທາງ​ການ​ຂອງ​ຈີນ​ຖື​ວ່າ​ເປັນ​ປາ­ກົດ­ການ​ໃໝ່​ໃນ​ວົງ​ການ​ສື່​ທີ່​ມີ​ຄວາມ​ເປັນ​ອັນ­ຕະ­ລາຍ ເພາະ​ມັນ​ສາ­ມາດ​ຫຼອກ​ລວງ​ໃຫ້​ຜູ້​ຊົມ­ໃຊ້​ເຫັນ​ວ່າ​ເປັນ​ຂອງ​ຈິງ.

   ກົດ­ໝາຍ​ສະ­ບັບ​ນີ້​ໄດ້​ກຳ­ນົດ​ໃຫ້​ຜູ້​ຜະ­ລິດ ຜູ້​ເຜີຍ­ແຜ່​ພາບ ແລະ ສຽງ​ວິ​ດີ​ໂອ​ທີ່​ເປັນ​ຂ່າວ​ບໍ່​ມີ​ມູນ​ຄວາມ​ຈິງ ແຕ່​ເໝືອນ​ຈິງ ມີ​ໂທດ​ທາງ​ອາ­ຍາ ສ່ວນ​ພາບ ແລະ ສຽງ​ວິ​ດີ​ໂອ​ທີ່​ຜະ­ລິດ​ດ້ວຍ​ເຕັກ​ໂນ​ໂລ​ຊີ​ເພື່ອ​ນຳ​ໃຊ້​ໃນ​ກໍ­ລະ­ນີ​ຈຳ­ເປັນ (ທາງ​ສ້າງ ສັນ) ນັ້ນ ກໍ​ຕ້ອງ​ມີ​ຄຳ­ເຕືອນ​ໃຫ້​ຜູ້​ຊົມ­ໃຊ້​ຮູ້​ຢ່າງ​ຈະ­ແຈ້ງ (ເພື່ອ​ບໍ່​ໃຫ້​ຫຼົງ​ເຊື່ອ​ວ່າ​ເປັນ​ຂອງ​ຈິງ).

ຂ່າວທີ່ກ່ຽວຂ້ອງ