ແຂ່ງຂັນ​ກີລາ​ເປ​ຕັງ​ຊີງ​ລາງວັນ ຫົວໜ້າ​ສະ​ຖາ​ບັນ​ວິຈິດ​ສິນ​ແຫ່ງ​ຊາດ

465 28 ມ.ກ. 2020 ວົງຈອນກີລາ
ແຂ່ງຂັນ​ກີລາ​ເປ​ຕັງ​ຊີງ​ລາງວັນ ຫົວໜ້າ​ສະ​ຖາ​ບັນ​ວິຈິດ​ສິນ​ແຫ່ງ​ຊາດ

    ຄະນະ​ຊາວ​ໜຸ່ມ​ໜ່ວຍ​ຮາກ​ຖານ​ສະ​ຖາ​ບັນ​ວິຈິດ​ສິນ​ແຫ່ງ​ຊາດ ກະຊວງ​ຖະ​ແຫຼ່ງ​ຂ່າວ ວັດທະນະທຳ ແລະ ທ່ອງ​ທ່ຽວ (ຖວ​​ທ) ຈັດ​ແຂ່ງຂັນ​ກີລາ​ເປ​ຕັງ​ຊີງ​ລາງວັນ​ຮູບແຕ້ມ​ຫົວໜ້າ​ສະ​ຖາ​ບັນ​ວິຈິດ​ສິນ​ແຫ່ງ​ຊາດ ຄັ້ງ​ທີ 5 ສົກ​ສຶກ​ສາ 2019-2020 ຂຶ້ນ​ວັນ​ທີ 24 ມັງກອນ 2020 ທີ່​ສະ​ຖາ​ບັນ​ດັ່ງກ່າວ ມີ​ທ່ານ ໄມ​ສິງ ຈັນ​ບຸດ​ດີ ຫົວໜ້າ​ສະ​ຖາ​ບັນ​ວິຈິດ​ສິນ​ແຫ່ງ​ຊາດ ທ່ານ ບົວ​ໄລ ພານຸ​ວົງ ເລຂາ​ຄະນະ​ບໍລິຫານ​ງານ​ຊາວ​ໜຸ່ມ​ກະຊວງ ຖວ​​ທ ພ້ອມ​ດ້ວຍ​ສະມາຊິກ​ຊາວ​ໜຸ່ມ​ເຂົ້າ​ຮ່ວມ.

    ທ່ານ ບຸນ​ເຕີມ ສີ​ບຸນ​ເຮືອງ ເລຂາ​ຊາວ​ໜຸ່ມ​ຮາກ​ຖານ​ສະ​ຖາ​ບັນ​ວິຈິດ​ສິນ​ແຫ່ງ​ຊາດ ກ່າວ​ວ່າ: ເພື່ອ​ເປັນ​ສ້າງ​ຂະ​ບວນ​ການ​ຕ້ອນຮັບ​ກອງ​ປະຊຸມ​ໃຫຍ່​ໜ່ວຍ​ພັກ​ສະ​ຖາ​ບັນ​ວິຈິດ​ສິນ​ແຫ່ງ​ຊາດ ກອງ​ປະຊຸມ​ໃຫຍ່​ຊາວ​ໜຸ່ມ ກະຊວງ ຖວ​​ທ ຄັ້ງ​ທີ VIII ສ້າງ​ຄວາມ​ສາມັກຄີ​ລະຫວ່າງ​ພະນັກງານ​ອ້ອມ​ຂ້າງ​ກະຊວງ ກໍ​ຄື​ພາກສ່ວນ​ພາຍ​ນອກ​ໃຫ້​ມີ​ຄວາມ​ຮັດ​ແໜ້ນ​ສາມັກຄີ​ກັນ​ຍິ່ງ​ຂຶ້ນ ທັງ​ເປັນ​ການ​ຊົມເຊີຍ​ວັນ​ສ້າງຕັ້ງ​ກອງທັບ​ປະຊາຊົນ​ປະຕິວັດ​ລາວ ຄົບຮອບ 71 ປີ ໃຫ້​ມີ​ຄວາມ​ໝາຍ​ສຳຄັນ ແລະ ບັນຍາກາດ​ຟົດຟື້ນ.

    ການ​ແຂ່ງຂັນ​ຄັ້ງ​ນີ້​ມີ​ທີມ​ນັກກີລາ​ເຂົ້າ​ຮ່ວມ​ທັງ​ໝົດ 45 ທີມ ໃນ​ນັ້ນ​ປະເພດ​ທີມ​ອາວຸໂສ​ມີ 13 ທີມ ທີມ​ຊາວ​ໜຸ່ມ​ຊາຍ 20 ທີມ ແລະ ທີມ​ຊາວ​ໜຸ່ມ​ຍິງ 12 ທີມ ເຊິ່ງ​ການ​ແຂ່ງຂັນ​ໄດ້​ດຳເນີນ​ໄປ​ດ້ວຍ​ບັນຍາກາດ​ຟົດຟື້ນ ແລະ ຜ່ານ​ການ​ແຂ່ງຂັນ​ຜົນ​ປາກົດ​ວ່າ ທີມ​ທີ່​ສາດ​ມາດ​ຍາດ​ໄດ້​ລາງວັນ​ຮູບແຕ້ມ​ຊະນະ​ເລີດ ສະເພາະ​ທີມ​ອາວຸໂສ ຫໍ​ວັດທະນະທຳ​ແຫ່ງ​ຊາດ ທີມ​ຊາວ​ໜຸ່ມ​ຊາຍ​ຫໍ​ພິ​ພິ​ຕະ​ພັນ​ແຫ່ງ​ຊາດ ແລະ ທີມ​ຊາວ​ໜຸ່ມ​ຍິງ ກົມ​ພິມ​ຈຳໜ່າຍ ໄດ້​ຮັບ​ຮູບແຕ້ມ ແລະ ເງິນ​ລາງວັນ​ພາກສ່ວນ​ລະ 8 ແສນ​ກີບ ສຳລັບ​ທີມ​ຮອງ​ຊະນະ​ເລີດ​ອາວຸໂສ ສະໂມສອນ​ບ້ານ​ຊຽງ​ດາ ແລະ ທີມ​ຊາຍ-ຍິງ​ໂຮງຮຽນ​ສິລະ​ປະ​ດົນຕີ​ແຫ່ງ​ຊາດ​ໄດ້​ຮັບ​ຮູບແຕ້ມ​ພ້ອມ​ດ້ວຍ​ເງິນ​ພາກສ່ວນ​ລະ 5 ແສນ​ກີບ ສ່ວນ​ອັນ​ດັບ​ທີ 3 ທີມ​ອາວຸໂສ ຂະແໜງ​ກີລາ​ມວນ​ຊົນ​ປະເພດ​ຊາຍ​ທີມ​ສູນວັດທະນະທຳ​ເດັກ ແລະ ທີມ​ປະເພດ​ຍິງ ຫໍ​ວັດທະນະທຳ​ໄດ້​ຮັບ​ຮູບແຕ້ມ ແລະ ເງິນ​ລາງວັນ​ພາກສ່ວນ​ລະ 3 ແສນ​ກີບ ນອກ​ນັ້ນ​ແມ່ນ​ລາງວັນ​ຊົມເຊີຍ.

ຂ່າວທີ່ກ່ຽວຂ້ອງ