ຜູ້ອຳນວຍການ​ໃຫຍ່ WHO ເດີນທາງ​ໄປ​ປະເທດ​ຈີນ

740 28 ມ.ກ. 2020 ຂ່າວຕ່າງປະເທດ
ຜູ້ອຳນວຍການ​ໃຫຍ່ WHO ເດີນທາງ​ໄປ​ປະເທດ​ຈີນ

     ທ່ານ ເທດ​​ຣອສ ອາ​ດາ​ນອມ ເກ​ເບຣ​ເຢ​ຊຸ​​ສ ຜູ້ອຳນວຍການ​ໃຫຍ່​ອົງການ​ອະນາໄມ​ໂລກ (WHO) ແຈ້ງ​ໃຫ້​ຮູ້​ວ່າ ເຂົາ​ພວມ​ເດີນທາງ​ໄປ​ຍັງ​ປະເທດ​ຈີນ ເພື່ອ​ປຶກສາ​ຫາລື​ກັບ​ບັນດາ​ເຈົ້າ​ໜ້າທີ່​ຈີນ ກ່ຽວ​ກັບ​ຮູບ​ການ​ໃນ​ການ​ຄວບ​ຄຸມພະ​ຍາດ​ປອດ​ອັກເສບ ທີ່​ເກີດ​ຈາກ​ໄວ​​ຣັສ​ໂຄ​ໂຣ​ນາ​ສາຍ​ພັນ​ໃໝ່.

    ຕົວ​ເລກ​ໃໝ່​ຫຼ້າ​ສຸດ​ຂອງ WHO ໃຫ້​ຮູ້​ວ່າ ຜູ້​ຕິດ​ໄວ​​ຣັສ​ໂຄ​ໂຣ​ນາ​ສາຍ​ພັນ​ໃໝ່ ໄດ້​ເພີ່ມ​ຂຶ້ນ​ເປັນ 2.014 ຄົນ ຊຶ່ງ​ສ່ວນ​ຫຼາຍ​ແມ່ນ​ຢູ່​ໃນ​ປະເທດ​ຈີນ ແລະ ມີ 29 ຄົນ ໄດ້​ຮັບ​ການ​ຢັ້ງຢືນ ວ່າ​ຕິດພະຍາດ​ດັ່ງກ່າວ ຢູ່​ໃນ​ປະເທດ​ອື່ນໆ​ອີກ 10 ປະເທດ.

    ເມື່ອ​ອາທິດ​ທີ່​ຜ່ານ​ມາ ທ່ານ ເທດ​​ຣອສ ໄດ້​ເລັ່ງ​ຊຸກຍູ້​ຈີນ​ໃຫ້​ເອົາ​ຈິງ​ໃນ​ການ​ປະຕິບັດ​ມາດ​ຕະການ​ແຍກ​ບໍລິເວນ “ໃນ​ໄລຍະ​ສັ້ນ” ເພື່ອ​ໃຫ້​ການເຄື່ອນໄຫວ​ຄວບ​ຄຸມພະ​ຍາດ ໄດ້​ຮັບ​ການ​ຜັນ​ຂະຫຍາຍ​ຢ່າງ​ມີ​ປະ​ສິດທິ​ຜົນ. ເພື່ອ​ຕອບ​ຮັບ​ຕໍ່​ຄຳ​ຮຽກຮ້ອງ​ຈາກ WHO ນັ້ນ ຈີນ​ກໍ​ໄດ້​ດຳເນີນ​ມາດ​ຕະການ​ແຍກ​ບໍລິເວນ​ຕໍ່​ແຂວງ ຫູ​ເບ ຊຶ່ງ​ເປັນ​ແຂວງ​ທີ່​ມີ​ນະຄອນ ອູ​ຮ້ານ (Wuhan) ຕັ້ງ​ຢູ່ ແລະ ຖື​ວ່າ​ເປັນ​ສູນ​ການ​ລະບາດ​ຂອງ​ໄວ​​ຣັວ​ໂຄ​ໂຣ​ນາ​ສາຍ​ພັນ​ໃໝ່.

    ໃນ​ຂະນະ​ດຽວ​ກັນ ວັນ​ທີ 26 ມັງກອນ​ນີ້ ທ່ານ​ຊີ​ເວີນ​ໂປ ຫົວໜ້າ​ສະ​ຖາ​ບັນ​ຄົ້ນຄວ້າ​ເຊື້ອ​ພະຍາດ​ຂອງ​ສູນ​ຄວບ​ຄຸມພະ​ຍາດ​ຈີນ ໃຫ້​ສຳພາດ​ຕໍ່​ຜູ້​ສື່​ຂ່າວ​ວ່າ ປັດຈຸບັນ ສູນ​ດັ່ງກ່າວ​ໄດ້​ເລີ່ມ​ດຳເນີນ​ການ​ຄົ້ນຄວ້າ​ວັກ​ແຊງ​ເຊື້ອ​ໄວ​​ຣັສ​ໂຄ​ໂຣ​ນາ​ສາຍ​ພັນ​ໃໝ່ ໂດຍ​ໄດ້​ແຍກ​ຕົວ​ເຊື້ອ​ພະຍາດ​ອອກ​ຢ່າງ​ສຳເລັດ​ຜົນ ແລະ ປັດຈຸບັນ​ພວມ​ຄັດ​ເລືອກ​ຕົວ​ເຊື້ອ​ພະຍາດ.

    ຫຼ້າ​ສຸດ ຄະນະ​ກຳມະການ​ສາທາລະນະ​ສຸກ​ແຫ່ງ​ຊາດ​ຈີນ ແຈ້ງ​ໃຫ້​ຮູ້ເມື່ອ​ວັນ​ທີ 27 ມັງກອນ​ນີ້​ວ່າ ໄລ່​ມາ​ຮອດ​ທ້າຍ​ວັນ​ທີ 26 ມັງກອນ​ນີ້ ຢູ່​ໃນ​ຈີນ ໄດ້​ຢັ້ງຢືນ​ຜູ້​ເສຍ​ຊີວິດ​ຍ້ອນ​ພະຍາດ​ປອດ​ອັກເສບ ທີ່​ເກີດ​ຈາກ​ໄວ​​ຣັສ​ໂຄ​ໂຣ​ນາ ສາຍ​ພັນ​ໃໝ່ ຈຳນວນ 80 ຄົນ ແລະ ຢັ້ງຢືນ​ຜູ້​ຕິດພະຍາດ​ດັ່ງກ່າວ 2.744 ຄົນ ໃນ​ນັ້ນ​ມີ ຜູ້​ຢູ່​ໃນ​ອາການ​ໜັກ 461 ຄົນ.

ຂ່າວທີ່ກ່ຽວຂ້ອງ