ຈະ​ຫຼວດ 4 ນັດ ຖືກ​ຍິງ​ໄປ​ຕົກ​ໃສ່​ໃກ້​ສະຖານທູດ ສ ອາ​ເມ​ຣິ​ກາ ປະຈຳ​ອີ​ຣັກ

751 28 ມ.ກ. 2020 ຂ່າວຕ່າງປະເທດ
ຈະ​ຫຼວດ 4 ນັດ ຖືກ​ຍິງ​ໄປ​ຕົກ​ໃສ່​ໃກ້​ສະຖານທູດ ສ ອາ​ເມ​ຣິ​ກາ ປະຈຳ​ອີ​ຣັກ

    ເຈົ້າ​ໜ້າທີ່​ກະຊວງ​ພາຍ​ໃນ​ຂອງ ສ ອາ​ເມ​ຣິ​ກາ ແຈ້ງ​ໃຫ້​ຮູ້ເມື່ອ​ວັນ​ທີ 26 ມັງກອນ​ນີ້​ວ່າ ຈະ​ຫຼວດ 4 ນັດ​ໄດ້​ຖືກ​ຍິງ​ໄປ​ຕົກ​ໃສ່​ບໍລິເວນ​ໃກ້​ກັບ​ສະຖານທູດ ສ ອາ​ເມ​ຣິ​ກາ ຊຶ່ງ​ຕັ້ງ​ຢູ່​ໃນ​ເຂດ​ຂຽວ ໃນ​ນະຄອນຫຼວງ​ແບກ​ແດດ ຂອງ​ອີ​ຣັກ ແຕ່​ບໍ່​ມີ​ຜູ້​ໄດ້​ຮັບ​ບາດເຈັບ ຫຼື​ເສຍ​ຊີວິດ​ຈາກ​ເຫດການ​ໂຈມ​ຕີ​ໃນ​ເທື່ອ​ນີ້.

     ໃນ​ຂະນະ​ດຽວ​ກັນ ທ່ານ ອັບ​ແດລ ອັບ​ດູ​​ລ ມາ​ດີ ນາຍົກລັດຖະມົນຕີ​ຮັກສາ​ການ​ຂອງ​ອີ​ຣັກ ໄດ້​ກ່າວ​ປະນາມ​ຕໍ່​ເຫດການ​ໂຈມ​ຕີ​ດັ່ງກ່າວ ທີ່​ເປັນ​ການ​ແນໃສ່​ສະຖານທູດ ສ ອາ​ເມ​ຣິ​ກາ. ນາຍົກລັດຖະມົນຕີ ອັບ​ດູ​​ລ ມາ​ດີ ກ່າວ​ຢູ່​ໃນ​ແຈ້ງ​ການ​ວ່າ ທ່ານ​ໄດ້​ສະເໜີ​ໃຫ້​ກອງ​ກຳລັງ​ຮັກສາ​ຄວາມ​ສະຫງົບ​ຂອງ​ອີ​ຣັກ ຜັນ​ຂະຫຍາຍ​ການ​ປະຕິບັດ​ໜ້າທີ່ ພ້ອມ​ທັງ​ເພີ່ມ​ທະວີ​ການ​ສືບສວນ ແລະ ຕາມ​ລ່າ​ຫາ​ຕົວ​ຜູ້​ທີ່​ກໍ່​ເຫດ​ໂຈມ​ຕີ.

    ການ​ໂຈມ​ຕີ​ດັ່ງກ່າວ​ເກີດ​ຂຶ້ນ ຫຼັງ​ຈາກ​ທີ່​ຊາວ​ອີ​ຣັກ​ຫຼາຍ​ພັນ​ຄົນ ພາກັນ​ເດີນ​ຂະ​ບວນ​ຢູ່​ໃນ​ໃຈກາງ​ນະຄອນຫຼວງ​ແບກ​ແດດ ເມື່ອ​ວັນ​ທີ 24 ມັງກອນ​ທີ່​ຜ່ານ​ມາ ເພື່ອ​ຄັດຄ້ານ​ຕໍ່​ການ​ມີໜ້າ​ຂອງ​ກອງທັບ ສ ອາ​ເມ​ຣິ​ກາ ຢູ່​ໃນ​ອີ​ຣັກ ຫຼັງ​ຈາກ​ເກີດ​ເຫດການ​ທີ່ ສ ອາ​ເມ​ຣິ​ກາ ປະຕິບັດ​ການ​ໂຈມ​ຕີ​ທາງ​ອາກາດ ໂດຍ​ໄດ້​ເຮັດ​ໃຫ້​ທ່ານ ກາ​ເຊມ ໂຊ​ເລ​ມາ​ນີ ຜູ້​ບັນຊາ​ການ​ລະດັບ​ສູງ​ຂອງ​ກອງທັບ​ອີ​ຣານ ລວມ​ເຖິງ​ຜູ້​ບັນຊາ​ການ​ທະຫານ​ຂອງ​ອີ​ຣັກ ອີກ​ຜູ້​ໜຶ່ງ ເສຍ​ຊີວິດ.

ຂ່າວທີ່ກ່ຽວຂ້ອງ