ອິນ​ເດຍ ສະເຫຼີມສະຫຼອງ​ວັນ​ສາທາລະນະ​ລັດ

779 28 ມ.ກ. 2020 ຂ່າວຕ່າງປະເທດ
ອິນ​ເດຍ ສະເຫຼີມສະຫຼອງ​ວັນ​ສາທາລະນະ​ລັດ

     ວັນ​ທີ 26 ມັງກອນ​ນີ້ ທາງ​ການ​ອິນ​ເດຍ ໄດ້​ຈັດ​ພິທີ​ສະເຫຼີມສະຫຼອງ​ວັນ​ສາທາລະນະ​ລັດ (26 ມັງກອນ) ທ່າມກາງ​ການ​ຮັກສາ​ຄວາມ​ສະຫງົບ​ຢ່າງ​ເຂັ້ມ​ງວດ. ການເຄື່ອນໄຫວ​ສະເຫຼີມສະຫຼອງ​ເຫດການ​ດັ່ງກ່າວ ຕົ້ນຕໍ​ແມ່ນ​ຈັດ​ຂຶ້ນ​ໃນ​ບໍລິເວນ​ຖະໜົນຫຼວງ ຣາ​​ສ​ປັດ ໃນ​ນະຄອນຫຼວງ ນີວ ແດນ​ລີ ບ່ອນ​ຊຶ່ງ​ມີ​ການສະແດງ​ກຳລັງ​ແຮງ​ດ້ານ​ການ​ທະຫານ ແລະ ຄວາມ​ຫຼາກ​ຫຼາຍ​ທາງ​ດ້ານ​ວັດທະນະທຳ​ຂອງ​ອິນ​ເດຍ. ພິທີ​ດັ່ງກ່າວ ເປີດ​ສາກ​ດ້ວຍ​ການ​ຍິງ​ປືນ​ໃຫຍ່ 21 ນັດ ໂດຍ​ມີ​ປະທານາທິບໍດີ​ອິນ​ເດຍ  ຣາມ ນັດ ໂຄ​ວິນ ແລະ ນາຍົກລັດຖະມົນຕີ ນາ​ເຣນ​ດຣາ ໂມ​ດີ ເຂົ້າ​ຮ່ວມ.

    ເຈົ້າ​ໜ້າທີ່​ຂອງ​ອິນ​ເດຍ ໃຫ້​ຮູ້​ວ່າ ມີ​ເຈົ້າ​ໜ້າທີ່​ຮັກສາ​ຄວາມ​ສະຫງົບ 20.000 ກວ່າ​ຄົນ ທີ່​ມາ​ຈາກ​ອົງການ​ຕຳຫຼວດ ແລະ ກອງ​ກຳລັງ​ເຄິ່ງ​ການ​ທະຫານ ຜັນ​ຂະຫຍາຍ​ການ​ປະຕິບັດ​ໜ້າທີ່ ຢູ່​ໃນ​ພື້ນ​ທີ່​ນະຄອນຫຼວງ ນີວ ແດນ​ລີ ເພື່ອ​ຮັບປະກັນ​ບໍ່​ໃຫ້​ເກີດ​ເຫດການ​ໃດໆຂຶ້ນ. ນອກຈາກ​ນັ້ນແລ້ວ ເຈົ້າ​ໜ້າທີ່​ກໍ​ໄດ້​ຕິດ​ຕັ້ງ​ລະບົບ​ກ້ອງ​ວົງ​ຈອນ​ປິດ​ຮັກສາ​ຄວາມ​ສະຫງົບ (CCTV) ແລະ ກ້ອງ​ວົງ​ຈອນ​ປິດ ສັນ​ລະ​ສູດ​ໃບ​ໜ້າ ຢູ່​ຕາມ​ຖະໜົນ ຣາ​​ສ​ປັດ ຄື​ກັບ​ວ່າ​ເປັນ​ສ່ວນ​ໜຶ່ງ​ຂອງ​ການເຄື່ອນໄຫວ​ຮັກສາ​ຄວາມ​ສະຫງົບ.

    ວັນ​ສາທາລະນະ​ລັດ​ຂອງ​ອິນ​ເດຍ ແມ່ນ​ເພື່ອ​ສັນລະເສີນ​ສະພາ​ແຫ່ງ​ຊາດ​ອິນ​ເດຍ ທີ່​ໄດ້​ຮັບຮອງ​ລັດ​ຖະ​ທຳ​ມະນູນ​ພິເສດ ຊຶ່ງ​ໃນ​ວັນ​ທີ 26 ມັງກອນ ປີ 1950 ລັດ​ຖະ​ທຳ​ມະນູນ​ໃໝ່ ໄດ້​ຮັບ​ການ​ປະຕິບັດ ແທນ​ທີ່​ໃຫ້​ແກ່​ກົດໝາຍ​ຂອງ​ລັດຖະບານ​ອິນ​ເດຍ ສະບັບ​ປີ 1935. ນັບ​ແຕ່​ນັ້ນ​ເປັນຕົ້ນ​ມາ ວັນ​ດັ່ງກ່າວ​ໄດ້​ຮັບ​ການ​ສະເຫຼີມສະຫຼອງ​ໃນ​ແຕ່​ລະ​ປີ ຄື​ກັບ​ວ່າ​ເປັນ​ເຫດການ​ລະດັບ​ຊາດ.

ຂ່າວທີ່ກ່ຽວຂ້ອງ